1 KUOROO 12 - WƖA TENIŊ

Iziral nɩaa lɩɩ Rehobuam harɩŋ

¹ Ŋɩɩ nɛ Rihobuam sii mʋ taŋ-la ba sɩɩ yɩrɛ Sɛkɛm. Iziral tɩŋŋaa kala fa mʋ nɩmɛ nɛ dɩ ba bilu kuoruŋ.

² Nɛbat nanʋala Jerobuam sɩ nɩɩ wɩɩ-la, bʋa-la lɛ dɩ ʋ lɩɩ fá Solomoŋ nɩsɩŋ lɛ a mʋ hɛ Ijipiti tinteeŋ lɛ. Ŋɩɩ nɛ ʋ mɩɩra lɩɩ Ijipiti tinteeŋ kɔ.

³ Ŋɩɩ nɛ ba tɩma yɩrɛ Jerobuam, ʋ dɩ Iziral tɩŋŋaa kala to dɔŋɔ a mʋ Rihobuam leriŋ a bʋla pʋ:

⁴ “Ŋ nyɩmma fa fʋgɛla hɛ nɛ la tɩŋ tɩntɩŋ-duoruŋ woruŋ, ama dɩ ŋ nɛ bɩ jaŋ leŋ dɩ la tɩŋ tɩntɩŋ duoru-la doho, ŋɩɩ-na la jaŋ sɛɩ a toŋ a tɩma pɩpɩŋ.”

⁵ Rihobuam bʋla pɩba, “Má mʋ aŋ mɩɩra kɔ tapʋl tori chɛɛŋ.” Nɩalɩŋ mɩɩra viiri.

⁶ Ŋɩɩ nɛ kuoro Rihobuam pɩɛsɛ nɩhɩasɩ-la fa sɩ tɩma pɩ ʋ nyɩmma Solomoŋ ʋ mɩɩsɩŋ bʋa lɛ, “Wʋbɛɛ nɛ ma jaŋ dagɛmɛ dɩ mɩ bʋla pɩ nɩaa deemba?”

⁷ Nɩhɩasɩ-la sɩ, “Dɩ ŋ nɩɩ chɛ dɩ nɩaa deemba toŋ a tɩma pɩpɩŋ, kɛŋ zile ba teeŋ a ŋaa wɩɩ-la ba sɩɩ chɛ pɩba jɩnɩŋ.”

⁸ Ŋɩɩ nɛ Rihobuam vɩa wɩɩ-la nɩhɩasɩ-la sɩ dagʋ, aŋ mɩɩra mʋ pɩɛsɛ bapʋɔsɩa-la sɩ ŋaa ʋ wielee aŋ lɛɛlɛ tɩma pʋpʋ.

⁹ Ʋ pɩɛsɛba, “Wʋbɛɛ nɛ ma ma kɛŋ dɩ ma bʋl? Wʋbɛɛ nɛ la jaŋ bʋla pɩ nɩalɩŋ sɩ sɩ mɩ lɩɩsɛba tɩntɩŋ-duoru-la lɛ mɩ nyɩmma sɩ jomba hɛ?”

¹⁰ Ŋɩɩ nɛ ʋ bapʋɔsɩa-la bʋl, “Bʋla pɩ nɩalɩŋ sɩɩ ŋmɛŋ ŋ teeŋ arɩ ŋ nenii-bie nɛ paala barɩma kɩɩ ŋ nyɩmma tɩŋa. (Ʋ bʋbʋɔŋ nɛ, ʋ tʋɔŋ nɛ paala hɛyɛ kɩɩ ʋ nyɩmma.)

¹¹ Bʋla pɩba arɩ ŋ nyɩmma leŋe ba tɩŋ tɩntɩŋ-duoruŋ nɛ, ama ŋ jaŋ leŋ dɩ ba wasa tɩŋ tɩntɩŋ-duoruŋ a kɩɩ ŋɩɩ. Ŋ nyɩmma vɩɩrɛba arɩ kpaasa nɛ, ama ŋ-na jaŋ joŋ hɔɔnʋŋ a hɛ kpaasɩ-biee niiriŋ lɛ a kaa vɩɩrɛba.”

¹² Tapʋlaa batori harɩŋ, Jerobuam arɩ nɩalɩŋ kala mɩɩra kɔ Rihobuam teeŋ, arɩ ŋɩɩ ʋ sɩ bʋla.

