1 KUOROO 1 - WƖA TENIŊ

Adonija bil ʋ tɩtɩa kuoruŋ

¹ Kuoro Devit fa sɩ faasa kʋ hɩɛsɛ, dɩ ba nɛ paala joŋ gɛrɩ-bɔsʋnʋŋ tɔʋ ma, waarɩŋ ha yie kɛnʋ nɛ.

² Ŋɩɩ nɛ ʋ tɩntɩnnaa fa bʋla pʋ, “Kuoro, leŋ dɩ la chɛ hatolo ha sɩ bɩ baal jɩŋ a kaa kɔ dɩ ʋ hɛ ŋ teeŋ a bibeniŋ. Ʋ jaŋ pɩŋ ŋ sɛmɛ a tɔ lɩmɩŋ hɩhɛ ŋ lɛ.”

³ Ŋɩɩ nɛ ba fa beŋ Iziral tinteeŋ kala lɛ a chɩchɛ hatol-zɔmʋŋ, a mʋ na tolo kʋbala baa yɩrɛ Abɩsak. Ʋ hɛ taŋ-la ba sɩɩ yɩrɛ Sunami lɛ nɛ. Ba kɛnʋ kaa kʋ pɩ kuoro Devit.

⁴ Tolo-la fa zɔmɔ nɛ woruŋ. Ʋ kɔ a bibeŋ kuoro. Ama ʋ dɩ tolo-la fa bɩ bɔsɔ ka pɛ.

⁵ Bʋa kʋbala lɛ, Adonija sɩ ŋaa Devit arɩ Hagɩf nanʋala, sii bigisi ʋ tɩtɩa lɛ a bʋl, “Mɩ jaŋ bil mɩ tɩtɩa kuoruŋ.” Ŋɩɩ nɛ ʋ sii chɛ laalɩŋ janɩŋ torukoba arɩ janɩŋ, arɩ baalaa mahɩŋ balɩa arɩ fii sɩ jaŋ laa ʋ sɩpaaŋ.

⁶ Ama Adonija nyɩmma Devit ha maachie bɩ ʋ wɩɩ pɩɛsa a mʋ tɩgɛ ʋ wʋŋaalaa lɛ. Adonija fa zɔmɔ nɛ woruŋ, ʋ malɩma nɛ Abɩsalɔm.

⁷ Ŋɩɩ nɛ Adonija sii mʋ na Zeruya nanʋala Jʋab arɩ Abɩata sɩ ŋaa Wɩɩsʋllɩ sɩpaalaara, ba chɩŋ ʋ harɩŋ.

⁸ Ama Wɩɩsʋllɩ sɩpaalaara Zadɔk arɩ Jehoyada nanʋala Benaaya, Netaŋ sɩ ŋaa Wɩa wʋlaabʋlla, a saa pɛ Sɩmɛɩ arɩ Rɛɩ arɩ laalɩyuoro-la sɩɩ pɔ kuoro Devit, ba-na bɩ Adonija harɩŋ chɩna.

⁹ Ŋɩɩ nɛ Adonija kpʋ piesee, nɛ-belliŋ, nɛ-pɔrɔɔ sɩ nɛrɛ a ŋaa Wɩɩsʋlʋŋ Dɩmɩŋ tabɩɩ-la lɛ, a kpagɛ Ɛŋ-Rɔgɛl. Ŋɩɩ nɛ ʋ yɩrɛ ʋ naambiiriŋ kala sɩ ŋaa kuoro biiriŋ, a pɛ Juda baala-la kala sɩ ŋaa kuoro tɩntɩnnɩ-hɩasɩŋ.

¹⁰ Ama ʋ bɩ Netaŋ sɩ ŋaa Wɩa wʋlaabʋllʋ yɩra, a pɛ Benaaya arɩ laalɩyuoro-la sɩɩ pɔ kuoro arɩ ʋ naambie Solomoŋ lɛ.

