1 KUOROO 22 - WƖA TENIŊ

Mɩkaaya bʋl wʋbɔŋŋɔɔ a pɩ Ahab

¹ Ʋ fa yi jɩsɩŋ batori laalɩŋ sɩ tuo Siiria tɩŋŋaa arɩ Iziral tɩŋŋaa pɛgɛ.

² Jɩ-tori lɛ nɛ Juda kuoro ba sɩɩ yɩrɛ Jehosafat sii mʋ dɩ ʋ na Iziral kuoro.

³ Iziral kuoro fa pɩɛsɛ ʋ tɩntɩnnɩ-hɩasɩŋ, “Ma jɩma la nɛ tɩɩ taŋ-la ba sɩɩ yɩrɛ Ramɔf Gɩlɩad, ama bɛɛ nɛ tɩɩ la bɩ wɩɩkala ŋaa dɩ la laaʋ Siiria kuoro teeŋ?”

⁴ Ŋɩɩ nɛ ʋ pɩɛsɛ Jehosafat, “Ŋ jaŋ pɛ mɩ lɛ dɩ la mʋ yuo Ramɔf Gɩlɩad?” Jehosafat bʋla pɩ Iziral kuoro, “Dɩ ŋ nɛ kɛŋ ŋ tɩtɩa hɛ dɔŋɔ, mɩ dɩ mɩ nɩaa arɩ mɩ janɩŋ ma kɛŋ la tɩtɩa hɛ dɔŋɔ nɛ.

⁵ Ama leŋ dɩ la laa sɩpaaŋ pɩɛsɛ La TƖƖNA na.”

⁶ Ŋɩɩ nɛ Ahab yɩrɛ wʋnyɩɛrɩ Wɩa wʋlaabʋllaa zɔɔ-banɛsɛ a pɩɛsɛba, “Mɩ mʋ yuo Ramɔf Gɩlɩad koo mɩ sɩ́ mʋ?” Ba bʋl, “Mʋ yuou, La TƖƖNA jaŋ joŋu hɛ ŋ nɩsɩŋ lɛ.”

⁷ Jehosafat bɩra pɩɛsɛ, “La TƖƖNA wʋlaabʋllʋ tuo daha dɩ la to ʋ lɛ a pɩɛsɛ La TƖƖNA naa?”

⁸ Iziral kuoro Ahab bʋla pɩ Jehosafat, “Nʋʋ dɔŋ ha hɛ nɩmɛ la sɩ jaŋ wuo to ʋ lɛ a pɩɛsɛ La TƖƖNA na. Ʋ yɩrɩŋ nɛ Mɩkaaya, a ŋaa Imila nanʋala. Ama mɩ bɛrʋ nɛ, bɛɛ wɩaa ʋ ha bɩ wʋzɔŋ kala bʋla pɩmɛ Wɩa doluŋ lɛ, see wʋbɔŋ.” Ŋɩɩ nɛ Jehosafat bʋl, “Kuoro, sɩ́ ŋɩɩ bʋl.”

⁹ Ŋɩɩ nɛ Ahab yɩrɛ ʋ tɩntɩnnɩ-hɩasɩŋ dɔŋɔ a bʋl, “Mʋ kɛŋ Imila nanʋala Mɩkaaya kɔ daha lɛɛlɛ.”

¹⁰ Ka Iziral kuoro arɩ Juda kuoro Jehosafat kala laalɛ ba kuori gɛnnɩŋ a hɔŋ ba kuoru kpasɩnɩŋ lɛ taha-la sɩ kpagɛ Samarɩa taŋ-la boi-baalɩŋ niiŋ. Wʋnyɩɛrɩ Wɩa wʋlaabʋlla-la chɩŋ ba sɩpaaŋ a bʋbʋl wɩalɩŋ sɩ jaŋ ŋaa.

