1 SAMƲƐL 26 - WƖA TENIŊ

Devit bɩra leŋe Sɔɔl kɛŋ mɩɩsɩŋ

¹ Ŋɩɩ nɛ Zɩf tɩŋŋaa bɩra sii mʋ Sɔɔl teeŋ Gɩbɩa lɛ a bʋl, “Devit nɛ faa dundolo-la ba sɩɩ yɩrɛ Hakɩla nyuŋ, a kpagɛ Jɛsɩmɔŋ wɩɩpɔsʋŋ nadiiŋ dɩɩrɩŋ.”

² Ŋɩɩ nɛ Sɔɔl sii tʋɔsɛ laalɩyuoroo bʋɩ batori sɩ jɩŋ laalɩŋ yuonuŋ woruŋ Iziral tɩŋŋaa tʋɔŋ, ba lɩɩ mʋ Zɩf tintee-hɩlɩŋ a chɩchɛ Devit.

³ Sɔɔl arɩ ʋ laalɩyuoroo mʋ hɔŋ wombiiŋ niiŋ Hakɩla dundolo-la sɛmɛ, a chaasɛ Jɛsɩmɔŋ. Ka Devit ha faa tintee-hɩlɩŋ tʋɔŋ. Devit sɩ kʋ jɩŋ arɩ Sɔɔl kɔ a chɩchɛʋ nɛ,

⁴ ʋ tɩŋ nɩaa ba lʋara mʋ, dɩ Sɔɔl sɛnɛ kɔ nɛ.

⁵ Ŋɩɩ nɛ Devit sii tɩtaŋɩŋ a mʋ lee-la Sɔɔl arɩ ʋ laalɩyuoroo sɩ ŋmoo buguŋ, a na lee-la Sɔɔl arɩ Nɛɛ nanʋala Abɩna sɩ ŋaa laalɩyuoroo nɩhɩaŋ sɩ pɩna. Sɔɔl fa pɩŋ doŋ ba bugu-la tʋtʋɔbaanɩŋ nɛ, ka laalɩyuoroo pɩna gollu.

⁶ Devit mɩɩra mʋ ʋ nɩaa teeŋ a pɩɛsɛ Hiti tɩŋŋaa baal kʋbala ba sɩɩ yɩrɛ Ahɩmɛlɛk arɩ Zeruya nanʋala Abɩsaɩ, Jʋab naambie, “Má kʋbɛɛ nɛ jaŋ wuo to mɩ harɩŋ a mʋ Sɔɔl buguŋ?” Abɩsaɩ bʋl, “Mɩ jaŋ mʋ.”

⁷ Devit arɩ Abɩsaɩ sii mʋ laalɩyuoro-la leriŋ tɩtaŋɩŋ, dɩ Sɔɔl pɩŋ doŋ ba dɩ-hɔnɩɩ-la tʋtʋɔbaanɩŋ, aŋ joŋ timiŋ pɛ tinteeŋ ʋ nyuŋ, ka Abɩna arɩ laalɩyuoroo pɩna gollu.

⁸ Abɩsaɩ fɩɛlɛ bʋla pɩ Devit, “Jɩnɩŋ La TƖƖNA joŋ ŋ dʋndɔmɔ Sɔɔl hɛ ŋ nɩsɩŋ lɛ nɛ. Leŋ dɩ mɩ joŋ mɩ timiŋ tɔbʋ a mɛrɛ tinteeŋ bala, bʋlɩa ma dee.”

⁹ Ama Devit ma fɩɛla bʋla pɩ Abɩsaɩ, “Pʋpɔ ŋ sɩ́ ʋ kpʋ. Nʋʋkala tuo sɩ jaŋ kpʋ nɩɩ-la La TƖƖNA sɩ lɩɩsa ʋ ŋaa kuoro, aŋ bɩ cheeriŋ jaŋ laa La TƖƖNA teeŋ.”

¹⁰ Devit bɩra bʋl, “La TƖƖNA sɩ weye tɩtɩa nɛ jaŋ kpʋ Sɔɔl, ʋ sʋʋŋ jaŋ yi dɩ ʋ sʋʋ, koo dɩ ʋ mʋ laalɩŋ a lɛl nɩmɛ.

¹¹ La TƖƖNA bɩ jaŋ sɛɩ dɩ mɩ ŋaa nɩɩ-la ʋ sɩ lɩɩsa ʋ ŋaa kuoro wʋbɔŋ kala. La jaŋ joŋ timiŋ arɩ lɩɩŋ loŋ-la sɩ chɩŋ ʋ nyuŋ nɛ a kaa viiri.”

¹² Devit joŋ tiŋ-la arɩ lɩɩŋ loŋ-la ba kaa viiri, ka nʋʋkala bɩ ba na koo a jɩŋ ba wɩaa, nʋʋkala ma bɩ hirige sii, bɛɛ wɩaa La TƖƖNA leŋe ba kala chaasa pɩŋ doŋ nɛ a yuo naaŋ.

¹³ Ŋɩɩ nɛ Devit arɩ Abɩsaɩ chol fuonaaŋ sɛmɛ dɔŋɔ a mʋ dɩ-bolii mʋa, a jɩla chɩŋ dundolo nyuŋ.

