1 SAMƲƐL 2 - WƖA TENIŊ

Hana chʋɔlɛ Wɩa

¹ Ŋɩɩ nɛ Hana chʋɔlɛ Wɩa a bʋl, “La TƖƖNA leŋe mɩ tʋɔŋ tɔrɛ nɛ woruŋ. Ʋ nɛ leŋe mɩ kɛŋ doluŋ, aa mɔŋ mɩ dʋndɔŋŋɔɔ. Mɩ tʋɔŋ tɔrɔ nɛ woruŋ ʋ sɩ laamɛ ta.

² Nʋʋkala tuo a bɩ disiniŋ kɛnɛ, see La TƖƖNA dʋndʋŋa, nʋʋkala tuo a magʋ. Nʋʋkala tuo a jaŋ wuo pɔla a magɛ la Wɩa.

³ Má sɩ́ babiibal wɩaa bʋbʋl koo a bibigisi ma tɩtɩa lɛ, bɛɛ wɩaa La TƖƖNA Wɩa nɛ jɩŋ wɩɩkala, a jaŋ dii nʋʋkala sarɩya.

⁴ Laalɩyuori babiibalaa tosuŋ boro nɛ, aŋ ka nɩalɩŋ sɩ bɩ doluŋ kɛnɛ mɩɩra kɛŋ doluŋ.

⁵ Nɩalɩŋ fa sɩ dii vʋvɔgɛ mɩɩra pɛrɛ pachɩŋŋaa nɛ didii, ama losuŋ fa sɩ kɛŋ nɩalɩŋ mɩɩra dii vʋvɔgɛ nɛ. Haal-la sɩ bɩ bii lʋla, mɩɩra lʋl biiriŋ balɩpɛ nɛ. Ka haal-la fa sɩ kɛŋ biiriŋ yʋgɛ bɩra bɩ bii kɛnɛ.

⁶ La TƖƖNA nɛ leŋe nɩaa sʋsʋʋ. Ʋ nɩɩ pɩ nɩaa mɩɩsɩŋ ma. Ʋ nɛ yie leŋ nɩaa sʋʋ a mʋ lɛlɛɛ-jaŋ, aŋ bɩra chɩsɛba ba kɛŋ mɩɩsɩŋ.

⁷ La TƖƖNA nɛ yie leŋ nɩa ŋaa summu koo a ŋaa kɩaa tɩɩna. Ʋ nɛ yie kɛŋ nɩa muuri koo a ŋaa ʋ ŋaa nɩbal.

⁸ Ʋ nɛ yie chʋʋlɛ summoo kʋŋkɔlʋŋ lɛ, aŋ kɛŋ nɩalɩŋ sɩ bɩ ba tɩtɩa lɛ wuo pɛ ta ba sii tʋɔrʋŋ nyuŋ, a leŋ ba guoli kuori-biiriŋ tʋɔŋ, a leŋ ba hɔŋ lee sɩ kɛŋ yɩrɩŋ. La TƖƖNA nɛ ŋaa tinteeŋ gentine kala, a leŋ dʋnɩa chɩŋ ʋ nyuŋ a ŋaa ʋ kʋŋ.

⁹ Ʋ jaŋ pɔ nɩalɩŋ sɩɩ tou arɩ wʋtɩtɩɩ. Ama nɩbɔŋŋɔɔ-na jaŋ lɛl birimiŋ tʋɔŋ. Nuhuobiine bɩ jaŋ wuo kɛŋ ʋ tɩtɩa doluŋ a ŋaa wɩɩkala.

¹⁰ La TƖƖNA jaŋ chei nɩalɩŋ kala sɩ vɩaʋ. Ʋ jaŋ na baanɩŋ, a kpɩa ba lɛ a nagɛ duonuŋ. La TƖƖNA jaŋ dii dʋnɩa nɩaa kala sarɩya. Ʋ jaŋ joŋ doluŋ a pɩ kuoru-la ʋ sɩ lɩɩsa, dɩ ʋ kɛŋ doluŋ kʋŋkala nyuŋ.”

