1 SAMƲƐL 31 - WƖA TENIŊ

Sɔɔl kpʋ ʋ tɩtɩa

¹ Fɩlɩsɩtɩa tɩŋŋaa kʋ yuo Iziral tɩŋŋaa a kpʋba woruŋ peel-la ba sɩɩ yɩrɛ Gɩlɩbʋa nyuŋ, ka ba dɔnsʋŋ fá a lɛl.

² Ka Fɩlɩsɩtɩa tɩŋŋaa laalɩyuoroo kire to Sɔɔl arɩ ʋ hambolibiisiŋ harɩŋ, a kpʋ ʋ hambolibiisiŋ deemba batori: Jonataŋ, Abɩnadab arɩ Malɩkɩ-Sʋa.

³ Laal-la sɩ kʋ lɩma kɛŋ Sɔɔl, ʋ dʋndɔŋŋɔɔ yagʋ arɩ to-hɛŋŋɛɛ, a bolimu woruŋ.

⁴ Ŋɩɩ nɛ Sɔɔl bʋla pɩ nɩɩ-la sɩ kori ʋ laalɩyuori kɩaa, “Lɩɩsɛ ŋ tokobiiŋ a tɔɔmɛ kpʋ, ŋɩɩ dee disiŋ tɩŋŋaa deemba jaŋ kʋ kpʋmɛ a tʋʋsɛ mɩ joŋŋoo.” Ama fawʋllʋŋ fa kɛŋ nɩɩ-la sɩ kori ʋ laalɩyuori kɩaa nɛ, ʋ bɩ wuo ŋaa ŋɩɩ. Ŋɩɩ nɛ Sɔɔl lɩɩsɛ ʋ tɩtɩa tokobiiŋ a pɛ, a tel ʋ nyuŋ a kpʋ ʋ tɩtɩa.

⁵ Nɩɩ-la sɩ kori Sɔɔl laalɩyuori kɩalɩŋ sɩ na dɩ ʋ sʋba, ʋ ma lɩɩsɛ tokobiiŋ kpʋ ʋ tɩtɩa a pɛ Sɔɔl lɛ.

⁶ Sɔɔl arɩ ʋ hambolibiisiŋ batori arɩ nɩɩ-la sɩ kori ʋ laalɩyuori kɩaa arɩ ʋ nɩaa kala sʋʋ tapʋl-bala nɛ.

⁷ Iziral tɩmma-la sɩ hɛ Jɛzɩrɛl fuonaaŋ lɛ arɩ nɩalɩŋ ma fa sɩ cholo hɛ Jɔdaŋ fuoŋ wɩɩjʋʋlʋŋ, sɩ na dɩ Iziral laalɩyuoroo kala fá a lɛl, ka Sɔɔl arɩ ʋ hambolibiisiŋ ma sʋʋ, ba lɩɩ fá kagɛ ba tasɩŋ lɛ. Ŋɩɩ nɛ Fɩlɩsɩtɩa tɩŋŋaa kʋ jʋʋ hɔŋ ba lɛ.

⁸ Taŋ sɩ pʋla Fɩlɩsɩtɩa tɩmma-la sii mʋ dɩ ba wuri nɩalɩŋ ba sɩ kpʋa kɩaa, ba na dɩ Sɔɔl arɩ ʋ hambolibiisiŋ batori sʋʋ pɩŋ Gɩlɩbʋa peeliŋ nyuŋ.

⁹ Ba keri Sɔɔl nyuŋ aŋ wuri ʋ laalɩyuori kɩaa, aŋ tɩŋ nɩaa ba gɔllɔ heele bʋl wɩɩ-la sɩ ŋaa Fɩlɩsɩtɩa tɩŋŋaa tinteeŋ kala lɛ arɩ ba vesiŋ dɩa lɛ.

¹⁰ Ba joŋ ʋ laalɩyuori kɩalɩŋ a bil ba vene-la ba sɩɩ yɩrɛ Asɩtarɔf dɩa lɛ, aŋ joŋ Sɔɔl kʋsʋʋŋ a kpaasa mɛrɛ taŋ-la ba sɩɩ yɩrɛ Bɛf Saŋ jeeŋ lɛ.

¹¹ Jabɛs Gɩlɩad nɩaa sɩ nɩɩ wɩɩ-la Fɩlɩsɩtɩa tɩŋŋaa sɩ ŋaa Sɔɔl lɛ,

¹² ba nɩalɩŋ sɩ kɛŋ nyuduoŋ sii a vɛŋ tɩtaŋɩŋ a mʋ Bɛf Saŋ, a sori Sɔɔl kʋsʋʋŋ Bɛf Saŋ jee-la lɛ, a paa ʋ hambolibiisiŋ pɛ a kaa mɩɩra mʋ Jabɛs a nyɩgɛ.

¹³ Ŋɩɩ nɛ aŋ paa ba haŋgbelee hugi tɩa-la ba sɩɩ yɩrɛ tamarɛs bʋbʋɔŋ Jabɛs lɛ, aŋ vɔɔ niiŋ tapʋlaa balɩpɛ.