¹¹ Netaŋ sɩ nɩɩ wɩɩ-la, ʋ pɩɛsɛ Solomoŋ naaŋ Bafɩsɛba, “Ŋ bɩ nɩa arɩ Hagɩf nanʋala Adonija bil ʋ tɩtɩa kuoruŋ nɛ ka la nɩhɩaŋ Devit jɩma tuo?

¹² Lɛɛlɛ, leŋ dɩ mɩ dagɩŋ wɩɩ ŋ sɩ jaŋ to a laa ŋ dɩ ŋ nanʋala Solomoŋ kala mɩɩsɩŋ.

¹³ Mʋ kuoro Devit teeŋ a pɩɛsʋ, ‘Mɩ kʋhɩaŋ, ŋ dee bɩ ŋmɩɛsa pɩmɛ arɩ mɩ nanʋala Solomoŋ nɛ jaŋ laa ŋ nyuŋ a dii kuoruŋ? Bɛɛ nɛ saa tɩɩ Adonija mɩɩra dii kuoruŋ?’

¹⁴ Bʋa-la lɛ ŋ sɩ jaŋ hɛ kuoro teeŋ a bʋbʋl wɩɩ-la, mɩ ma jaŋ kʋ jʋʋ a bʋl wɩɩ-la tɩtɩa a pʋ.”

¹⁵ Ŋɩɩ nɛ Bafɩsɛba mʋ dɩ ʋ na kuoro ʋ dɩɩ-pɩnɩŋ lɛ. Kuoro Devit fa hɩɛsa nɛ woruŋ, Abɩsak sɩ lɩɩ Sunami nɛ faa benu.

¹⁶ Bafɩsɛba sɩ mʋa, ʋ tuu kpirimi kuoro Devit sɩpaaŋ. Ŋɩɩ nɛ kuoro pɩɛsʋ, “Bɛɛ kʋŋ nɛ ŋ chɩchɛ?”

¹⁷ Ʋ bʋla pʋ, “Mɩ kʋhɩaŋ, ŋ ŋmɩɛsɛ La TƖƖNA ŋ Wɩa a pɩ mɩ-na ŋ tɩntɩnna nɛ arɩ ŋ nanʋala Solomoŋ nɛ jaŋ laa ŋ nyuŋ a dii kuoruŋ.

¹⁸ Ama lɛɛlɛ, Adonija paala dii kuoruŋ nɛ ka ŋ bɩ ŋɩɩ lɛ jɩŋ.

¹⁹ Ʋ kpʋ nɛ-belliŋ yʋgɛ nɛ woruŋ, piesee, nɛ-pɔrɔɔ sɩ nɛrɛ a ŋaa Wɩɩsʋlʋŋ, aŋ yɩrɛ ŋ-na kuoro hambolibiisiŋ kala, a pɛ Abɩata sɩ ŋaa Wɩɩsʋllɩ sɩpaalaara lɛ, arɩ Jʋab ŋ laalɩyuoroo kʋhɩaŋ. Ama ʋ bɩ ŋ nanʋala Solomoŋ-na yɩra.

²⁰ Mɩ kʋhɩaŋ, Iziral tɩŋŋaa kala sɩaa pɛ ŋ lɛ nɛ, dɩ ŋ dagɛba nɩɩ-la sɩ jaŋ laa ŋ nyuŋ a dii kuoruŋ.

²¹ Dɩ ŋɩɩ dee, dɩ ŋ nɛ sʋba, ba jaŋ ŋaa wɩaa mɩ-na arɩ mɩ nanʋala Solomoŋ lɛ a nagɛ la ŋaa nɩbɔmɔ nɛ.”

²² Bʋa-la lɛ Bɛfɩsɛba ha sɩɩ bʋl wɩaa kuoro teeŋ, dɩ Wɩa wʋlaabʋlla Netaŋ ma kɔ lee-la.

