1 KUOROO 2 - WƖA TENIŊWɩalɩŋ Devit sɩ bʋla pɩ Solomoŋ 1 Devit sʋʋŋ sɩ yie, ʋ bʋl wɩaa a pɩ ʋ nanʋala Solomoŋ. 2 Ʋ sɩ, “Mɩ sʋʋŋ yie nɛ, ŋɩɩ wɩaa nyɩrɛ bɔyɛ a kɛŋ tʋɔ-doluŋ. 3 To wɩalɩŋ kala ŋ TƖƖNA Wɩa sɩɩ chɛ: To ʋ wombiee, arɩ ʋ wʋdagaa kala. Tuto wɩalɩŋ kala ʋ sɩ joŋo dagɛ Mosis ʋ ŋmʋnsa bil dɩ nɩaa tuto, dɩ ŋɩɩ leŋ dɩ wɩɩkala ŋ sɩɩ ŋaa arɩ lee-kala ŋ sɩɩ mʋ, dɩ wɩaa vɛŋ woruŋ pɩŋ. 4 Dɩ ŋ nɛ to La TƖƖNA niiŋ, ʋ jaŋ leŋ dɩ nii-la ʋ sɩ hɛ pɩmɛ chɩŋ. Ʋ fa bʋla pɩmɛ nɛ arɩ ʋ jaŋ leŋ dɩ mɩ doho nɩaa nɛ didii kuoruŋ Iziral tinteeŋ lɛ, dɩ ba nɛ jaŋ kɛŋ wʋtɩtɩɩ a tou arɩ ba tʋɔŋ arɩ ba wɩɩ wɩɩkala. 5 Ŋ tɩtɩa jɩŋ wɩɩ-la Zeruya nanʋala Jʋab sɩ ŋaa mɩ lɛ nɛ, ʋ sɩ kpʋ Iziral tɩŋŋaa laalɩyuori-hɩasɩ-la balɩa, Nɛɛ nanʋala Abɩna arɩ Jɛta nanʋala Amasa. Wɩɩkala fa bɩ jʋa ka ʋ kpʋba a nagɛ laalɩŋ sɩ sie. Lɛɛlɛ wɩalɩŋ kala mɩɩra daŋ mɩ nyuŋ nɛ, mɩ nɩna hɛɛŋ ŋɩɩ bʋbʋɔŋ lɛ. 6 Ŋ sɩ bɩɩna dɩ ŋɩɩ maga, joŋo ŋaa ʋ lɛ, ama sɩ́ leŋe dɩ ʋ hɩɛsɛ a sʋʋ ʋ Wɩa sʋʋŋ arɩ yarɩfɩɛlaa. 7 Ama kɛŋ Gɩlɩad tɩŋŋaa baal-la ba sɩɩ yɩrɛ Bazɩlaɩ hambolibiisiŋ woruŋ, a leŋ dɩ ba didii kɩaa ŋ gbaŋa lɛ. Ba nɛ fa chɩŋ mɩ harɩŋ bʋa-la lɛ mɩ sɩ faa lɛl ŋ malɩma Abɩsalɔm nɩsɩŋ lɛ. 8 Pɔ ŋ sɩ́ Gɛra nanʋala Sɩmɛɩ, Bɛnjamɩŋ tɩɩna-la sɩ lɩɩ Bahurim wɩaa yʋ. Ʋ chaasa bʋl wʋbɔŋŋɔɔ nɛ a hɛ mɩ lɛ tapʋlɩɩ-la mɩ sɩɩ mʋ Mahanem. Ʋ sɩ kʋ puumi Jɔdaŋ lɛ, mɩ ŋmɩɛsɛ La TƖƖNA nɛ, arɩ mɩ bɩ jaŋ kpʋʋ. 9 Ama lɛɛlɛ, sɩ́ ʋ pɛɩ leŋ. Ŋ ŋaa wʋjɩnnʋ nɛ, ŋ jɩŋ wɩɩ-la sɩ maga dɩ ŋ ŋaa nɛ. Ʋ maga dɩ ŋ leŋ dɩ ba kpʋʋ nɛ.” 10 Ŋɩɩ nɛ Devit sʋʋ, ba hugu Jerusalɛm lɛ. 11 Ʋ fa beŋ Iziral tinteeŋ jɩsɩŋ mahɩŋ balɩa nɛ. Ʋ hɔŋ Hɛbʋrɔŋ lɛ a bemba jɩsɩŋ balɩpɛ nɛ, Jerusalɛm ma lɛ jɩsɩŋ mara arɩ fii arɩ batori. 