¹¹ Wʋnyɩɛrɩ Wɩa wʋlaabʋlla-la dɔŋɔ yɩrɩŋ nɛ fa Zedikaaya, a ŋaa Kɛnaana nanʋala. Ʋ fa kɛŋ hɔɔŋ libi banyilliŋ nɛ, ʋ kaa heele bʋl, “Wɩɩ-la La TƖƖNA sɩ bʋla nɛ ŋ-la: ‘Kɩaa deemba nɛ ŋ jaŋ kaa tɩɩgɛ Siiria tɩŋŋaa kala kpʋ.’ ”

¹² Wʋnyɩɛrɩ Wɩa wʋlaabʋlla-la kʋkaanaa ma kala bʋl ŋɩɩ tɩtɩa. Ba sɩ, “Mʋ yuo Ramɔf Gɩlɩad, ŋ jaŋ yuo diiu, bɛɛ wɩaa La TƖƖNA jaŋ joŋu hɛ ŋ nɩsɩŋ lɛ.”

¹³ Nɩɩ-la ba sɩ tɩma dɩ ʋ yɩrɛ Mɩkaaya bʋla pʋ, “Na, Wɩa wʋlaabʋlla-la bʋl wʋbala nɛ. Ba sɩ, ‘Kuoro jaŋ yuo dii.’ Dɩ ŋ nɛ mʋa, ŋ ma chɩŋ ba kʋa lɛ a bʋl ŋɩɩ tɩtɩa.”

¹⁴ Ŋɩɩ nɛ Mɩkaaya bʋl, “La TƖƖNA sɩ weye wɩaa, wɩɩ-la La TƖƖNA sɩ bʋla, ʋ nɛ mɩ jaŋ bʋl.”

¹⁵ Mɩkaaya sɩ kɔ, kuoro Ahab pɩɛsʋ, “La mʋ yuo taŋ-la ba sɩɩ yɩrɛ Ramɔf Gɩlɩad koo la sɩ́ mʋ?” Ʋ bʋl, “Má mʋ yuou. La TƖƖNA jaŋ joŋu hɛ ma nɩsɩŋ lɛ.”

¹⁶ Kuoro Ahab bɩra pɩɛsʋ, “Naansɩɩŋ bʋŋmɛɛ nɛ maga dɩ mɩ leŋ dɩ ŋ ŋmɩɛsɛ aŋ bʋl wʋtɩtɩɩ pɩmɛ La TƖƖNA yɩrɩŋ lɛ?”

¹⁷ Ŋɩɩ nɛ Mɩkaaya bʋl, “Mɩ na Iziral tɩŋŋaa kala dɩ ba pɩsa su dundolluŋ nyuŋ, a nagɛ piesee sɩ bɩ pie-daara kɛnɛ, ka La TƖƖNA bʋl, ‘Nɩaa deemba bɩ sɩpaalaarʋ kɛnɛ. Leŋ dɩ ba mɩɩra mʋ ba dɩɩsɩŋ arɩ yarɩfɩɛlaa.’ ”

¹⁸ Kuoro Ahab bʋla pɩ Jehosafat, “Mɩ bɩ bʋla pɩŋ arɩ ʋ ha bɩ wʋzɔŋ kala sɩ jaŋ ŋaa bʋla pɩmɛ see wʋbɔŋ?”

¹⁹ Mɩkaaya bɩra bʋl, “Má jegile nɩɩ wɩɩ-la La TƖƖNA sɩ bʋla: Mɩ na La TƖƖNA dɩ ʋ hɔŋ ʋ kuoru kpasa nyuŋ, ka ʋ tɩndaaraa kala chɩna gollu, ʋ nadiiŋ arɩ ʋ nagʋa.

²⁰ Ka La TƖƖNA pɩɛsɛ, ‘Kʋbɛɛ nɛ jaŋ mʋ nyɩsɛ Ahab hɛ dɩ ʋ mʋ yuo Ramɔf Gɩlɩad tɩŋŋaa dɩ ba kpʋʋ nɩmɛ?’ Dɔnsʋŋ bʋl ŋ-la, dɔnsʋŋ ma bʋl wɩɩ dɔŋ.

