1 SAMƲƐL 23 - WƖA TENIŊ

Devit laa Kɛɛla nɩaa ta

¹ Ŋɩɩ nɛ ba bʋla pɩ Devit, “Fɩlɩsɩtɩa tɩŋŋaa ka yuo taŋ-la ba sɩɩ yɩrɛ Kɛɛla nɩaa nɛ, a gɔllɔ to ba mɩɩ-ŋmoori tahɩŋ a pɩpaa ba mɩaa.”

² Devit pɩɛsɛ La TƖƖNA a bʋl, “Mɩ mʋ yuo Fɩlɩsɩtɩa tɩŋŋaa deemba?” La TƖƖNA bʋla pʋ, “Mʋ yuoba, a laa Kɛɛla nɩaa ta.”

³ Ama Devit nɩaa bʋla pʋ, “La hɛ Juda tinteeŋ lɛ nɛ daha aŋ fɩfá Fɩlɩsɩtɩa tɩŋŋaa, ɛɛ nɛ saa ʋ jaŋ naga pɩla dɩ la nɛ lɩɩ daha mʋ Kɛɛla dɩ la yuo Fɩlɩsɩtɩa tɩŋŋaa deemba?”

⁴ Devit bɩra pɩɛsɛ La TƖƖNA, ŋɩɩ nɛ ʋ bʋla pʋ, “Sii a tuu Kɛɛla, bɛɛ wɩaa mɩ jaŋ joŋ Fɩlɩsɩtɩa tɩmma-la a hɛ ŋ nɩsɩŋ lɛ.”

⁵ Ŋɩɩ nɛ Devit arɩ ʋ nɩaa mʋ Kɛɛla a yuo dii Fɩlɩsɩtɩa tɩŋŋaa a kpʋba, aŋ kɛsɛ ba pʋsʋŋ. Devit chaasa kpʋba nɛ woruŋ, aŋ laa Kɛɛla nɩalɩŋ ta.

⁶ (Bʋa-la lɛ Ahɩmɛlɛk nanʋala Abɩata sɩ fá mʋ Devit teeŋ ŋɩɩ Kɛɛla lɛ, ʋ to joŋ gɛrɩ-laala-daŋɩɩ-la ma mʋ nɛ, dɩ ʋ wuo kaa chɛ nɩna wɩaa La TƖƖNA teeŋ.)

Sɔɔl kiri Devit libe

⁷ Sɔɔl sɩ nɩa dɩ Devit hɛ Kɛɛla lɛ, ʋ bʋl, “Wɩa joŋu hɛ mɩ nɩsɩŋ lɛ nɛ ŋɩɩ, bɛɛ wɩaa Devit fá jʋʋ taŋ-la ba sɩ saa kɛrɛ a golli aŋ kɛŋ boi-baalaa ba sɩ jaŋ wuo kaa yagɛ nɛ.”

⁸ Sɔɔl kɛŋ ʋ laalɩyuoroo kala hɛ dɔŋɔ, dɩ ba tuu Kɛɛla a tɔ Devit arɩ ʋ nɩaa hɛ.

⁹ Devit sɩ nɩa dɩ Sɔɔl ka kɔ dɩ ʋ yuou nɛ, ŋɩɩ nɛ ʋ bʋla pɩ Wɩɩsʋllɩ sɩpaalaara Abɩata, “Kɛŋ gɛrɩ-laala-daŋɩɩ-la kɔ.”

¹⁰ Devit bɩra bʋl, “La TƖƖNA, Iziral tɩŋŋaa Wɩa, mɩ-na ŋ tɩntɩnna chaasa nɩɩ dɩ Sɔɔl ka bɩɩnɛ dɩ ʋ kɔ Kɛɛla a chei tabal-la nɛ, a tɩŋ mɩ wɩaa.

¹¹ Dɩ ʋ nɛ kɔ, nɩalɩŋ sɩ hɛ Kɛɛla lɛ jaŋ kɛmmɛ pʋʋ? Sɔɔl sɛnɛ jaŋ kɔ arɩ ŋɩɩ ŋ tɩntɩnna sɩ nɩa? La TƖƖNA Iziral tɩŋŋaa Wɩa, jaaŋ jaaŋ bʋla pɩmɛ, mɩ ŋaa ŋ tɩntɩnnʋ nɛ.” Ŋɩɩ nɛ La TƖƖNA bʋl, “Ʋ jaŋ kɔ.”

¹² Devit bɩra pɩɛsɛ, “Nɩalɩŋ sɩ hɛ Kɛɛla lɛ jaŋ joŋ mɩ dɩ mɩ nɩaa a pɩ Sɔɔl?” La TƖƖNA bɩra bʋl, “Ba jaŋ jomma pɩba.”

¹³ Ŋɩɩ nɛ Devit arɩ ʋ nɩaa zɔɔ-balɩdʋ, guu lɩɩ Kɛɛla lɛ a gɔllɔ bɩbaarɛ leree. Sɔɔl bɩra nɩɩ dɩ Devit arɩ ʋ nɩaa fá lɩɩ Kɛɛla lɛ. Ŋɩɩ nɛ ʋ bɩra bɩ nɩmɛ mʋa.

¹⁴ Devit fa gɔllɔ fɩfaa tintee-hɩlɩŋ dɩ-duoruŋ arɩ Zɩf tintee-hɩlɩŋ dundollu-la lɛ nɛ. Ka Sɔɔl gɔllɔ chɩchɛʋ tapʋlɩɩ kala. Ama Wɩa bɩ leŋe Devit jʋʋ Sɔɔl nɩsɩŋ.

