1 SAMƲƐL 22 - WƖA TENIŊ

Devit hɛ Adulam arɩ Mɩzɩpa lɛ

¹ Ŋɩɩ nɛ Devit lɩɩ fá Gaf lɛ, a mʋ faa bʋ-bʋa kʋbala sɩ kpagɛ taŋ-la ba sɩɩ yɩrɛ Adulam lɛ. Ʋ naambiiriŋ arɩ ʋ dɩa nɩaa sɩ nɩɩ wɩɩ-la, ba sii mʋ ʋ teeŋ nɩmɛ.

² Ŋɩɩ nɛ nɩaa dɔnsʋŋ ma mʋ ʋ teeŋ, nɩalɩŋ kala sɩɩ na hɛɛŋ koo nɩalɩŋ sɩ dii chɩŋŋaa koo nɩalɩŋ tʋɔŋ sɩ bɩ dɩ-bala pɩna. Ba mʋ ʋ teeŋ ʋ ŋaa ba sɩpaalaara. Nɩalɩŋ fa yi nɩaa zɔɔ-banɛsɛ nɛ.

³ Devit bɩra lɩɩ nɩmɛ a mʋ Mɩzɩpa sɩ hɛ Mʋab tinteeŋ, a bʋla pɩ Mʋab kuoro, “Mɩɩ sʋlʋŋ, leŋ dɩ mɩ nyɩmma arɩ mɩ naaŋ kʋ hɛ ŋ teeŋ, ka dɩ mɩ na wɩɩ-la Wɩa sɩ jaŋ ŋaa pɩmɛ.”

⁴ Devit leŋ ʋ nyɩmma arɩ naaŋ a pɩ Mʋab kuoro, ba hɔŋ ʋ teeŋ bʋa-la kala lɛ ʋ sɩ faa dɩ-duo-la lɛ.

⁵ Tapʋlɩɩ kʋbala, Wɩa Wʋlaabʋlla Gad bʋla pɩ Devit, “Sɩ́ dɩ-duo-la lɛ hɛ, mʋ Juda tinteeŋ.” Ŋɩɩ nɛ Devit lɩɩ a mʋ duu kʋbala ba sɩɩ yɩrɛ Hɛrɛf duuŋ.

Sɔɔl kpʋ Wɩɩsʋllɩ sɩpaalaaraa Nɔb lɛ

⁶ Tapʋlɩɩ kʋbala Sɔɔl kori timiŋ a hɔŋ dundolo nyuŋ tɩa kʋbala ba sɩɩ yɩrɛ tamarɛs bʋbʋɔŋ Gɩbɩa lɛ. Ʋ tɩntɩnnɩ-hɩasɩŋ kala chɩna gollu, ka ʋ nɩɩ arɩ ba na Devit nɛ.

⁷ Ŋɩɩ nɛ Sɔɔl pɩɛsɛba, “Bɛnjamɩŋ doho nɩaa, má jegile nɩɩ, Jesi bile jaŋ wuo pɩma ŋmaŋkaanɩŋ arɩ tɩɩnɛnɛɛ bagɩsɩŋ? Ʋ jaŋ sɛɩ a leŋ dɩ ma ŋaa laalɩyuoroo bʋɩba arɩ zɔlɔba sɩpaalaaraa?

⁸ Bɛɛ nɛ tɩɩ ma kala lɩɩ mɩ harɩŋ a vʋvʋʋrɛ mɩ wɩaa? Ma kʋŋkala ha bɩ bʋla pɩmɛ arɩ mɩ nanʋala arɩ Jesi bie pɛ niiŋ nɛ. Ma kʋŋkala sɩpaaŋ tuo mɩ lɛ, koo a bʋla pɩmɛ arɩ mɩ bie yigi mɩ tɩntɩnna Devit hɛ mɩ lɛ nɛ ʋ bɩbagɩlɛ dɩ ʋ kpʋmɛ, arɩ ʋ sɩɩ ŋaa ŋɩɩ jɩnɩŋ.”

⁹ Dɩ Dʋɛg, Ɛdɔm tɩɩna-la ma fa chɩŋ Sɔɔl tɩntɩnnɩ-hɩasɩ-la tʋɔŋ nɩmɛ. Ʋ bʋl, “Mɩ fa na Jesi nanʋala Devit nɛ, bʋa-la lɛ ʋ sɩ kɔ Ahitub nanʋala Ahɩmɛlɛk teeŋ Nɔb lɛ.

¹⁰ Ahɩmɛlɛk chɛ La TƖƖNA teeŋ nɛ dɩ ʋ na wɩɩ-la ʋ sɩ jaŋ ŋaa a pʋ, aŋ pʋ kʋdiilee a joŋ Fɩlɩsɩtɩa tɩŋŋaa Golɩaf tokobiiŋ ma a pɛ pʋ.”

¹¹ Ŋɩɩ nɛ kuoro Sɔɔl tɩma yɩrɛ Wɩɩsʋllɩ sɩpaalaara Ahɩmɛlɛk, arɩ ʋ nyɩmma dɩa nɩalɩŋ kala sɩ ŋaa Wɩɩsʋllɩ sɩpaalaaraa Nɔb lɛ. Ba kala kɔ ʋ teeŋ.

