1 KUOROO 14 - WƖA TENIŊ

Ahija bʋl wʋbɔŋŋɔɔ a tɩgɛ Jerobuam lɛ

¹ Bʋa-la tɩtɩa lɛ dɩ Jerobuam nanʋala Abija ka wɩɩlʋ.

² Jerobuam bʋla pɩ ʋ haala, “Kɛŋ ŋ tɩtɩa bɩrɩmɛ, dɩ nʋʋkala sɩ́ wuo jɩŋ arɩ ŋ nɛ, ka ŋ mʋ Sɩlɔ. Lee-la nɛ Wɩa wʋlaabʋlla Ahija hɛ. Ʋ nɛ bʋla pɩmɛ arɩ mɩ jaŋ dii Iziral tɩŋŋaa kuoruŋ.

³ Pɛ kɛŋ boroboroba fii, kɩŋkɛsɩmɛɛ mʋa arɩ tʋʋŋ loŋ a kaa mʋ pʋ, aŋ pɩɛsʋ dɩ ʋ dagɩŋ wɩɩ-la sɩ jaŋ ŋaa la nanʋal-la lɛ.”

⁴ Ŋɩɩ nɛ Jerobuam haala ŋaa wɩɩ-la ʋ sɩ bʋla, a sii mʋ Ahija dɩa Sɩlɔ lɛ. Bʋa-la lɛ dɩ Ahija hɩɛsa, ʋ sɩaa bɩra bɩ na.

⁵ Ama La TƖƖNA bʋla pɩ Ahija, “Jerobuam haala nɩɩ kɔ dɩ ʋ pɩɛsɩŋ wɩaa a mʋ tɩgɛ ʋ nanʋala sɩɩ wɩɩlʋ lɛ. Dɩ ʋ nɛ kɔ, ʋ jaŋ kɛŋ ʋ tɩtɩa bɩrɩmɛ arɩ ʋ ŋaa nʋʋ dɔŋ nɛ. Ʋ saa maga ŋ bʋl wɩalɩŋ mɩ sɩ jaŋ bʋla pɩŋ a pʋ.”

⁶ Ahija sɩ nɩɩ haal-la naasɩŋ dɔmɔ boiŋ niiŋ, ʋ bʋl, “Jerobuam haala, kʋ jʋʋ. Bɛɛ nɛ tɩɩ ŋ kɛŋ ŋ tɩtɩa bɩrɩmɛ arɩ ŋ ŋaa nʋʋ dɔŋ nɛ? Wʋbɔŋ nɛ mɩ kɛŋ dɩ mɩ bʋla pɩŋ.

⁷ Mʋ a bʋla pɩ Jerobuam arɩ wɩɩŋ deeŋ nɛ La TƖƖNA, Iziral tɩŋŋaa Wɩa bʋl, ‘Mɩ nɛ lɩɩsɩŋ mɩ nɩaa Iziral tɩŋŋaa tʋɔŋ a leŋ ŋ ŋaa ba sɩpaalaara.

⁸ Mɩ nɛ kɛŋ kuorii-la laa Devit doho nɩaa teeŋ a joŋo pɩŋ. Ama ŋ vɩa nɛ dɩ ŋ nagɛ mɩ tɩntɩnna Devit. Devit fa to wɩalɩŋ mɩ sɩ daga nɛ, a kɛŋ ʋ tʋɔŋ kala a to mɩ niiŋ a ŋaa wɩalɩŋ sɩ zɔmɔ dʋndʋŋ mɩ sɩpaaŋ.

⁹ Ŋ nɛ paala ŋaa wʋbɔŋŋɔɔ a kɩɩ nɩalɩŋ kala fa sɩ laa sɩpaaŋ dii kuoruŋ aŋ ka pɩŋ. Ŋ vɩamɛ nɛ, aŋ mɛ vesiŋ a pɩ ŋ tɩtɩa, a kɛŋ hɔɔŋ ma libi tɔŋŋɔɔ a kpʋkpaarɛ, a joŋ harɩŋ yɩamɛ, a ŋaa mɩ baanɩŋ sii.