¹⁵ Devit fa sɩ hɛ Hɔrɛs sɩ hɛ Zɩf tintee-hɩlɩŋ lɛ, ʋ bɩra nɩa arɩ Sɔɔl kʋ lɩɩ dɩ ʋ kpʋʋ nɛ.

¹⁶ Devit sɩ hɛ lee-la ŋɩɩ, Sɔɔl nanʋala Jonataŋ mʋ bʋl wɩaa a nyaasɛ Devit nyuŋ arɩ Wɩa pɔʋ nɛ.

¹⁷ Jonataŋ bʋla pʋ, “Sɩ́ fawʋllʋŋ fá. Mɩ nyɩmma Sɔɔl bɩ jaŋ wuo kɛnɩŋ. Ŋ jaŋ dii kuoruŋ Iziral tinteeŋ lɛ, dɩ mɩ tɩtɩgɛ ŋ lɛ. Mɩ nyɩmma Sɔɔl ma tɩtɩa paala jɩŋ wɩɩŋ deeŋ lɛ nɛ.”

¹⁸ Ba balɩamɩŋ bɩra leŋ nii-la ba sɩ hɛ pɩ dɔŋɔ La TƖƖNA sɩpaaŋ wasa chɩŋ. Jonataŋ mɩɩra mʋ dɩa, ka Devit ha hɛ Hɔrɛs lɛ.

¹⁹ Ŋɩɩ nɛ Zɩf tɩŋŋaa dɔnsʋŋ sii mʋ Sɔɔl teeŋ Gɩbɩa lɛ, a bʋla pʋ, “Devit nɛ faa la tinteeŋ dɩ-duoruŋ lɛ, dundolo-la ba sɩɩ yɩrɛ Hakɩla lɛ a kpagɛ Hɔrɛs sɩ hɛ taŋ-la ba sɩɩ yɩrɛ Jɛsɩmɔŋ wɩɩpɔsʋŋ nadiiŋ dɩɩrɩŋ.

²⁰ Kuoro, bʋa-la kala ŋ sɩ cho kɔ, la jaŋ kɛnʋ pɩŋ.”

²¹ Sɔɔl bʋl, “La TƖƖNA jaŋ pɛ ma lɛ a tɩŋ tʋɔbɩɩna-la ma sɩ kɛnɛ a tɩgɛ mɩ lɛ.

²² Má mɩɩra wasa mʋ beŋ woruŋ, a jɩŋ lee-la Devit sɩ hɛ, a leŋ dɩ mɩ jɩŋ nɩalɩŋ ma sɩ naʋ nɩmɛ. Mɩ nɩa dɩ ʋ kɛŋ wʋjɩmɩŋ nɛ woruŋ.

²³ Má beŋ woruŋ a jɩŋ lere-la kala ʋ sɩ yie fɩfaa, a kʋ bʋl wʋtɩtɩɩ a pɩmɛ. Mɩ jaŋ to ma harɩŋ mʋ, dɩ ʋ nɛ hɛ lee-la, mɩ jaŋ chɛ kɛnʋ, dɩ ʋ nɛ paala magɛ dɩ mɩ gbilli Juda tinteeŋ kala ma.”

²⁴ Ŋɩɩ nɛ nɩalɩŋ laa Sɔɔl sɩpaaŋ ba mʋ Zɩf. Bʋa-la lɛ dɩ Devit arɩ ʋ nɩaa hɛ Mayɔŋ tintee-hɩlɩŋ lɛ, fuonaa-la ba sɩɩ yɩrɛ Araba a hɛ Jɛsɩmɔŋ wɩɩpɔsʋŋ nadiiŋ dɩɩrɩŋ.

²⁵ Ka Sɔɔl arɩ ʋ nɩaa suomo chɩchɛ Devit. Devit nɩɩ wɩɩ-la, a sii mʋ faa bʋŋ kʋbala sɩ hɛ Mayɔŋ tintee-hɩlɩŋ lɛ. Sɔɔl nɩɩ a sii kiri Devit libe mʋ bʋŋ-la leriŋ.

²⁶ Sɔɔl arɩ ʋ nɩaa hɛ bʋ-taala sɛmɛ dɔŋɔ, Devit arɩ ʋ nɩaa ma hɛ sɛmɛ dɔŋɔ a nɩnɛrɩgɛ dɩ ba fá a lɛl Sɔɔl nɩsɩŋ lɛ. Sɔɔl arɩ ʋ laalɩyuoroo sɩ kʋ kpagɛ Devit arɩ ʋ nɩaa dɩ ba kɛsɛba,

²⁷ dɩ tɩndaara kɔ Sɔɔl teeŋ a bʋl, “Má ŋaa lɩma kɔ! Fɩlɩsɩtɩa tɩŋŋaa nɛ kɔ a didii la tinteeŋ.”

²⁸ Ŋɩɩ nɛ Sɔɔl bɩra bɩ Devit arɩ ʋ nɩaa libi kire, aŋ mɩɩra mʋ dɩ ʋ yuo Fɩlɩsɩtɩa tɩŋŋaa. Ŋɩɩ nɛ tɩɩ ba kɛŋ bʋ-taala-la leriŋ a yɩyɩrɛ Sɛla Hamalɛkɔf. (Ʋ bʋbʋɔŋ nɛ bʋŋ-la sɩ kɛmba pɔrɛ dɔŋɔ lɛ.)

²⁹ Devit bɩra sii nɩmɛ a mʋ faa Ɛŋ-Gedi tinteeŋ dɩ-duoruŋ dɔŋɔ lɛ.