¹¹ Ŋɩɩ nɛ Ɛlɩkaana mɩɩra mʋ ʋ jaŋ Rama, ka Samʋɛl pɛ Wɩɩsʋllɩ sɩpaalaara Eli lɛ a tɩma pɩpɩ La TƖƖNA.

Eli hambolibiisiŋ

¹² Eli hambolibiisiŋ fa ŋaa bii-bɔmɔ nɛ, ba bɩ La TƖƖNA ka fá.

¹³ Ba bɩ wombie-la Wɩɩsʋllɩ sɩpaalaaraa sɩ maga dɩ ba to a laa kɩaa nɩaa teeŋ ka to. Ba wɩɩŋ nɛ, dɩ nʋʋ nɛ kpʋ pʋna a sʋl Wɩɩsʋlʋŋ a joŋ nammɩa-la chɔ, ba kʋŋkala yie tɩŋ ʋ tɩntɩnna, ʋ joŋ nammɩɩ-lɩɩsɩrɩ laha sɩ kɛŋ kerikee batori a kori.

¹⁴ Ʋ jaŋ kɛŋ laha-la a mʋ tʋʋ pupoiŋ koo kʋŋ na-kala ba sɩ kaa chɔ nammɩa-la tʋɔŋ. Kʋ-la na-kala ʋ sɩ lɩɩsa, ba nɛ tɩɩʋ. Ŋɩɩ nɛ ba yie joŋo ŋaa Iziral tɩmma-la kala sɩ yie kɔ Sɩlɔ a ŋaa Wɩɩsʋlʋŋ lɛ.

¹⁵ Ŋɩɩ ma dʋndʋŋa dee, ka dɩ ba-na paala lɩɩsɛ pʋna nʋʋŋ a nyɩgɛ, Wɩɩsʋllɩ sɩpaalaara tɩntɩnna jaŋ mʋ bʋl nɩɩ-la sɩɩ sʋl Wɩɩsʋlʋŋ lɛ, “Chɔgɛ nammɩa pɩ Wɩɩsʋllɩ sɩpaalaara dɩ ʋ wasɛ. Ʋ bɩ nammɩɩ chɔɔlʋŋ ka chɛ, see kʋhuoŋ.”

¹⁶ Dɩ nɩɩ-la nɛ bʋla pʋ, “Leŋ dɩ mɩ laa sɩpaaŋ a nyɩgɛ nʋʋ-la aŋ ka ŋ-na chɔgɛ magɛ ŋɩɩ kala ŋ sɩɩ chɛ,” tɩntɩnnʋ-la yie bʋl, “Aɩ, chɔgɔ pɩmɛ lɛɛlɛ, ŋɩɩ dee, mɩ jaŋ chɔgɛ arɩ doluŋ.”

¹⁷ Wɩɩŋ deeŋ Eli hambolibiisi-la sɩɩ ŋaa chaasa ŋaa wʋbɔŋ-bal nɛ La TƖƖNA teeŋ, bɛɛ wɩaa ba kɛŋ Wɩɩsʋlʋŋ kɩalɩŋ ba sɩ kaa kʋ pɩ La TƖƖNA aa ŋmoo gbɛɛŋ nɛ.

¹⁸ Ama Samʋɛl-na fa hɛ La TƖƖNA teeŋ nɛ a tɩma pʋpʋ bʋa na-kala. Ʋ fa ŋaa bii-bie nɛ a laalɛ gɛrɩpɛ fʋfʋlʋŋ gɛrɩ-laala-daŋɩŋ.

¹⁹ Jɩna na-kala ʋ naaŋ yie yɛrɛ gɛrɩ-duduo-bie nɛ a kaa kʋ pʋ, dɩ ʋ dɩ ʋ bala nɛ kɔ dɩ ba kpʋ pʋsʋŋ a ŋaa ba jɩna Wɩɩsʋlʋŋ.