¹⁰ A tɩŋ ŋ-la wɩaa, mɩ jaŋ chei Jerobuam doho nɩaa kala. Mɩ jaŋ kpʋ ʋ doho nʋʋkala sɩ ŋaa baal, nɩhɩasɩŋ arɩ hambiisiŋ kala, yosuŋ arɩ nɩalɩŋ sɩ bɩ yosuŋ ŋaa. Mɩ jaŋ dɛrɛ Jerobuam dɩa kala arɩ ba sɩ yie nyɩgɛ nɛ-bɩnɩŋ ʋ kala dii ŋɩɩ.

¹¹ Jerobuam naambiiri-la sɩ jaŋ sʋʋ jaŋ lɛ, vasɩŋ jaŋ dii ba kʋsʋʋnʋŋ, ka dɩ zaaraa ma dii nɩalɩŋ sɩ jaŋ sʋʋ gɩrɩŋ lɛ. La TƖƖNA nɛ bʋla.’

¹² Ŋ-na mɩɩra mʋ dɩa. Dɩ ŋ nɛ joŋ ŋ naaŋ nʋɔsɛ jaŋ lɛ dɛrɛ, ŋ nanʋal-la jaŋ sʋʋ.

¹³ Iziral tɩŋŋaa kala jaŋ yel ʋ yoho aŋ joŋu hugi. Ʋ dʋndʋŋa nɛ ŋaa Jerobuam nʋʋ ba sɩ jaŋ hugi, bɛɛ wɩaa ʋ dʋndʋŋa nyuŋ nɛ La TƖƖNA, Iziral tɩŋŋaa Wɩa tʋɔŋ tɔrɛ.

¹⁴ La TƖƖNA tɩtɩa jaŋ lɩɩsɛ ʋ kuoro dɩ ʋ bibeŋ Iziral. Ʋ nɛ jaŋ chei Jerobuam doho nɩaa kala. Tapʋlɩɩ-la nɛ jɩnɩŋ, ʋ nɛ bʋa deeŋ.

¹⁵ La TƖƖNA jaŋ dɔgɩsɛ Iziral tɩŋŋaa, ba jaŋ nagɛ yaŋ sɩ sagɛ lɩɩŋ nyuŋ a bibiegi. Ʋ jaŋ lɩɩsɛ Iziral tɩŋŋaa tintee-zɔmʋŋ deeŋ ʋ sɩ joŋo pɩ ba naabalɩmaba lɛ, a kɛmba pɩsɛ a mʋ kieli Yufireti fuo-la, bɛɛ wɩaa ba ŋaa vene-la ba sɩɩ yɩrɛ Asɩra daasɩŋ nɛ, a tutou a ŋaa La TƖƖNA baanɩŋ sii.

¹⁶ La TƖƖNA jaŋ vɩa Iziral tɩŋŋaa ta a tɩŋ wʋbɔmɔ-la Jerobuam sɩ ŋaa, a leŋ Iziral tɩŋŋaa ma pɛ ŋaaba.”

¹⁷ Ŋɩɩ nɛ Jerobuam haala sii a mɩɩra mʋ ʋ jaŋ Tɩɩza. Ʋ sɩ yie joŋ ʋ naaŋ a nʋɔsɛ ʋ dɩa boiŋ niiŋ dɩdɛrɛ, ʋ nanʋal-la sʋʋ.

¹⁸ Ba joŋu hugi, ka Iziral tɩŋŋaa kala yel ʋ yoho, arɩ La TƖƖNA sɩ to ʋ tɩntɩnna Ahija, ʋ wʋlaabʋllʋ-la lɛ a bʋl ŋɩɩ.

¹⁹ Wɩalɩŋ dɔnsʋŋ Jerobuam sɩ dii kuoruŋ a ŋaa, arɩ laala-la ʋ sɩ yuo, ba ŋmʋnsɛ ba kala nɛ a hɛ Iziral tɩŋŋaa kuoroo wʋŋaalaa teniŋ tʋɔŋ.

²⁰ Jerobuam fa dii kuoruŋ jɩsɩŋ mara arɩ balɩa nɛ aŋ sʋʋ, ka ʋ nanʋala Nadab laa ʋ nyuŋ a dii kuoruŋ.