²³ Ŋɩɩ nɛ ba bʋla pɩ kuoro, “Wɩa wʋlaabʋlla Netaŋ kɔ daha nɛ.” Ŋɩɩ nɛ Netaŋ mʋ kuoro sɩpaaŋ a tuu kpirimi,

²⁴ aŋ pɩɛsɛ, “Kuoro mɩ kʋhɩaŋ, ŋ nɛ bʋla arɩ Adonija jaŋ laa ŋ nyuŋ a dii kuoruŋ?

²⁵ Jɩnɩŋ ʋ kpʋ nɛ-belliŋ yʋgɛ nɛ woruŋ, piesee arɩ nɛ-pɔrɔɔ sɩ nɛrɛ a ŋaa Wɩɩsʋlʋŋ. Ʋ yɩrɛ ŋ-na kuoro hambolibiisiŋ kala nɛ, a pɛ ŋ laalɩyuoroo nɩhɩasɩŋ arɩ Wɩɩsʋllɩ sɩpaalaara Abɩata lɛ. Bʋa deeŋ lɛ nɩaa deemba kala hɛ ʋ teeŋ a didii kɩaa aŋ pɛ nyʋnyʋa kɩaa aŋ ŋaa goŋ a bʋbʋl, ‘Wɩa jaŋ leŋ dɩ kuoro Adonija mɩɩsɩŋ duomi.’

²⁶ Ama mɩ-na ŋ tɩntɩnna, arɩ Zadɔk sɩ ŋaa Wɩɩsʋllɩ sɩpaalaara, arɩ Jehoyada nanʋala Benaaya arɩ ŋ nanʋala Solomoŋ nɛ ʋ bɩ yɩra.

²⁷ Kuoro, ŋ nɛ ŋaa wɩɩŋ deeŋ aŋ bɩ bʋla pɩ ŋ tɩntɩnnaa dɩ ba jɩŋ nɩɩ-la sɩ jaŋ laa ŋ nyuŋ a dii kuoruŋ?”

Devit leŋe Solomoŋ dii kuoruŋ

²⁸ Ŋɩɩ nɛ kuoro Devit bʋl, “Má yɩrɛ Bafɩsɛba dɩ ʋ kʋ jʋʋ.” Ŋɩɩ nɛ ʋ kʋ jʋʋ a chɩŋ kuoro sɩpaaŋ.

²⁹ Kuoro ŋmɩɛsɛ a bʋl, “La TƖƖNA sɩ weye wɩaa, Nɩɩ-la sɩ lɩɩsɛmɛ wʋwalɩmɩɩ kala lɛ,

³⁰ wɩɩ-la mɩ sɩ hɛ niiŋ La TƖƖNA Iziral tɩŋŋaa Wɩa yɩrɩŋ lɛ a pɩŋ, mɩ jaŋ ŋaaʋ jɩnɩŋ. Ŋ nanʋala Solomoŋ nɛ jaŋ laa mɩ nyuŋ a dii kuoruŋ.”

³¹ Ŋɩɩ nɛ Bafɩsɛba tuu kpirimi kuoro sɩpaaŋ aŋ bʋl, “A leŋ mɩ kʋhɩaŋ kuoro Devit mɩɩsɩŋ duomi.”

³² Kuoro Devit bʋl, “Má yɩrɛ Wɩɩsʋllɩ sɩpaalaara Zadɔk, arɩ Netaŋ, Wɩa wʋlaabʋllʋ-la arɩ Jehoyada nanʋala Benaaya dɩ ba kɔ.” Ba sɩ kɔ kuoro sɩpaaŋ,

³³ ʋ bʋla pɩba, “Má kɛsɛ mɩ tɩntɩnnaa dɩ ma kɛŋ mɩ nanʋala Solomoŋ a leŋ dɩ ʋ jɩl mɩ kakumo dɩ ma kɛnʋ mʋ Gɩhɔŋ lɩɩ-bulo-la leriŋ.

