1 KUOROO 16 - WƖA TENIŊ

¹ Ŋɩɩ nɛ La TƖƖNA bʋl wɩaa pɩ Hanani nanʋala Jehu a tɩgɛ Baasa lɛ a bʋl:

² “Ŋ fa bɩ nʋʋkala ŋaa, ka mɩ lɩɩsɩŋ, a leŋ ŋ ŋaa mɩ nɩaa Iziral tɩŋŋaa sɩpaalaara. Ama ŋ to Jerobuam naabʋɔsʋŋ nɛ a leŋ mɩ nɩaa Iziral tɩŋŋaa ŋaa wʋbɔŋŋɔɔ a leŋ mɩ baanɩŋ sii a tɩŋ ba wʋcheelie-la wɩaa.

³ Ŋɩɩ wɩaa mɩ kɛŋ mɩ tɩtɩa hɛ dɔŋɔ nɛ dɩ mɩ chei Baasa arɩ ʋ dɩa nɩaa, a nagɛ mɩ sɩ chei Jerobuam dɩa ŋɩɩ.

⁴ Baasa naambiiri-la sɩ jaŋ sʋʋ jaŋ lɛ, vasɩŋ nɛ jaŋ dii ba kʋsʋʋnʋŋ, ka dɩ zaaraa ma dii nɩalɩŋ sɩ jaŋ sʋʋ gɩrɩŋ lɛ.”

⁵ Wɩalɩŋ dɔnsʋŋ kala Baasa sɩ dii kuoruŋ a ŋaa a laa yɩrɩŋ, ba kala nɛ ba ŋmʋnsa hɛ Iziral tɩŋŋaa kuoroo wʋŋaalaa teniŋ tʋɔŋ.

⁶ Ŋɩɩ nɛ Baasa sʋʋ, ba hugu Tɩɩza lɛ, ka ʋ nanʋala Ɛla dii kuoruŋ ʋ nyuŋ lɛ.

⁷ La TƖƖNA to Hanani nanʋala Jehu, ʋ wʋlaabʋllʋ-la lɛ nɛ a bʋl wʋbɔŋŋɔɔ a tɩgɛ Baasa arɩ ʋ dɩa nɩaa lɛ, a tɩŋ wʋbɔmɔ-la kala ʋ sɩ ŋaa La TƖƖNA sɩpaaŋ a leŋ ʋ baanɩŋ sii. Ʋ ma wʋŋaalaa fa nagɛ Jerobuam nɛ, a paala bɔmɔ kɩɩba ʋ sɩ kpʋ Jerobuam dɩa nɩaa kala.

Ɛla dii Iziral kuoruŋ

⁸ Asa sɩ dii kuoruŋ Juda lɛ, ʋ jɩsɩŋ mara arɩ balɩdʋ lɛ nɛ Baasa nanʋala Ɛla dii kuoruŋ Iziral lɛ, a hɔŋ Tɩɩza lɛ a bemba jɩsɩŋ balɩa.

⁹ Ʋ tɩntɩnnɩ-hɩasɩŋ dɔŋɔ fa hɛ nɩmɛ baa yɩrɛ Zimiri. Ʋ nɛ faa beŋ kuoro laalɩŋ janɩŋ torukoba kpaa magɛ dɔŋɔ. Ʋ chɩchɛ wombiiŋ dɩ ʋ kpʋ kuoro. Bʋa-la lɛ dɩ Ɛla hɛ Tɩɩza lɛ, a bubugi Aaza dɩa lɛ, nɩɩ-la sɩɩ beŋ kuoro dɩa Tɩɩza lɛ.

¹⁰ Zimiri kʋ jʋʋ a kpʋ Ɛla, aŋ laa ʋ nyuŋ dii kuoruŋ. Bʋa-la lɛ dɩ Asa sɩ dii kuoruŋ Juda lɛ, ʋ jɩsɩŋ mara arɩ balɩpɛ lɛ nɛ ŋɩɩ.

¹¹ Zimiri sɩ dii kuoruŋ dɛrɛ, ʋ kpʋ Baasa dɩa nɩaa kala. Ʋ bɩ ba baal kala leŋe, a pɛ Baasa nandɔnsʋŋ lɛ.

