1 KUOROO 11 - WƖA TENIŊ

Solomoŋ haalaa

¹ Kuoro Solomoŋ fa cho ha-nʋhʋɔraa nɛ woruŋ a pɛ Ijipiti tinteeŋ kuoro tolo-la ʋ sɩ jaa lɛ. Ʋ fa cho Mʋab tɩŋŋaa toloo nɛ arɩ Amɔŋ tɩŋŋaa toloo arɩ Ɛdɔm tɩŋŋaa toloo arɩ Sɩdɔŋ tɩŋŋaa toloo arɩ Hiti tɩŋŋaa toloo.

² Tinteyee deemba toloo nɛ La TƖƖNA fa bʋla pɩ Iziral tɩŋŋaa arɩ ba sɩ́ jaa, bɛɛ wɩaa ba jaŋ kɛŋ Iziral tɩŋŋaa tʋɔbɩɩnaa bɩrɩmɛ dɩ ba tuto ba vesiŋ. Ka Solomoŋ vɩa aŋ choba.

³ Ʋ haalaa zɔɔ-balɩpɛ nɛ fa ŋaa kuoroo toloo, ʋ haala-la ma ʋ sɩ bile aŋ bɩ jaa ŋaa zɔɔ-batori. Ʋ haala-la leŋ ʋ yeŋŋi Wɩa wombiiŋ lɛ.

⁴ Solomoŋ sɩ kʋ hɩɛsɛ, ʋ haala-la bɩrɩmɛ ʋ tʋɔbɩɩnaa, ʋ mɩɩra tuto vesiŋ. Ʋ fa bɩ ʋ tɩtɩa kala joŋo pɩ ʋ TƖƖNA Wɩa, arɩ ʋ nyɩmma Devit fa sɩ ŋaa ŋɩɩ.

⁵ Ʋ mɩɩra kpʋkpaarɛ Sɩdɔŋ tɩŋŋaa veŋ-haal-la ba sɩɩ yɩrɛ Asɩtɔrɛf arɩ Amɔŋ tɩŋŋaa veŋ-bɔŋ-la ba sɩɩ yɩrɛ Mɔlɛk nɛ.

⁶ Ŋɩɩ nɛ Solomoŋ ŋaa wʋbɔŋŋɔɔ La TƖƖNA teeŋ, ʋ bɩ La TƖƖNA to arɩ ʋ tʋɔŋ kala arɩ ʋ nyɩmma Devit fa sɩ to ŋɩɩ.

⁷ Jerusalɛm wɩɩpɔsʋŋ dundolo kʋbala nyuŋ, Solomoŋ ŋaa wʋkɩsɩɩ a saa vʋɩyaa dɩ-kpaarɩŋ, a kpʋkpaarɛ Mʋab tɩŋŋaa vene-la ba sɩɩ yɩrɛ Chɛmɔs arɩ Amɔŋ tɩŋŋaa veŋ-bɔŋ-la ba sɩɩ yɩrɛ Mɔlɛk.

⁸ Ŋɩɩ tɩtɩa nɛ ʋ ŋaa a pɩ ʋ ha-nʋhʋɔra-la ma ʋ sɩ jaa, ba kpʋ pʋsʋŋ a kpʋkpaarɛ ba vesiŋ a nyɩgɛ kʋsʋɔrʋsʋŋ pɩpɩba.

⁹ Ŋɩɩ nɛ La TƖƖNA na baanɩŋ Solomoŋ nyuŋ, a tɩŋ ʋ tʋɔbɩɩna-la sɩ bɩrɩma lɩɩ La TƖƖNA, Iziral tɩŋŋaa Wɩa lɛ, Nɩɩ-la fa sɩ kɛŋ ʋ tɩtɩa kʋ dagʋ bʋlɩa kala.

¹⁰ La TƖƖNA fa sɩ Solomoŋ sɩ́ vesiŋ to nɛ, ka ʋ vɩa.

¹¹ Ŋɩɩ nɛ La TƖƖNA bʋla pɩ Solomoŋ, “Ŋ mɛlɛ sɩ folo nagɛ ŋ-la, ŋ bɩ nii-la mɩ sɩ bile arɩ wɩalɩŋ mɩ sɩ dagɩŋ to, mɩ jaŋ kɛŋ ŋ kuoruŋ laa a joŋo pɩ ŋ tɩntɩnnaa dɔŋɔ.