²¹ Ʋ dɩdɛrɩŋ, dɩma kʋbala kʋ lɩɩ chɩŋ La TƖƖNA sɩpaaŋ a bʋl, ‘Mɩ jaŋ mʋ nyɩsʋ.’

²² La TƖƖNA pɩɛsʋ, ‘Ɛɛ nɛ ŋ jaŋ to?’ Dɩma-la bʋl, ‘Mɩ jaŋ joŋ wʋnyɩɛrɩŋ a hɛ ʋ nɩalɩŋ kala sɩ bʋl wɩaa pʋpʋ niiŋ lɛ.’ La TƖƖNA bɩra bʋl, ‘Mʋ, ŋ jaŋ wuo nyɩsʋ.’ ”

²³ Mɩkaaya bʋl, “La TƖƖNA joŋ wʋnyɩɛrɩŋ dɩma hɛ nɩaa deemba kala sɩ bʋl wɩaa pɩpɩŋ niiŋ lɛ nɛ. La TƖƖNA tɩtɩa bʋla arɩ wʋlɔrʋnʋŋ jaŋ jʋʋŋ.”

²⁴ Ŋɩɩ nɛ Zedikaaya sɩ ŋaa Kɛnaana nanʋala mʋ fallɛ Mɩkaaya, aŋ pɩɛsʋ, “Bʋa bɛɛ lɛ nɛ La TƖƖNA dɩma-la lɩɩ mɩ lɛ, a kɔ ŋ teeŋ a bʋl wɩaa pɩŋ?”

²⁵ Mɩkaaya bʋl, “Tapʋlɩɩ-la ŋ jaŋ kɛŋ ŋ tɩtɩa jʋʋ faa dɩa sɩpaaŋ, ŋɩɩ nɛ ŋ jaŋ jɩŋ arɩ mɩ bʋl wʋtɩtɩɩ.”

²⁶ Ŋɩɩ nɛ kuoro Ahab bʋl, “Má kɛŋ Mɩkaaya mɩɩra mʋ taŋ nɩhɩaŋ Amɔŋ arɩ mɩ nanʋala Jʋas teeŋ.

²⁷ Má bʋla pɩba arɩ ba laaʋ tɔ bɩnɩŋ dɩa a pʋpʋ boroboro mʋa mʋa arɩ lɩɩŋ dʋndʋŋ a mʋ yi bʋa-la lɛ mɩ sɩ jaŋ mɩɩra kɔ arɩ yarɩfɩɛlaa.”

²⁸ Mɩkaaya bʋl, “Dɩ ŋ nɛ mɩɩra kɔ arɩ yarɩfɩɛlaa, ŋɩɩ-na, La TƖƖNA dee bɩ mɩ lɛ to a bʋl wɩaa.” Ŋɩɩ nɛ aŋ bɩra bʋl, “Ma nɩaa deemba kala, má magɩlɛ wɩɩ-la mɩ sɩ bʋla bil.”

Ba kpʋ kuoro Ahab Ramɔf Gɩlɩad lɛ

²⁹ Ŋɩɩ nɛ Iziral kuoro arɩ Juda kuoro Jehosafat sii kɛŋ ba laalɩyuoroo mʋ dɩ ba yuo Ramɔf Gɩlɩad.

³⁰ Iziral kuoro bʋla pɩ Jehosafat, “Dɩ laalɩŋ nɛ suomo, mɩ jaŋ kɛŋ mɩ tɩtɩa bɩrɩmɛ a jʋʋ laalɩŋ tʋɔŋ, ama ŋ-na laalɛ ŋ kuoru gɛnnɩŋ.” Ŋɩɩ nɛ Iziral kuoro kɛŋ ʋ tɩtɩa bɩrɩmɛ a jʋʋ laal-la tʋɔŋ.