¹² Sɔɔl bʋla pɩ Ahɩmɛlɛk, “Jegili mɩ teeŋ.” Ʋ bʋl, “Kuoro, mɩɩ jegili nɛ.”

¹³ Ŋɩɩ nɛ Sɔɔl pɩɛsʋ, “Bɛɛ nɛ tɩɩ ŋ dɩ Jesi nanʋala vʋʋrɛ mɩ wɩaa, ŋ paala pʋ kʋdiilee a joŋ tokobiiŋ pʋ, aŋ ha chɛ Wɩa teeŋ dɩ ŋ na wɩɩ-la Wɩa sɩɩ chɛ ʋ ŋaa a pʋ? Ŋɩɩ leŋ ʋ vɩamɛ aŋ bɩbagɩlɛ dɩ ʋ kpʋmɛ.”

¹⁴ Ahɩmɛlɛk bɩra pɩɛsɛ kuoro Sɔɔl, “Ŋ tɩntɩnnaa kala tʋɔŋ, kʋbɛɛ nɩɩ to ŋ niiŋ a magɛ Devit? Ʋ paala ŋaa ŋ hɩɩlɛ-baala nɛ, a ŋaa laalɩyuoro-la sɩɩ pɔŋ nɩhɩaŋ, ŋ dɩa nɩaa ma kala zizilu woruŋ.

¹⁵ Tapʋlɩɩ-la dee bɩ mɩ chɛ-bumbuŋ ŋaa mɩ sɩ chɛ Wɩa teeŋ dɩ mɩ na wɩaa a pɩ Devit. Kuoro, sɩ́ mɩ-na ŋ tɩntɩnna koo mɩ nyɩmma dɩa nɩaa kʋŋkala ŋmaamʋ, bɛɛ wɩaa mɩ bɩ wɩɩŋ deeŋ lɛ jɩŋ.”

¹⁶ Kuoro bʋl, “Ahɩmɛlɛk, ŋ dɩ ŋ nyɩmma dɩa nɩaa kala maga dɩ ma sʋʋ nɛ.”

¹⁷ Ŋɩɩ nɛ aŋ bʋla pɩ laalɩyuoro-la sɩɩ pɔ ʋ-na kuoro, “Má kpʋ La TƖƖNA Wɩɩsʋllɩ sɩpaalaaraa, bɛɛ wɩaa ba ma kala chɩŋ Devit harɩŋ nɛ. Ba jɩma arɩ ʋ fa a viviiri nɛ, ka ba vɩa dɩ ba bʋla pɩmɛ.” Ama laalɩyuoro-la vɩa dɩ ba kpʋ La TƖƖNA Wɩɩsʋllɩ sɩpaalaara-la.

¹⁸ Kuoro mɩɩra bʋla pɩ Dʋɛg, “Kpʋ Wɩɩsʋllɩ sɩpaalaaraa.” Ŋɩɩ nɛ Dʋɛg, Ɛdɔm tɩɩna-la kpʋba. Tapʋlɩɩ-la ʋ kpʋ ba nɩaa mahɩŋ banɛsɛ arɩ banɔŋ nɛ sɩɩ laalɛ gɛrɩ-laala-daŋɩŋ.

¹⁹ Dʋɛg bɩra mʋ Wɩɩsʋllɩ sɩpaalaaraa taŋ-la ba sɩɩ yɩrɛ Nɔd a kpʋ nɩalɩŋ dɔnsʋŋ arɩ pʋsʋ-la kala sɩ hɛ nɩmɛ, baalaa arɩ haalaa, hambiisiŋ arɩ bii-mulluŋ, nɛsɩŋ, kakusuŋ arɩ piesee kala.

²⁰ Ama Ahɩmɛlɛk nanʋala ba sɩɩ yɩrɛ Abɩata, Ahitub nihiŋ dʋndʋŋa nɛ wuo lɩɩ fá, a mʋ Devit teeŋ,

²¹ a bʋla pʋ arɩ Sɔɔl kpʋ La TƖƖNA Wɩɩsʋllɩ sɩpaalaaraa kala nɛ Nɔb lɛ.

²² Ŋɩɩ nɛ Devit bʋla pɩ Abɩata: “Tapʋlɩɩ-la Ahɩmɛlɛk sɩ joŋ kʋdiilee arɩ tokobiiŋ pɩmɛ, dɩ Dʋɛg Ɛdɔm tɩɩna-la hɛ nɩmɛ, mɩ jɩma woruŋ arɩ ʋ jaŋ bʋl wɩalɩŋ kala a pɩ Sɔɔl. Mɩ nɛ tɩɩ ba kpʋ ŋ nyɩmma dɩa nɩaa kala ŋɩɩ.

²³ Hɔŋ mɩ teeŋ, sɩ́ fawʋllʋŋ fá. Nɩɩ-la sɩɩ walɩmɛ dɩ ʋ kpʋŋ, ʋ nɩɩ chɛ dɩ ʋ kpʋ mɩ ma. Wɩɩkala bɩ jaŋ ŋaaŋ mɩ nɩsɩŋ lɛ.”