1 KUOROO 13 - WƖA TENIŊ

Wɩa wʋlaabʋlla sɩ lɩɩ Juda tinteeŋ

¹ Tapʋlɩɩ kʋbala nɛ La TƖƖNA tɩŋ ʋ wʋlaabʋlla ʋ lɩɩ Juda tinteeŋ a kɔ Bɛtɛl, dɩ Jerobuam chɩŋ koruŋ bʋbʋɔŋ dɩ ʋ ŋaa Wɩɩsʋlʋŋ.

² Wɩa wʋlaabʋllʋ-la ŋmoo niiŋ bʋl wɩalɩŋ La TƖƖNA sɩ bʋla a tɩgɛ koru-la lɛ: “Koruŋ, wɩɩ-la La TƖƖNA sɩ bʋla nɛ ŋ-la: ‘Ba jaŋ lʋl hambolibie Devit doho nɩaa tʋɔŋ a hɛ ʋ yɩrɩŋ Josaaya. Ʋ jaŋ kpʋ nɩalɩŋ kala ba sɩ lɩɩsa ba kpʋkpaarɩŋ a ŋɩŋaa Wɩɩsʋlʋŋ ŋ nyuŋ, aŋ nyɩgɛ nuhuobiine haŋgbelee ŋ nyuŋ.’ ”

³ Ŋɩɩ nɛ Wɩa wʋlaabʋllʋ-la bɩra bʋl: “Koruŋ deeŋ jaŋ yɛrɛ, dɩ tʋɔrʋ-la sɩ hɛ ʋ lɛ bɩsa jaasɛ, ŋɩɩ nɛ ŋ jaŋ jɩŋ arɩ La TƖƖNA nɛ to mɩ lɛ a bʋl wɩaa deemba.”

⁴ Kuoro Jerobuam sɩ nɩɩ wɩɩ-la Wɩa wʋlaabʋllʋ-la sɩ bʋla a tɩgɛ koru-la sɩ hɛ Bɛtɛl lɛ, ʋ chɩŋ koru-la bʋbʋɔŋ aŋ kɛŋ nɩsɩŋ tɩɛna chaasɛ baal-la aŋ bʋl, “Má kɛŋ baal-la.” Nɩsɩ-la ʋ sɩ kaa tɩɛna chaasɛ baal-la terigi, ʋ bɩra bɩ wuo kaa kʋʋrɛ.

⁵ Koru-la ma yɛrɛ, ʋ tʋɔrʋŋ bɩsa jaasɛ arɩ ŋɩɩ Wɩa wʋlaabʋllʋ-la sɩ bʋla La TƖƖNA yɩrɩŋ lɛ.

⁶ Ŋɩɩ nɛ kuoro bʋla pɩ Wɩa wʋlaabʋllʋ-la, “Mɩɩ sʋlʋŋ, sʋl ŋ Tɩɩna Wɩa pɩmɛ dɩ ʋ leŋ dɩ mɩ nɩsɩ-la fɩɛlɛ.” Wɩa wʋlaabʋllʋ-la sʋl La TƖƖNA pʋ, ʋ leŋ kuoro nɩsɩŋ fɩɛlɛ a nagɛ ŋɩɩ ʋ fa sɩ naga.

⁷ Kuoro Jerobuam bɩra bʋla pɩ Wɩa wʋlaabʋllʋ-la, “Kɔ dɩ la mʋ mɩ dɩa a dii kɩaa, ka dɩ mɩ joŋ kʋŋ a dii zile ŋ lɛ.”

⁸ Ama Wɩa wʋlaabʋllʋ-la bʋla pɩ kuoro, “Dɩ ŋ nɛ jaŋ paala joŋ kɩalɩŋ kala ŋ sɩ kɛnɛ kpaa magɛ dɔŋɔ ma pɩmɛ, mɩ bɩ jaŋ to ŋ harɩŋ mʋ, mɩ bɩ jaŋ dii kʋŋ koo a nyʋa kʋŋ daha,

⁹ bɛɛ wɩaa La TƖƖNA bʋla pɩmɛ nɛ: ‘Ŋ bɩ maga dɩ ŋ dii kʋŋ koo a nyʋa lɩɩŋ koo a bɩra to wombii-la ŋ sɩ to kɔ.’ ”

¹⁰ Ŋɩɩ nɛ ʋ mɩɩra joŋ wombii dɔŋ, aŋ vɩa wombii-la ʋ sɩ to kɔ Bɛtɛl.