¹² Ama, a tɩŋ ŋ nyɩmma Devit wɩaa, mɩ bɩ jaŋ ŋaa ŋɩɩ dɩ ŋ ha hɛ ŋ mɩɩsɩŋ lɛ. Ŋ nanʋala nɩsɩŋ lɛ nɛ mɩ jaŋ ŋaa wɩɩ-la.

¹³ Mɩ bɩ jaŋ laa kuorii-la kala ʋ teeŋ, ama mɩ jaŋ leŋ doho bala pʋ dɩ ʋ bibeŋ, a tɩŋ mɩ tɩntɩnna Devit arɩ Jerusalɛm mɩ sɩ lɩɩsa wɩaa.”

Solomoŋ dʋndɔŋŋɔɔ

¹⁴ Ŋɩɩ nɛ La TƖƖNA leŋ Ɛdɔm tɩŋŋaa kuoru bii kʋbala baa yɩrɛ Hadad bɩrɩmɛ Solomoŋ dʋndɔŋ a chɩŋ ʋ lɛ.

¹⁵ Devit fa sɩ yuo dii Ɛdɔm tɩŋŋaa, ʋ laalɩyuori-hɩaŋ Jʋab mʋ nɩmɛ nɛ dɩ ʋ hugi nɩalɩŋ ba sɩ kpʋa laalɩŋ lɛ.

¹⁶ Jʋab arɩ Iziral tɩŋŋaa laalɩyuoroo kala fa hɔŋ Ɛdɔm lɛ chɛnsɩŋ balɩdʋ nɛ a kpʋ Ɛdɔm tɩŋŋaa baalaa kala, nɩhɩasɩŋ arɩ hambiisiŋ kala.

¹⁷ Ama dɩ Hadad-na fa ha ŋaa bii-bie, ʋ fá to Ɛdɔm tɩŋŋaa tɩntɩnnɩ-hɩasɩ-la dɔnsʋŋ fa sɩ tɩma pɩpɩ ʋ nyɩmma harɩŋ a mʋ Ijipiti tinteeŋ.

¹⁸ Ba lɩɩ Ɛdɔm tinteeŋ nɛ a mʋ Midiaŋ tinteeŋ a joŋo mʋ lee-la ba sɩɩ yɩrɛ Paraŋ. Nɩaa dɔnsʋŋ lɩɩ Paraŋ lɛ a to ba harɩŋ ba mʋ Ijipiti tinteeŋ kuoro teeŋ, ʋ pɩ Hadad dɩa arɩ tinteeŋ arɩ kʋdiilee.

¹⁹ Ijipiti tinteeŋ kuoro fa cho Hadad wɩaa nɛ woruŋ, a joŋ ʋ haala ba sɩɩ yɩrɛ Tapɛnɛs ŋaana pʋ ʋ jaa.

²⁰ Tapɛnɛs ŋaaŋ-la arɩ Hadad lʋl hambolibie a hɛ ʋ yɩrɩŋ Genubaf. Tapɛnɛs kɛŋ bile mʋ kuoro dɩa a dɩɛsʋ. Genubaf arɩ Ijipiti tinteeŋ kuoro biiriŋ kala fa hɛ dɩ-bala nɛ.

²¹ Hadad fa sɩ hɛ Ijipiti tinteeŋ lɛ, ʋ nɩɩ arɩ Devit sʋba, ʋ laalɩyuori-hɩaŋ Jʋab ma sʋʋ. Ŋɩɩ nɛ Hadad bʋla pɩ Ijipiti tinteeŋ kuoro, “Leŋ dɩ mɩ mɩɩra mʋ mɩ tinteeŋ.”

²² Ijipiti tinteeŋ kuoro pɩɛsʋ, “Bɛɛ kʋŋ nɛ ŋ chɛ ka daha a chɩchɛ dɩ ŋ mɩɩra mʋ ŋ tinteeŋ?” Hadad bʋl, “Kʋŋkala dee, ama leŋ dɩ mɩ mʋ.”

