1 SAMƲƐL 30 - WƖA TENIŊ

Devit chei Amalɛk tɩŋŋaa

¹ Devit arɩ ʋ nɩaa mʋ yi Zɩkɩlag tapʋl-tori chɛɛŋ nɛ. Bʋa-la lɛ Devit arɩ ʋ nɩaa fa sɩ tuo ŋɩɩ, Amalɛk tɩŋŋaa kʋ yuo Juda wɩɩpɔsʋŋ nadiiŋ dɩɩrɩŋ arɩ Zɩkɩlag kala. Ba sɩ yuo dii Zɩkɩlag, ba nyɩgʋ,

² aŋ kɛsɛ haala-la kala sɩ hɛ nɩmɛ, hambiisiŋ arɩ nɩhɩasɩŋ kala. Ba bɩ ba kʋŋkala kpʋa, aŋ kɛsɛba mʋ lee-la ba sɩɩ mʋ.

³ Devit arɩ ʋ nɩaa sɩ kɔ Zɩkɩlag, ba na dɩ nyiniŋ dii ʋ kala. Ka ba kɛsɛ ba biiriŋ arɩ ba haalaa, toloo arɩ hambolibiisiŋ kala viiri.

⁴ Ŋɩɩ nɛ Devit arɩ ʋ nɩaa yel woruŋ a kala pʋgʋmɛ.

⁵ Ba fa pɛ kɛsɛ Devit haalaa balɩa-la ma kala nɛ, Ahɩnʋam sɩ lɩɩ Jɛzɩrɛl arɩ Kamɛl tɩŋŋaa Nabal yo-haal-la ʋ sɩ jaa baa yɩrɛ Abɩgɛl.

⁶ Devit tʋɔŋ fa faasa chei, bɛɛ wɩaa, baala-la bʋla arɩ ba jaŋ yagʋ kpʋ arɩ tabɩaa a tɩŋ ba sɩ kɛsɛ ba hambolibiisiŋ arɩ hantolibiisiŋ viiri wɩaa. Ka La TƖƖNA Wɩa leŋ Devit ha kɛŋ bɔɩ-duoŋ.

⁷ Ŋɩɩ nɛ Devit bʋla pɩ Wɩɩsʋllɩ sɩpaalaara Abɩata, Ahɩmɛlɛk nanʋala, “Joŋ gɛrɩ-laala-daŋɩɩ-la la sɩ kaa chɛ nɩna wɩaa La TƖƖNA teeŋ kʋ pɩmɛ.” Ŋɩɩ nɛ Abɩata joŋo mʋ pʋ.

⁸ Devit pɩɛsɛ La TƖƖNA, “Mɩ jaŋ wuo kiri la dʋndɔmɔ-la sɩ kʋ dii la jaŋ harɩŋ? Mɩ jaŋ puuba?” Ŋɩɩ nɛ La TƖƖNA bʋl, “Kiri ba harɩŋ, ŋ jaŋ puuba a laa ma nɩaa ba teeŋ.”

⁹ Devit arɩ ʋ nɩaa zɔɔ-balɩdʋ-la lɩɩ kikiri ba harɩŋ, a mʋ yi fuonaa luŋii kʋbala baa yɩrɛ Bɛsɔɔ. Devit nɩaa dɔnsʋŋ lɔl a hɔŋ nɩmɛ.

¹⁰ Nɩaa zɔɔ-balɩa nɛ fa lɔlɔ a bɩ fuonaa luŋii-la wuo chol. Ka Devit kɛŋ nɩaa zɔɔ-banɛsɛ ba chol fuonaa-la a kiri Amalɛk tɩmma-la libe.

¹¹ Ba mʋ puu Ijipiti tɩɩna kʋbala pɔkɔŋ nyuŋ a kɛnʋ mʋ Devit teeŋ, a pʋ lɩɩŋ arɩ kʋdiilee.

¹² Ba pʋ kɩŋkɛsɩmɛɛ arɩ tɩɩ-nɛŋ hɩlaa nɛ ʋ dii ʋ yaraa polli, bɛɛ wɩaa ʋ tapʋlaa nɛ batori ʋ sɩ bɩ kʋŋ die, a bɩ lɩɩŋ ma nyʋa wɩɩhɛyɛ arɩ tɩtaŋɩŋ kala.

¹³ Ŋɩɩ nɛ Devit pɩɛsʋ, “Ŋ ŋaa kʋbɛɛ nʋʋ nɛ, a lɩɩ nɩɩ?” Ʋ bʋl, “Mɩ ŋaa Ijipiti tɩɩna nɛ, a ŋaa Amalɛk tɩɩna kʋbala yomo. Mɩɩ wɩɩlɛ nɛ mɩ nɩhɩaŋ vɩamɛ ta aŋ mʋ, ʋ tapʋlaa batori nɛ ŋ-la.

¹⁴ La nɛ yuo dii Kɛrɛtɩ tɩŋŋaa sɩ hɛ Juda wɩɩpɔsʋŋ dɩɩrɩŋ arɩ Kalɩb doho nɩaa ma sɩ hɛ tintee-hɩlɩŋ lɛ. La nɛ yuo dii Zɩkɩlag ma a nyɩgʋ.”

¹⁵ Devit bɩra pɩɛsʋ, “Ŋ jaŋ wuo kɛmmɛ tuu dagɛ Amalɛk tɩmma-la sɩ yuo la jaŋ leriŋ?” Yoŋ-la bʋl, “Ŋmɩɛsa pɩmɛ Wɩa sɩpaaŋ, arɩ ŋ bɩ jaŋ kpʋmɛ koo a kɛmmɛ mʋ pɩ mɩ nɩhɩaŋ. Ka dɩ mɩ kɛnɩŋ tuu dagɛ ba leriŋ.”

