1 SAMƲƐL 8 - WƖA TENIŊ

Iziral tɩŋŋaa sɩ baa chɛ kuoro nɛ

¹ Samʋɛl sɩ kʋ hɩɛsɛ, ʋ lɩɩsɛ ʋ hambolibiisiŋ nɛ ba ŋaa Iziral tɩŋŋaa sɩpaalaaraa.

² Ʋ bii-bumbuŋ yɩrɩŋ nɛ Jowɛl, bii-lɩa ma yɩrɩŋ nɛ Abija. Ba kala fa hɛ Bɛɛsɩba lɛ nɛ a ŋaa ba sɩpaalaaraa.

³ Ama ʋ biiriŋ deemba wʋŋaalaa fa bɩ ba nyɩmma wombiee lɛ to. Ba mɩɩra chɩl kɩaa wɩaa nɛ, aa gʋrɛ nɩaa, a lɩlaa kpalaa a bɩ wʋtɩtɩɩ ka bʋl.

⁴ Ŋɩɩ nɛ Iziral tɩŋŋaa nɩhɩasɩŋ kala sii hɛ dɔŋɔ lɛ a mʋ Samʋɛl teeŋ Rama lɛ,

⁵ a bʋla pʋ, “Ŋ hɩɛsa nɛ, ka ŋ biiriŋ wʋŋaalaa bɩ ŋ wombiee lɛ ka to, ŋɩɩ wɩaa lɩɩsɛ kuoro pɩla dɩ ʋ laa la sɩpaaŋ arɩ tinteye-la dɔnsʋŋ kala sɩ kɛŋ kuoroo ŋɩɩ.”

⁶ Ba sɩ sɩ, “Lɩɩsɛ kuoro pɩla dɩ ʋ laa la sɩpaaŋ,” ŋɩɩ leŋ Samʋɛl tʋɔŋ chei, ʋ sʋl La TƖƖNA.

⁷ Ŋɩɩ nɛ La TƖƖNA bʋla pʋ, “Jegile nɩɩ wɩalɩŋ kala nɩalɩŋ sɩ bʋlaa pɩŋ. Ŋ dee ba vɩa, mɩ-na sɩ ŋaa ba kuoro nɛ ba vɩa ŋɩɩ.

⁸ A chɩŋ tapʋlɩɩ-la lɛ mɩ sɩ kɛmba lɩɩ Ijipiti tinteeŋ lɛ a kaa kɔ jɩnɩŋ, ba vɩamɛ nɛ aŋ tuto vesiŋ, ŋɩɩ tɩtɩa nɛ ba joŋo ŋɩŋaa ŋ ma lɛ ŋɩɩ.

⁹ Ŋ-na jegile nɩɩ ba teeŋ, ama kpʋrɩsɛ ba dɩgɩlaa woruŋ, a leŋ dɩ ba jɩŋ wɩalɩŋ kala kuoru-la sɩ jaŋ joŋo ŋaa ba lɛ.”

¹⁰ Ŋɩɩ nɛ Samʋɛl bʋl wɩalɩŋ kala La TƖƖNA sɩ bʋla pʋ a pɩ nɩalɩŋ sɩ pɩɛsʋ a chɩchɛ dɩ ʋ lɩɩsɛ kuoro pɩba.

¹¹ Ʋ sɩ, “Wɩalɩŋ kuoru-la sɩ jaŋ bibemma sɩ jaŋ joŋo ŋaa ma lɛ nɛ ŋ-la: Ʋ jaŋ leŋ dɩ ma hambolibiisiŋ ŋaa ʋ laalɩyuoroo, dɔnsʋŋ jaŋ kɛŋ ʋ laalɩŋ janɩŋ torukoba tɩtɩŋ, dɩ dɔnsʋŋ ma jɩjɩl ʋ laalɩŋ janɩŋ, ka dɩ ʋ lɩɩsɛ dɔnsʋŋ ma dɩ ba laa ʋ tɩtɩa janɩŋ torukoba sɩpaaŋ a fɩfá.

¹² Ʋ jaŋ leŋ dɩ ba dɔnsʋŋ ŋaa laalɩyuoroo bʋɩba nɩhɩasɩŋ a bibemba, dɩ dɔnsʋŋ ma bibeŋ laalɩyuoroo mahɩŋ balɩa arɩ fiiba. Ka dɩ dɔnsʋŋ ma pɩpɛrɛ ʋ baga lɛ, a ŋaa ʋ baga kɩaa pʋpʋ. Ba dɔnsʋŋ ma nɛ ha jaŋ lilibi ʋ laalɩyuori kɩaa arɩ ʋ janɩŋ torukoba kɩaa kala.

¹³ Ʋ jaŋ leŋ dɩ ma toloo nɛ ŋɩŋaa ʋ tʋlaalɩɩba, ʋ kʋdiilee, aŋ pɛ wʋwasɛ ʋ boroboro ma.

¹⁴ Ʋ jaŋ kɛŋ ma bagɩsɩ-la sɩ sɩma arɩ ma girep tɩɩsɩŋ bagɩsɩŋ arɩ ma Olif tɩɩsɩŋ bagɩsɩŋ kala sɩ zɔmɔ laa ma teeŋ, a joŋo pɩ ʋ tɩntɩnnaa.

¹⁵ Ʋ jaŋ leŋ dɩ ma kɛŋ ma mɩaa arɩ ma girep nɛnɛɛ kpaa leree fii, dɩ ʋ laa kpaalɩŋ dɔŋɔ a pɩ ʋ tɩntɩnnɩ-hɩasɩŋ arɩ ʋ tɩntɩnnaa dɔnsʋŋ.

¹⁶ Ma tɩntɩnnɩ-baalaa arɩ haalaa arɩ ma nɛsɩŋ arɩ kakusu-la sɩ zɔmɔ, ʋ jaŋ laa ba kala dɩ ba tɩmaa pʋ.

¹⁷ Ʋ jaŋ laa ma piesee arɩ bʋʋnaa fii na-kala tʋɔŋ kʋbala, ka dɩ ma tɩtɩa ŋaa ʋ yosi.

¹⁸ Dɩ tapʋlɩɩ-la nɛ yie, ma jaŋ yele chɩchɛ dɩ La TƖƖNA laama ta kuoru-la ma sɩɩ chɛ nɩsɩŋ lɛ, ka dɩ ʋ fʋʋla yagɛma.”

¹⁹ Ama nɩalɩŋ bɩ wɩɩ-la Samʋɛl sɩ bʋla jegile nɩɩ, aŋ bʋl, “Aɩ, laa chɛ kuoro nɛ dɩ ʋ bibenla.

²⁰ Laa chɛ kuoro nɛ dɩ ʋ bibenla a laa la sɩpaaŋ a kɛnla mʋ dɩ la yuyuo laalɩŋ, dɩ la ma nagɛ tinteye-la dɔnsʋŋ.”

²¹ Samʋɛl sɩ nɩɩ wɩalɩŋ kala nɩalɩŋ sɩ bʋla, ʋ bɩra mʋ bʋl wɩalɩŋ kala a pɩ La TƖƖNA.

²² La TƖƖNA bʋl, “Jegile nɩɩ ba teeŋ a lɩɩsɛ kuoro pɩba.” Ŋɩɩ nɛ Samʋɛl bʋla pɩ Iziral baala-la kala, “Má kʋŋkala mɩɩra mʋ ŋ jaŋ.”