1 SAMƲƐL 24 - WƖA TENIŊ

Devit kɛŋ Sɔɔl aŋ bɩ ʋ kpʋa

¹ Sɔɔl sɩ kiri Fɩlɩsɩtɩa tɩŋŋaa mʋ aŋ mɩɩra kɔ, ba bʋla pʋ, “Devit hɛ Ɛŋ-Gedi tintee-hɩlɩŋ lɛ.”

² Ŋɩɩ nɛ Sɔɔl tʋɔsɛ laalɩyuoroo bʋɩ batori sɩ jɩŋ laalɩŋ yuonuŋ woruŋ Iziral tinteeŋ lɛ, a kaa lɩɩ gɔllɔ chɩchɛ Devit arɩ ʋ nɩaa, a kpagɛ tɛhɩɩba bʋsʋ-la leriŋ.

³ Sɔɔl sɩ kʋ yi piesee dɩɩsɩ-la sɩ kpagɛ wombiiŋ, bʋ-bʋa kʋbala nɛ hɛ nɩmɛ, ʋ jʋʋ nɩmɛ dɩ ʋ togili, dɩ Devit arɩ ʋ nɩaa ma jʋʋ faa bʋ-bʋa-la tɩtɩa tʋɔŋ sɩpaaŋ dɩɩrɩŋ.

⁴ Devit nɩaa bʋla pʋ, “Tapʋlʋŋ deeŋ wɩaa nɛ La TƖƖNA fa bʋla pɩŋ ŋɩɩ, bʋa-la lɛ ʋ sɩ sɩ, ‘Mɩ jaŋ joŋ ŋ dʋndɔmɔ hɛ ŋ nɩsɩŋ lɛ, dɩ ŋ ŋaaʋ wɩɩ-la kala ŋ sɩ cho.’ ” Ŋɩɩ nɛ Devit sii densi a mʋ lʋara keri Sɔɔl gɛrɩŋ niipiniŋ.

⁵ Devit sɩ keri Sɔɔl gɛrɩ-la niipiniŋ dɛrɛ harɩŋ, ʋ tʋɔbɩɩnaa walɩmʋ ʋ sɩ ŋaa ŋɩɩ.

⁶ Ʋ mɩɩra mʋ ʋ nɩaa leriŋ, a bʋla pɩba, “La TƖƖNA bɩ chɛ dɩ mɩ joŋ wʋdoho deeŋ a ŋaa mɩ nɩhɩaŋ nɩɩ-la ʋ sɩ lɩɩsa lɛ, koo dɩ mɩ ŋaaʋ wʋbɔŋ kala, bɛɛ wɩaa La TƖƖNA nɛ lɩɩsʋ ʋ ŋaa kuoro.”

⁷ Wɩalɩŋ Devit sɩ bʋla kiri ʋ harɩ-tooroo ba bɩ Sɔɔl yuo nɛ ŋɩɩ. Ka ʋ lɩɩ bʋ-bʋa-la lɛ a viiri.

⁸ Ŋɩɩ nɛ Devit ma lɩɩ bʋ-bʋa-la lɛ, a kʋ lɩɩ a yɩrɛ Sɔɔl, “Kuoro, mɩ nɩhɩaŋ.” Sɔɔl daasɛ harɩŋ a naʋ, Devit tuu kpirime yi tinteeŋ.

⁹ Ʋ pɩɛsɛ Sɔɔl, “Bɛɛ nɛ tɩɩ ŋ jegile nɩɩ nɩalɩŋ sɩ bʋl wɩaa pɩŋ niiŋ, arɩ mɩ-na Devit ka chɛ dɩ mɩ ŋaaŋ wʋbɔŋ nɛ?

¹⁰ Jɩnɩŋ, ŋ tɩtɩa na ŋɩɩ La TƖƖNA sɩ joŋuŋ hɛ mɩ nɩsɩŋ lɛ nɛ bʋ-bʋa-la tʋɔŋ. Mɩ nɩaa dɔnsʋŋ fa sɩ dɩ mɩ kpʋŋ nɛ, ama mɩ-na nɛ ta leŋiŋ. Mɩ sɩ, ‘Mɩ bɩ jaŋ ŋaa mɩ nɩhɩaŋ wʋbɔŋ kala, bɛɛ wɩaa ʋ nɛ nɩɩ-la La TƖƖNA sɩ lɩɩsa ʋ ŋaa kuoro.’

