1 KUOROO 17 - WƖA TENIŊ

Gɩlɩŋgaamba kɛŋ kʋdiilee kʋ pɩ Ɩlaaja

¹ Wɩa wʋlaabʋllʋ kʋbala nɛ fa hɛ nɩmɛ baa yɩrɛ Ɩlaaja, a lɩɩ taŋ-la ba sɩɩ yɩrɛ Tɩsɩbɩ sɩ hɛ Gɩlɩad tinteeŋ lɛ. Ʋ fa bʋla pɩ kuoro Ahab, “La TƖƖNA Iziral tɩŋŋaa Wɩa sɩ weye wɩaa, nɩɩ-la mɩ sɩ tɩma pɩpa, jɩsɩŋ baŋmɛnɛ lɛ, nyalɩŋ bɩ jaŋ nyal koo dɩ duonuŋ nɩɩ, see dɩ mɩ pa wombiiŋ.”

² Ŋɩɩ nɛ La TƖƖNA bʋl wɩaa pɩ Ɩlaaja:

³ “Sii daha, a joŋ sɩaa chaasɛ wɩɩpɔsʋŋ dɩɩrɩŋ a mʋ faa lee-la ba sɩɩ yɩrɛ Kɛrɩf lɩɩ-libe, a hɛ Jɔdaŋ fuo-la wɩɩpɔsʋŋ dɩɩrɩŋ.

⁴ Ŋ jaŋ nyʋnyʋa lɩɩŋ lɩɩ-libe-la sɩɩ pɛllʋ lɛ. Mɩ hɛ gɩlɩŋgaamba nɛ dɩ ba kɛŋ kʋdiilee kʋʋ pɩŋ nɩmɛ.”

⁵ Ŋɩɩ nɛ Ɩlaaja ŋaa ŋɩɩ La TƖƖNA sɩ bʋla pʋ. Ʋ sii a mʋ Kɛrɩf lɩɩ-libe-la sɩ hɛ Jɔdaŋ fuo-la wɩɩpɔsʋŋ dɩɩrɩŋ a hɛ nɩmɛ.

⁶ Gɩlɩŋgaamba yie kɛŋ boroboro arɩ nammɩa kʋʋ pʋ chʋchʋɔŋ arɩ dɩdaanɩŋ kala, ka ʋ nyʋnyʋa lɩɩ-libe-la sɩɩ pɛllʋ lɩɩŋ.

Yo-haal-la sɩ hɛ Zarɛfaf lɛ

⁷ Bʋa kʋbala lɛ lɩɩ-libe-la sɩɩ pɛllʋ hʋ, a tɩŋ duonuŋ sɩ bɩ tintee-la lɛ ka nɩɩ.

⁸ Ŋɩɩ nɛ La TƖƖNA bʋla pɩ Ɩlaaja:

⁹ “Guu sii a mʋ hɔŋ Zarɛfaf sɩ hɛ Sɩdɔŋ tinteeŋ lɛ. Mɩ bʋla pɩ yo-haal kʋbala sɩ hɛ lee-la nɛ dɩ ʋ pɩŋ kʋdiilee.”

¹⁰ Ŋɩɩ nɛ Ɩlaaja sii mʋ Zarɛfaf. Ʋ sɩ mʋ yi taŋ-la boi-baalɩŋ, ʋ na Zarɛfaf tɩŋŋaa yo-haal kʋbala nɩmɛ dɩ ʋʋ paa daasɩŋ. Ʋ yɩrɛ haal-la a bʋl, “Mɩɩ sʋlʋŋ, ŋaa lɩɩŋ mʋa hɛ loŋ lɛ a kaa kʋ pɩmɛ dɩ mɩ nyʋa.”

¹¹ Haal-la sɩɩ mʋ dɩ ʋ ŋaa lɩɩ-la, ʋ bɩra yɩrʋ a bʋl, “Mɩɩ sʋlʋŋ, pɛ kɛŋ boroboro ma mʋa kʋ pɩmɛ.”

¹² Haal-la bʋl, “Ŋ Tɩɩna Wɩa sɩ weye wɩaa, mɩ bɩ kʋdiilii kala kɛnɛ, kʋ-la kala mɩ sɩ kɛnɛ nɛ munuŋ nɩsɩŋ sɩɩŋ a hɛ gbaŋa lɛ arɩ nʋʋŋ ma mʋa loŋ lɛ. Daasɩŋ mʋa nɛ mɩɩ paa daha, dɩ mɩ kaa mʋ dɩa a ŋaa kʋdiile-la mʋa mɩ sɩ kɛnɛ dɩ mɩ dɩ mɩ nanʋala dii, ŋɩɩ harɩŋ, losuŋ nɛ la jaŋ kaa sʋʋ.”