Juda kuoro Rihobuam

²¹ Solomoŋ nanʋala Rihobuam fa ŋaa jɩsɩŋ mahɩŋ balɩa arɩ kʋbala nɛ, aŋ dii kuoruŋ Juda tinteeŋ lɛ a bemba jɩsɩŋ fii arɩ balɩpɛ. Ʋ fa hɔŋ Jerusalɛm lɛ nɛ, taŋ-la La TƖƖNA sɩ lɩɩsa Iziral doho doho-la kala tʋɔŋ dɩ ba mʋ nɩmɛ a dɩdɛnnʋ. Ʋ naaŋ yɩrɩŋ nɛ fa Naama, a ŋaa Amɔŋ tɩɩna.

²² Juda doho nɩaa ma fa ŋaa wʋbɔŋŋɔɔ nɛ La TƖƖNA sɩpaaŋ. Wʋbɔmɔ-la ba sɩ ŋaa nɛ paala kɩɩ wɩalɩŋ ba naabalɩmaba fa sɩ ŋaa. Ŋɩɩ leŋ La TƖƖNA yaraa bieri, ʋ na baanɩŋ woruŋ ba nyuŋ.

²³ Ba ma fa saa veŋ kpaarɛ leree nɛ, a bil tabɩa, a pɛ Asɩra daasɩŋ dundolluŋ nyuŋ arɩ tɩɩ-lugunuŋ bʋbʋɔŋ a kpʋkpaarɛ.

²⁴ Baalaa arɩ haalaa fa hɛ tintee-la lɛ a ŋɩŋaa wʋlɩɩlɩŋ lee-la ba sɩɩ kpaarɛ ba vesiŋ. Ba faa ŋaa wɩalɩŋ La TƖƖNA sɩɩ kɩsʋ nɛ, wɩalɩŋ nɩalɩŋ fa sɩ hɛ lee-la a ŋɩŋaa La TƖƖNA kiriba ta.

²⁵ Rihobuam sɩ dii kuoruŋ, ʋ jɩ-nɔŋ tʋɔŋ nɛ Ijipiti tinteeŋ kuoro Sɩsak kʋ yuo Jerusalɛm,

²⁶ a paa sɩɩfɩaŋ kɩalɩŋ kala sɩ hɛ La TƖƖNA dɩɩ-bal-la arɩ kuoru dɩa kala lɛ. Ʋ pɛ paa Solomoŋ fa sɩ kɛŋ sɛlɩmɛ libi hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ a kaa viiri.

²⁷ Ŋɩɩ nɛ kuoro Rihobuam leŋ ba kɛŋ kɔlɩɩŋ libi hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ, a hɛ sɛlɩmɛ kɩalɩŋ ba sɩ paa nyuŋ lɛ. Ʋ joŋ kɩalɩŋ hɛ laalɩyuori-hɩasɩ-la sɩɩ pɔ kuoru dɩa boiŋ niiŋ nɩsɩŋ lɛ.

²⁸ Bʋa na-kala dɩ kuoro nɩɩ mʋ La TƖƖNA dɩɩ-bal-la, nɩalɩŋ sɩɩ pɔ lee-la yie paa hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ a to ʋ harɩŋ nɛ. Dɩ ba nɛ ŋaa wɩaa dɛrɛ, ba bɩra mɩɩra kaa jʋʋ bil nɩalɩŋ sɩɩ pɔ leriŋ dɩa lɛ.

²⁹ Wɩalɩŋ dɔnsʋŋ Rihobuam sɩ dii kuoruŋ a ŋaa, ba kala nɛ ba ŋmʋnsa hɛ Juda kuoroo wʋŋaalaa teniŋ tʋɔŋ.

³⁰ Laalɩŋ fa hɛ Rihobuam arɩ Jerobuam pɛgɛ nɛ bʋa na-kala.

³¹ Ŋɩɩ nɛ Rihobuam sʋʋ, ba joŋu hugi Devit tabal-la lɛ ʋ nyɩmmaba tʋɔŋ. Ʋ naaŋ nɛ fa Naama, ʋ fa ŋaa Amɔŋ tɩɩna nɛ. Rihobuam sɩ sʋba, ʋ nanʋala Abija nɛ laa ʋ nyuŋ a dii kuoruŋ.