1 SAMƲƐL 5 - WƖA TENIŊ

Wɩa niiriŋ daga-la hɛ Asɩdɔd arɩ Ɛkʋrɔŋ lɛ

¹ Fɩlɩsɩtɩa tɩŋŋaa sɩ yuo laa Wɩa niiriŋ daga-la ŋɩɩ, ba joŋu a lɩɩ lee-la ba sɩɩ yɩrɛ Ɛbɛnɩza, a kaa mʋ taŋ-la ba sɩɩ yɩrɛ Asɩdɔd.

² Ba sɩ kaa mʋ ŋɩɩ, ba kaa jʋʋ bil ba vene-la ba sɩɩ yɩrɛ Dagɔŋ dɩa lɛ, ʋ chɩna kpagʋ.

³ Taŋ sɩ pʋla chʋchʋɔ-fɩɛla, Asɩdɔd tɩŋŋaa sie dɩ Dagɔŋ-la tele chu tinteeŋ, La TƖƖNA niiriŋ daga-la sɩpaaŋ. Ba kaa chʋʋla kɩɩ ʋ dɩchɩnɩŋ.

⁴ Taŋ sɩ bɩra pʋla chʋchʋɔ-fɩɛla, ba sie dɩ Dagɔŋ-la tele chu tinteeŋ, La TƖƖNA niiriŋ daga-la sɩpaaŋ. Bʋa deeŋ-na lɛ, dɩ ʋ nyuŋ yɛrɛ, ʋ nɩsaa ma bori a pɩŋ boiŋ niiŋ, ka ʋ yaraa dʋndʋŋa pɩŋ lee-la.

⁵ Ŋɩɩ nɛ tɩɩ arɩ jɩnɩŋ kala nɩalɩŋ sɩ kpʋ pʋsʋŋ pɩpɩ ba vene-la ba sɩɩ yɩrɛ Dagɔŋ arɩ nɩalɩŋ kala sɩɩ tou nɛ jʋʋ Dagɔŋ-la dɩa Asɩdɔd lɛ, ba bɩ boiŋ niiŋ lee-la-na ka nʋɔsɛ.

⁶ La TƖƖNA fa dɔgɩsɛ Asɩdɔd tɩŋŋaa arɩ lere-la kala sɩ gollu nɛ woruŋ. Ʋ fa leŋe ba na hɛɛŋ nɛ woruŋ, a ŋmɛrɛ mɔpʋllʋŋ.

⁷ Asɩdɔd tɩŋŋaa sɩ na wɩalɩŋ sɩɩ ŋaa ba lɛ, ba bʋl, “Iziral tɩŋŋaa Wɩa niiriŋ daga-la bɩ maga dɩ ʋ hɛ la teeŋ daha, bɛɛ wɩaa ʋʋ dɔgɩsɛ la dɩ la vene Dagɔŋ kala nɛ.”

⁸ Ŋɩɩ nɛ ba yɩrɛ kuorusu-la kala sɩɩ beŋ Fɩlɩsɩtɩa tinteeŋ a kʋ hilimi a pɩɛsɛba, “Ɛɛ nɛ la jaŋ joŋ Iziral tɩŋŋaa Wɩa niiriŋ daga-la ŋaa?” Ba bʋl, “Má joŋ a kaa mʋ taŋ-la ba sɩɩ yɩrɛ Gaf.” Ŋɩɩ nɛ ba joŋ Iziral tɩŋŋaa Wɩa niiriŋ daga-la a kaa mʋ Gaf.

⁹ Ba sɩ kɛnʋ mʋ lee-la ma, La TƖƖNA bɩra dɔgɩsɛ taŋ-la ma nɩaa, a leŋ fawʋllʋŋ chaasa jʋʋba ba chichel. Ʋ leŋ mɔpʋllʋŋ ŋmɛrɛ taŋ-la nɩhɩasɩŋ arɩ hambiisiŋ kala lɛ.

¹⁰ Ŋɩɩ nɛ ba sii joŋ Wɩa niiriŋ daga-la a kaa mʋ taŋ-la ba sɩɩ yɩrɛ Ɛkʋrɔŋ. Ba sɩ kaa mʋ dɩ ba jʋʋ, Ɛkʋrɔŋ tɩŋŋaa ŋmoo niiŋ a bʋl, “Iziral tɩŋŋaa Wɩa niiriŋ daga-la nɛ ba kaa kɔ la jaŋ dɩ ʋ kpʋ la dɩ la nɩaa kala.”

¹¹ Ɛkʋrɔŋ tɩmma-la yɩrɛ kuorusu-la kala sɩ hɛ Fɩlɩsɩtɩa tinteeŋ lɛ, a kʋ hilimi a bʋl, “Má joŋ Iziral tɩŋŋaa Wɩa niiriŋ daga-la a kaa mɩɩra mʋ bil ʋ dɩ-biliŋ, dɩ ŋɩɩ dee, ʋ jaŋ kpʋ la dɩ la nɩaa kala dɛrɛ,” bɛɛ wɩaa Wɩa fa dɔgɩsɛba nɛ woruŋ, nɩaa sʋʋ ba jaŋ lɛ, fawʋllʋŋ kɛmba.

¹² Nɩalɩŋ ma sɩ bɩ sʋba ŋmɛrɛ mɔpʋllʋŋ nɛ. Ŋɩɩ nɛ taŋ-la nɩaa ŋmoo niiŋ pɩ ba vesiŋ dɩ ba pɛ ba lɛ.