1 SAMƲƐL 19 - WƖA TENIŊ

Sɔɔl nɛrɩgɛ dɩ ʋ kpʋ Devit

¹ Tapʋlɩɩ kʋbala nɛ Sɔɔl bʋla pɩ ʋ nanʋala Jonataŋ arɩ ʋ tɩntɩnnaa kala dɩ ba kpʋ Devit. Ama Jonataŋ arɩ Devit fa mal dɔŋɔ nɛ woruŋ.

² Ŋɩɩ nɛ ʋ lʋara bʋla pʋ, “Mɩ nyɩmma Sɔɔl ka chɛ wombiiŋ nɛ dɩ ʋ kpʋŋ. Chie chʋchʋɔŋ kɛŋ ŋ tɩtɩa woruŋ, a chɛ lee a faa.

³ Mɩ dɩ mɩ nyɩmma jaŋ kʋ lɩɩ chɩŋ ŋmaŋkaaŋ lee-la ŋ sɩ faa, dɩ mɩ bʋl ŋ wɩaa pʋ. Wɩɩ-la kala mɩ sɩ nɩa ʋ niiŋ lɛ, mɩ jaŋ leŋ dɩ ŋ jɩŋ.”

⁴ Ŋɩɩ nɛ Jonataŋ bɛsɛ Devit lɛ a pɩ ʋ nyɩmma Sɔɔl a bʋl, “Mɩ nyɩmma, ŋ jɩma ŋ-na kuoro bɩ maga dɩ ŋ joŋ wʋbɔŋ kala ŋaa ŋ tɩntɩnna Devit lɛ. Ʋ ha bɩ wɩɩkala ŋaa a cheyiŋ, wɩalɩŋ kala ʋ sɩ ŋaa chaasa pɛ ŋ lɛ nɛ woruŋ.

⁵ Ʋ joŋ ʋ mɩɩsɩŋ lenni sʋʋŋ nɛ, a kpʋ Golɩaf. La TƖƖNA nɛ pɛ ʋ lɛ ʋ yuo dii a laa yɩrɩŋ pɩ Iziral tɩŋŋaa kala. Bʋa-la lɛ ŋ sɩ na wɩɩ-la, ŋ tʋɔŋ fa tɔrɔ nɛ. Bɛɛ nɛ saa tɩɩ ŋ chɩchɛ ŋ kpʋ Devit sɩ bɩ wɩɩkala cheye?”

⁶ Sɔɔl jegile nɩɩ Jonataŋ teeŋ aŋ ŋmɩɛsɛ, “La TƖƖNA sɩ weye wɩaa, mɩ bɩ jaŋ kpʋ Devit.”

⁷ Ŋɩɩ nɛ Jonataŋ yɩrɛ Devit a bʋl wɩalɩŋ kala ba sɩ bʋla a pʋ, aŋ kɛŋ Devit kɔ Sɔɔl teeŋ, ʋ tɩma pʋpʋ arɩ ʋ fa sɩ laa sɩpaaŋ tɩtɩŋ ŋɩɩ.

⁸ Bʋa kʋbala lɛ laalɩŋ bɩra sii. Devit lɩɩ a chaasa yuo dii Fɩlɩsɩtɩa tɩŋŋaa, ba fá.

⁹ Tapʋlɩɩ kʋbala jɩŋ-bɔmʋŋ sɩ lɩɩ La TƖƖNA teeŋ sii Sɔɔl lɛ, dɩ ʋ hɔŋ ʋ dɩa tʋɔŋ a kori timiŋ. Bʋa-la lɛ dɩ Devit bɩra hɛ nɩmɛ a dudu cheŋ.

¹⁰ Ŋɩɩ nɛ Sɔɔl nɛrɩgɛ dɩ ʋ yagɛ Devit mɛrɛ jeeŋ lɛ arɩ tiŋ-la. Devit wuo nuuro lɩɩ, tiŋ-la bɩ ʋ kɛnɛ, aŋ mʋ jʋʋ jeeŋ. Tɩtaŋ-la Devit lɩɩ fá mʋ ʋ dɩa.

¹¹ Sɔɔl tɩŋ nɩaa dɩ ba mʋ a pɔ Devit dɩa, a kpʋʋ chʋchʋɔŋ. Ŋɩɩ nɛ Devit haala Mɩkal lʋara bʋla pʋ, “Dɩ ŋ nɛ bɩ lɩɩ fá tɩtaŋɩŋ deeŋ, chie chʋchʋɔŋ ba jaŋ kpʋŋ.”

¹² Ŋɩɩ nɛ Mɩkal joŋ Devit ta ʋ to tokoro lɩɩ, a fá viiri,

¹³ ka ʋ mɩɩra joŋ tɔmʋŋ a jʋʋ bil Devit kʋpɩnaa nyuŋ a kɛŋ gɛrɩŋ tɔ, a paa bʋ-pʋnaa a mɛrɛ tɔŋ-la nyuŋ.

