1 SAMƲƐL 6 - WƖA TENIŊ

Ba kɛŋ Wɩa niiriŋ daga-la mɩɩra mʋ Iziral

¹ La TƖƖNA niiriŋ daga-la fa sɩ hɛ Fɩlɩsɩtɩa tinteeŋ lɛ a mʋ yi chɛnsɩŋ balɩpɛ,

² ŋɩɩ harɩŋ nɛ Fɩlɩsɩtɩa tɩŋŋaa sii yɩrɛ nɩalɩŋ sɩɩ kpaarɛ ba vʋɩyaa arɩ vʋgʋraa kala kʋ hɛ dɔŋɔ a pɩɛsɛba, “Ɛɛ nɛ la jaŋ ŋaa La TƖƖNA niiriŋ daga-la? Má dagɛla ŋɩɩ la sɩ jaŋ to a kɛnʋ mʋ bil ʋ dɩ-biliŋ.”

³ Ba bʋl, “Dɩ ma nɩɩ chɛ ma kɛŋ Iziral tɩŋŋaa Wɩa niiriŋ daga-la mɩɩra mʋ, ma bɩ maga ma kɛnʋ mʋ arɩ na-hɩllɩŋ. Ʋ maga dɩ ma chɛ cheeriŋ Wɩɩsʋlʋŋ kɩaa pɛ nɛ a kaa mʋ pʋ. Dɩ ma nɛ ŋaa ŋɩɩ, ma jaŋ na dɩ ma duoro, aŋ pɛ bɩra jɩŋ wɩɩ-la ma sɩ tɩɩ ʋ dʋdɔgɩsɛma.”

⁴ Ŋɩɩ nɛ Fɩlɩsɩtɩa tɩmma-la bɩra pɩɛsɛ, “Bɛɛ kɩaa nɛ la jaŋ chɛ a kaa mʋ sʋl cheeriŋ Wɩɩsʋlɩɩ-la a pʋ?” Ba sɩ, “Má kɛŋ sɛlɩmɛ a mɛ kɩaa banɔŋ sɩ nagɛ mɔpʋllʋŋ, a bɩra kɛŋ sɛlɩmɛ-la tɩtɩa a mɛ kɩaa dɩ ba nagɛ taatɩaa, ba ma banɔŋ, a chesi Fɩlɩsɩtɩa tɩŋŋaa kuorusu-la sɩɩ bemma niiŋ, bɛɛ wɩaa, nyanyal-bɔmɔ-la jʋʋ ma dɩ ma kuorusu-la kala nɛ.

⁵ Ʋ maga dɩ ma mɛ kɩalɩŋ sɩ nagɛ mɔpʋllʋŋ, a bɩra mɛ kɩalɩŋ sɩ nagɛ taatɩaa. Kɩaa deemba nɛ jʋʋ chichei ma tinteeŋ. Má kɛmba kaa mʋ zil Iziral tɩŋŋaa Wɩa. Kapo ʋ jaŋ leŋ ma dɩ ma vesiŋ arɩ ma tinteeŋ kala dɔgʋsʋŋ.

⁶ Bɛɛ nɛ tɩɩ ma kɛŋ tʋɔ-doluŋ arɩ Ijipiti tɩŋŋaa a nagɛ ba kuoro fa sɩ ŋaa ŋɩɩ? Bʋa-la lɛ Wɩa sɩ dɔgɩsɛba ba na hɛɛŋ woruŋ, ba bɩrɩmɛ ba tʋɔbɩɩnaa nɛ a leŋ Iziral tɩŋŋaa viiri.

⁷ Lɛɛlɛ, má ŋaa nɛsɩŋ toruko-falɩŋ, a kɛsɛ nɛsɩŋ balɩa sɩ kɛŋ biiriŋ aŋ ha bɩ toruko lɛrɛ aŋ ka. Má kɛsɛba a joŋ toruko-la hɛba, aŋ kɛrɛ ba biiriŋ mʋ tɔ nɛ-dɩa lɛ.

⁸ Má joŋ Iziral tɩŋŋaa Wɩa niiriŋ daga-la daŋ toruko-la nyuŋ, a joŋ sɛlɩmɛ kɩalɩŋ sɩ ŋaa ma cheeriŋ Wɩɩsʋlʋŋ kɩaa, ma sɩ kaa mʋmʋ ma pʋ, a hɛ dagɩ-bie lɛ a joŋo bil Wɩa niiriŋ daga-la sɛmɛ. Má kaa lɩɩ ta dɩ ʋ mʋ ʋ tɩtɩa lɛ.

⁹ Ama, má chɩŋ a bibeŋ, dɩ ʋ nɛ to lee-la ʋ sɩ lɩɩ kɔ, a mʋ taŋ-la ba sɩɩ yɩrɛ Bɛf Sɛmɛs dɩɩrɩŋ, ŋɩɩ daga arɩ La TƖƖNA nɛ joŋ nyanyal-bɔmɔ-la hɛ la lɛ. Ama dɩ ʋ nɛ bɩ nɩmɛ to, la jaŋ bɩra jɩŋ arɩ ʋ dee bɩ nyanyal-bɔmɔ-la joŋo hɛ la lɛ, ba ma ta paala jʋʋla nɛ.”

¹⁰ Ŋɩɩ nɛ nɩalɩŋ ŋaa ŋɩɩ ba sɩ daga, a kɛsɛ nɛsɩ-la a joŋ toruko hɛba, aŋ kɛrɛ ba biiriŋ tɔ nɛ-dɩa lɛ.

