1 KUOROO 4 - WƖA TENIŊ

Solomoŋ jaŋ nɩhɩasɩŋ arɩ ʋ tɩntɩnnɩ-hɩasɩŋ

¹ Solomoŋ fa sɩ ŋaa kuoro a bibeŋ Iziral tinteeŋ kala,

² ʋ tɩntɩnnɩ-hɩasɩŋ nɛ fa ŋ-la: Zadɔk nanʋala Azarɩa nɛ fa ŋaa Wɩɩsʋllɩ sɩpaalaara,

³ Ɛlɩhɔrɛf arɩ Ahija, sɩ ŋaa Sɩsa biiriŋ nɛ fa ŋaa nɩalɩŋ sɩɩ ŋmʋnsɛ ba tenniŋ, Ahilud nanʋala Jehosafat ma nɛ faa bil ba tenniŋ,

⁴ Jehoyada nanʋala Benaaya ma nɛ fa ŋaa laalɩyuoroo nɩhɩaŋ, Zadɔk arɩ Abɩata ma ŋaa Wɩɩsʋllɩ sɩpaalaaraa.

⁵ Netaŋ nanʋala Azarɩa ma nɛ fa ŋaa tɩntɩnnɩ-hɩasɩ-la kʋhɩaŋ. Netaŋ nanʋala dɔŋɔ ba sɩɩ yɩrɛ Zabud ma fa ŋaa Wɩɩsʋllɩ sɩpaalaarʋ nɛ, aŋ pɛ bʋl wɩaa a chɩchagɩlɛ kuoro.

⁶ Ahɩsa ma nɛ faa beŋ kuoro dɩa, ka Abɩda nanʋala Adoniram ma bibeŋ nɩalɩŋ ba sɩ fʋga ba tɩtɩŋ.

⁷ Solomoŋ fa kɛŋ nɩaa fii arɩ balɩa nɛ ba bibeŋ Iziral tinteeŋ kala ba sɩ kaa kpaa. Ba nɛ yie kɛŋ kʋdiilee kʋʋ pɩ kuoro arɩ ʋ dɩa nɩaa. Ba kʋŋkala yie tɩa kʋdiile-la chɛnɛ nɛ jɩna-kala tʋɔŋ.

⁸ Nɩalɩŋ yɩraa nɛ ŋ-la: Bɛŋ-Huu, ʋ nɛ faa beŋ Efirem tintee-la peelee sɩ yʋga.

⁹ Bɛŋ-Dɛkɛɛ, ʋ ma nɛ faa beŋ tasɩŋ deemba: Makas, Saalɩbɩm, Bɛf Sɛmɛs arɩ Ɛlɔŋ Bɛfɩhanaŋ.

¹⁰ Bɛŋ-Hɛsɛ, ʋ ma nɛ faa beŋ Arubof tabalaa arɩ Soko, arɩ Hefa tinteeŋ kala.

¹¹ Bɛŋ-Abɩnadab, ʋ ma nɛ faa beŋ Nafɔf Doo. Ʋ nɛ fa jaa Solomoŋ tolo Tafaf.

¹² Ahilud nanʋala Baana ma nɛ fa dɔŋɔ. Ʋ faa beŋ Taanak arɩ Mɛgɩdɔ tabalaa nɛ. Ʋ nɛ haa beŋ Bɛf Saŋ kala a kpagɛ taŋ-la ba sɩɩ yɩrɛ Zarɛtaŋ, Jɛzɩrɛl wɩɩpɔsʋŋ nadiiŋ dɩɩrɩŋ a chɩŋ Bɛf Saŋ lɛ a kaa mʋ Abɛl Mɛhɔla a cholo mʋ Jɔkɩmɩam.

