1 KUOROO 18 - WƖA TENIŊ

Ɩlaaja arɩ Obadaaya

¹ Duonuŋ sɩ bɩ nɩa a dieni ŋɩɩ, jɩ-tori lɛ La TƖƖNA bʋla pɩ Ɩlaaja, “Kɛŋ ŋ tɩtɩa a mʋ dagɛ kuoro Ahab, aŋ ka dɩ mɩ leŋ dɩ duonuŋ nɩɩ tintee-la lɛ.”

² Ŋɩɩ nɛ Ɩlaaja kɛŋ ʋ tɩtɩa mʋ Ahab teeŋ. Bʋa-la lɛ dɩ losuŋ faasa jʋʋ Samarɩa tinteeŋ.

³ Bʋa deeŋ lɛ dɩ baal-la ba sɩɩ yɩrɛ Obadaaya nɛ faa beŋ kuoro Ahab kuoru dɩa. (Obadaaya fa laa La TƖƖNA wɩaa dii nɛ woruŋ.

⁴ Jɛzɛbɛl fa sɩɩ kpʋ La TƖƖNA wʋlaabʋllaa, Obadaaya kɛsɛ Wɩa wʋlaabʋllaa zɔlɔ a faa bʋ-bʋɔsʋŋ balɩa lɛ. Mahɩŋ balɩa arɩ fii hɛ dɔŋɔ lɛ, mahɩŋ balɩa arɩ fii ma hɛ dɔŋɔ lɛ, a pɩpɩba kʋdiilee arɩ lɩɩŋ.)

⁵ Ahab bʋla pɩ Obadaaya, “Leŋ dɩ la gɔllɛ la tinteeŋ lɩɩ-bulo leree arɩ fuonaasɩŋ kala, ŋ bɩ pɔ la jaŋ na yaŋ a pɩ la janɩŋ arɩ kakusuŋ dɩ ba sɩ́ sʋʋ, dɩ ŋɩɩ leŋ dɩ la sɩ́ la pʋna kala kpʋ.”

⁶ Ŋɩɩ nɛ ba kɛŋ ba tinteeŋ lere-la ba sɩ jaŋ mʋ a kaa kpaa. Ahab to sɛmɛ dɔŋɔ, Obadaaya ma to sɛmɛ dɔŋɔ.

⁷ Obadaaya sɩɩ mʋ ŋɩɩ, Ɩlaaja chemu. Obadaaya wuo jɩmʋ a tuu kpirimi tinteeŋ aŋ pɩɛsɛ, “Ŋ nɛ sɛnɛ ŋɩɩ, mɩ nɩhɩaŋ Ɩlaaja?”

⁸ Ɩlaaja bʋl, “Oo, mɩ nɛ. Mʋ bʋla pɩ ŋ nɩhɩaŋ arɩ mɩ hɛ daha.”

⁹ Obadaaya pɩɛsɛ, “Bɛɛ nɛ mɩ ŋaa chei, ŋ chɩchɛ dɩ ŋ joŋ mɩ-na ŋ tɩntɩnna a hɛ Ahab nɩsɩŋ lɛ dɩ ʋ kpʋmɛ?

¹⁰ Ŋ TƖƖNA Wɩa sɩ weye wɩaa, tintee koo kuoru kala lee tuo mɩ nɩhɩaŋ sɩ bɩ nɩaa tɩma ba mʋ chɩchɛŋ. Dɩ tintee koo kuoru kala lee nɩaa nɛ sɩ ba bɩŋ na, ʋ yie leŋ ba ŋmɩɛsɛ nɛ arɩ ba sɛnɛ bɩŋ na,

¹¹ ka ŋ bʋla pɩmɛ arɩ mɩ mʋ bʋla pɩ mɩ nɩhɩaŋ arɩ ŋ hɛ daha.

¹² Ka dɩ mɩ nɛ leŋiŋ daha aŋ mʋ, dɩ La TƖƖNA Dɩma-la kʋ joŋuŋ kaa mʋ lee mɩ sɩ bɩ jɩŋ? Dɩ mɩ nɛ bʋla pɩ Ahab arɩ ŋ hɛ daha ka ʋ bɩŋ na, ʋ jaŋ kpʋmɛ. Ama mɩ-na ŋ tɩntɩnna to La TƖƖNA nɛ mɩ hambiriŋ kala lɛ.

