1 SAMƲƐL 27 - WƖA TENIŊ

Devit hɛ Fɩlɩsɩtɩa tɩŋŋaa tinteeŋ lɛ

¹ Ŋɩɩ nɛ Devit bɩɩnɛ ʋ tʋɔŋ lɛ a bʋl, “Tapʋlaa deemba dɔŋɔ, Sɔɔl jaŋ wuo kɛmmɛ a kpʋmɛ. Wɩɩ-la mɩ sɩ jaŋ ŋaa a laa mɩ mɩɩsɩŋ nɛ, mɩ jaŋ lɩɩ mʋ Fɩlɩsɩtɩa tɩŋŋaa tinteeŋ. Ŋɩɩ nɛ Sɔɔl jaŋ leŋ mɩ gɔllɔ chɛnɩŋ Iziral tinteeŋ lɛ, ka dɩ mɩ wiesi.”

² Devit arɩ ʋ nɩaa zɔɔ-balɩdʋ-la sii mʋ Moak nanʋala Akɩs teeŋ, ʋ nɛ fa ŋaa Gaf kuoro.

³ Devit arɩ ʋ nɩalɩŋ kala mʋ hɔŋ Akɩs teeŋ Gaf lɛ. Ba kʋŋkala pɛ kɛŋ ʋ dɩa nɩaa. Devit ma kɛsɛ ʋ haalaa balɩa: Ahɩnʋam, Jɛzɩrɛl tɩɩna-la arɩ Kamɛl tɩŋŋaa Nabal yo-haal-la baa sɩɩ yɩrɛ Abɩgɛl ʋ sɩ jaa.

⁴ Sɔɔl sɩ nɩa dɩ Devit fá mʋ Gaf, ʋ bɩra bɩ gɔllɔ chɛʋ.

⁵ Tapʋlɩɩ kʋbala Devit sii a bʋla pɩ Akɩs, “Dɩ ŋ tʋɔŋ nɛ tɔrɛ mɩ nyuŋ, joŋ ŋ tinteeŋ tasɩŋ dɔŋɔ pɩmɛ dɩ mɩ hɔŋ nɩmɛ. Mɩ bɩ maga dɩ mɩ hɔŋ ŋ teeŋ ma tabalɩŋ lɛ.”

⁶ Ŋɩɩ nɛ Akɩs joŋ taŋ-la ba sɩɩ yɩrɛ Zɩkɩlag a pɩ Devit tapʋlɩɩ-la. A chɩŋ bʋa-la lɛ a kaa kɔ nɛ Zɩkɩlag ŋaa Juda tinteeŋ kuoroo kʋŋ.

⁷ Devit hɔŋ Fɩlɩsɩtɩa tɩŋŋaa tinteeŋ lɛ jɩna arɩ chɛnsɩŋ banɛsɛ nɛ.

⁸ Devit arɩ ʋ nɩaa sii mʋ yuo Gesu tɩŋŋaa, Gɛzɩ tɩŋŋaa arɩ Amalɛk tɩŋŋaa. (Faafaa kala nɩaa deemba nɛ hɔŋ tintee-la lɛ a kɛŋ ŋɩɩ mʋ yi Suu arɩ Ijipiti tinteeŋ.)

⁹ Bʋa na-kala lɛ dɩ Devit nɛ mʋ yuo lee-kala, ʋ yie kpʋ baalaa arɩ haalaa kala nɛ, aŋ kɛsɛ piesee, nɛsɩŋ, kakusuŋ, bʋntaŋŋaba, a paa ba gɛnnɩŋ ma pɛ, a kaa mɩɩra kɔ Akɩs teeŋ.

¹⁰ Dɩ Akɩs nɛ pɩɛsʋ, “Nɩɩ nɛ ŋ mʋ yuo jɩnɩŋ?” Devit yie bʋl, “Mɩ mʋ yuo tasɩ-la sɩ hɛ Juda wɩɩpɔsʋŋ nadiiŋ dɩɩrɩŋ nɛ, Jɛramɛɛl doho nɩaa tinteeŋ koo Keni tɩŋŋaa tinteeŋ.”

¹¹ Devit bɩ baal koo haal kala kʋweeŋ kaa kʋkɔ Gaf, bɛɛ wɩaa ʋ bɩɩna ʋ tʋɔŋ lɛ nɛ a bʋl, “Dɩ mɩ nɛ lemba, ba jaŋ sɛnɛ mʋ bʋl wɩalɩŋ mɩ sɩɩ ŋaa.” Wɩalɩŋ Devit sɩ hɛ Fɩlɩsɩtɩa tinteeŋ lɛ faafaa kala a ŋɩŋaa nɛ ŋɩɩ.

¹² Akɩs laa Devit dii nɛ woruŋ, a bʋl ʋ tɩtɩa lɛ, “Ʋ nɩaa Iziral tɩŋŋaa chaasa bɩ ʋ wɩaa cho, ŋɩɩ wɩaa ʋ jaŋ ŋaa mɩ tɩntɩnnʋ a kaa mʋ wuu,”