³⁴ Nɩmɛ nɛ Wɩɩsʋllɩ sɩpaalaara Zadɔk arɩ Netaŋ, Wɩa wʋlaabʋllʋ-la jaŋ lɩɩsʋ dɩ ʋ ŋaa Iziral kuoro. Má ŋmʋʋ banyile, a kpɩa goŋ bʋl, ‘A leŋ dɩ kuoro Solomoŋ mɩɩsɩŋ duomi.’

³⁵ Ŋɩɩ nɛ ma jaŋ kɛnʋ mʋ, aŋ kɛnʋ mɩɩra kɔ daha dɩ ʋ hɔŋ mɩ kuoru kpasa lɛ a laa mɩ nyuŋ. Mɩ nɛ lɩɩsʋ dɩ ʋ dii kuoruŋ Iziral arɩ Juda tinteeŋ kala lɛ.”

³⁶ Jehoyada nanʋala Benaaya bʋla pɩ kuoro, “La jaŋ ŋaa ŋɩɩ ŋ sɩ daga! A leŋ dɩ ŋ TƖƖNA Wɩa leŋ dɩ wɩɩ-la ŋ sɩ bʋla chɩŋ.

³⁷ La TƖƖNA fa chɩŋ ŋ harɩŋ nɛ woruŋ, a leŋ dɩ ʋ chɩŋ Solomoŋ harɩŋ a kɩɩ ŋɩɩ, dɩ ʋ kuoruŋ yʋga kɩɩ ŋ kʋa.”

³⁸ Ŋɩɩ nɛ Wɩɩsʋllɩ sɩpaalaara Zadɔk arɩ Wɩa wʋlaabʋlla Netaŋ arɩ Jehoyada nanʋala Benaaya arɩ laalɩyuoro-la sɩɩ pɔ kuoro Devit, ba sii tuu a leŋ Solomoŋ jɩl Devit kakumo, ba kɛnʋ kaa mʋ Gɩhɔŋ lɩɩ-bulo-la leriŋ.

³⁹ Nɩmɛ nɛ Zadɔk sɩ ŋaa Wɩɩsʋllɩ sɩpaalaara joŋ nʋʋŋ arɩ nyile ʋ sɩ joŋo Wɩa lɛbɩŋ tʋɔŋ a bɩsa hɛ Solomoŋ lɛ. Ŋɩɩ nɛ ba ŋmʋʋ banyile, nɩalɩŋ kala kpɩa goŋ a bʋl, “A leŋ dɩ kuoro Solomoŋ mɩɩsɩŋ duomi.”

⁴⁰ Ŋɩɩ nɛ nɩalɩŋ kala to Solomoŋ harɩŋ a ŋmʋʋ ŋmʋlaa aŋ faasa jʋɔsa ŋɩŋaa goŋ, tinteeŋ paala jijigisi.

⁴¹ Adonija arɩ nɩalɩŋ kala ʋ fa sɩ yɩra dii kɩaa aŋ gbiele dɩdɛrɛ nɛ aŋ nɩɩ goŋ-la. Jʋab sɩ nɩɩ banyile-la ba sɩɩ ŋmʋʋ, ʋ pɩɛsɛ, “Bɛɛ kʋŋ goŋ nɛ baa ŋaa jaŋ lɛ ŋɩɩ?”

⁴² Ʋ fa sɩɩ bʋl ŋɩɩ, dɩ Abɩata sɩ ŋaa Wɩɩsʋllɩ sɩpaalaara nanʋala Jonataŋ kɔ. Adonija yɩrʋ, “Kʋ jʋʋ. Ŋ-na sɩɩfɩaŋ tɩɩna deeŋ sɩɩ kɔ ŋ-la, ʋ naga wʋzɔŋ nɛ ŋ kaa kɔ.”