¹³ Mɩ nɩhɩaŋ, ŋ bɩ wɩɩ-la mɩ sɩ ŋaa nɩa bʋa-la lɛ Jɛzɛbɛl sɩɩ kpʋ La TƖƖNA wʋlaabʋllaa? Mɩ kɛŋ La TƖƖNA wʋlaabʋllaa zɔlɔ nɛ a faa bʋbʋɔsʋŋ balɩa lɛ, mahɩŋ balɩa arɩ fii hɛ bʋbʋa kala lɛ, a pɩpɩba kʋdiilee arɩ lɩɩŋ.

¹⁴ Ka ŋ bʋla pɩmɛ bʋa deeŋ lɛ dɩ mɩ mʋ bʋla pɩ mɩ nɩhɩaŋ arɩ ŋ hɛ daha. Ʋ jaŋ kpʋmɛ.”

¹⁵ Ɩlaaja bʋl, “La TƖƖNA doluŋ kala Tɩɩna sɩ weye wɩaa, nɩɩ-la mɩ sɩ tɩma pɩpa, mɩ jaŋ sɛnɛ kɛŋ mɩ tɩtɩa mʋ Ahab teeŋ jɩnɩŋ.”

Ɩlaaja hɛ peel-la ba sɩɩ yɩrɛ Kamɛl nyuŋ

¹⁶ Ŋɩɩ nɛ Obadaaya mʋ cheŋ Ahab a bʋla pʋ arɩ Ɩlaaja hɛ daha. Ahab mʋ dɩ ʋ naʋ.

¹⁷ Ʋ sɩ na Ɩlaaja, ʋ pɩɛsʋ, “Ŋ nɛ ŋɩɩ koo, Iziral tɩŋŋaa wʋhɛɛrʋ?”

¹⁸ Ɩlaaja bʋl, “Mɩ bɩ wɩɩkala hɛ Iziral tinteeŋ lɛ. Ŋ dɩ ŋ nyɩmma dɩa nɩaa nɛ hɛ wɩaa. Ma nɛ vɩa wɩalɩŋ La TƖƖNA sɩ daga aŋ mʋ tuto vene-la ba sɩɩ yɩrɛ Baal.

¹⁹ Lɛɛlɛ mʋ yɩrɛ Iziral nɩaa kala dɩ ba kʋ chemmi peel-la ba sɩɩ yɩrɛ Kamɛl nyuŋ. Pɛ kɛŋ Baal veŋ-kpaaraa zɔɔ-banɛsɛ arɩ mahɩŋ balɩa arɩ fii arɩ veŋ-haal-la ba sɩɩ yɩrɛ Asɩra kpʋkpaaraa zɔɔ-banɛsɛ kala sɩɩ dii kɩaa Jɛzɛbɛl teeŋ a kɔ.”

²⁰ Ŋɩɩ nɛ Ahab tɩma yɩrɛ Iziral tɩŋŋaa kala arɩ veŋ-kpaara-la, ba kʋ hilimi peel-la ba sɩɩ yɩrɛ Kamɛl nyuŋ.

²¹ Ɩlaaja mʋ chɩŋ nɩalɩŋ sɩpaaŋ aŋ bʋl, “Ɛɛ nɛ maa chɛ dɩ ma diene magɛ aŋ joŋ wɩaa deemba balɩa kʋ-la sɩ maga dɩ ma to? Dɩ La TƖƖNA nɛ ŋaa Wɩa, má tou, ama dɩ Baal ma nɛ ŋaa Wɩa, má tou.” Ama nɩalɩŋ bɩ wɩɩkala bʋla.

²² Ŋɩɩ nɛ Ɩlaaja bʋla pɩba, “Mɩ dʋndʋŋa nɛ ŋaa La TƖƖNA wʋlaabʋllʋ sɩ ka, ama Baal kɛŋ veŋ-kpaaraa zɔɔ-banɛsɛ arɩ mahɩŋ balɩa arɩ fii nɛ.

²³ Má kɛŋ nɛ-belliŋ balɩa kʋ pɩla, dɩ Baal vʋgʋraa joŋ dɔŋɔ a kpʋ a kaa keri muno muno a daŋ daasɩŋ nyuŋ a sɩ́ nyiniŋ cholo hɛ. Mɩ ma jaŋ joŋ dɔŋɔ a kpʋ a ŋaa ŋɩɩ tɩtɩa.