³¹ Siiria kuoro fa bʋla pɩ ʋ laalɩyuori-hɩasɩ-la mara arɩ fii arɩ balɩa-la sɩɩ beŋ ʋ laalɩŋ janɩŋ torukoba, “Má sɩ́ nʋʋkala yuo, see Iziral kuoro Ahab dʋndʋŋa.”

³² Laalɩyuori-hɩasɩ-la sɩ na Jehosafat, ba bɩɩnɛ a bʋl, “Iziral kuoro Ahab nɛ ŋ-la.” Ŋɩɩ nɛ ba bɩrɩmɛ dɩ ba yuou. Ama Jehosafat ŋmoo niiŋ.

³³ Laalɩyuori-hɩasɩ-la sɩ na dɩ Iziral kuoro dee, ŋɩɩ nɛ ba leŋu.

³⁴ Laal-la tʋɔŋ, laalɩyuoro-la dɔŋɔ yuo to-hɛmɩŋ bine, ʋ to Ahab laalɩyuori gɛrɩŋ pɛgɛ a jʋʋ kɛnʋ. Ʋ bʋla pɩ nɩɩ-la sɩ kɛŋ ʋ laalɩŋ janɩŋ toruko vɩvɛŋ, “Mɩɩrɛ harɩŋ a kɛmmɛ lɩɩ laal-la tʋɔŋ, ba bolimimi nɛ.”

³⁵ Tapʋlɩɩ-la kala laalɩŋ hoso nɛ woruŋ, ka kuoro hɔnɔ tɩɛnɛ a yelli ʋ toruko-la a chaasɛ Siiria tɩmma-la. Ʋ chalɩŋ lɩɩ a pɛllɛ su toruko-la tʋɔŋ kala. Dɩdaanɩŋ mʋʋ yi dɩ ʋ sʋba.

³⁶ Wɩɩ-muluŋ sɩɩŋ sɩ tuu jʋjʋʋ, Iziral laalɩyuoro dɔŋɔ heele bʋl, “Nʋʋkala mɩɩra mʋ ʋ jaŋ.”

³⁷ Ŋɩɩ nɛ ba joŋ kuoro Ahab kʋsʋʋŋ a kaa mʋ Samarɩa, a hugu nɩmɛ.

³⁸ Ka ba kɛŋ toruko-la tuu chɛsɛ Samarɩa fuoŋ lɛ (lee-la halɩɩlɩŋ sɩɩ fo lɩɩŋ). Vasɩŋ lenni ʋ chalɩŋ, arɩ La TƖƖNA fa sɩ bʋl ŋɩɩ.

³⁹ Wɩalɩŋ dɔnsʋŋ Ahab sɩ dii kuoruŋ a ŋaa, a pɛ ʋ sɩ kɛŋ batu-nyɩlaa kpɩɛrɛ ʋ kuoru dɩa arɩ tasɩ-la kala ʋ sɩ saa kɛrɩsɩŋ golli nɛ, ba ŋmʋnsa hɛ Iziral kuoroo wʋŋaalaa teniŋ tʋɔŋ.

⁴⁰ Ahab sɩ sʋba, ʋ nanʋala Ahazɩa nɛ dii kuoruŋ ʋ nyuŋ.

Jehosafat dii Juda kuoruŋ

⁴¹ Ahab sɩ dii kuoruŋ Iziral lɛ, ʋ jɩ-nɛsɛ lɛ nɛ Asa nanʋala Jehosafat ma dii kuoruŋ Juda tinteeŋ lɛ.

⁴² Jehosafat fa ŋaa jɩsɩŋ mara arɩ fii arɩ banɔŋ nɛ aŋ dii kuoruŋ. Ʋ hɔŋ Jerusalɛm lɛ a bemba jɩsɩŋ mara arɩ banɔŋ. Ʋ naaŋ yɩrɩŋ nɛ fa Azuba, a ŋaa Silihi tolo.