²³ Wɩa bɩra leŋ Ɛlɩada nanʋala Rɛzɔŋ ŋaa Solomoŋ dʋndɔŋ. Rɛzɔŋ fa lɩɩ fá nɛ ʋ nɩhɩaŋ Hadadɛza sɩ ŋaa Zɔba kuoro teeŋ.

²⁴ Devit sɩ yuo dii Hadadɛza arɩ ʋ nɩaa kala a cheiba, Rɛzɔŋ sii chɛ kɛsɛ wʋcheeree hɛ dɔŋɔ a ŋaa ba sɩpaalaara. Ba mʋ hɔŋ Damasɩkʋs lɛ, ʋ ŋaa ba kuoro.

²⁵ Solomoŋ mɩɩsɩŋ kala lɛ, Rɛzɔŋ fa ŋaa Iziral tɩŋŋaa dʋndɔŋ nɛ, a hɩhɛ wɩaa arɩ Hadad fa sɩɩ ŋaa ŋɩɩ. Rɛzɔŋ fa ŋaa Siiria kuoro nɛ.

Jerobuam vɩa Solomoŋ niiŋ

²⁶ Nɛbat nanʋala Jerobuam ma bɩra vɩa kuoro Solomoŋ niiŋ. Ʋ fa ŋaa Solomoŋ tɩntɩnnɩ-hɩasɩŋ dɔŋɔ nɛ, a ŋaa Efirem tɩɩna a lɩɩ Zɛrɛda. Ʋ naaŋ yɩrɩŋ nɛ Zɛrʋa, ʋ fa ŋaa yo-haal nɛ.

²⁷ Wɩɩ-la sɩ tɩɩ ʋ vɩa kuoro niiŋ nɛ ŋ-la: Solomoŋ fa leŋe ba chʋŋ hagɩla nɛ a dɩŋ buotuonuŋ Jerusalɛm wɩɩpɔsʋŋ dɩɩrɩŋ aŋ wasa sɩsaa kɛrɛ-la sɩ golli taŋ-la.

²⁸ Bʋa-la lɛ dɩ Jerobuam fa ŋaa bapʋɔsɩɩ a chaasa tɩtɩŋ woruŋ. Solomoŋ sɩ na dɩ ʋ faasa tɩtɩŋ ŋɩɩ, ʋ leŋ ʋ nɛ ŋaa Manasɛ arɩ Efirem doho nɩalɩŋ ba sɩ fʋga hɛ ba tɩtɩŋ tɩntɩmɩa-la nɩhɩaŋ.

²⁹ Tapʋlɩɩ kʋbala Jerobuam lɩlɩɩ Jerusalɛm lɛ, a mʋ cheŋ Wɩa wʋlaabʋllʋ-la ba sɩɩ yɩrɛ Ahija wombiiŋ lɛ, dɩ ʋ laalɛ gɛrɩ-falɩŋ. Ahija lɩɩ taŋ-la ba sɩɩ yɩrɛ Sɩlɔ nɛ. Ba balɩa dʋndʋŋa nɛ fa hɛ wombii-la.

³⁰ Ahija kɛŋ gɛrɩ-falɩɩ-la ʋ sɩ laala wuri, a kaa kɩɛsɛ leree fii arɩ balɩa.

³¹ Ŋɩɩ nɛ aŋ bʋla pɩ Jerobuam, “Paa leree fii a kɛŋ, bɛɛ wɩaa La TƖƖNA, Iziral tɩŋŋaa Wɩa sɩ, ‘Bee na, mɩ jaŋ laa Solomoŋ kuorii-la a joŋ doho doho fii-la a pɩŋ dɩ ŋ bibeŋ.

³² Ama a tɩŋ mɩ tɩntɩnna Devit arɩ Jerusalɛm wɩaa, taŋ-la mɩ sɩ lɩɩsa Iziral doho doho kala tʋɔŋ, ʋ jaŋ bibeŋ doho bala.