¹² Zimiri kpʋ Baasa dɩa nɩaa kala, arɩ La TƖƖNA sɩ to ʋ wʋlaabʋlla Jehu lɛ a bʋl ŋɩɩ tɩgɛ ʋ lɛ.

¹³ Wɩaa deemba ŋaa a tɩŋ wʋbɔmɔ-la kala Baasa arɩ ʋ nanʋala Ɛla sɩ ŋaa a leŋ Iziral tɩŋŋaa ma ŋaaba, a kpʋkpaarɛ vʋɩyaa wɩaa nɛ. Ŋɩɩ leŋ La TƖƖNA, Iziral tɩŋŋaa Wɩa baanɩŋ sii.

¹⁴ Wɩalɩŋ dɔnsʋŋ Ɛla sɩ dii kuoruŋ a ŋaa, ba kala nɛ ba ŋmʋnsa hɛ Iziral kuoroo wʋŋaalaa teniŋ tʋɔŋ.

Zimiri dii Iziral kuoruŋ

¹⁵ Asa sɩ dii kuoruŋ Juda lɛ, ʋ jɩsɩŋ mara arɩ balɩpɛ lɛ nɛ Zimiri dii Iziral kuoruŋ a hɔŋ Tɩɩza lɛ a bemba tapʋlaa balɩpɛ. Bʋa-la lɛ dɩ Iziral tɩŋŋaa laalɩyuoroo fa ŋmoo buguŋ a kpagɛ Gɩbɛtɔŋ sɩ ŋaa Fɩlɩsɩtɩa tɩŋŋaa taŋ.

¹⁶ Iziral tɩmma-la sɩ hɛ ba buguŋ lɛ aŋ nɩɩ arɩ Zimiri chɛ wombiiŋ nɛ a kpʋ kuoro, ba guu heele bʋl tapʋlɩɩ-la tɩtɩa arɩ ba laalɩyuori-hɩaŋ Omiri nɛ ŋaa Iziral kuoro.

¹⁷ Ŋɩɩ nɛ Omiri arɩ Iziral tɩmma-la kala sɩ hɛ ʋ teeŋ lɩɩ Gɩbɛtɔŋ lɛ a mʋ yuo Tɩɩza.

¹⁸ Zimiri sɩ na dɩ ba yuo dii taŋ-la, ʋ fá jʋʋ kuoru dɩa dɩ-duoŋ aŋ joŋ nyiniŋ hɛ, ʋ diiu kpʋ.

¹⁹ Wɩaa deemba kala ŋaa a tɩŋ wʋbɔmɔ-la Zimiri sɩ ŋaa La TƖƖNA teeŋ nɛ. Wʋbɔmɔ-la Jerobuam sɩ ŋaa tɩtɩa nɛ ʋ ma ŋaa a leŋ Iziral tɩŋŋaa ma ŋaa wʋbɔmɔ-la.

²⁰ Wɩalɩŋ dɔnsʋŋ Zimiri sɩ dii kuoruŋ a ŋaa, arɩ wʋbɔmɔ-la ʋ sɩ joŋo ŋaa Ɛla lɛ, ba kala nɛ ba ŋmʋnsa hɛ Iziral kuoroo wʋŋaalaa teniŋ tʋɔŋ.

Omiri dii Iziral kuoruŋ

²¹ Ŋɩɩ nɛ Iziral tɩŋŋaa pɔɩ leree balɩa, dɔnsʋŋ chɩŋ Ginaf nanʋala Tibini harɩŋ a cho dɩ ʋ nɛ ŋaa kuoro, dɔnsʋŋ ma chɩŋ Omiri harɩŋ a ma cho dɩ ʋ nɛ ŋaa kuoro.

²² Ama Omiri harɩŋ nɩaa nɛ kɛŋ doluŋ a kɩɩ nɩalɩŋ sɩ chɩŋ Tibini harɩŋ. Ba kpʋ Tibini, ka Omiri dii kuoruŋ.

²³ Asa sɩ dii kuoruŋ Juda lɛ, ʋ jɩsɩŋ mara arɩ fii arɩ kʋbala lɛ nɛ Omiri dii kuoruŋ Iziral lɛ, a bemba jɩsɩŋ fii arɩ balɩa. Jɩsɩ-la tʋɔŋ, ʋ hɔŋ Tɩɩza lɛ a bemba jɩsɩŋ balɩdʋ nɛ.