⁴³ Jonataŋ bʋla pɩ Adonija, “Wʋzɔŋ dee mɩ kaa kɔ. Kuoro Devit leŋe Solomoŋ nɛ dii kuoruŋ.

⁴⁴ Devit leŋe Zadɔk sɩ ŋaa Wɩɩsʋllɩ sɩpaalaara arɩ Wɩa wʋlaabʋlla Netaŋ arɩ Jehoyada nanʋala Benaaya arɩ laalɩyuoro-la sɩɩ pɔ kuoro nɛ to Solomoŋ harɩŋ a leŋ ʋ jɩl kuoro kakumo,

⁴⁵ ka Zadɔk, arɩ Netaŋ joŋ nʋʋŋ tɩsʋ ʋ dii kuoruŋ Gɩhɔŋ lɛ. Ŋɩɩ nɛ ka ba jʋʋ jaŋ tʋɔŋ, a jʋɔsa ŋɩŋaa goŋ. Goŋ-la ŋ sɩ nɩa nɛ ŋɩɩ.

⁴⁶ Solomoŋ nɛ lɛɛlɛ ŋaa kuoro.

⁴⁷ Kuoro tɩntɩnnɩ-hɩasɩ-la kala nɛ kʋ lɔllɛ la nɩhɩaŋ kuoro Devit aŋ bʋl, ‘A leŋ dɩ ŋ Wɩa ŋaa dɩ Solomoŋ yɩrɩŋ sii a kɩɩ ŋ kʋa, dɩ ʋ kuoruŋ ma yʋgɛ a kɩɩ ŋ kʋa.’ Kuoro Devit ma kpirimi ʋ bɔsɔ lɛ a dɛnnɛ La TƖƖNA

⁴⁸ a bʋl, ‘Mɩɩ dɛnnɛ La TƖƖNA Iziral tɩŋŋaa Wɩa, jɩnɩŋ ʋ sɩ leŋe mɩ doho nʋʋ laa mɩ nyuŋ a dii kuoruŋ a leŋ mɩ sɩɩŋ naʋ.’ ”

⁴⁹ Nɩalɩŋ kala Adonija sɩ yɩra sɩ nɩɩ wɩɩŋ deeŋ, fawʋllʋŋ kɛmba. Ba guu sii pɩsɛ.

⁵⁰ Fawʋllʋŋ fa sɩ kɛŋ Adonija ma tɩtɩa ŋɩɩ a tɩŋ Solomoŋ wɩaa, ʋ sii jʋʋ La TƖƖNA lɛbɩ-la tʋɔŋ a kɛŋ Wɩɩsʋllɩ koruŋ gʋnaa lɛ.

⁵¹ Ŋɩɩ nɛ nʋʋ bʋla pɩ kuoro Solomoŋ arɩ fawʋllʋŋ kɛŋ Adonija nɛ a tɩŋ ʋ wɩaa, ʋ jʋʋ kɛŋ Wɩɩsʋllɩ koru-la gʋnaa lɛ aŋ bʋl, “Má leŋ dɩ Solomoŋ ŋmɩɛsa pɩmɛ jɩnɩŋ arɩ ʋ bɩ jaŋ kpʋmɛ.”

⁵² Solomoŋ bʋl, “Dɩ ʋ wɩaa nɛ zɔmɔ, ʋ nyu-pʋŋ ma bɩ jaŋ churo tel tinteeŋ, ama dɩ ʋ nɛ kɛŋ tʋɔbɩɩŋ bɔmɔ, ʋ maga dɩ ʋ sʋʋ nɛ.”

⁵³ Ŋɩɩ nɛ kuoro Solomoŋ tɩŋ ba mʋ kɛnʋ lɩɩ koru-la nyuŋ a kɔ. Ʋ kɔ a kpirimi kuoro Solomoŋ sɩpaaŋ. Solomoŋ bʋla pʋ, “Sii mʋ dɩa.”