1 SAMƲƐL 3 - WƖA TENIŊ

La TƖƖNA yɩrɛ Samʋɛl

¹ Bʋa-la lɛ Samʋɛl fa sɩ hɛ Eli teeŋ a tɩtɩŋ La TƖƖNA tɩntɩŋŋaa, La TƖƖNA fa bɩ chaasa bʋl wɩaa pɩpɩ nɩaa. Ʋ fa bɩ ʋ tɩtɩa kaa dagɛ nɩaa duosoo tʋɔŋ ma a yʋgɛ.

² Tɩtaŋ kʋbala Eli pɩŋ lee-la ʋ sɩ vɛnɛɛ pɩŋ, ʋ sɩɩ-poloo kala fa yʋɔra nɛ, ʋ sɩaa bɩra bɩ na woruŋ.

³ Bʋa deeŋ lɛ dɩ Wɩa chaanɩŋ ba sɩ nyɩga bil Wɩa dɩa tʋɔŋ ma ha bɩ dɩsa, ka Samʋɛl ma pɩŋ nɩmɛ. Lee-la nɛ Wɩa niiriŋ daga-la ma chɩŋ.

⁴ Ŋɩɩ nɛ La TƖƖNA yɩrɛ Samʋɛl. Ʋ sɩ, “Namɛ,”

⁵ aŋ sii fá mʋ Eli teeŋ a bʋl, “Ŋ sɩ yɩrɛmɛ, mɩ kɔ nɛ.” Ŋɩɩ nɛ Eli bʋl, “Mɩ bɩŋ yɩra, mɩɩra mʋ pɩŋ.” Samʋɛl mɩɩra mʋ pɩŋ.

⁶ La TƖƖNA bɩra yɩrʋ, “Samʋɛl!” Ŋɩɩ nɛ ʋ hirige sii a bɩra mʋ Eli teeŋ a bʋl, “Ŋ sɩ yɩrɛmɛ, na mɩ nɛ ŋ-la.” Eli sɩ, “Mɩ bii, aɩ, mɩ bɩŋ yɩra, mɩɩra mʋ pɩŋ.”

⁷ Samʋɛl fa bɩ jɩŋ arɩ La TƖƖNA nɛ. La TƖƖNA fa ha bɩ ʋ wɩaa kaa dagʋ aŋ ka.

⁸ La TƖƖNA bɩra yɩrɛ Samʋɛl torimuŋ lɛ, ʋ sii fá mʋ Eli teeŋ a bʋl, “Ŋ sɩ yɩrɛmɛ, namɛ nɛ ŋ-la.” Ŋɩɩ nɛ Eli tʋɔbɩɩnaa kɔ, ʋ jɩŋ arɩ La TƖƖNA nɩɩ yɩrɛ bile.

⁹ Ŋɩɩ nɛ Eli bʋla pɩ Samʋɛl, “Mɩɩra mʋ pɩŋ, dɩ nʋʋ nɛ bɩra yɩrɩŋ, bʋl: La TƖƖNA, bʋl wɩɩ-la ŋ sɩ kɛnɛ, ŋ tɩntɩnna ka jegili nɛ.” Ŋɩɩ nɛ Samʋɛl mɩɩra mʋ pɩŋ ʋ dɩpɩnɩŋ.

¹⁰ La TƖƖNA bɩra kɔ a yɩrʋ arɩ ʋ sɩ vɛnɛɛ ŋaa ŋɩɩ, “Samʋɛl! Samʋɛl!” Ŋɩɩ nɛ Samʋɛl bʋl, “Bʋl wɩɩ-la ŋ sɩ kɛnɛ, mɩ-na ŋ tɩntɩnna ka jegili nɛ.”

¹¹ Ŋɩɩ nɛ La TƖƖNA bʋla pʋ, “Bee na, mɩɩ chɛ mɩ ŋaa wɩɩ nɛ Iziral tinteeŋ lɛ, dɩ nʋʋkala nɛ nɩɩ wɩɩ-la, ʋ jaŋ hirigi.

¹² Bʋa-la lɛ mɩ jaŋ ŋaa wɩalɩŋ kala mɩ sɩ sɩ mɩ jaŋ ŋaa Eli dɩa nɩaa lɛ, a chɩŋ dɩ-suomuŋ a kaa mʋ dɩdɛrɩŋ.

¹³ Mɩ fa bʋla pʋ arɩ mɩ jaŋ dɔgɩsɛ ʋ dɩa nɩaa a kaa mʋ wuu, a tɩŋ wʋbɔŋ-la ʋ biiriŋ sɩ ŋaa, ʋ jɩŋ aŋ bɩ ba kire.

¹⁴ Ŋɩɩ wɩaa mɩ ŋmɩɛsa pɩ Eli dɩa nɩaa, arɩ wʋbɔŋ-la ba sɩ ŋaa, kʋŋkala tuo ba sɩ jaŋ wuo kaa kpʋ a sʋl Wɩɩsʋlʋŋ a pɩɩsɛ ba wʋbɔŋ-la ta.”

¹⁵ Ŋɩɩ nɛ Samʋɛl pɩŋ taŋ pʋl, ʋ sii kɛŋ La TƖƖNA dɩa boiŋ niiree a suri. Ka fawʋllʋŋ fa kɛnʋ arɩ ʋ sɩ jaŋ bʋl wɩɩ-la ʋ sɩ na arɩ duosoo tʋɔŋ a pɩ Eli.

¹⁶ Ŋɩɩ nɛ Eli yɩrʋ a bʋl, “Mɩ nanʋala Samʋɛl.” Ʋ sɩ, “Namɛ.”

¹⁷ Eli pɩɛsʋ, “Bɛɛ nɛ La TƖƖNA bʋla pɩŋ?” Pɔ ŋ sɩ́ wɩɩ-la joŋo faamɛ. Dɩ ŋ nɛ bɩ wɩalɩŋ kala ʋ sɩ bʋla pɩŋ bʋla pɩmɛ, Wɩa jaŋ dɔgʋsʋŋ kɩŋkɛŋ.

¹⁸ Ŋɩɩ nɛ Samʋɛl bʋl wɩalɩŋ kala a pʋ, ʋ bɩ ba kʋŋkala joŋo faaʋ. Ŋɩɩ nɛ Eli bʋl, “Ʋ nɛ La TƖƖNA, wɩɩ-la kala ʋ sɩ bene dɩ ʋ zɔmɔ pʋ, ʋ́ ŋaa.”

¹⁹ Samʋɛl sɩɩ waa ŋɩɩ, La TƖƖNA chɩŋ ʋ harɩŋ nɛ woruŋ a leŋ wɩalɩŋ kala Samʋɛl sɩ bʋla sɛnɛ kʋ ŋaa.

²⁰ Iziral tɩŋŋaa kala, a chɩŋ Daŋ tinteeŋ lɛ a kaa mʋ yi taŋ-la ba sɩɩ yɩrɛ Bɛɛsɩba, nʋʋkala jɩma arɩ Samʋɛl sɛnɛ ŋaa La TƖƖNA wʋlaabʋllʋ nɛ.

²¹ La TƖƖNA fa vɛnɛ kɛŋ ʋ tɩtɩa kʋʋ dagɛ Samʋɛl nɛ Sɩlɔ lɛ a bʋl wɩalɩŋ ʋ sɩ jaŋ dagɛ Iziral tɩŋŋaa pʋ.