1 SAMƲƐL 29 - WƖA TENIŊ

Akɩs leŋe Devit mɩɩra mʋ Zɩkɩlag

¹ Fɩlɩsɩtɩa tɩŋŋaa kɛŋ ba laalɩyuoroo a kʋ hɛ dɔŋɔ Afɛk lɛ, ka Iziral tɩŋŋaa ma ŋmoo ba buguŋ Jɛzɩrɛl lɩɩ-bulo-la leriŋ.

² Fɩlɩsɩtɩa tɩŋŋaa kuoroo kɛŋ ba laalɩyuoroo a vɩvɛŋ bugoo nɛ, dɔnsʋŋ zɔlɔ zɔlɔ, dɔnsʋŋ ma bʋɩ bʋɩ. Ka Devit arɩ ʋ nɩaa ma hɛ Akɩs laalɩyuoroo harɩŋ a tuto.

³ Ŋɩɩ nɛ Fɩlɩsɩtɩa tɩŋŋaa laalɩyuori-hɩasɩŋ pɩɛsɛ, “Ka Hiburu tɩŋŋaa deemba ma, bɛɛ nɛ ba ŋɩŋaa daha?” Akɩs bʋl, “Iziral kuoro Sɔɔl tɩntɩnnɩ-hɩaŋ Devit nɛ. Ʋ sɩ hɛ mɩ teeŋ ʋ kɩɩ jɩna, a chɩŋ tapʋlɩɩ-la ʋ sɩ lɩɩ Sɔɔl teeŋ a kɔ mɩ leriŋ a kaa kɔ lɛɛlɛ, ʋ ha bɩ wɩɩ cheye.”

⁴ Ama Fɩlɩsɩtɩa tɩŋŋaa laalɩyuori-hɩasɩ-la na baanɩŋ Akɩs nyuŋ a bʋl, “Leŋ dɩ baal-la mɩɩra mʋ taŋ-la ŋ sɩ joŋo pʋ. Ʋ bɩ maga dɩ ʋ to la harɩŋ a mʋ laalɩŋ dɩ-yuoluŋ. Laal-la lɛ ʋ jaŋ wuo mɩɩra yuyuola. Wʋbɛɛ nɛ ʋ jaŋ wuo ŋaa dɩ ʋ nɩhɩaŋ Sɔɔl bɩra cho ʋ wɩaa, dɩ la nɩaa tɩtɩa dee dɩ ʋ kpʋ a keri nyusuŋ?”

⁵ Devit deeŋ wɩaa dee ba fa yɩɩ yɩɩlɩŋ a gʋgʋa ŋɩɩ aŋ bʋl, “Sɔɔl kpʋ nɩaa bʋɩba nɛ, ka Devit kpʋ nɩaa bʋɩ fiiba?”

⁶ Ŋɩɩ nɛ Akɩs yɩrɛ Devit a bʋla pʋ, “La TƖƖNA sɩ weye wɩaa, ŋ wʋŋaalaa leŋe mɩ jɩŋ arɩ ŋ kɛŋ wʋtɩtɩɩ nɛ woruŋ. Mɩ fa jaŋ cho dɩ ŋ pɛ mɩ laalɩyuoroo lɛ, bɛɛ wɩaa a chɩŋ tapʋlɩɩ-la ŋ sɩ kɔ mɩ teeŋ a kaa kɔ bʋa deeŋ lɛ, mɩ ha bɩ ŋ wʋcheeli kala na. Ama Fɩlɩsɩtɩa tɩŋŋaa sɩpaalaaraa bɩ sɛyɛ.

⁷ Mɩɩra mʋ dɩa arɩ yarɩfɩɛlaa, aŋ sɩ́ wɩɩkala ŋaa dɩ Fɩlɩsɩtɩa tɩŋŋaa sɩpaalaara-la tʋɔŋ chei.”

⁸ Ŋɩɩ nɛ Devit pɩɛsɛ, “Bɛɛ nɛ mɩ ŋaa? Bɛɛ nɛ ŋ na ŋ tɩntɩnna lɛ a chɩŋ tapʋlɩɩ-la mɩ sɩ kɔ ŋ teeŋ a kaa kɔ lɛɛlɛ? Bɛɛ nɛ tɩɩ mɩ bɩ jaŋ wuo mʋ yuo mɩ nɩhɩaŋ sɩ ŋaa kuoro dʋndɔŋŋɔɔ?”

⁹ Akɩs bɩra bʋl, “Mɩ jɩma ŋ wʋŋaalaa tɔrɛ mɩ tʋɔŋ a nagɛ Wɩa tɩndaara nɛ, ka Fɩlɩsɩtɩa tɩŋŋaa laalɩyuoroo nɩhɩasɩŋ bʋl, ‘Ʋ bɩ maga dɩ ʋ to la harɩŋ a mʋ laalɩŋ.’

¹⁰ Ŋ dɩ ŋ tɩntɩnna-la kala sɩ vɩa Sɔɔl aŋ kɔ mɩ teeŋ maga dɩ ma sii lɩma chʋchʋɔ-fɩɛla, a viiri, dɩ leriŋ nɛ suomo pʋpʋllɛ.”

¹¹ Ŋɩɩ nɛ Devit arɩ ʋ nɩaa sii chʋchʋɔ-fɩɛla-la, dɩ ba mɩɩra mʋ Fɩlɩsɩtɩa tɩŋŋaa tinteeŋ. Ka Fɩlɩsɩtɩa tɩmma-la ma mʋ Jɛzɩrɛl.