¹³ Ŋɩɩ nɛ Ɩlaaja bʋla pʋ, “Sɩ́ leŋe dɩ fawʋllʋŋ kɛnɩŋ. Ŋ-na mʋ dɩa a ŋaa kʋdiile-la arɩ ŋ sɩ bʋl ŋɩɩ. Ama laa sɩpaaŋ ŋaa muŋ-la ŋ sɩ kɛnɛ a wasɛ boroboro a kaa kʋ pɩmɛ, aŋ-na ŋaa ŋ dɩ ŋ nanʋala ma kɩaa.

¹⁴ Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la: ‘Muŋ-la sɩ hɛ gbaŋa-la lɛ bɩ jaŋ dɛrɛ, nʋʋ-la ma sɩ hɛ loŋ lɛ bɩ jaŋ dɛrɛ a kaa mʋ tapʋlɩɩ-la mɩ sɩ jaŋ leŋ dɩ duonuŋ nɩɩ tinteeŋ deeŋ lɛ.’ ”

¹⁵ Haal-la mʋ a ŋaa wɩɩ-la Ɩlaaja sɩ bʋla pʋ. Ŋɩɩ nɛ Ɩlaaja arɩ haal-la arɩ ʋ dɩa nɩaa-na kɛŋ kʋdiilee a didii tapʋlɩɩ kala.

¹⁶ La TƖƖNA sɩ to Ɩlaaja lɛ a bʋl ŋɩɩ, muŋ-la sɩ hɛ gbaŋa-la lɛ bɩ dɛrɛ, nʋʋ-la ma sɩ hɛ loŋ-la lɛ bɩ dɛrɛ.

¹⁷ Bʋa kʋbala lɛ, yo-haal-la nanʋala wʋwɩɩlɛ. Nyanyalɩɩ-la faasa jʋʋ bile lɛ woruŋ, ʋ sʋʋ.

¹⁸ Haal-la pɩɛsɛ Ɩlaaja, “Wɩa wʋlaabʋllʋ, bɛɛ nɛ ŋ ŋaa mɩ lɛ ŋ-la? Ŋ kɔ dɩ ŋ kpʋ mɩ nanʋala nɛ a liisimi mɩ wʋbɔŋŋɔɔ wɩaa?”

¹⁹ Ɩlaaja bʋl, “Joŋ bile a pɩmɛ.” Ʋ laa bile haal-la nɩsɩŋ lɛ, a kaa jɩl lusuŋ nyuŋ dɩa-la ʋ sɩɩ jʋʋ, a joŋu bil ʋ kʋpɩnɩŋ nyuŋ.

²⁰ Ŋɩɩ nɛ ʋ bunso pɩ La TƖƖNA a bʋl, “Mɩ TƖƖNA Wɩa, bɛɛ kʋŋ wʋlɔrʋ nɛ ŋ ŋaa yo-haala deeŋ lɛ ŋ-la? Ʋ kɛmmɛ nɛ woruŋ ʋ dɩa lɛ, ka ŋ leŋ ʋ nanʋala sʋʋ.”

²¹ Ŋɩɩ nɛ aŋ chu tɔ bile lɛ naansɩɩŋ butori aŋ bɩra sʋl La TƖƖNA, “Mɩ TƖƖNA Wɩa, leŋ dɩ bie deeŋ bɩra sii a kɛŋ mɩɩsɩŋ.”

²² La TƖƖNA nɩɩ Ɩlaaja sʋla, a leŋ bile bɩra sii a kɛŋ mɩɩsɩŋ.

²³ Ɩlaaja joŋ bile dɩa-la lɛ a kaa tuu pɩ ʋ naaŋ aŋ bʋl, “Na ŋ nanʋala, ʋ weye nɛ.”

²⁴ Ŋɩɩ nɛ haal-la bʋla pɩ Ɩlaaja, “Mɩ jɩma lɛɛlɛ ŋ sɛnɛ ŋaa Wɩa tɩntɩnnʋ nɛ. Wɩalɩŋ kala ŋ sɩ bʋla sɛnɛ lɩɩ La TƖƖNA teeŋ nɛ.”