1 KUOROO 20 - WƖA TENIŊ

Kuoro Bɛŋ-Hadad yuo taŋ-la ba sɩɩ yɩrɛ Samarɩa

¹ Ŋɩɩ nɛ Siiria kuoro Bɛŋ-Hadad sii a kɛŋ ʋ laalɩyuoroo kala hɛ dɔŋɔ. Kuoroo mara arɩ fii arɩ balɩa ma kɛŋ ba janɩŋ arɩ ba laalɩŋ janɩŋ torukoba kʋ pɛ ʋ lɛ, ba mʋ golli Samarɩa chu a yuou.

² Ʋ tɩŋ tɩndaaraa ba mʋ Iziral kuoro Ahab teeŋ a bʋl,

³ “Joŋ ŋ hɔpʋla, sɛlɩmɛ arɩ ŋ hazɔŋŋɔɔ arɩ ba bii-duoruŋ kala a pɩmɛ.”

⁴ Iziral kuoro bʋl, “Má bʋla pɩ kuoro Bɛŋ-Hadad mɩ nɩhɩaŋ, arɩ mɩ dɩ mɩ kɩaa kala ŋaa ʋ kɩaa nɛ.”

⁵ Ʋ bɩra tɩŋ tɩndaara-la ba kɔ Ahab teeŋ a bʋl, “Mɩ tɩma ba bʋla pɩŋ dɩ ŋ joŋ ŋ hɔpʋla arɩ sɛlɩmɛ arɩ ŋ haalaa arɩ ŋ biiriŋ pɩmɛ,

⁶ ama chie bʋa deeŋ lɛ, mɩ jaŋ leŋ dɩ mɩ tɩntɩnnɩ-hɩasɩŋ kʋ gbilli ŋ kuoru dɩa arɩ ŋ tɩntɩnnɩ-hɩasɩŋ dɩɩsɩŋ kala. Ba jaŋ paa ma kʋzɔŋŋɔɔ kala a kaa viiri.”

⁷ Ŋɩɩ nɛ Iziral kuoro yɩrɛ ʋ tinteeŋ nɩhɩasɩŋ kala a bʋla pɩba, “Ma na baala deeŋ sɩɩ chɛ yuosuŋ ŋɩɩ. Ʋ laa sɩpaaŋ tɩŋ ba kʋ bʋla pɩmɛ dɩ mɩ joŋ mɩ hɔpʋla arɩ sɛlɩmɛ arɩ mɩ haalaa arɩ mɩ biiriŋ kala pʋ nɛ, mɩ bɩ vɩa.”

⁸ Nɩhɩasɩ-la arɩ nɩalɩŋ kala bʋl, “Sɩ́ ʋ teeŋ jegilu, sɩ́ wɩɩ-la ʋ sɩɩ chɛ ŋaa.”

⁹ Ŋɩɩ nɛ ʋ bʋla pɩ Bɛŋ-Hadad tɩndaara-la, “Má mʋ bʋla pɩ kuoro mɩ nɩhɩaŋ, arɩ mɩ-na ʋ tɩntɩnna sɛɩ bumbuŋ wɩɩ-la nɛ, ama wʋlɩa-la-na, mɩ bɩ sɛyɛ.” Ba kɛŋ wɩɩ-la ʋ sɩ bʋla mɩɩra mʋ bʋla pɩ Bɛŋ-Hadad.

¹⁰ Ŋɩɩ nɛ Bɛŋ-Hadad bɩra tɩŋ ba mʋ bʋla pɩ Ahab, “Mɩ jaŋ chei Samarɩa kala. Ʋ mʋa-la sɩ jaŋ ka bɩ jaŋ su mɩ laalɩyuoroo nɩsɩŋ. Dɩ mɩ nɛ bɩ ŋɩɩ ŋaa, a leŋ dɩ mɩ vesiŋ faasa dɔgɩsɛmɛ.”

¹¹ Ŋɩɩ nɛ Iziral kuoro bʋl, “Má bʋla pɩ kuoro Bɛŋ-hadad, arɩ laalɩyuoro yie bigisi ʋ tɩtɩa lɛ bʋa-la lɛ ʋ sɩ yuo dii nɛ, ama bʋa-la lɛ ʋ ha sɩ bɩ yuo dii lɛ dee.”

¹² Bɛŋ-Hadad ka nɩɩ tɩndaarɩŋ deeŋ, dɩ ʋ dɩ kuorusu-la sɩ kʋ pɛ ʋ lɛ hɛ ba lɛŋŋɛɛ tʋɔŋ nɛ a nyʋnyʋa kɩaa. Ŋɩɩ nɛ ʋ bʋla pɩ ʋ laalɩyuoroo arɩ ba kɛŋ ba tɩtɩa hɛ dɔŋɔ a mʋ yuo taŋ-la. Ŋɩɩ nɛ ba kɛŋ ba tɩtɩa hɛ dɔŋɔ dɩ ba mʋ yuo taŋ-la.

