1 SAMƲƐL 4 - WƖA TENIŊ

Fɩlɩsɩtɩa tɩŋŋaa yuo laa Wɩa niiriŋ daga

¹ Iziral tɩŋŋaa kala fa jegile nɩnɩɩ Samʋɛl teeŋ nɛ. Tapʋlɩɩ kʋbala Iziral tɩŋŋaa sii a mʋ dɩ ba yuo Fɩlɩsɩtɩa tɩŋŋaa. Iziral tɩŋŋaa mʋ ŋmoo ba buguŋ lee-la ba sɩɩ yɩrɛ Ɛbɛnɩza, ka Fɩlɩsɩtɩa tɩŋŋaa ma hɛ lee-la ba sɩɩ yɩrɛ Afɛk.

² Ŋɩɩ nɛ Fɩlɩsɩtɩa tɩmma-la yuyuo Iziral tɩŋŋaa. Laal-la sɩ chaasa kʋ lɩŋ, ba yuo dii Iziral tɩŋŋaa, a kpʋ ba baalaa bʋɩ banɛsɛ laal-baga-la lɛ.

³ Iziral laalɩyuori-kaana-la sɩ mɩɩra mʋ ba buguŋ, Iziral nɩhɩasɩŋ pɩɛsɛ dɔŋɔ, “Bɛɛ nɛ tɩɩ La TƖƖNA leŋ Fɩlɩsɩtɩa tɩŋŋaa yuo diila jɩnɩŋ? Má leŋ la mʋ taŋ-la ba sɩɩ yɩrɛ Sɩlɔ a joŋ La TƖƖNA niiriŋ daga-la kɔ dɩ ʋ hɛ la teeŋ, a laala ta la dʋndɔŋŋɔɔ nɩsɩŋ lɛ.”

⁴ Ŋɩɩ nɛ ba tɩŋ nɩaa ba mʋ Sɩlɔ, a joŋ La TƖƖNA doluŋ kala Tɩɩna niiriŋ daga-la kaa kɔ. Daga-la nyuŋ kɛŋ kɩaa sɩ kɛŋ kɩŋkɛnsɩŋ nɛ a nagɛ Wɩa tɩndaaraa balɩa, La TƖƖNA hɔŋ ba pɛgɛ. Eli hambolibiisiŋ balɩa, Hofini arɩ Finihas ma to Wɩa niiriŋ daga-la harɩŋ a mʋ ba buguŋ.

⁵ Ba sɩ kɛŋ La TƖƖNA niiriŋ daga-la kɔ ba buguŋ, Iziral tɩŋŋaa faasa ŋaa goŋ tinteeŋ zigili.

⁶ Fɩlɩsɩtɩa tɩŋŋaa sɩ nɩɩ goŋ-la, ba pɩɛsɛ, “Bɛɛ kʋŋ goŋ nɩɩ ŋaa Hiburu tɩmma-la buguŋ lɛ ŋɩɩ?” Ba sɩ kʋ jɩŋ arɩ La TƖƖNA niiriŋ daga nɛ ba kaa kɔ ba buguŋ,

⁷ fawʋllʋŋ kɛŋ Fɩlɩsɩtɩa tɩmma-la, ba bʋl, “Vene nɛ kɔ ba buguŋ. Wʋdoho deeŋ ha bɩ ŋaa aŋ ka.

⁸ Wɩɩŋ jʋʋla, kʋbɛɛ nɛ jaŋ laala ta veŋ-duoruŋ deemba nɩsɩŋ lɛ? Vesi-la nɛ fa joŋ wʋlɔrʋnʋŋ a ŋaa Ijipiti tɩŋŋaa lɛ ŋɩɩ tintee-hɩlɩŋ lɛ.

⁹ Fɩlɩsɩtɩa tɩmma, má nyɩrɛ bɔyɛ, a yuo arɩ baalɩŋ, dɩ ŋɩɩ dee ma jaŋ bɩrɩmɛ Hiburu tɩmma-la yosi arɩ ba fa sɩ ŋaa ma yosi ŋɩɩ.”

¹⁰ Ŋɩɩ nɛ Fɩlɩsɩtɩa tɩŋŋaa yuo Iziral tɩŋŋaa woruŋ a yuo diiba. Iziral tɩŋŋaa mɩɩra fá, nʋʋkala fá mʋ ʋ lɛbɩŋ. Ba fa kpʋ Iziral tɩŋŋaa yʋgɛ nɛ woruŋ. Ba laalɩyuoroo bʋɩ mara arɩ fii nɛ ba kpʋ. Laalɩyuoroo deemba faa vɛŋ naasɩŋ lɛ nɛ.