²⁰ Eli yie sʋl Wɩa pɩ Ɛlɩkaana arɩ ʋ haala a bʋl, “La TƖƖNA jaŋ pɛ ŋ dɩ ŋ haala deeŋ lɛ dɩ ma lʋl biiriŋ, dɩ ba chɩŋ bie deeŋ nyuŋ, bie deeŋ ʋ sɩ sʋl Wɩa ʋ joŋo pʋ ʋ ma bɩra joŋu hɛ La TƖƖNA nɩsɩŋ lɛ nɛ.” Dɩ ʋ nɛ sʋl Wɩa pɩba dɛrɛ, ba yie mɩɩra mʋ dɩa.

²¹ Ŋɩɩ nɛ La TƖƖNA pɛ Hana lɛ, ʋ bɩra lʋl hambolibiisiŋ batori arɩ hantolibiisiŋ ma balɩa. Ama Samʋɛl-na hɛ La TƖƖNA teeŋ nɛ a mʋ waa.

²² Eli fa hɩɛsa nɛ woruŋ, ŋɩɩ nɛ ʋ nɩɩ wɩalɩŋ kala ʋ hambolibiisiŋ sɩ joŋo ŋaa Iziral tɩŋŋaa lɛ, arɩ ŋɩɩ ba sɩ kɛŋ haala-la sɩɩ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ pɩpɩŋ.

²³ Ŋɩɩ nɛ ʋ pɩɛsɛba, “Bɛɛ nɛ tɩɩ ma ŋɩŋaa wʋdosunuŋ deemba? Nɩaa bʋl wʋbɔmɔ-la kala ma sɩɩ ŋaa pɩmɛ nɛ.

²⁴ Mɩ biiri, má sɩ́ ŋɩɩ ŋaa, wɩɩŋ deeŋ La TƖƖNA nɩaa sɩ gɔllɔ bʋlaa bal ŋaa wʋbɔŋ nɛ.

²⁵ Dɩ nʋʋ nɛ ŋaa wʋbɔŋ ʋ dɔŋɔ lɛ, Wɩa jaŋ wuo jʋʋ ma balɩa pɛgɛ a kɛmma hɛ dɔŋɔ, ama dɩ nʋʋ nɛ ŋaa wɩaa chei La TƖƖNA teeŋ, kʋbɛɛ ma nɛ saa bɩra jaŋ jʋʋ ma pɛgɛ a kɛmma hɛ dɔŋɔ?” Ama ʋ hambolibiisi-la bɩ jegile nɩɩ ŋɩɩ ʋ sɩ kpʋrɩsɛ ba dɩgɩlaa, bɛɛ wɩaa La TƖƖNA paala kɛŋ ʋ tɩtɩa hɛ dɔŋɔ nɛ dɩ ʋ kpʋba.

²⁶ Ka Samʋɛl ha wʋwaa, La TƖƖNA arɩ nuhuobiinee kala tʋɔŋ tɔrɛ ʋ nyuŋ.

Ba bʋl wɩalɩŋ sɩ jaŋ ŋaa Eli dɩa nɩaa lɛ

²⁷ Bʋa kʋbala lɛ Wɩa wʋlaabʋlla kɔ Eli teeŋ a bʋla pʋ, “Wɩɩ-la La TƖƖNA sɩ bʋla nɛ ŋ-la: ‘Mɩ fa chaasa kɛŋ mɩ tɩtɩa kʋ dagɛ ŋ nyɩmma dɩa nɩaa nɛ Ijipiti tinteeŋ lɛ, bʋa-la lɛ ba sɩ ŋaa Ijipiti kuoro yosi.

²⁸ Iziral doho doho-la kala tʋɔŋ, ŋ nyɩmma doho nɩaa nɛ mɩ lɩɩsɛ dɩ ba nɛ ŋaa Wɩɩsʋllɩ sɩpaalaaraa, a tɩtɩŋ mɩ koru-la lɛ, a nyɩgɛ kʋsʋɔrʋsʋŋ pɩpɩmɛ, a lɩlaalɛ gɛrɩ-laala-daŋɩɩ-la a chɛɛ na wɩalɩŋ mɩ sɩɩ chɛ. Wɩɩsʋlʋŋ kɩalɩŋ Iziral tɩŋŋaa sɩ yie nyɩga pɩmɛ ma tʋɔŋ, mɩ leŋe ma nyɩmma doho nɩaa kɛŋ kpaalɩŋ nɛ.