12 Solomoŋ sɩ laa ʋ nyɩmma Devit nyuŋ a dii kuoruŋ, ʋ kuoruŋ fa chaasa chɩŋ nɛ woruŋ. Solomoŋ kuoruŋ chɩna 13 Tapʋlɩɩ kʋbala, Hagɩf nanʋala Adonija sii mʋ Solomoŋ naaŋ Bɛfɩsɛba teeŋ. Ŋɩɩ nɛ Bɛfɩsɛba pɩɛsʋ, “Ba fɩɛla nɛ ŋ kʋkɔ mɩ teeŋ?” Ʋ bʋl, “Oo, ba fɩɛla nɛ.” 14 Ŋɩɩ nɛ ʋ bɩra bʋl, “Mɩ kɛŋ wɩɩ nɛ dɩ mɩ bʋla pɩŋ.” Bɛfɩsɛba sɩ, “Ŋ jaŋ wuo bʋl.” 15 Adonija bʋl, “Ŋ jɩma, kuorii-la fa ŋaa mɩ kʋa nɛ. Iziral tɩŋŋaa kala faa chɛ mɩ nɛ ŋaa ba kuoro. Ama wɩaa bɩrɩma nɛ, kuorii-la mɩɩra ŋaa mɩ naambie kʋŋ, bɛɛ wɩaa ŋɩɩ nɛ La TƖƖNA chɩchɛ. 16 Lɛɛlɛ mɩɩ chɛ dɩ mɩ sʋl wʋbala nɛ ŋ teeŋ. Mɩɩ sʋlʋŋ, sɩ́ mɩ sʋla-la vɩa.” Bɛfɩsɛba sɩ, “Ŋ jaŋ wuo bʋl.” 17 Ŋɩɩ nɛ Adonija bɩra bʋl, “Mɩɩ sʋlʋŋ, bʋla pɩ kuoro Solomoŋ dɩ ʋ leŋ dɩ mɩ jaa Abɩsak, tolo-la sɩ lɩɩ Sunem. Mɩ jɩma ʋ bɩ jaŋ vɩa ŋ niiŋ.” 18 Bɛfɩsɛba sɩ, “Ʋ zɔmɔ, mɩ jaŋ bʋla pɩ kuoro.” 19 Bɛfɩsɛba sɩ mʋ kuoro Solomoŋ leriŋ dɩ ʋ bʋl Adonija wɩɩ-la, kuoro sii chɩŋ a chemu, a tuu kpirimi ʋ sɩpaaŋ, aŋ sii hɔŋ ʋ kuoru kpasa nyuŋ, a leŋ ba kɛŋ kuoru kpasa dɔŋɔ kʋ pɩ ʋ naaŋ, ʋ ma hɔŋ ʋ nadiiŋ. 20 Bɛfɩsɛba bʋl, “Mɩ kɛŋ wʋbie nɛ a chɩchɛ dɩ ŋ ŋaa pɩmɛ. Mɩɩ sʋlʋŋ, pʋpɔ ŋ sɩ́ wɩɩ-la vɩa.” Kuoro sɩ, “Mɩ naaŋ, bʋl wɩɩ-la ŋ sɩ kɛnɛ, mɩ bɩ jaŋ vɩa.” 21 Ŋɩɩ nɛ Bɛfɩsɛba bʋl, “Leŋ dɩ ŋ naambie Adonija jaa Abɩsak, tolo-la sɩ lɩɩ Sunem.” 22 Kuoro Solomoŋ pɩɛsɛ ʋ naaŋ, “Bɛɛ nɛ tɩɩ ŋ chɩchɛ dɩ Adonija jaa Abɩsak? Ŋɩɩ-na bʋl mɩ joŋ kuorii-la ma a pɛ pʋ, bɛɛ wɩaa ʋ ŋaa mɩ malɩma nɛ. Wɩɩsʋllɩ sɩpaalaara Abɩata arɩ Zeruya nanʋala Jʋab ma paala chɩŋ ʋ harɩŋ nɛ.” 23 Ŋɩɩ nɛ kuoro Solomoŋ ŋmɩɛsɛ La TƖƖNA: “A leŋ dɩ Wɩa dɔgɩsɛmɛ kɩŋkɛŋ, dɩ mɩ nɛ bɩ leŋe dɩ ba kpʋ Adonija a tɩŋ wɩɩŋ deeŋ ʋ sɩ pɩɛsa chɩchɛ wɩaa. 24 La TƖƖNA leŋe mɩ dii kuoruŋ mɩ nyɩmma Devit nyuŋ nɛ, a leŋ mɩ kuoruŋ chaasa chɩŋ. Ʋ hɛ niiŋ nɛ arɩ mɩ doho nɩaa nɛ jaŋ didii kuoruŋ Iziral tinteeŋ lɛ. Mɩ ŋmɩɛsɛ La TƖƖNA sɩ weye, Adonija maga dɩ ʋ sʋʋ nɛ jɩnɩŋ.” 