³³ Mɩ jaŋ ŋaa wɩɩŋ deeŋ, bɛɛ wɩaa Solomoŋ arɩ Iziral tɩŋŋaa vɩamɛ nɛ aŋ kpʋkpaarɛ Sɩdɔŋ tɩŋŋaa vene-la ba sɩɩ yɩrɛ Asɩtɔrɛf, arɩ Mʋab tɩŋŋaa vene Chɛmɔs, arɩ Amɔŋ tɩŋŋaa vene Mɔlɛk. Solomoŋ bɩ mɩ wombiee to, a bɩ wɩalɩŋ mɩ sɩɩ chɛ ŋaa arɩ ʋ nyɩmma Devit sɩ ŋaa ŋɩɩ.

³⁴ Ama mɩ bɩ jaŋ kɛŋ kuorii-la kala laa Solomoŋ nɩsɩŋ lɛ. Mɩ leŋe ʋ dii kuoruŋ ʋ mɩɩsɩŋ kala lɛ nɛ, a tɩŋ mɩ tɩntɩnna Devit mɩ sɩ lɩɩsa ʋ to mɩ wombiee arɩ wɩalɩŋ kala mɩ sɩ daga wɩaa.

³⁵ Mɩ jaŋ laa kuorii-la ʋ nanʋala nɩsɩŋ lɛ a joŋ doho doho fii-la pɩŋ dɩ ŋ bibeŋ.

³⁶ Mɩ jaŋ joŋ doho bala pɩ ʋ nanʋala dɩ ʋ bibeŋ, dɩ mɩ tɩntɩnna Devit doho nɩaa ha wuo didii kuoruŋ Jerusalɛm lɛ, taŋ-la mɩ sɩ lɩɩsa dɩ ba dɩdɛnnɛmɛ nɩmɛ.

³⁷ Ama ŋ-na, ŋ jaŋ dii kuoruŋ Iziral tinteeŋ lɛ, a bibeŋ lere-la kala ŋ sɩ cho.

³⁸ Dɩ ŋ nɛ ŋaa wɩalɩŋ kala mɩ sɩ dagɩŋ, a to mɩ wombiee a ŋaa wɩaa ba bʋa lɛ mɩ sɩpaaŋ a kɛŋ wɩalɩŋ kala mɩ sɩ daga a kaa tɩtɩŋ arɩ mɩ tɩntɩnna Devit fa sɩ ŋaa ŋɩɩ, mɩ jaŋ hɛ ŋ teeŋ bʋa na-kala. Mɩ jaŋ leŋ ŋ dɩ ŋ doho nɩaa didii kuoruŋ Iziral tinteeŋ lɛ bʋa na-kala, arɩ mɩ sɩ leŋe Devit doho nɩaa didii kuoruŋ ŋɩɩ. Iziral tinteeŋ kala jaŋ hɛ ŋ nɩsɩŋ lɛ.

³⁹ Mɩ jaŋ dɔgɩsɛ Devit doho nɩaa a tɩŋ Solomoŋ wʋbɔmɔ-la wɩaa, ama mɩ bɩ jaŋ dɔgɩsɛba a kaa mʋ wuu.’ ”

⁴⁰ Ŋɩɩ nɛ Solomoŋ wʋwalɩmɛ dɩ ʋ kpʋ Jerobuam. Ama ʋ lɩɩ fá mʋ Ijipiti tinteeŋ kuoru kʋbala ba sɩɩ yɩrɛ Sɩsak teeŋ, a hɔŋ nɩmɛ ŋɩɩ Solomoŋ mʋ sʋʋ.

Solomoŋ sʋʋŋ

⁴¹ Wɩalɩŋ dɔnsʋŋ Solomoŋ sɩ dii kuoruŋ a ŋaa, arɩ wʋjɩmɩɩ-la ʋ sɩ kɛnɛ kala nɛ ba ŋmʋnsa hɛ ʋ wʋŋaalaa teniŋ tʋɔŋ.

⁴² Kuoro Solomoŋ hɔŋ Jerusalɛm lɛ, a beŋ Iziral tɩŋŋaa jɩsɩŋ mahɩŋ balɩa nɛ.

⁴³ Ŋɩɩ nɛ ʋ sʋʋ, ba joŋu hugi Jerusalɛm lɛ, Devit tabal-la, ka ʋ nanʋala Rihobuam dii kuoruŋ ʋ nyuŋ lɛ.