¹⁶ Devit sɛɩ, yoŋ-la kɛnʋ ba mʋ, dɩ Amalɛk tɩmma-la sii pɩsa su lee-la ba sɩ hɔnɔ kala a didii kɩaa aŋ nyʋnyʋa, aŋ gbigbieli a tɩŋ kʋ-daŋ-la ba sɩ yuo laa Fɩlɩsɩtɩa tinteeŋ arɩ Juda tinteeŋ lɛ.

¹⁷ Sɩɩpʋʋraa Devit sii a yuoba ŋɩɩ deeŋ deeŋ taŋ pʋl a kaa mʋ yi dɩdaanɩŋ. Bapʋɔsaa zɔɔ-banɛsɛ dʋndʋŋa nɛ wuo paa bʋntaŋŋaba a jɩla fá. Dɩ ŋɩɩ dee, ba kʋŋkala fa bɩ ka.

¹⁸ Devit yuo laa ba kɩalɩŋ kala Amalɛk tɩmma-la fa sɩ paa Zɩkɩlag lɛ, a pɛ ʋ haala-la balɩa lɛ.

¹⁹ Ba kʋŋkala bɩ lɛlɛ. Hambie koo nɩhɩaŋ, hambolibie koo hantolibie, kɩalɩŋ kala ba sɩ yuo paa koo kʋŋ na-kala ba sɩ joŋo. Ba kala nɛ Devit bɩra laa.

²⁰ Ʋ laa Amalɛk tɩmma-la piesee arɩ nɛsɩŋ kala nɛ, ʋ nɩaa kiri ba kala a pɛ ba kɩaa lɛ a hɛ ba sɩpaaŋ aŋ bʋl, “Kɩalɩŋ Devit sɩ yuo laa nɛ ŋ-la.”

²¹ Ŋɩɩ nɛ Devit mɩɩra kɔ nɩalɩŋ teeŋ, nɩalɩŋ zɔɔ-balɩa-la fa sɩ lɔlɔ a bɩ ba harɩŋ wuo to, ba lemba ta fuonaa luŋii-la ba sɩɩ yɩrɛ Bɛsɔɔ lɛ. Ba ma kʋ lɩɩ dɩ ba cheŋ Devit arɩ ʋ nɩaa. Devit arɩ ʋ nɩaa sɩ kʋ yiba, ʋ chʋɔlɛba.

²² Nɩalɩŋ dɔnsʋŋ fa sɩ to Devit harɩŋ a mʋ laal-la a ŋaa nɩbɔmɔ arɩ wʋhɛɛrɛɛ bʋl, “Nɩalɩŋ sɩ bɩ la harɩŋ wuo to mʋ, ʋ bɩ maga dɩ la kpaa kɩalɩŋ la sɩ yuo laa Amalɛk tɩmma-la teeŋ a pɩba. Ba kʋŋkala maga dɩ la joŋ ʋ haalaa arɩ ʋ biiriŋ nɛ a pʋ dɩ ʋ kaa viiri.”

²³ Devit bʋl, “Aɩ, mɩ naambiiriŋ, ʋ bɩ maga dɩ ma ŋaa ŋɩɩ kɩalɩŋ La TƖƖNA sɩ joŋo pɩla lɛ. Ʋ pɔla nɛ woruŋ, a joŋ la dʋndɔmɔ-la sɩ kʋ dii la jaŋ a hɛ la nɩsɩŋ lɛ.

²⁴ Wɩalɩŋ kala ma sɩ bʋla, kʋbɛɛ nɛ jaŋ kɛmba tɩŋ? Nɩalɩŋ sɩ hɔnɔ pɔ la kɩaa sɩ jaŋ laa kpaal-la, ʋ tɩtɩa nɛ nɩalɩŋ ma sɩ mʋ laalɩŋ jaŋ laa. Ma kala kpaalɩŋ jaŋ magɛ dɔŋɔ.”

²⁵ Devit joŋ wɩɩŋ deeŋ a bil ʋ ŋaa nii a pɩ Iziral tɩŋŋaa ba tuto a kaa kɔ arɩ jɩnɩŋ kala.

²⁶ Bʋa-la lɛ Devit sɩ kʋ yi Zɩkɩlag, ʋ joŋ kɩalɩŋ ʋ sɩ yuo laa dɔnsʋŋ a dii zile pɩ Juda nɩhɩasɩ-la kala sɩ ŋaa ʋ nandɔnsʋŋ aŋ bʋl, “Kɩalɩŋ la sɩ yuo laa La TƖƖNA dʋndɔŋŋɔɔ teeŋ nɛ ŋɩɩ, má laa.”

²⁷ Ʋ joŋ dɔnsʋŋ ma pa ba kaa mʋ pɩ nɩalɩŋ sɩ hɛ Bɛtɛl arɩ Ramɔf wɩɩpɔsʋŋ nadiiŋ arɩ Jatɛ lɛ,

²⁸ a pɩ nɩalɩŋ ma sɩ hɛ Arʋa, Sɩfɩmɔf, Ɛsɩtɛmʋa

²⁹ arɩ nɩalɩŋ sɩ hɛ Rakal lɛ, a bɩra pɩ nɩalɩŋ sɩ hɛ Jɛramɛɛl arɩ Keni tɩŋŋaa tabala-la lɛ,

³⁰ a pɩ nɩalɩŋ ma sɩ hɛ Hɔma, Bɔɔ Asaŋ, Atak

³¹ arɩ Hɛbʋrɔŋ lɛ. Devit bɩra joŋ kɩalɩŋ dɔnsʋŋ a dii zile pɩ nɩalɩŋ ma kala sɩ hɛ lere-la kala ʋ dɩ ʋ nɩaa sɩ gɔllɔ mʋ.