²⁴ Baal veŋ-kpaaraa jaŋ sʋla yɩrɛ ba vene, dɩ mɩ ma yɩrɛ La TƖƖNA. Ba tʋɔŋ kʋ-la sɩ jaŋ leŋ dɩ nyiniŋ kɔ, ʋ nɛ ŋaa Wɩa.” Ŋɩɩ nɛ nɩalɩŋ kala bʋl, “Wɩɩ-la ŋ sɩ bʋla ŋaa wʋzɔŋ nɛ.”

²⁵ Ɩlaaja bɩra bʋla pɩ Baal veŋ-kpaara-la, “Má laa sɩpaaŋ a bagɩsa lɩɩsɛ nɛ-belli-la dɔŋɔ a kpʋ, ma nɛ sɩ yʋga. Má sɩ́ nyiniŋ cholo hɛ, aŋ sʋla yɩrɛ ma vene.”

²⁶ Ŋɩɩ nɛ ba kpʋ nɛ-bele-la ba sɩ lɩɩsa a bɩrɩmɛ, aŋ sʋla yɩrɛ ba vene Baal, a chɩŋ chʋchʋɔŋ a kaa mʋ wɩɩhɛyɛ. Ba faasa ŋaa goŋ a bʋl “Baal, nɩɩ la yɩra.” Ŋɩɩ nɛ ba gʋa gugolli koru-la ba sɩ saa. Ama ba bɩ wɩɩkala nɩa.

²⁷ Wɩɩhɛyɛ Ɩlaaja suomo sisieri ba lɛ a bʋl, “Má faasa kpɩa, ʋ sɛnɛ ŋaa vene nɛ! Ŋ bɩ pɔ ʋ chaasaa bɩɩnɛ wɩaa nɛ, koo ʋʋ tɩŋ tɩntɩŋŋaa nɛ, koo ʋʋ vɛŋ wombiiŋ nɛ. Ŋ bɩ pɔ ʋ pɩŋ doŋ nɛ a magɛ dɩ ma chɩsʋ.”

²⁸ Ŋɩɩ nɛ ba bɩra faasa kpɩa aŋ kɛŋ sɩɩsɩŋ arɩ tiŋŋee kikeri aŋ tʋtɔɔ ba tɩtɩa arɩ ba naabarɩŋ wombiiŋ sɩ dagɛ ŋɩɩ, chalɩŋ pɩpɛllɛ.

²⁹ Ba ŋaa ŋɩɩ nɛ deeŋ deeŋ a mʋ yi dɩdaanɩŋ Wɩɩsʋlʋŋ ŋaanɩŋ bʋa, aŋ bɩ wɩɩkala nɩa.

³⁰ Ŋɩɩ nɛ Ɩlaaja bʋla pɩ nɩalɩŋ kala, “Má kɔ mɩ teeŋ daha.” Ŋɩɩ nɛ ba kɔ, ʋ wasa bɩrɩmɛ La TƖƖNA Wɩɩsʋlʋŋ koru-la fa sɩ yɔrʋmɔ.

³¹ Ɩlaaja paa tabɩaa fii arɩ balɩa, tabɩɩ kala chɩŋ Iziral doho doho-la ba sɩ joŋ Jekɔb biiriŋ yɩraa hɛ pa nyuŋ lɛ nɛ. La TƖƖNA fa hɛ Jekɔb yɩrɩŋ Iziral nɛ.

³² Tabɩa-la nɛ ʋ kaa saa koruŋ dɩ ʋ yɩrɛ La TƖƖNA yɩrɩŋ, aŋ lu bʋa a gollu a magɛ lɩɩŋ galaŋ batori sɩ jaŋ wuo jʋʋ.

³³ Ʋ paa daasɩŋ a daŋ koru-la nyuŋ aŋ kɛŋ nɛ-bele-la keri muno muno a daŋ daasɩ-la nyuŋ. Ŋɩɩ nɛ aŋ bʋla pɩba, “Má ŋaa lɩɩŋ su lonnuŋ banɛsɛ a bɩsa hɛ Wɩɩsʋlʋŋ kɩalɩŋ arɩ daasɩ-la lɛ.” Ba ŋaa ŋɩɩ ʋ sɩ bʋla.

³⁴ Ʋ bɩra bʋl, “Má bɩra ŋaa hɛ lɩa.” Ŋɩɩ nɛ ba ŋaa hɛ. Ʋ bɩra bʋl, “Má bɩra ŋaa hɛ tori.” Ba bɩra ŋaa hɛ tori.

³⁵ Lɩɩŋ su koru-la kala a pɛllɛ tuu su bʋa-la sɩ golli koru-la.