¹¹ Ba yuo a laa Wɩa niiriŋ daga-la, aŋ kpʋ Eli biiri-la ma balɩa, Hofini arɩ Finihas.

Eli sʋba

¹² Tapʋlɩɩ-la tɩtɩa nɛ Bɛnjamɩŋ doho nɩaa laalɩyuoru kʋbala lɩɩ fá laal-baga lɛ, a kɛŋ ʋ gɛnnɩŋ kɩɛsɛ aŋ ŋaa hagɩla bʋgɛ ʋ nyuŋ aa dagɛ tʋɔ-cheeŋ, a fá mʋ Sɩlɔ.

¹³ Ʋ mʋa dɩ Eli hɔŋ wombiiŋ niiŋ a bibeŋ leriŋ, bɛɛ wɩaa ʋ bɔyɛ faa joŋ Wɩa niiriŋ daga-la wɩaa nɛ. Baal-la sɩ jʋʋ taŋ-la, a bʋl wɩalɩŋ kala sɩ ŋaa a pɩba, jaŋ nɩaa kala ŋmoo niiŋ.

¹⁴ Eli sɩ nɩɩ nii-ŋmobo-la, ʋ pɩɛsɛ, “Nii-ŋmobo deeŋ bʋbʋɔŋ nɛ bɛɛ?” Ŋɩɩ nɛ baal-la guu mʋ Eli teeŋ.

¹⁵ Bʋa-la lɛ dɩ Eli fa ŋaa jɩsɩŋ mahɩŋ banɛsɛ arɩ fii arɩ chori, ʋ sɩaa bɩra bɩ na.

¹⁶ Ʋ bʋla pɩ Eli, “Laal-baga nɛ mɩ lɩɩ ŋɩɩ, jɩnɩŋ nɛ mɩ fá lɩɩ nɩmɛ kɔ.” Eli pɩɛsʋ, “Mɩ bii, wʋbɛɛ nɛ ŋaa nɩmɛ?”

¹⁷ Baal-la sɩ kɛŋ duoso kɔ bɩra bʋl, “Iziral tɩŋŋaa fá nɛ Fɩlɩsɩtɩa tɩŋŋaa sɩpaaŋ. Ba chaasa kpʋ la laalɩyuoro nɛ woruŋ. Ba kpʋ ŋ nanʋa-baala-la balɩa ma nɛ, Hofini arɩ Finihas, aŋ laa Wɩa niiriŋ daga-la ma.”

¹⁸ Baal-la sɩ yɩrɛ Wɩa niiriŋ daga-la yɩrɩŋ, Eli sɩ hɔŋ kpasa-la nyuŋ boi-baalɩŋ lɛ, ʋ wulle tel hambayala. Ʋ sɩ tele ŋɩɩ, ʋ baŋŋaa bori ʋ sʋʋ, bɛɛ wɩaa ʋ fa hɩɛsa nɛ aŋ yuŋ woruŋ. Ʋ fa laa Iziral tɩŋŋaa sɩpaaŋ jɩsɩŋ mahɩŋ balɩa nɛ.

¹⁹ Bʋa deeŋ lɛ dɩ Eli nanʋala Finihas haala kɛŋ luoruŋ, ʋ lʋlʋŋ yi. Ʋ sɩ nɩa dɩ ba yuo laa Wɩa niiriŋ daga-la, ʋ bala nyɩmma arɩ ʋ bala ma kala sʋʋ, ʋ luoruŋ guu wʋwɩɩ dɩ ʋ lʋl, ama ʋ luo-wɩɩla-la jʋʋ ʋ lɛ nɛ woruŋ, ʋ chɩchɛ dɩ ʋ sʋʋ.

²⁰ Bʋa-la lɛ ʋ sɩɩ chɛ dɩ ʋ sʋʋ, haala-la sɩ kɛnʋ ʋ lʋl bʋla pʋ, “Sɩ́ fawʋllʋŋ fá, hambolibie nɛ ŋ lʋl.” Ama ʋ bɩ wɩɩkala bʋla, ʋ bɩ ba teeŋ jegile.

²¹ Ka dɩ ʋ-na sʋʋ, ʋ hɛ bile yɩrɩŋ Ɩkabɔd. Yɩrɩ-la bʋbʋɔŋ nɛ: ‘Iziral tʋla lɩa’, bɛɛ wɩaa ba yuo laa Wɩa niiriŋ daga-la nɛ, ʋ bala nyɩmma arɩ ʋ bala ma sʋʋ.

²² Ŋɩɩ nɛ ʋ bʋl, “Iziral tʋla lɩa, bɛɛ wɩaa ba yuo laa Wɩa niiriŋ daga-la nɛ.”