¹³ Rihobuam vɩa wɩɩ-la nɩhɩasɩ-la sɩ dagʋ, aŋ bʋl wɩaa kpɩa nɩalɩŋ lɛ arɩ baanɩŋ,

¹⁴ aŋ to wɩɩ-la ʋ bapʋɔsɩa-la sɩ dagʋ a bʋl, “Mɩ nyɩmma leŋe ma tɩŋ tɩntɩŋ-duoruŋ nɛ, ama mɩ-na jaŋ leŋ dɩ ma wasa tɩŋ tɩntɩŋ-duoruŋ a kɩɩ ŋɩɩ. Mɩ nyɩmma vɩɩrɛma arɩ kpaasa nɛ, ama mɩ-na jaŋ joŋ hɔɔnʋŋ a hɛ kpaasɩ-bie-la niiriŋ lɛ a kaa vɩɩrɛma.”

¹⁵ La TƖƖNA faa chɛ dɩ wɩɩ-la ʋ sɩ to ʋ wʋlaabʋlla Ahija sɩ lɩɩ Sɩlɔ lɛ a bʋla pɩ Nɛbat nanʋala Jerobuam kʋ ŋaa nɛ. Ŋɩɩ nɛ tɩɩ kuoro bɩ nɩhɩasɩ-la niiŋ jegile nɩɩ ŋɩɩ.

¹⁶ Iziral tɩmma-la kala sɩ na dɩ kuoro bɩ ba teeŋ jegile nɩɩ, ba ma bʋl: “La dɩ Jesi nanʋala Devit doho nɩaa bɩ wɩɩ pɛ. Iziral tɩmma, má leŋ dɩ la mɩɩra mʋ la dɩɩsɩŋ, ka dɩ Rihobuam bibeŋ ʋ nɩaa.” Ŋɩɩ nɛ Iziral tɩŋŋaa mʋ ba dɩɩsɩŋ.

¹⁷ Ama Iziral tɩmma-la fa sɩ hɔŋ tasɩ-la sɩ hɛ Juda tinteeŋ lɛ, Rihobuam nɛ faa bemba.

¹⁸ Ŋɩɩ nɛ kuoro Rihobuam tɩŋ Adoniram, nɩɩ-la fa sɩɩ beŋ nɩalɩŋ ba sɩ fʋga hɛ ba tɩtɩŋ dɩ ʋ bʋl wɩaa pɩ nɩalɩŋ, ama Iziral tɩŋŋaa kala kʋ lɩɩ yagʋ arɩ tabɩaa ʋ sʋʋ. Ka kuoro Rihobuam-na wuo fá a mʋ jʋʋ ʋ laalɩŋ jaaba toruko a fá mʋ Jerusalɛm.

¹⁹ A chɩŋ bʋa-la lɛ a kaa kɔ, Iziral doho doho-la kala sɩ hɛ wɩɩpɔsʋŋ nagʋa arɩ Devit doho nɩaa bɩ dɔŋɔ lɛ wuo arɩ jɩnɩŋ kala.

²⁰ Iziral tɩmma-la kala sɩ nɩa arɩ Jerobuam mɩɩra kɔ nɛ, ba tɩma yɩrʋ ʋ kɔ ba hilimi a bilu kuoruŋ ʋ bibeŋ Iziral tinteeŋ. Juda doho nɩaa dʋndʋŋa nɛ fa haa to Devit doho nɩaa.

²¹ Rihobuam sɩ mɩɩra kɔ Jerusalɛm, ʋ yɩrɛ Juda arɩ Bɛnjamɩŋ doho nɩaa laalɩyuoroo bʋɩ zɔlɔ arɩ mahɩŋ banɛsɛ hɛ dɔŋɔ, dɩ ba mʋ yuo Iziral tɩmma-la dɔnsʋŋ a laa kuorii-la pɩ Solomoŋ nanʋala Rihobuam.