³⁶ Dɩdaanɩŋ Wɩɩsʋlʋŋ bʋa sɩ yie, Wɩa wʋlaabʋlla Ɩlaaja kʋ lɩɩ chɩŋ a chʋɔlɛ Wɩa a bʋl, “Mɩ Tɩɩna sɩ ŋaa Abɩraham, Aɩzɩk arɩ Jekɔb Wɩa, jɩnɩŋ leŋ dɩ ba jɩŋ arɩ ŋ nɛ ŋaa Wɩa a hɛ Iziral lɛ, a bɩra leŋ dɩ ba jɩŋ arɩ mɩ ŋaa ŋ tɩntɩnnʋ nɛ, wɩaa deemba kala mɩ sɩɩ ŋaa, ŋ nɛ hɛmɛ.

³⁷ La TƖƖNA, nɩɩ mɩ teeŋ, leŋ dɩ nɩaa deemba jɩŋ arɩ ŋ nɛ ŋaa ba TƖƖNA, a ŋaa Wɩa, aŋ kɛŋ ba tʋɔŋ bɩrɩmɛ dɩ ba toŋ.”

³⁸ Ŋɩɩ nɛ La TƖƖNA leŋ nyiniŋ kʋ tuu joŋ Wɩɩ-sʋla kɩalɩŋ arɩ daasɩ-la arɩ tabɩa-la arɩ hagɩla kala dii, lɩɩ-la ma sɩ hɛ bʋa-la lɛ kala hʋ.

³⁹ Nɩalɩŋ kala sɩ na wɩɩŋ deeŋ, ba tele chu tinteeŋ aŋ ŋmoo niiŋ a bʋl, “La TƖƖNA nɛ Wɩa! La TƖƖNA nɛ Wɩa!”

⁴⁰ Ŋɩɩ nɛ Ɩlaaja bʋl, “Má kɛsɛ Baal vʋgʋra-la kala. Má sɩ́ leŋe dɩ ba kʋŋkala fá viiri.” Ŋɩɩ nɛ ba kɛsɛba. Ɩlaaja laaba a kaa tuu Kɩsɔŋ fuonaaŋ a kpʋba nɩmɛ.

⁴¹ Ɩlaaja bʋla pɩ Ahab, “Mʋ dii kɩaa, mɩ nɩɩ duoŋ-bal nɛ huuro a kʋkɔ.”

⁴² Ŋɩɩ nɛ Ahab mʋ dɩ ʋ dii kɩaa, ka Ɩlaaja jɩl peel-la ba sɩɩ yɩrɛ Kamɛl nyuŋ, a tuu chugili a kɛŋ ʋ nyuŋ hɛ ʋ naadʋsʋŋ pɛgɛ.

⁴³ Ŋɩɩ nɛ aŋ bʋla pɩ ʋ tɩntɩnna, “Mʋ beŋ mʋgʋ-balɩŋ dɩɩrɩŋ.” Ʋ mʋ beŋ aŋ kʋ bʋl, “Mɩ bɩ kʋŋkala na.” Ɩlaaja leŋ ʋ vɛnɛ beŋ naansɩɩŋ bʋlɩpɛ.

⁴⁴ Tɩntɩnnʋ-la mʋ beŋ pɛɩ lɛ aŋ mɩɩra kʋ bʋl, “Duoŋ-bɩlɩmbaaŋ-bie nɛ lɩɩ chɩŋ mʋgʋ-balɩŋ nyuŋ a magɛ nuhuobiine nɩsɩŋ.” Ɩlaaja bʋl, “Mʋ bʋla pɩ Ahab dɩ ʋ joŋ ʋ jaaba toruko a viiri dɩ duonuŋ sɩ́ ʋ tɔ hɛ.”

⁴⁵ Ʋ bɩ diene ka wɩa-nyuŋ kala tɔ arɩ duoŋ-bɩlɩmbaanaa, peliŋ lulu, duonuŋ faasa nɩnɩɩ. Ahab jɩl ʋ jaaba toruko a fá mʋmʋ Jɛzɩrɛl.

⁴⁶ Ŋɩɩ nɛ La TƖƖNA doluŋ kʋ jʋʋ Ɩlaaja. Ʋ kɛŋ ʋ gɛrɩŋ a vɔɔ ʋ tɩŋa, aŋ fá a laa Ahab sɩpaaŋ a mʋ Jɛzɩrɛl.