25 Ŋɩɩ nɛ kuoro Solomoŋ leŋ Jehoyada nanʋala Benaaya mʋ kpʋ Adonija, 26 aŋ bʋla pɩ Abɩata ma sɩ ŋaa Wɩɩsʋllɩ sɩpaalaara, “Mɩɩra mʋ ŋ jaŋ Anatɔf. Ʋ fa maga dɩ mɩ kpʋŋ nɛ, ama mɩ bɩ jaŋ kpʋŋ a tɩŋ ŋ sɩ chʋŋ La TƖƖNA Wɩɩjarɩbakɔ niiriŋ daga-la mɩ nyɩmma Devit sɩpaaŋ, a pɛ na hɛɛ-la ma mɩ nyɩmma sɩ na wɩaa.” 27 Ŋɩɩ nɛ Solomoŋ kiri Abɩata sɩ ŋaa La TƖƖNA Wɩɩsʋllɩ sɩpaalaara ʋ tɩntɩŋŋaa lɛ. Ŋɩɩ leŋ La TƖƖNA fa sɩ bʋl wɩalɩŋ Sɩlɔ lɛ a tɩgɛ Eli doho nɩaa lɛ sɛnɛ kʋ ŋaa wʋtɩtɩɩ. 28 Jʋab fa pɛ Adonija lɛ nɛ dɩ ʋ dii kuoruŋ aŋ lɩɩ Abɩsalɔm harɩŋ. Ʋ sɩ nɩɩ wɩɩ-la, ʋ sii fá jʋʋ La TƖƖNA lɛbɩ-la tʋɔŋ a kɛŋ Wɩɩsʋllɩ koruŋ gʋnaa lɛ. 29 Ŋɩɩ nɛ ba bʋla pɩ kuoro Solomoŋ arɩ Jʋab fá jʋʋ La TƖƖNA lɛbɩ-la tʋɔŋ nɛ, a chɩŋ koru-la sɛmɛ. Ŋɩɩ nɛ Solomoŋ bʋla pɩ Jehoyada nanʋala Benaaya, “Mʋ kpʋʋ.” 30 Benaaya mʋ jʋʋ La TƖƖNA lɛbɩ-la tʋɔŋ a bʋla pɩ Jʋab, “Kuoro sɩ, ŋ kʋ lɩɩ.” Jʋab sɩ, “Aɩ, mɩ jaŋ sʋʋ daha.” Benaaya mɩɩra mʋ bʋl wɩɩ-la Jʋab sɩ bʋla a pɩ kuoro. 31 Ŋɩɩ nɛ kuoro bʋla pɩ Benaaya, “Mʋ a ŋaa ŋɩɩ ʋ sɩ bʋla. Kpʋʋ a joŋu hugu, ŋɩɩ jaŋ leŋ dɩ mɩ nyɩmma doho nɩaa sɩ́ cheeriŋ laa, nɩalɩŋ sɩ bɩ wɩɩ cheye ka Jʋab kpʋba bʋbʋɔŋ lɛ. 32 La TƖƖNA jaŋ joŋ nɩalɩŋ balɩa Jʋab sɩ kpʋa, ka mɩ nyɩmma Devit jɩma tuo chɩmɩŋ a tiŋ ʋ lɛ. Nɩalɩŋ kala balɩa fa kpɩaʋ: Nɛɛ nanʋala Abɩna fa sɩ ŋaa Iziral tɩŋŋaa laalɩyuoroo nɩhɩaŋ arɩ Jɛta nanʋala Amasa ma fa sɩ ŋaa Juda nɩaa laalɩyuoroo nɩhɩaŋ. 