²⁴ Ŋɩɩ nɛ ʋ joŋ warɩpʋla bʋɩ balɩdʋ a yɔɔ Samarɩa dundolo kʋbala, baal kʋbala ba sɩɩ yɩrɛ Sɛmɛɛ teeŋ. Ʋ saa jaŋ dundolo-la nyuŋ a hɛ ʋ yɩrɩŋ Samarɩa. Nɩɩ-la fa sɩ tɩɩ lee-la yɩrɩŋ nɛ ʋ mɩɩra joŋo hɛ pʋ.

²⁵ Omiri fa ŋaa wʋbɔŋŋɔɔ nɛ kɩŋkɛŋ La TƖƖNA teeŋ a kɩɩ kuorusu-la kala sɩ laa ʋ sɩpaaŋ.

²⁶ Wʋbɔmɔ-la Nɛbat nanʋala Jerobuam sɩ ŋaa doho tɩtɩa nɛ Omiri ma ŋaa, a leŋ Iziral tɩŋŋaa ma ŋaaba. La TƖƖNA, Iziral tɩŋŋaa Wɩa na baanɩŋ, a tɩŋ ba vʋɩ-tɔɔnʋ-la kpaarɩŋ wɩaa.

²⁷ Wɩalɩŋ dɔnsʋŋ Omiri sɩ dii kuoruŋ a ŋaa, ba kala nɛ ba ŋmʋnsa hɛ Iziral kuoroo wʋŋaalaa teniŋ tʋɔŋ.

²⁸ Omiri sʋʋ, ba hugu Samarɩa lɛ, ka ʋ nanʋala Ahab dii kuoruŋ ʋ nyuŋ.

Ahab dii Iziral kuoruŋ

²⁹ Asa sɩ dii kuoruŋ Juda lɛ, ʋ jɩsɩŋ mara arɩ fii arɩ chori lɛ nɛ Omiri nanʋala Ahab dii kuoruŋ Iziral lɛ. Ʋ hɔŋ Samarɩa lɛ a beŋ Iziral tɩŋŋaa jɩsɩŋ mara arɩ balɩa.

³⁰ Omiri nanʋala Ahab fa ŋaa wʋbɔŋŋɔɔ nɛ woruŋ La TƖƖNA teeŋ a kɩɩ kuorusu-la kala sɩ laa ʋ sɩpaaŋ.

³¹ Jerobuam sɩ ŋaa wʋbɔmɔ-la dʋndʋŋa dee ʋ ŋaa, ʋ-na paala jaa Jɛzɛbɛl nɛ, Sɩdɔŋ kuoro ba sɩɩ yɩrɛ Ɛfɩbaal tolo, a suomo kpʋkpaarɛ vene-la ba sɩɩ yɩrɛ Baal.

³² Baal vene-la dɩa sɩ hɛ Samarɩa lɛ, ʋ paala saa koruŋ nɛ ʋ tʋɔŋ a kpʋkpaarɛ.

³³ Ahab fa pɛ veŋ-haal-la ma ba sɩɩ yɩrɛ Asɩra daaŋ nɛ. Ʋ chaasa ŋaa wʋbɔŋŋɔɔ nɛ woruŋ La TƖƖNA Iziral tɩŋŋaa Wɩa teeŋ, a leŋ ʋ baanɩŋ sii a kɩɩ Iziral kuorusu-la sɩ laa sɩpaaŋ ʋ lɛ.

³⁴ Ahab kuoruŋ bʋa lɛ, Bɛtɛl tɩŋŋaa baal kʋbala ba sɩɩ yɩrɛ Hɩɛl nɛ wasa saa taŋ-la ba sɩɩ yɩrɛ Jeriko. Ʋ sɩ bil taŋ-la gentine, ʋ bii-hɩaŋ ba sɩɩ yɩrɛ Abɩram sʋba nɛ, ʋ sɩ bɩra dɛrɛ taŋ-la a hɛ ʋ boi-baalaa, ʋ bii-katɩɩ ma ba sɩɩ yɩrɛ Segub sʋba nɛ. La TƖƖNA fa to Nuŋ nanʋala Josua lɛ a bʋl wɩɩŋ deeŋ nɛ faafaa kala.