Kuoro Ahab yuo dii kuoro Bɛŋ-Hadad

¹³ Bʋa-la tɩtɩa lɛ dɩ Wɩa wʋlaabʋllʋ kɔ Iziral kuoro Ahab teeŋ a bʋla pʋ, “Wɩɩ-la La TƖƖNA sɩ bʋla nɛ ŋ-la: ‘Ŋ na laalɩyuori daŋ deeŋ nɛɛ? Mɩ jaŋ jomba a hɛ ŋ nɩsɩŋ lɛ jɩnɩŋ, dɩ ŋ jɩŋ arɩ mɩ nɛ ŋaa ŋ Tɩɩna.’ ”

¹⁴ Ahab pɩɛsɛ, “Kʋbɛɛ nɛ jaŋ mʋ yuo laalɩŋ deeŋ?” Wɩa wʋlaabʋllʋ-la bʋl, “Laalɩyuori bapʋɔsɛ biisi-la sɩɩ tɩgɛ Iziral tinteeŋ laalɩyuori-hɩasɩŋ lɛ nɛ jaŋ ŋaa wɩɩ-la.” Ʋ bɩra pɩɛsɛ, “Kʋbɛɛ nɛ jaŋ laa ba sɩpaaŋ?” Wɩa wʋlaabʋllʋ-la bɩra bʋl, “Ŋ nɛ.”

¹⁵ Ahab yɩrɛ laalɩyuori bapʋɔsɛ biisi-la sɩɩ tɩgɛ Iziral tinteeŋ laalɩyuori-hɩasɩŋ lɛ hɛ dɔŋɔ, ba ŋaa zɔɔ balɩa arɩ mara arɩ fii arɩ balɩa. Ŋɩɩ nɛ ʋ yɩrɛ Iziral laalɩyuori kaanaa ma bʋɩ balɩpɛ kala hɛ dɔŋɔ.

¹⁶ Ba lɩɩ Samarɩa lɛ wɩɩhɛyɛ a mʋ dɩ ba yuo laal-la. Bʋa-la lɛ dɩ Bɛŋ-Hadad arɩ kuorusu-la mara arɩ fii arɩ balɩa sɩ kʋ pɛ ʋ lɛ hɛ ba lɛŋŋɛɛ tʋɔŋ a bubugi.

¹⁷ Laalɩyuori bapʋɔsɛ biisi-la sɩɩ tɩgɛ Iziral tinteeŋ laalɩyuori-hɩasɩŋ lɛ nɛ laa sɩpaaŋ mʋ. Bʋa deeŋ lɛ dɩ Bɛŋ-Hadad ma hɛ nɩaa dɩ ba lɩɩ bee na ba dʋndɔŋŋɔɔ lɛ. Ba beŋ aŋ kʋ bʋla pʋ, “Laalɩyuoroo nɛ lɩɩ Samarɩa a kʋkɔ.”

¹⁸ Ŋɩɩ nɛ ʋ bʋl, “Dɩ ba fɩɛla nɛ ba kʋkɔ koo dɩ baa kɔ dɩ ba yuo laalɩŋ nɛ, má kɛsɛba.”

¹⁹ Laalɩyuori bapʋɔsɛ biisi-la sɩɩ tɩgɛ Iziral tinteeŋ laalɩyuori-hɩasɩŋ nɛ laa sɩpaaŋ, ka Iziral laalɩyuoroo tuto ba harɩŋ.

²⁰ Ba kʋŋkala mʋ yuo a kpʋ nɩɩ-la ʋ sɩɩ yuo. Ŋɩɩ nɛ Siiria tɩŋŋaa laalɩyuoroo fá, Iziral tɩŋŋaa kire to ba harɩŋ. Ama Siiria kuoro Bɛŋ-Hadad arɩ ʋ ja-jɩllaa dɔnsʋŋ-na paa ba janɩŋ a fá viiri.

²¹ Iziral kuoro arɩ ʋ laalɩyuoroo kire kɛsɛ Siiria tɩmma-la arɩ ba janɩŋ arɩ laalɩŋ janɩŋ torukoba kala a chaasa kpʋba.

²² Ŋɩɩ harɩŋ, Wɩa wʋlaabʋllʋ-la kɔ Iziral kuoro Ahab teeŋ a bʋl, “Mʋ a kɛŋ ŋ laalɩyuoroo hɛ dɔŋɔ woruŋ, aŋ chɛ wombiiŋ ma sɩ jaŋ to, bɛɛ wɩaa harɩŋ jɩna tafaaŋ lɛ Siiria kuoro jaŋ bɩra mɩɩra kʋ yuoma.”

