1 SAMƲƐL 21 - WƖA TENIŊ

Devit mʋ Nɔd

¹ Ŋɩɩ nɛ Devit mʋ taŋ kʋbala baa yɩrɛ Nɔb dɩ ʋ na Wɩɩsʋllɩ sɩpaalaara Ahɩmɛlɛk nɩmɛ. Ahɩmɛlɛk sɩ kʋ lɩɩ dɩ ʋ chemu, fawʋllʋŋ kɛnʋ, ʋ chichel aŋ pɩɛsɛ Devit, “Bɛɛ nɛ tɩɩ ŋ dʋndʋŋa kɔ daha? Bɛɛ nɛ tɩɩ nʋʋkala bɩ ŋ harɩŋ to?”

² Devit bʋla pɩ Wɩɩsʋllɩ sɩpaalaara Ahɩmɛlɛk, “Kuoro tɩmmɛ nɛ dɩ mɩ ŋaa wɩɩ, aŋ bʋla pɩmɛ, ‘Sɩ́ leŋe dɩ nʋʋkala jɩŋ wɩɩ-la mɩ sɩ sɩ ŋ ŋaa.’ Mɩ harɩ-tooro-na, mɩ bʋla pɩba dɩ ba chemmi lee kʋbala nɛ.

³ Ŋ kɛŋ kʋdiilii nɛ ŋ nɩsɩŋ lɛ dɩ ŋ pɩmɛɛ? Pɩmɛ boroboroba banɔŋ koo kʋŋ na-kala ŋ sɩ kɛnɛ.”

⁴ Ŋɩɩ nɛ Wɩɩsʋllɩ sɩpaalaara bʋla pɩ Devit, “Mɩ bɩ boroboro wogo kala kɛnɛ daha, see boroboro-la ba sɩ joŋo pɩ La TƖƖNA dʋndʋŋa nɛ hɛ nɩmɛ. Dɩ ŋ dɩ ŋ harɩ-tooro-la nɛ bɩ haalaa pɩna, ŋ jaŋ wuo laa.”

⁵ Devit bʋl, “Wʋtɩtɩɩ, mɩ dɩ mɩ harɩ-tooroo nɩɩ lɩɩ dɩ la tɩŋ tɩntɩmɩɩ, la dɩ haalaa bɩ bɔsɔ ka pɛ, la kʋŋkala bɩ disiniŋ kɛŋ. Dɩ la nɛ paala mʋ dɩ la tɩŋ tɩntɩmɩɩ dɔŋ sɩ bɩ sɩɩfɩaŋ tɩntɩmɩɩ ŋaa ma, la yie bɩ disiŋ wɩaa ka ŋaa, a saa wasa nyaŋ jɩnɩŋ tɩntɩmɩŋ sɩ ŋaa sɩɩfɩaŋ tɩntɩmɩɩ.”

⁶ Dɩ Wɩɩsʋllɩ sɩpaalaara Ahɩmɛlɛk fa paa boroboroba-la sɩ pɩŋ La TƖƖNA sɩpaaŋ aŋ bil kʋfalaa. Ʋ joŋ kɩalɩŋ ʋ sɩ paa a pɩ Devit, bɛɛ wɩaa boroboro dɔŋ kala fa tuo a pɛ ba lɛ.

⁷ Tapʋlɩɩ-la dɩ Sɔɔl tɩntɩnnaa dɔŋɔ ba sɩɩ yɩrɛ Dʋɛg a ŋaa Ɛdɔm tɩɩna hɛ nɩmɛ. Ba kɛnʋ bil nɛ dɩ ʋ tɩŋ tɩntɩmɩɩ dɔŋ sɩ maga ʋ tɩma pɩ Wɩa. Ʋ nɛ ŋaa Sɔɔl pie-daarɩ-hɩaŋ.

⁸ Devit pɩɛsɛ Ahɩmɛlɛk, “Ŋ bɩ timiŋ koo tokobiiŋ kɛnɛ dahaa? Mɩ bɩ tokobiiŋ koo laalɩyuori kʋŋkala koro daha, bɛɛ wɩaa wɩɩ-la kuoro sɩ sɩ dɩ mɩ ŋaa, ʋ guu dɩ mɩ lɛ nɛ.”

⁹ Wɩɩsʋllɩ sɩpaalaara bʋl, “Fɩlɩsɩtɩa tɩɩna-la ŋ sɩ kpʋa baa yɩrɛ Golɩaf, Ɛla fuonaa-la lɛ, ʋ tokobiiŋ nɛ hɛ daha. Ʋ nɛ ba kɛŋ gɛrɩŋ bɛ tɔ a joŋo bil gɛrɩ-laala-daŋɩɩ-la harɩŋ. Dɩ ŋ nɩɩ chɛ, ŋ jaŋ wuo joŋ ʋ dʋndʋŋa nɛ hɛ daha.” Devit bʋl, “Tokobii dɔŋ tuo a zɔmɔ magʋ, joŋu pɩmɛ.”

Devit mʋ Gaf

¹⁰ Tapʋlɩɩ-la tɩtɩa nɛ Devit lɩɩ fá dɩ Sɔɔl sɩ́ ʋ kpʋ a mʋ taŋ-la ba sɩɩ yɩrɛ Gaf kuoro Akɩs teeŋ.

¹¹ Ŋɩɩ nɛ Akɩs tɩntɩnnaa pɩɛsʋ, “Devit deeŋ dee bɩ Iziral tinteeŋ kuoro ŋaa? Ʋ dee ba fa yɩɩ yɩɩlaa a gʋgʋa aŋ bɛsɛ ʋ lɛ bʋl, ‘Sɔɔl kpʋ nɩaa bʋɩba nɛ, ka Devit kpʋ nɩaa bʋɩ fiiba?’ ”

¹² Devit kɛŋ wɩalɩŋ kala ba sɩ bʋla a tɩgɛ ʋ lɛ bɩɩnɛ ʋ tʋɔŋ lɛ, fawʋllʋŋ kɛnʋ woruŋ a tɩŋ Gaf kuoro Akɩs wɩaa.

¹³ Devit sɩ hɛ kuoro Akɩs arɩ ʋ tɩntɩnnaa nɩsɩŋ lɛ, ʋ fugo ŋɩŋaa wɩaa arɩ ʋ nyuŋ tuo. Ʋ yie paa kɩaa a pɩpaasɛ taŋ-la boi-baalɩŋ borusuŋ, aŋ gieri nantʋɔrʋŋ su ʋ tɔŋŋɔɔ kala, a nagɛ nɩa sɩɩ nyaasʋ.

¹⁴ Ŋɩɩ nɛ Akɩs pɩɛsɛ ʋ tɩntɩnna-la, “Ma sɩ na dɩ baala deeŋ ka nyaasʋ, bɛɛ nɛ tɩɩ ma kɛnʋ kɔ mɩ teeŋ?

¹⁵ Mɩ sɩ mɩ bɩ nyɩnyɛ tɩŋŋaa kɛnɛ nɛ, ma kɛŋ baala deeŋ kɔ ʋ ŋɩŋaa nyɩnyɛ wɩaa mɩ sɩpaaŋ? Nɩdoho deeŋ maga dɩ ʋ jʋʋ mɩ dɩa nɛɛ?”