²⁹ Bɛɛ nɛ saa tɩɩ ma kɛŋ mɩ Wɩɩsʋlʋŋ kɩalɩŋ mɩ sɩ daga dɩ ba kaa kɔ mɩ Dɩ-zɔŋ-la lɛ ŋmuŋmoo gbɛɛŋ? Bɛɛ nɛ tɩɩ ŋ zil ŋ hambolibiisiŋ a kɩɩmɛ, a leŋ ba dii Iziral tɩŋŋaa Wɩɩsʋlʋŋ kɩalɩŋ lere-la sɩ kɛŋ nʋʋraa a nɛrɛ nɛrɛ?

³⁰ Ŋɩɩ wɩaa, mɩ-na ma TƖƖNA, Iziral tɩŋŋaa Wɩa sɩ: Mɩ fa bʋla pɩ ŋ dɩa nɩaa arɩ ŋ nyɩŋ-nɩaa, dɩ ba nɛ ŋaa Wɩɩsʋllɩ sɩpaalaaraa bʋa na-kala, ama lɛɛlɛ mɩ bʋla arɩ ŋɩɩ bɩra bɩ jaŋ chɩŋ. Nɩalɩŋ sɩɩ zilmi, mɩ ma jaŋ zilba, aŋ bɛrɛ nɩalɩŋ sɩ bɩ mɩ kaa tɩtɩŋ.

³¹ Bʋa kʋbala jaŋ yi dɩ mɩ kpʋ ŋ dɩa bapʋɔsaa arɩ ŋ nyɩŋ-nɩaa bapʋɔsaa kala. Ŋ doho nʋʋkala bɩ jaŋ hɩɛsɛ aŋ sʋʋ.

³² Ŋ jaŋ na hɛɛŋ woruŋ, ka dɩ mɩ ŋaa wʋzɔŋŋɔɔ a pɩpɩ Iziral tɩŋŋaa. Ŋ dɩa nɩaa tʋɔŋ, nʋʋkala bɩ jaŋ kɔ dɩ ʋ hɩɛsa aŋ sʋʋ.

³³ Dɩ mɩ nɛ paala bɩ nʋʋ kpʋa ŋ doho nɩaa tʋɔŋ ma, ka dɩ ʋ ŋaa Wɩɩsʋllɩ sɩpaalaarʋ, ʋ jaŋ yel a nyʋlɩmɛ dɩ ʋ tʋɔŋ faasa chei woruŋ. Ŋ doho nɩaa kala jaŋ sʋʋ nɩduo-sʋʋŋ.

³⁴ Ŋ hambolibiisi-la balɩa, Hofini arɩ Finihas kala jaŋ sʋʋ chɛ bala. Ŋɩɩ jaŋ ŋaa magɩl arɩ wɩalɩŋ mɩ sɩ bʋla sɛnɛ jaŋ ŋaa wʋtɩtɩɩba.

³⁵ Mɩ jaŋ lɩɩsɛ nɩtɛŋɛ dɩ ʋ ŋaa Wɩɩsʋllɩ sɩpaalaarʋ, a ŋɩŋaa wɩalɩŋ kala mɩ sɩɩ chɛ. Mɩ jaŋ leŋ dɩ ʋ dɩa chɩŋ woruŋ, ʋ jaŋ tɩma pɩpɩ kuoru-la mɩ sɩ lɩɩsa bʋa na-kala.

³⁶ Dɩ nʋʋ nɛ ka ŋ doho nɩaa tʋɔŋ, ʋ jaŋ kʋ kpirimi mɩ Wɩɩsʋllɩ sɩpaalaara sɩpaaŋ, a sʋlʋ a chɩchɛ moribiee arɩ kʋdiilee mʋa. Ʋ jaŋ sʋlʋ a bʋl: Leŋ dɩ mɩ pɛ Wɩɩsʋllɩ sɩpaalaaraa lɛ a tɩtɩŋ a ma wuo na kʋdiilee mʋa a didii.’ ”