⁴³ Wɩalɩŋ kala ʋ nyɩmma Asa sɩ ŋaa, ba tɩtɩa nɛ ʋ ma ŋaa, ʋ bɩ kʋŋ kere ta. Ʋ fa ŋaa wɩalɩŋ sɩɩ tɔrɛ La TƖƖNA tʋɔŋ nɛ. Ama ʋ fa bɩ vesiŋ dɩ-kpaaraa cheye, ka nɩaa fa ha ŋɩŋaa Wɩɩsʋlʋŋ a nyɩnyɩgɛ kʋsʋɔrʋsʋŋ nɩmɛ.

⁴⁴ Jehosafat arɩ Iziral kuoro pɛgɛ wɩaa faa jʋʋ nɛ woruŋ.

⁴⁵ Wɩalɩŋ dɔnsʋŋ Jehosafat sɩ dii kuoruŋ a ŋaa, arɩ ŋɩɩ ʋ sɩ yuo laalɩŋ, ba kala nɛ ba ŋmʋnsa hɛ Juda kuoroo wʋŋaalaa teniŋ tʋɔŋ.

⁴⁶ Ʋ nyɩmma sɩ sʋba, aŋ ka nɩalɩŋ dɔnsʋŋ ha hɛ nɩmɛ a ŋɩŋaa wʋlɩɩlɩŋ vesi-la leree, ba kala nɛ ʋ gire ta tintee-la lɛ.

⁴⁷ Bʋa-la lɛ Ɛdɔm tinteeŋ fa bɩ kuoro kɛnɛ, ka ba leŋ kuoro tɩntɩnnɩ-hɩaŋ dɔŋɔ bibeŋ lee-la.

⁴⁸ Dɩ Jehosafat fa leŋe lɩɩŋ daborusuŋ mʋmʋ Ofi dɩ ba chʋŋ sɛlɩmɛ, a mʋ chei lee-la ba sɩɩ yɩrɛ Ɛzɩɔŋ-Geba lɛ a bɩra bɩ vɛnɛ.

⁴⁹ Bʋa-la lɛ kuoro Ahab nanʋala Ahazɩa bʋla pɩ Jehosafat, “Leŋ dɩ mɩ nɩaa ma pɛ ŋ lɩɩŋ daborusu-la tɩntɩnnaa lɛ dɩ ba mʋ.” Ama Jehosafat bɩ sɛyɛ.

⁵⁰ Ŋɩɩ nɛ Jehosafat sʋʋ, ba joŋu hugi Devit tabal-la lɛ ʋ naabalɩmaba tʋɔŋ. Ka ʋ nanʋala Jehoram dii kuoruŋ ʋ nyuŋ lɛ.

Ahazɩa dii kuoruŋ Iziral tinteeŋ lɛ

⁵¹ Jehosafat sɩ dii kuoruŋ Juda lɛ, ʋ jɩsɩŋ fii arɩ balɩpɛ lɛ nɛ Ahab nanʋala Ahazɩa dii Iziral kuoruŋ a hɔŋ Samarɩa lɛ, a beŋ Iziral jɩsɩŋ balɩa.

⁵² Ahazɩa fa ŋaa wʋbɔŋŋɔɔ nɛ La TƖƖNA teeŋ. Ʋ ŋaa wʋbɔmɔ-la tɩtɩa ʋ nyɩmma arɩ ʋ naaŋ arɩ Nɛbat nanʋala Jerobuam sɩ ŋaa nɛ a leŋ Iziral tɩŋŋaa ŋaa wʋbɔŋŋɔɔ.

⁵³ Ʋ faa to vene-la ba sɩɩ yɩrɛ Baal nɛ, a leŋ La TƖƖNA Iziral Wɩa baanɩŋ chaasa sii arɩ ʋ nyɩmma fa sɩ ŋaa ŋɩɩ.