¹⁴ Nɩalɩŋ Sɔɔl sɩ tɩma sɩ mʋa dɩ ba kɛŋ Devit, Mɩkal bʋla pɩba, “Ʋʋ wɩɩlɛ nɛ.”

¹⁵ Ba mɩɩra kʋ bʋla pɩ Sɔɔl. Ʋ bɩra tɩmba a bʋl, “Má mɩɩra mʋ Devit dɩa, a dʋɔrʋ bɔsɔ-la lɛ a kaa kʋ pɩmɛ, dɩ mɩ kpʋʋ.”

¹⁶ Ba mʋ jʋʋ beŋ bɔsɔ-la lɛ dɩ tɔmʋŋ nɛ pɩna, ba paa bʋ-pʋnaa mɛrɛ ʋ nyuŋ lɛ.

¹⁷ Ŋɩɩ nɛ Sɔɔl tɩŋ ba yɩrɛ Mɩkal. Ʋ kɔ, ʋ pɩɛsʋ, “Bɛɛ nɛ tɩɩ ŋ nyɩsɛmɛ ŋ-la, aŋ leŋ mɩ dʋndɔmɔ fa lɛl?” Mɩkal bʋla pʋ, “Ʋ sɩ, ʋ jaŋ kpʋmɛ, dɩ mɩ nɛ bɩ ʋ lɛ pɛ dɩ ʋ fá lɛl.”

¹⁸ Bʋa-la lɛ Devit sɩ lɩɩ fá, ʋ mʋ Samʋɛl teeŋ nɛ taŋ-la ba sɩɩ yɩrɛ Rama lɛ, a bʋl wɩalɩŋ kala Sɔɔl sɩ ŋaa ʋ lɛ a pʋ. Ŋɩɩ nɛ ʋ dɩ Samʋɛl sii mʋ hɔŋ lee kʋbala ba sɩɩ yɩrɛ Nayɔf.

¹⁹ Ba sɩ hɔŋ nɩmɛ, ba bʋla pɩ Sɔɔl, “Devit nɛ hɛ Nayɔf sɩ hɛ Rama lɛ.”

²⁰ Ŋɩɩ nɛ ʋ hɛ nɩaa dɩ ba mʋ kɛnʋ. Ba sɩ mʋa, ba na Wɩa wʋlaabʋllaa dɩ ba hilime a bʋbʋl wɩaa Wɩa doluŋ lɛ. Samʋɛl hɛ nɩmɛ a ŋaa ba sɩpaalaara. Ŋɩɩ nɛ Wɩa Dɩma kʋ jʋʋ nɩalɩŋ Sɔɔl sɩ tɩma, ba ma bʋbʋl wɩaa Wɩa doluŋ lɛ.

²¹ Sɔɔl sɩ nɩɩ wɩɩ-la, ʋ bɩra tɩŋ nɩaa dɔnsʋŋ ma ba mʋ. Ba sɩ mʋa, ŋɩɩ tɩtɩa nɛ ŋaa ba ma lɛ. Sɔɔl bɩra tɩŋ nɩaa torimuŋ lɛ ba mʋ, ŋɩɩ tɩtɩa bɩra ŋaa.

²² Ʋ dɩdɛrɩŋ, Sɔɔl tɩtɩa sii a mʋmʋ Rama. Ʋ sɩ mʋ yi vil-bal kʋbala sɩ hɛ lee-la ba sɩɩ yɩrɛ Seku, ʋ pɩɛsɛ, “Nɩɩ nɛ Samʋɛl arɩ Devit hɛ?” Ba bʋla pʋ, “Ba hɛ Nayɔf sɩ hɛ Rama lɛ.”

²³ Sɔɔl joŋo mʋmʋ nɩmɛ. Ŋɩɩ nɛ Wɩa Dɩma-la jʋʋ-ʋ ma, ʋ bʋbʋl wɩaa Wɩa doluŋ lɛ ŋɩɩ a mʋ yi Nayɔf.

²⁴ Ʋ sɩ mʋa, ʋ wuri ʋ gɛnnɩŋ kala ta nɛ, aŋ ma bʋbʋl Wɩa wɩaa Samʋɛl sɩpaaŋ, aŋ kɛŋ yarɩ-biree pɩŋ tinteeŋ tapʋlɩɩ-la wɩɩhɛyɛ arɩ tɩtaŋɩŋ kala. Ŋɩɩ nɛ tɩɩ nɩaa pɩpɩɛsɛ, “Sɔɔl ma ŋaa Wɩa wʋlaabʋllʋ nɛɛ?”