²³ Bʋa-la lɛ dɩ Siiria kuoro tɩntɩnnɩ-hɩasɩŋ bʋla pʋ, “Iziral tɩŋŋaa vesiŋ ŋaa peelee nyuŋ vesi nɛ. Ŋɩɩ nɛ tɩɩ ba wuola ŋɩɩ. Ama dɩ la nɛ yuoba tintee-taala lɛ, la jaŋ wuoba.

²⁴ Wɩɩ-la sɩ maga dɩ ŋ ŋaa nɛ ŋ-la: Kiri kuorusu-la kala ba kuoruŋ lɛ, aŋ mɩɩra joŋ laalɩyuori-hɩasɩŋ hɛ ba nyuŋ lɛ.

²⁵ Ʋ bɩra maga dɩ ŋ chɛ laalɩyuoroo arɩ janɩŋ arɩ laalɩŋ janɩŋ torukoba dɩ ba yʋga magɛ faafaa kɩalɩŋ. La jaŋ yuo Iziral tɩmma-la tintee-taala lɛ, bʋa deeŋ-na lɛ la jaŋ wuoba.” Bɛŋ-Hadad sɛɩ ba niiŋ a ŋaa ŋɩɩ ba sɩ daga.

²⁶ Ŋɩɩ nɛ jɩna bɩra kʋ yi tafaaŋ, Bɛŋ-Hadad yɩrɛ Siiria tɩŋŋaa kala ba jɩl taŋ-la ba sɩɩ yɩrɛ Afɛk, dɩ ba yuo Iziral tɩŋŋaa.

²⁷ Dɩ Iziral tɩŋŋaa ma hɛ dɔŋɔ a nyɩgɩlɛ dɩ ba mʋ cheŋ Siiria tɩmma-la. Iziral tɩŋŋaa ŋmoo bugoo balɩa a chaasɛba, a nagɛ bʋʋnaa baŋmɛnɛ sɩ pɩna, ka Siiria tɩmma-la su leriŋ kala.

²⁸ Ŋɩɩ nɛ Wɩa wʋlaabʋllʋ-la kɔ Iziral kuoro teeŋ a bʋl, “Wɩɩ-la La TƖƖNA sɩ bʋla nɛ ŋ-la: ‘A tɩŋ Siiria tɩŋŋaa sɩ bɩɩna arɩ mɩ-na ma TƖƖNA ŋaa peelee nyuŋ vene nɛ, aŋ bɩ tintee-taala-na vene ŋaa wɩaa, mɩ jaŋ joŋ ba laalɩyuori daŋ deeŋ kala a hɛ ma nɩsɩŋ lɛ, dɩ ma jɩŋ arɩ mɩ nɛ ŋaa ma TƖƖNA.’ ”

²⁹ Ba ŋmoo ba bugoo a hɔnɔ chaasa dɔŋɔ ŋɩɩ nɛ tapʋlaa balɩpɛ. Tapʋl-pɛɩ chɛɛŋ nɛ laalɩŋ suomi. Ŋɩɩ nɛ Iziral tɩŋŋaa kpʋ Siiria tɩŋŋaa laalɩyuoroo bʋɩ zɔlɔ tapʋlɩɩ-la.

³⁰ Ba kʋkaanaa fá mʋ taŋ-la ba sɩɩ yɩrɛ Afɛk. Nɩmɛ nɛ jeeŋ tele kpʋ ba ma nɩaa bʋɩ mara arɩ balɩpɛ. Bɛŋ-Hadad ma fá jʋʋ taŋ-la, a jʋʋ faa dɩa sɩpaaŋ.

³¹ Ŋɩɩ nɛ ʋ tɩntɩnnɩ-hɩasɩŋ bʋla pʋ, “La nɩa arɩ Iziral kuoroo ka fá nɩaa nenige nɛ. Leŋ dɩ la paa tʋɔ-chei gɛnnɩŋ vɔɔ la tɩnsɩŋ aŋ paa ŋmɛsɩŋ ma a vɔɔ la nyusuŋ a mʋ ʋ teeŋ. Ŋ bɩ pɔ ʋ jaŋ leŋ dɩ ŋ kɛŋ mɩɩsɩŋ.”

³² Ba paa tʋɔ-chei gɛnnɩŋ a vɔɔ ba tɩnsɩŋ aŋ paa ŋmɛsɩŋ ma vɔɔ ba nyusuŋ a mʋ Iziral kuoro Ahab teeŋ a bʋl, “Ŋ tɩntɩnna Bɛŋ-Hadad sɩ ʋʋ sʋlʋŋ dɩ ŋ leŋ dɩ ʋ kɛŋ mɩɩsɩŋ.” Iziral kuoro pɩɛsɛ, “Ʋ ha weye nɛɛ? Ʋ nagɛ mɩ naambii nɛ.”