¹³ Bɛŋ-Geba ma nɛ dɔŋɔ. Ʋ nɛ faa beŋ tabal-la ba sɩɩ yɩrɛ Ramɔf a hɛ Gɩlɩad tinteeŋ lɛ, arɩ tabiisi-la sɩ ŋaa Jaa nyɩŋ-nɩaa kɩaa, Manasɛ doho nɩɩ-la. Ʋ nɛ fa haa beŋ Agɔb ma sɩ hɛ Basaŋ tinteeŋ lɛ arɩ ʋ tabala-la mahɩŋ batori ba sɩ saa kɛrɩsɩŋ golli a kɛŋ kɔlɩɩŋ ŋaa ba borusuŋ daa-doloo.

¹⁴ Ido nanʋala Ahɩnadab ma nɛ dɔŋɔ. Ʋ nɛ faa beŋ Mahanem tinteeŋ kala.

¹⁵ Ahɩmaas ma nɛ dɔŋɔ. Ʋ nɛ fa jaa Solomoŋ tolo ba sɩɩ yɩrɛ Basɛmaf. Ʋ nɛ faa beŋ Nafɩtalɩ tinteeŋ kala.

¹⁶ Husai nanʋala Baana ma nɛ dɔŋɔ. Ʋ nɛ faa beŋ Asa tinteeŋ arɩ taŋ-la ba sɩɩ yɩrɛ Alɔf.

¹⁷ Parʋa nanʋala Jehosafat ma nɛ dɔŋɔ. Ʋ nɛ faa beŋ Ɩsaka tinteeŋ.

¹⁸ Ɛla nanʋala Sɩmɛɩ ma nɛ dɔŋɔ. Ʋ nɛ faa beŋ Bɛnjamɩŋ tinteeŋ.

¹⁹ Uri nanʋala Geba ma nɛ dɔŋɔ. Ʋ ma nɛ faa beŋ Gɩlɩad, lee-la Amɔrɩ tɩŋŋaa kuoro Sɩhɔŋ arɩ Basaŋ kuoro Ɔgɩ fa sɩ hɔnɔ. Nɩhɩaŋ dɔŋ ma nɛ fa hɛ nɩmɛ a bibeŋ Juda tinteeŋ kala.

Kɩalɩŋ ba sɩ yie kaa kʋ pɩ Solomoŋ tapʋlɩɩ kala

²⁰ Juda arɩ Iziral nɩaa fa yʋga nɛ woruŋ a nagɛ hagɩlɩ-bumbugulo sɩ pɩŋ fuoŋ niiŋ. Ba kala fa dii yiyi nɛ a nyʋnyʋa a kɛŋ tʋɔtɔrʋŋ.

²¹ Solomoŋ nɛ faa beŋ tintee-la kala a chɩŋ Yufireti fuo-la lɛ a kaa mʋ yi Fɩlɩsɩtɩa tɩŋŋaa tinteeŋ a kɛŋ ŋɩɩ mʋ yi Ijipiti tinteeŋ bʋa. Solomoŋ mɩɩsɩŋ kala lɛ, nɩalɩŋ sɩ hɛ tinteye-la kala lɛ fa tiŋ ba lampoo a pʋpʋ nɛ.

²² Tapʋlɩɩ na-kala ba sɩ yie kɛŋ kɩalɩŋ kʋ pɩ Solomoŋ nɛ ŋaa munuŋ sɩ bɩɩ nʋgʋgʋ bɔtɔba mara arɩ fii, kʋdiilee dɔnsʋŋ ma bɔtɔba mahɩŋ batori,

²³ nɛ-belliŋ fii ba sɩ tɔ hɛ dɩa lɛ a dɩɛsɛ arɩ nɛsɩŋ mara ma sɩɩ dii gɩrɩŋ lɛ, piesee arɩ bʋʋnaa zɔlɔ, a pɛ aamɩŋ, tahɩŋ, bʋrʋŋ arɩ jiŋŋee sɩ waa yi lɛ.

²⁴ Solomoŋ nɛ faa beŋ kuorusu-la kala sɩ hɛ Yufireti fuo-la wɩɩjʋʋlʋŋ dɩɩrɩŋ, a chɩŋ Tɩpɩsa lɛ a kaa mʋ Gaza. Nii-magɛ dɔŋɔ fa hɛ ʋ dɩ tinteye-la kala sɩ hɔnɔ kpagɛ ba pɛgɛ nɛ.