¹⁴ Ŋɩɩ nɛ Devit yɩrɛ Sɔɔl laalɩyuoroo arɩ Nɛɛ nanʋala Abɩna, “Mɩ sɩɩ yɩrɛma, ma bɩ nɩɩ, Abɩna?” Abɩna bʋl, “Ŋ nɛ kʋbɛɛ a yɩyɩrɛ kuoro dɩ ʋ sii doŋ lɛ?”

¹⁵ Devit bɩra bʋl, “Ŋ waa baal nɛ, kʋbɛɛ nɛ kɛŋ doluŋ a magɩŋ Iziral tinteeŋ lɛ? Bɛɛ nɛ tɩɩ ŋ bɩ kuoro pɔ? Nʋʋ nɛ kʋ jʋʋ ma buguŋ dɩ ʋ kpʋ ma kuoro.

¹⁶ Wɩɩ-la ma sɩ ŋaa, ʋ bɩ zɔŋ. La TƖƖNA sɩ weye wɩaa, ŋ dɩ ŋ nɩaa kala fa maga dɩ ma sʋʋ nɛ, bɛɛ wɩaa ma bɩ ma nɩhɩaŋ-la ma TƖƖNA sɩ lɩɩsa ʋ ŋaa kuoro pɔ. Má beŋ ma teeŋ a na, nɩɩ nɛ kuoro timiŋ arɩ ʋ lɩɩŋ loŋ-la sɩ chɩŋ ʋ nyuŋ hɛ?”

¹⁷ Sɔɔl wuo jɩŋ arɩ Devit yikoro nɛ a pɩɛsɛ, “Mɩ nanʋala Devit, ŋ nɩɩ bʋl wɩaa?” Devit bʋl, “Oo mɩ nɛ, kuoro.”

¹⁸ Devit bɩra pɩɛsɛ, “Bɛɛ nɛ tɩɩ ŋ-na mɩ nɩhɩaŋ kirimi a bɩbaarɛ? Bɛɛ nɛ mɩ ŋaa a cheyiŋ?

¹⁹ Mɩɩ sʋlʋŋ mɩ nɩhɩaŋ, jegile nɩɩ wɩalɩŋ mɩ sɩɩ chɛ mɩ bʋl. Dɩ La TƖƖNA nɛ sɩ dɩ ŋ chɩŋ mɩ lɛ, ŋɩɩ-na ʋ laa mɩ Wɩɩsʋlʋŋ kɩaa. Ama dɩ nuhuobiinee nɛ leŋe ŋ chɩŋ mɩ lɛ, dɩ La TƖƖNA ŋmɩaŋ diiba. Ba kirimi ta tinteeŋ sɩ ŋaa La TƖƖNA kʋŋ lɛ nɛ a bʋl, ‘Mʋ a tuto vesiŋ.’

²⁰ Sɩ́ leŋe dɩ ba kpʋmɛ ta tintee-la sɩ bɩ la TƖƖNA kʋŋ ŋaa lɛ. Mɩ-na teeŋ mɩ ŋaa kʋpɛɩ nɛ, a nagɛ buguluŋ ka Iziral kuoro bɩbagɩlɛ dɩ ʋ kpʋmɛ, a nagɛ nɩa sɩɩ bagɩlɛ yoho peelee tʋɔŋ.”

²¹ Ŋɩɩ nɛ Sɔɔl bʋl, “Devit, mɩ ŋaa wʋbɔŋ nɛ, mɩɩra kɔ mɩ bii, bɛɛ wɩaa jɩnɩŋ ŋ leŋ mɩ mɩɩsɩŋ pɩmɛ nɛ, mɩ bɩra bɩ jaŋ ŋaaŋ wʋbɔŋ kala. Mɩ wʋŋaalaa ŋaa nɩyaarɛ wɩaa nɛ, mɩ cheeriŋ yʋga.”

²² Devit bʋl, “Kuoro, ŋ timiŋ nɛ hɛ mɩ teeŋ daha. Leŋ dɩ ŋ bapʋɔsɩa-la dɔŋɔ kʋ laa.

²³ Nʋʋkala tʋɔpʋla arɩ ʋ Wɩa laa diiniŋ sɩ magɛ ŋɩɩ nɛ La TƖƖNA jaŋ timu. Jɩnɩŋ ʋ joŋuŋ hɛ mɩ nɩsɩŋ lɛ nɛ, ama mɩ bɩ chɛ dɩ mɩ joŋ wʋbɔŋ kala a ŋaa nɩɩ-la La TƖƖNA sɩ lɩɩsa ʋ ŋaa kuoro lɛ.

²⁴ Mɩ sɩ bene dɩ ŋ mɩɩsɩŋ ŋaa sɩɩfɩaŋ kʋŋ ŋɩɩ mɩ teeŋ jɩnɩŋ, mɩ bɩŋ kpʋa, La TƖƖNA jaŋ ŋaa ŋɩɩ tɩtɩa mɩ ma lɛ, a lɩɩsɛmɛ wʋbɔŋ kala lɛ.”

²⁵ Ŋɩɩ nɛ Sɔɔl bʋla pɩ Devit, “Mɩ bii, La TƖƖNA jaŋ pɛ ŋ lɛ. Wɩɩ na-kala ŋ sɩ jaŋ ŋaa, jaŋ vɛŋ woruŋ a pɩŋ.” Devit viiri, ka Sɔɔl ma mɩɩra mʋ dɩa.