¹¹ Ba joŋ La TƖƖNA niiriŋ daga-la arɩ dagɩ-bie-la tʋɔŋ sɛlɩmɛ taatɩa-la arɩ mɔpʋllʋ-la sɩ hɛ kala daŋ toruko-la nyuŋ.

¹² Ŋɩɩ nɛ nɛsɩ-la joŋ wombiiŋ ŋɩɩ tegi tegi a tʋʋlɛ Bɛf Sɛmɛs dɩɩrɩŋ mʋmʋ aŋ yiyel. Ba bɩ nadiiŋ koo nagʋa gɛbɛ. Fɩlɩsɩtɩa tɩŋŋaa kuorusu-la to ba harɩŋ ŋɩɩ halɩɩ a mʋ yi Bɛf Sɛmɛs tinteeŋ bʋa.

¹³ Bʋa-la lɛ dɩ Bɛf Sɛmɛs tɩŋŋaa ka kʋŋ mɛmpɛ fuonaaŋ lɛ. Ba sɩ bee na Wɩa niiriŋ daga-la, ba tʋɔŋ kala tɔrɛ.

¹⁴ Ŋɩɩ nɛ toruko-la kʋ jʋʋ Bɛf Sɛmɛs tɩŋŋaa baal kʋbala ba sɩɩ yɩrɛ Josua baga, a mʋ chɩŋ bʋ-bal kʋbala sɛmɛ. Ŋɩɩ nɛ nɩalɩŋ ŋmoo nɛsɩŋ toruko-la daborusuŋ yɛrɛ, aŋ kpʋ nɛsɩ-la ma a sʋl kʋnyɩgaa Wɩɩsʋlʋŋ a pɩ La TƖƖNA.

¹⁵ Levi doho nɩaa joŋ La TƖƖNA niiriŋ daga-la arɩ dagɩ-bie-la lɛ Fɩlɩsɩtɩa tɩŋŋaa sɩ joŋ sɛlɩmɛ kɩalɩŋ ba sɩ mɛ hɛ, a joŋ ba kala daŋ bʋ-bal-la nyuŋ. Tapʋlɩɩ-la Bɛf Sɛmɛs tɩŋŋaa ŋaa kʋnyɩgaa Wɩɩsʋlʋŋ, aŋ kpʋ pʋsʋŋ a pɩ La TƖƖNA.

¹⁶ Fɩlɩsɩtɩa tɩŋŋaa kuorusu-la banɔŋ chɩna na wɩaa deemba kala nɛ, aŋ mɩɩra mʋ Ɛkʋrɔŋ tapʋlɩɩ-la tɩtɩa.

¹⁷ Kɩalɩŋ banɔŋ Fɩlɩsɩtɩa tɩŋŋaa sɩ kɛŋ sɛlɩmɛ mɛ ba nagɛ mɔpʋllʋŋ ba kaa mʋ sʋl cheeriŋ Wɩɩsʋlʋŋ pɩ La TƖƖNA, ba kʋŋkala chɩŋ taŋ nyuŋ nɛ. Tasɩ-la nɛ ŋ-la: Asɩdɔd, Gaza, Asɩkɛlɔŋ, Gaf arɩ Ɛkʋrɔŋ.

¹⁸ Ba sɩ kɛŋ sɛlɩmɛ mɛ kɩalɩŋ banɔŋ ma ba nagɛ taatɩaa, ba ma kʋŋkala chɩŋ Fɩlɩsɩtɩa tɩŋŋaa tasɩ-la kuorusu-la banɔŋ sɩɩ beŋ nyuŋ nɛ, tabala-la ba sɩ saa kɛrɛ golli arɩ tabiisi-la ba sɩ bɩ kɛrɛ saa golli. Bʋ-bal-la sɩ hɛ Bɛf Sɛmɛs tɩŋŋaa baal-la ba sɩɩ yɩrɛ Josua baga lɛ, ba joŋ Wɩa niiriŋ daga-la daŋ ʋ nyuŋ. Ʋ ha hɛ nɩmɛ arɩ jɩnɩŋ kala, a ŋaa magɩl aa dagɛ wɩɩ-la fa sɩ ŋaa.

¹⁹ Ama Wɩa kpʋ Bɛf Sɛmɛs tɩŋŋaa mahɩŋ batori arɩ fii nɛ, a tɩŋ ba sɩ nyilimi daga-la tʋɔŋ. Nɩaa yel woruŋ, a tɩŋ nɩ-daŋ-la La TƖƖNA sɩ kpʋa ba jaŋ lɛ wɩaa.

²⁰ Ŋɩɩ nɛ Bɛf Sɛmɛs tɩŋŋaa pɩɛsɛ dɔŋɔ, “Kʋbɛɛ nɛ jaŋ wuo chɩŋ La TƖƖNA Wɩa deeŋ sɩ bɩ disiniŋ kɛnɛ sɩpaaŋ? Kʋbɛɛba teeŋ nɛ Wɩa niiriŋ daga deeŋ jaŋ mʋ lɛɛlɛ?”

²¹ Ŋɩɩ nɛ aŋ tɩŋ ba bʋla pɩ Kɩrɩaf Jɩarɩm nɩaa, “Fɩlɩsɩtɩa tɩŋŋaa kɛŋ Wɩa niiriŋ daga-la mɩɩra kɔ nɛ. Má kʋ tuu joŋ a kaa mʋ ma leriŋ.”