²⁵ Bʋa-la lɛ Solomoŋ sɩ hɛ ʋ mɩɩsɩŋ lɛ, Juda arɩ Iziral tɩŋŋaa kala, a chɩŋ taŋ-la ba sɩɩ yɩrɛ Daŋ sɩ hɛ wɩɩpɔsʋŋ nagʋa a kaa mʋ taŋ-la ba sɩɩ yɩrɛ Bɛɛsɩba sɩ hɛ wɩɩpɔsʋŋ nadiiŋ, nʋʋkala fa hɔnɔ arɩ fɩɛlɩŋ nɛ, wɩɩkala bɩ ba jʋa. Nɩalɩŋ kala fa kɛŋ ba tɩtɩa tɩɩnɛnɛɛ bagɩsɩŋ arɩ ba tutogusuŋ nɛ.

²⁶ Solomoŋ fa kɛŋ laalɩŋ janɩ-la sɩɩ lɛrɛ torukoba dɩɩsɩŋ bʋɩ banɛsɛ nɛ. Ʋ janɩŋ dɔnsʋŋ ma ŋaa bʋɩ fii arɩ balɩa.

²⁷ Solomoŋ tɩntɩnnɩ-hɩasɩ-la fii arɩ balɩa sɩɩ beŋ Iziral tinteeŋ ba sɩ kaa kpaa, dɩ ba kʋŋkala chɛnɛ nɛ yie, ʋ yie kɛŋ kʋdiilee kʋ pɩ Solomoŋ arɩ nɩalɩŋ kala sɩɩ dii kɩaa ʋ dɩa lɛ nɛ, dɩ ba sɩ́ kʋŋkala chɛ ka.

²⁸ Ba ha yie pɛ kɛŋ mɩaa arɩ ja-yaŋ ma a kaa kɔ nɛ ba laa pɩ janɩ-la.

Solomoŋ wʋjɩmɩŋ

²⁹ Wɩa fa pɩ Solomoŋ wʋjɩmɩŋ nɛ woruŋ, ʋ wuo bee nɩna wʋtɩtɩɩ, a jɩjɩŋ ba bʋbʋɔŋ. Ʋ wʋjɩmɩŋ fa bɩ magɩa kɛnɛ.

³⁰ Solomoŋ wʋjɩmɩŋ nɛ fa kɩɩ wʋjɩnna-la kala sɩ hɛ wɩɩpɔsʋŋ dɩɩrɩŋ, arɩ Ijipiti tinteeŋ wʋjɩnnaa kala.

³¹ Ʋ nɛ fa jɩŋ wɩaa a kɩɩ nʋʋkala. Ʋ wʋjɩmɩŋ nɛ fa kɩɩ Ɛzɩra tɩŋŋaa Ɛtaŋ, arɩ Hemaŋ, Kalɩkɔl arɩ Daada sɩ ŋaa Mahol biiriŋ kala. Ʋ yɩrɩŋ fa teeli tinteye-la kala sɩ golli Iziral tinteeŋ nɛ.

³² Solomoŋ magɛ namagaba bʋɩ batori nɛ, a yɩɩ yɩɩlaa ma bʋɩ arɩ banɔŋ.

³³ Ʋ wuo jɩŋ tɩɩsɩŋ arɩ kɩalɩŋ kala sɩɩ nyʋ ma wɩaa nɛ: Tɩɩ-balaa, kʋbiisiŋ, a wuo jɩŋ pʋsʋŋ arɩ bagɩlaa wɩaa, diibiisiŋ, kɩalɩŋ sɩɩ vaamɛ tinteeŋ arɩ chenfilee kala.

³⁴ Dʋnɩa kuoroo kala nɛ nɩɩ Solomoŋ wʋjɩmɩŋ wɩaa, a tɩŋ nɩaa ba kʋ jegilee nɩɩ ʋ wʋjɩmɩɩ-la.