³³ Bɛŋ-Hadad tɩntɩnnɩ-hɩasɩ-la joŋ wɩɩ-la arɩ ʋ ŋaa wʋzɔŋ nɛ. Ba guu cheme laa Ahab niiŋ lɛ a bʋl, “Wʋtɩtɩɩ nɛ, Bɛŋ-Hadad ŋaa ŋ naambii nɛ.” Kuoro bɩra bʋl, “Má mʋ kɛnʋ kaa kɔ.” Bɛŋ-Hadad sɩ kʋ lɩɩ, Ahab ŋaa ʋ jʋʋ ʋ laalɩŋ jaaba toruko.

³⁴ Ŋɩɩ nɛ Bɛŋ-Hadad bʋla pʋ, “Tasɩ-la kala mɩ nyɩmma sɩ yuo laa ŋ nyɩmma teeŋ, mɩ jaŋ mɩɩra joŋo pɩŋ. Ŋ jaŋ wuo bil ŋ tɩtɩa yɔbɔ Damasɩkʋs lɛ, arɩ mɩ nyɩmma sɩ ŋaa ŋɩɩ Samarɩa lɛ.” Ahab ma bʋl, “See dɩ la hɛ niiŋ pɩ dɔŋɔ, ka dɩ mɩ-na joŋuŋ ta.” Ŋɩɩ nɛ ʋ hɛ niiŋ pʋ, aŋ leŋ ʋ viiri.

Wɩa wʋlaabʋlla bʋl kuoro Ahab teeŋ

³⁵ Bʋa deeŋ lɛ dɩ La TƖƖNA leŋe ʋ wʋlaabʋllaa dɔŋɔ bʋla pɩ ʋ dɔŋɔ tɩɩna, “Ŋmoomi.” Ʋ dɔŋɔ-la vɩa.

³⁶ Ŋɩɩ nɛ Wɩa wʋlaabʋllʋ-la bɩra bʋl, “A tɩŋ ŋ sɩ vɩa La TƖƖNA niiŋ wɩaa, dɩ ŋ nɛ lemmi aŋ viviiri, naachigiŋ jaŋ kpʋŋ.” Baal-la sɩ leŋu aŋ viviiri, naachigiŋ naʋ a kpʋʋ.

³⁷ Wɩa wʋlaabʋllʋ-la bɩra na baala dɔŋɔ ma a bʋl, “Mɩɩ sʋlʋŋ, ŋmoomi.” Baal-la ŋmobu bolimi.

³⁸ Ŋɩɩ nɛ Wɩa wʋlaabʋllʋ-la joŋ nyu-bɛlɛ vɔɔ tɔ ʋ sɩaa dɩ nɩaa sɩ́ ʋ jɩŋ, a lɩɩ chɩŋ wombiiŋ lɛ aa gbɛrɛ kuoro.

³⁹ Kuoro sɩ kʋʋ bal, ʋ yɩrʋ a bʋl, “Mɩ-na ŋ tɩntɩnna hɛ laalɩŋ sɩ hoso tʋɔŋ nɛ, nʋʋ kɛŋ baal ʋ sɩ yuo kɛŋ laalɩŋ lɛ kaa kʋ pɩmɛ dɩ mɩ pɔ, aŋ bʋla pɩmɛ arɩ mɩ nɛ leŋe dɩ ʋ lɛl, mɩ jaŋ sʋʋ koo mɩ jaŋ tiŋ chɩmɩŋ warɩpʋla bʋɩ batori.

⁴⁰ Mɩ fɩɛsɛ sɩɩŋ a tɩtɩŋ tɩntɩŋŋaa, ka baal-la fá lɛl.” Iziral kuoro Ahab sɩ, “Ŋ dii ŋ tɩtɩa sarɩya nɛ, ŋɩɩ ŋ sɩ bʋla nɛ ba jaŋ ŋaaŋ.”

⁴¹ Ŋɩɩ nɛ Wɩa wʋlaabʋllʋ-la guu kɛŋ nyu-bɛlɛ-la sɩ tɔ ʋ sɩaa kaa suri, Iziral kuoro naʋ a jɩŋ arɩ ʋ ŋaa Wɩa wʋlaabʋllaa dɔŋɔ nɛ.

⁴² Wɩa wʋlaabʋllʋ-la bʋla pɩ kuoro, “La TƖƖNA sɩ, ‘Ŋ joŋ nʋʋ ʋ sɩ sɩ dɩ ŋ kpʋ ta nɛ ʋ viiri. Ŋɩɩ wɩaa, ŋ jaŋ mɩɩra laa ʋ nyuŋ a sʋʋ, dɩ ŋ nɩaa ma laa ʋ nɩaa nyuŋ a sʋʋ.’ ”

⁴³ Iziral kuoro Ahab tʋɔŋ chei. Ʋ na baanɩŋ a mɩɩra mʋ ʋ jaŋ Samarɩa.