¹¹ Bʋa deeŋ lɛ, dɩ Wɩa wʋlaabʋllʋ-hɩaŋ kʋbala hɛ Bɛtɛl lɛ. Ʋ hambolibiisiŋ bʋl wɩalɩŋ kala Wɩa wʋlaabʋllʋ-la sɩ ŋaa tapʋlɩɩ-la a pʋ. Ba bɩra bʋla pɩ ba nyɩmma wɩalɩŋ kala baal-la sɩ bʋla pɩ kuoru-la.

¹² Ba nyɩmma pɩɛsɛba, “Wombii bɛɛ nɛ ʋ to viiri?” Ʋ hambolibiisi-la dagʋ wombii-la Wɩa wʋlaabʋllʋ-la sɩ lɩɩ Juda sɩ joŋo viiri.

¹³ Ŋɩɩ nɛ ʋ bʋla pɩ ʋ hambolibiisi-la, “Má kpɩɛrɛ kakumo pɩmɛ.” Ba sɩ kpɩɛrɛ kakumo-la pʋ, ʋ jɩl a

¹⁴ kiri Wɩa wʋlaabʋllʋ-la harɩŋ. Ʋ mʋ naʋ dɩ ʋ hɔŋ piiŋ tɩa kʋbala sɩ kɛŋ fɩɛlɩŋ bʋbʋɔŋ. Ʋ pɩɛsʋ, “Ŋ nɛ Wɩa wʋlaabʋllʋ-la sɩ lɩɩ Juda kɔɔ?” Baal-la bʋl, “Mɩ nɛ.”

¹⁵ Ŋɩɩ nɛ Wɩa wʋlaabʋllʋ-hɩaŋ-la bʋla pʋ, “Kɔ dɩ la mʋ mɩ dɩa dɩ ŋ dii kɩaa.”

¹⁶ Wɩa wʋlaabʋllʋ-la sɩ, “Mɩ bɩ jaŋ wuo mɩɩra to ŋ harɩŋ mʋ. Mɩ bɩ jaŋ wuo dii kʋŋ koo a nyʋa kʋŋ daha.

¹⁷ La TƖƖNA bʋla pɩmɛ nɛ arɩ ʋ bɩ maga dɩ mɩ dii kʋŋ koo a nyʋa kʋŋ koo a bɩra to wombii-la mɩ sɩ to kɔ.”

¹⁸ Wɩa wʋlaabʋllʋ-hɩaŋ-la sɩ, “Mɩ ma ŋaa Wɩa wʋlaabʋllʋ nɛ. Wɩa tɩndaara bʋla pɩmɛ nɛ arɩ La TƖƖNA sɩ, ‘Kɛnʋ mɩɩra mʋ ŋ dɩa dɩ ʋ dii kɩaa aŋ nyʋa lɩɩŋ.’ ” Ama baal-la faa nyɩɛ nɛ.

¹⁹ Ŋɩɩ nɛ Wɩa wʋlaabʋllʋ-la mɩɩra to ʋ harɩŋ ba mʋ ʋ dɩa, ʋ dii kɩaa aŋ nyʋa lɩɩŋ ma.

²⁰ Ba sɩ hɔnɔ didii kɩaa ŋɩɩ, La TƖƖNA bʋl wɩaa a pɩ ʋ wʋlaabʋllʋ-hɩaŋ-la sɩ kɛnʋ mɩɩra kɔ.

²¹ Ʋ ŋmoo niiŋ a bʋla pɩ Wɩa wʋlaabʋllʋ-la sɩ lɩɩ Juda kɔ, “La TƖƖNA sɩ ŋ vɩa ʋ niiŋ nɛ a bɩ wɩalɩŋ ʋ sɩ dagɩŋ to.

²² Ʋ fa sɩ ŋ sɩ́ kɩaa dii nɛ daha, ka ŋ vɩa aŋ mɩɩra to mɩ harɩŋ kʋ dii kɩaa a nyʋa lɩɩŋ daha. Ŋɩɩ wɩaa ba bɩ jaŋ hugi ŋ kʋsʋʋŋ ŋ nyɩmmaba dɩ-huguŋ.”