33 A leŋ dɩ nɩalɩŋ Jʋab sɩ kpʋa cheeriŋ nyʋa ʋ dɩ ʋ doho nɩaa nyuŋ lɛ a kaa mʋ wuu, aŋ ka dɩ La TƖƖNA leŋ dɩ Devit arɩ ʋ doho nɩaa, arɩ ba kuoruŋ wɩaa vɩvɛŋ woruŋ a kaa mʋ wuu.” 34 Ŋɩɩ nɛ Benaaya sii mʋ a kpʋ Jʋab. Ba joŋu hugi ʋ jaŋ lɛ pɔkɔŋ nyuŋ. 35 Kuoro leŋ Benaaya laa Jʋab nyuŋ a ŋaa laalɩyuoroo nɩhɩaŋ, aŋ leŋ Zadɔk ma laa Abɩata nyuŋ a ŋaa Wɩɩsʋllɩ sɩpaalaara. 36 Ŋɩɩ nɛ kuoro tɩŋ ba yɩrɛ Sɩmɛɩ, ʋ bʋla pʋ, “Saa dɩa Jerusalɛm lɛ a hɛ nɩmɛ, sɩ́ lee-kala mʋ. 37 Dɩ ŋ nɛ maachie sie a chol Kɩdɩrɔŋ fuonaa-la, tapʋlɩɩ-la ba jaŋ kpʋŋ. Dɩ ŋ nɛ sʋba, ŋ tɩtɩa nɛ chɛ ŋ sʋʋŋ.” 38 Sɩmɛɩ bʋla pɩ kuoro, “Wɩɩ-la ŋ sɩ bʋla zɔmɔ nɛ. Mɩ-na ŋ tɩntɩnna jaŋ ŋaa wɩɩ-la kala ŋ sɩ bʋla.” Sɩmɛɩ hɔŋ Jerusalɛm lɛ a dieni woruŋ. 39 Jɩsɩŋ batori harɩŋ, Sɩmɛɩ yosuŋ balɩa lɩɩ fá a mʋ Gaf kuoro Akɩs teeŋ, Maaka nanʋala. Ŋɩɩ nɛ ba bʋla pɩ Sɩmɛɩ arɩ ʋ yosu-la hɛ Gaf lɛ. 40 Ŋɩɩ nɛ Sɩmɛɩ sii kpɩɛrɛ ʋ kakumo a mʋ Akɩs teeŋ Gaf lɛ a chɩchɛ ʋ yosu-la. Ʋ sɩ mʋ Gaf, ʋ na yosi-la a kɛsɛba kaa mɩɩra kɔ Jerusalɛm. 41 Ba bʋla pɩ Solomoŋ arɩ Sɩmɛɩ lɩɩ Jerusalɛm lɛ a mʋ Gaf nɛ aŋ mɩɩra kɔ. 42 Kuoro Solomoŋ yɩrɛ Sɩmɛɩ a pɩɛsʋ, “Mɩ bɩ leŋe ŋ hɛ niiŋ La TƖƖNA yɩrɩŋ lɛ arɩ ʋ bɩ maga dɩ ŋ lɩɩ Jerusalɛm lɛ a mʋ lee kalaa? Mɩ chaasa bʋla pɩŋ nɛ arɩ tapʋlɩɩ-la ŋ sɩ jaŋ lɩɩ mʋ lee dɔŋ, jɩŋ arɩ ŋ jaŋ sʋʋ. Bʋa-la lɛ ŋ bʋla pɩmɛ arɩ ŋ sɛɩ wɩɩ-la nɛ, ŋ jaŋ tou. 43 Bɛɛ nɛ saa tɩɩ ŋ bɩ nii-la ŋ sɩ hɛ pɩ La TƖƖNA arɩ wɩɩ-la mɩ sɩ bʋla pɩŋ lɛ to?” 44 Kuoro bɩra bʋla pɩ Sɩmɛɩ, “Ŋ tʋɔŋ lɛ, ŋ jɩŋ wʋbɔmɔ-la kala ŋ sɩ ŋaa mɩ nyɩmma Devit lɛ nɛ. La TƖƖNA jaŋ joŋ ba chɩmɩŋ a timiŋ. 45 Ama La TƖƖNA jaŋ pɛ mɩ-na kuoro Solomoŋ lɛ, dɩ Devit kuorii-la chaasa chɩŋ woruŋ a kaa mʋ wuu.” 46 Ŋɩɩ nɛ kuoro leŋ Jehoyada nanʋala Benaaya mʋ kpʋ Sɩmɛɩ. Kuorii-la lɛɛlɛ chaasa chɩŋ kpaŋkpaŋ Solomoŋ nɩsɩŋ lɛ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.