¹¹ Mɩ nyɩmma, beŋ mɩ nɩsɩŋ lɛ a na gɛrɩ-kɔsʋ-bie-la mɩ sɩ koro. Ŋ gɛrɩŋ niipiniŋ nɛ ŋɩɩ mɩ keri, aŋ bɩŋ kpʋa. Lɛɛlɛ jɩŋ woruŋ arɩ mɩ bɩ wʋbɔŋ ŋaa cheyiŋ koo a vɩa ŋ niiŋ. Mɩ bɩ wʋbɔŋ ma joŋo ŋaa ŋ lɛ, ka ŋ bagɩla chɩchɛmɛ dɩ ŋ kpʋ.

¹² La TƖƖNA nɛ jaŋ dii mɩ dɩŋ pɛgɛ sarɩya. Wʋbɔmɔ-la ŋ sɩ ŋaa mɩ lɛ, La TƖƖNA nɛ jaŋ joŋ ba chɩmɩŋ timiŋ. Ama mɩ-na bɩ jaŋ joŋ mɩ nɩsɩŋ digiŋ.

¹³ Faafaa nɩaa sɩ, ‘Nɩbɔmʋŋ nɛ yie ŋɩŋaa wʋbɔŋŋɔɔ,’ ŋɩɩ wɩaa mɩ-na bɩ jaŋ joŋ mɩ nɩsɩŋ a digiŋ.

¹⁴ Bee na Iziral tɩŋŋaa kuoro sɩ lɩɩ a kikiri mɩ-na Devit dɩ ʋ kpʋ. Mɩ-na Devit teeŋ mɩ ŋaa kʋpɛɩ nɛ, a nagɛ va-sʋʋŋ koo buguluŋ.

¹⁵ La TƖƖNA nɛ jaŋ dii mɩ dɩŋ pɛgɛ sarɩya. Ʋ nɛ jaŋ beŋ mɩ wɩɩŋ tʋɔŋ, aŋ chɩŋ mɩ harɩŋ a laamɛ ta ŋ nɩsɩŋ lɛ.”

¹⁶ Devit sɩ bʋl wɩaa deemba dɛrɛ, Sɔɔl pɩɛsɛ, “Mɩ nanʋala Devit, ŋ nɛɛ?” Ŋɩɩ nɛ aŋ faasa ŋmoo niiŋ.

¹⁷ Ŋɩɩ nɛ aŋ bʋl, “Ŋ kɛŋ tʋɔpʋla a kɩɩmɛ, ŋ-na kɛmmɛ woruŋ nɛ, ka mɩ joŋ wʋbɔŋŋɔɔ ŋaa ŋ lɛ.

¹⁸ Wʋzɔmɔ-la ŋ sɩ ŋaa mɩ lɛ nɛ ŋ bʋla pɩmɛ ŋɩɩ, La TƖƖNA chaasa jommi a hɛ ŋ nɩsɩŋ lɛ nɛ, ka ŋ bɩ mɩ kpʋa.

¹⁹ Dɩ nʋʋ nɛ na ʋ dʋndɔmɔ, ʋ jaŋ leŋu ta dɩ ʋ mʋ pɛɩ? La Tɩɩna jaŋ timiŋ woruŋ a tɩŋ wʋzɔŋ-la ŋ sɩ ŋaa mɩ lɛ jɩnɩŋ.

²⁰ Mɩ chaasa jɩŋ arɩ ŋ jaŋ dii kuoruŋ Iziral tinteeŋ lɛ, dɩ tintee-la wɩɩkala chɩŋ woruŋ ŋ nɩsɩŋ lɛ.

²¹ La TƖƖNA yɩrɩŋ lɛ, ŋmɩɛsa pɩmɛ arɩ ŋ bɩ jaŋ kpʋ mɩ doho nɩaa koo a leŋ dɩ mɩ yɩrɩŋ lɛl mɩ nyɩmma dɩa lɛ.”

²² Ŋɩɩ nɛ Devit hɛ niiŋ pɩ Sɔɔl, ʋ mɩɩra mʋ dɩa, ka Devit arɩ ʋ nɩaa mɩɩra mʋ lee-la ba sɩ faa.