²³ Wɩa wʋlaabʋllʋ-la sɩ dii kɩalɩŋ aŋ nyʋa lɩɩŋ dɛrɛ, Wɩa wʋlaabʋllʋ-hɩaŋ-la sɩ kɛnʋ mɩɩra kɔ, sii kpɩɛrɛ kakumo pʋ.

²⁴ Ʋ sɩ jɩl kakumo-la a mʋmʋ, naachigiŋ kʋ chemu a kpʋʋ. Ʋ kʋsʋʋŋ pɩŋ wombiiŋ lɛ, ka kakumo-la arɩ naachigi-la chɩŋ ʋ sɛmɛ.

²⁵ Nɩaa dɔnsʋŋ sɩ to lee-la bɩbal, ba na ʋ kʋsʋʋŋ dɩ ʋ pɩna, ka naachigi-la ma chɩŋ ʋ sɛmɛ. Ŋɩɩ nɛ ba mʋ Bɛtɛl lee-la Wɩa wʋlaabʋllʋ-hɩaŋ-la sɩ hɛ a bʋl wɩɩ-la ba sɩ na a pɩ nɩaa.

²⁶ Wɩa wʋlaabʋllʋ-hɩaŋ-la sɩ kɛŋ Wɩa wʋlaabʋllʋ-la wombiiŋ lɛ mɩɩra kɔ sɩ nɩɩ wɩɩ-la, ʋ bʋl, “Wɩa wʋlaabʋllʋ-la sɩ lɩɩ Juda vɩa La TƖƖNA niiŋ nɛ. La TƖƖNA nɛ joŋu hɛ naachigiŋ lɛ ʋ kpʋʋ. La TƖƖNA fa kpʋrɩsɛ ʋ dɩgɩlaa nɛ ka ʋ bɩ nɩa.”

²⁷ Wɩa wʋlaabʋllʋ hɩaŋ-la bʋla pɩ ʋ hambolibiisiŋ, “Má kpɩɛrɛ kakumo pɩmɛ.” Ŋɩɩ nɛ ba kpɩɛra pʋ.

²⁸ Ʋ jɩla mʋ na ʋ kʋsʋʋŋ dɩ ʋ pɩŋ wombiiŋ lɛ, ka kakumo arɩ naachigiŋ chɩŋ ʋ sɛmɛ. Naachigi-la bɩ ʋ chaŋa, ʋ bɩ kakumo-la ma kpʋa.

²⁹ Ŋɩɩ nɛ Wɩa wʋlaabʋllʋ hɩaŋ-la joŋ baal-la kʋsʋʋŋ, a daŋ ʋ kakumo nyuŋ, a kɛnʋ mɩɩra kɔ Bɛtɛl a yel ʋ yoho aŋ joŋo hugi.

³⁰ Ʋ joŋu hugi ʋ tɩtɩa bʋa lɛ, aŋ yel a bʋl, “Mɩ naambii ba.”

³¹ Ʋ sɩ hugu dɛrɛ, ʋ bʋla pɩ ʋ hambolibiisiŋ, “Dɩ mɩ nɛ sʋba, má hugimi bʋa-la lɛ mɩ sɩ hugi Wɩa wʋlaabʋllʋ-la, dɩ la pɛ bʋa bala.

³² Wɩalɩŋ kala La TƖƖNA sɩ to ʋ lɛ a bʋl a tɩgɛ koru-la sɩ hɛ Bɛtɛl arɩ veŋ-kpaarɛ lere-la kala sɩ hɛ Samarɩa tasɩ-la lɛ, sɛnɛ jaŋ kʋ ŋaa wʋtɩtɩɩ.”

³³ Wɩaa deemba harɩŋ lɛ, Jerobuam ha bɩ wʋbɔŋŋɔɔ ŋaanɩŋ leŋe, aŋ ha lɩɩsɛ nʋʋ na-kala yee ba kpʋkpaarɛ vesi-la ʋ sɩ saa. Nʋʋkala sɩ cho dɩ ʋ ŋaa veŋ-kpaarʋ, ʋ yie kɛnʋ hɛ nɛ.

³⁴ Wʋbɔŋŋɔɔ deemba nɛ Jerobuam ŋaa, ʋ kuoruŋ arɩ ʋ doho nɩaa kala yagɩsɛ ŋɩɩ.