²² Ama Wɩa fa bʋla pɩ Sɛmaaya sɩ ŋaa Wɩa wʋlaabʋllʋ,

²³ “Bʋla pɩ Solomoŋ nanʋala Rihobuam sɩ ŋaa Juda kuoro a pɛ Juda arɩ Bɛnjamɩŋ doho nɩaa arɩ nɩkaana-la kala lɛ,

²⁴ arɩ mɩ-na ma TƖƖNA sɩ: ‘Ma pʋpɔ má sɩ́ ma naambiiriŋ Iziral tɩŋŋaa yuo. Má mʋ ma dɩɩsɩŋ, mɩ nɛ leŋe wɩɩŋ deeŋ ŋaa.’ ” Ba sɛɩ La TƖƖNA niiŋ a mɩɩra mʋ dɩa.

Ba kɛŋ sɛlɩmɛ libi nɛ-biisiŋ balɩa bil Bɛtɛl arɩ Daŋ tinteeŋ lɛ

²⁵ Ŋɩɩ nɛ Jerobuam saa kɛrɛ a golli taŋ-la ba sɩɩ yɩrɛ Sɛkɛm sɩ hɛ Efirem tintee-la peelee sɩ yʋga lɛ a hɔŋ nɩmɛ. Ʋ bɩra lɩɩ nɩmɛ a mʋ saa kɛrɛ a golli taŋ-la ba sɩɩ yɩrɛ Pɛnɩɛl ma.

²⁶ Jerobuam fa bɩɩna nɛ ʋ tʋɔŋ lɛ a bʋl, “Kuoruŋ deeŋ lɛɛlɛ jaŋ bɩra wuo mɩɩra kʋ jʋʋ Devit doho nɩaa nɩsɩŋ.

²⁷ Dɩ nɩaa deemba nɛ mʋ La TƖƖNA dɩɩ-bal-la sɩ hɛ Jerusalɛm lɛ a sʋl Wɩɩsʋlʋŋ, ba jaŋ mɩɩra kʋ to ba nɩhɩaŋ Rihobuam sɩ ŋaa Juda kuoro. Ba jaŋ kpʋmɛ aŋ tutou.”

²⁸ Ŋɩɩ nɛ Jerobuam pɩɛsɛ nɩaa ba dagʋ wɩaa. Ʋ kɛŋ sɛlɩmɛ libi kɩaa balɩa sɩ nagɛ nɛ-bel-biisiŋ, aŋ bʋla pɩ ʋ nɩaa, “Ma jaŋ walɩmɛ ma tɩtɩa, ma sɩ jaŋ mʋ Jerusalɛm a dɩdɛnnɛ La TƖƖNA. Iziral tɩmma, má na vesi-la sɩ laama ta Ijipiti tinteeŋ lɛ a kɛmma kaa kʋ lɩɩ nɛ ŋ-la.”

²⁹ Ʋ joŋ dɔŋɔ a bil taŋ-la ba sɩɩ yɩrɛ Bɛtɛl lɛ aŋ joŋ dɔŋɔ ma a bil Daŋ tinteeŋ lɛ.

³⁰ Iziral tɩmma-la yie mʋ Bɛtɛl arɩ Daŋ a kpʋkpaarɛ vesi-la, ʋ ŋɩɩ ŋaa wʋbɔŋ.

³¹ Jerobuam ha bɩra saa vesiŋ dɩ-kpaaraa nɛ a lɩɩsɛ nɩaa sɩ bɩ Levi doho nɩaa ŋaa ba kpʋkpaarɛ vesi-la.

³² Ʋ bil gbiele a pɩ nɩalɩŋ ba gbigbieli jɩna tʋɔŋ chɛŋ chori tapʋlaa fii arɩ banɔŋ chɛɛŋ, a nagɛ gbiele-la ba sɩ yie gbieli Juda lɛ a kpʋ pʋsʋŋ a sʋl Wɩɩsʋllɩ koruŋ lɛ. Bɛtɛl lɛ, ʋ kpʋ pʋsʋŋ a sʋl Wɩɩsʋlʋŋ kɩalɩŋ ʋ sɩ libe ba nagɛ nɛ-biisiŋ lɛ, aŋ bɩra lɩɩsɛ nɩaa ba ŋaa veŋ-kpaaraa lee-la.

³³ Chɛŋ chori tapʋlaa fii arɩ banɔŋ-la ʋ sɩ lɩɩsa pɩ Iziral tɩŋŋaa lɛ, ʋ ma tɩtɩa yie mʋ kpʋ pʋsʋŋ nɛ koru-la ʋ sɩ saa Bɛtɛl lɛ a ŋaa Wɩɩsʋlʋŋ a gbieli gbiele-la.