1 SAMƲƐL 18 - WƖA TENIŊ

Sɔɔl yaraa bieri Devit nyuŋ

¹ Bʋa-la lɛ Devit arɩ Sɔɔl sɩ bʋl wɩaa a dɛrɛ, ŋɩɩ nɛ Jonataŋ dɩma chaasa kɛŋ Devit, ʋ faasa chou arɩ ʋ sɩ cho ʋ tɩtɩa ŋɩɩ.

² A chɩŋ tapʋlɩɩ-la a kaa mʋ, Sɔɔl leŋ Devit hɛ ʋ teeŋ. Ʋ bɩra bɩ leŋe ʋ mɩɩra mʋ ʋ nyɩmma dɩa.

³ Jonataŋ sɩ cho Devit arɩ ʋ sɩ cho ʋ tɩtɩa ŋɩɩ, ʋ hɛ niiŋ a pʋ arɩ ba jaŋ ŋaa nandɔsɛ a kaa mʋ wuu.

⁴ Ŋɩɩ nɛ Jonataŋ wuri ʋ gɛrɩ-balɩŋ arɩ ʋ laalɩyuori-gɛrɩŋ a pɩ Devit, a pɛ ʋ tokobiiŋ arɩ toŋ arɩ gɛrɩpɛlɩɛɛ-bie lɛ.

⁵ Dɩ Sɔɔl nɛ tɩŋ Devit dɩ ʋ mʋ ŋaa wɩɩ, ʋ yie ŋaa wɩɩ-la woruŋ nɛ. Ŋɩɩ nɛ Sɔɔl leŋ ʋ ŋaa ʋ laalɩyuoroo nɩhɩaŋ dɔŋɔ. Sɔɔl tɩntɩnnɩ-hɩasɩŋ arɩ nɩalɩŋ kala tʋɔŋ tɔrɛ wɩɩ-la Sɔɔl sɩ ŋaa pɩ Devit lɛ.

⁶ Bʋa-la lɛ Devit sɩ kpʋ Golɩaf ka ba mɩɩra kʋkɔ dɩa, haalaa lɩɩ Iziral tasɩŋ kala lɛ, a yɩɩ yɩɩlaa a gʋa cheŋ kuoro Sɔɔl. Ba yɩɩ yɩɩlaa arɩ tʋɔtɔrʋŋ nɛ a chɩgɩsɛ chɩnchɩgɩsɩŋ a du kɔnɛba a hɛ.

⁷ Haala-la yɩɩ yɩɩla-la gʋgʋa ŋɩɩ nɛ aŋ bʋbʋl, “Sɔɔl kpʋ nɩaa bʋɩba nɛ, ka Devit kpʋ bʋɩ fiiba.”

⁸ Ba sɩɩ yɩɩ yɩɩla-la ŋɩɩ, Sɔɔl tʋɔŋ kala chei, ʋ baanɩŋ ma sii kɩŋkɛŋ. Ʋ bʋl ʋ tʋɔŋ lɛ, “Ba sɩ Devit kpʋ nɩaa bʋɩ fiiba nɛ, ka mɩ-na kpʋ bʋɩba dʋndʋŋ. Bɛɛ kʋŋ nɛ saa ka dɩ ʋ laa, dɩ mɩ kuorii-la dee?”

⁹ A chɩŋ tapʋlɩɩ-la, Sɔɔl yaraa bibieri Devit nyuŋ ʋ gɩgɩɛnʋ.

¹⁰ Taŋ sɩ pʋla Wɩa leŋ jɩŋ-bɔmʋŋ guu kʋ jʋʋ Sɔɔl arɩ doluŋ. Ʋ faasaa bʋl wɩaa ʋ dɩa tʋɔŋ a nagɛ nyɩnyɛ-tɩɩna, ka Devit dudu cheŋ arɩ ʋ sɩ vɛnɛɛ ŋaa ŋɩɩ. Bʋa deeŋ lɛ dɩ Sɔɔl kori timiŋ.

¹¹ Ʋ yuo tiŋ-la aŋ bʋl ʋ tʋɔŋ lɛ, “Mɩ jaŋ yagɛ Devit a mɛrɛ jeeŋ lɛ.” Ʋ ŋaa ŋɩɩ naansɩɩŋ bʋlɩa nɛ, Devit ma wuo nuuro lɩɩ bʋlɩa-la kala.

¹² Fawʋllʋŋ kɛŋ Sɔɔl a tɩŋ Devit wɩaa, bɛɛ wɩaa La TƖƖNA lɩɩ Sɔɔl harɩŋ nɛ, a mɩɩra chɩŋ Devit harɩŋ.

¹³ Ŋɩɩ nɛ Sɔɔl bɩra bɩ leŋe Devit hɛ ʋ teeŋ, aŋ joŋu hɛ ʋ ŋaa laalɩyuoroo bʋɩ sɩpaa-laarʋ, a kɛmba mʋmʋ laalɩŋ.

¹⁴ Wɩɩ na-kala Devit sɩ ŋaa vɛŋ woruŋ nɛ, bɛɛ wɩaa La TƖƖNA chɩŋ ʋ harɩŋ nɛ.

¹⁵ Sɔɔl sɩ na dɩ Devit wɩɩkala ka vɛŋ woruŋ, ʋ chaasa fɩfáʋ woruŋ.

¹⁶ Nɩalɩŋ sɩ hɛ Iziral tinteeŋ arɩ Juda tinteeŋ kala lɛ cho Devit nɛ woruŋ, bɛɛ wɩaa ʋ laa ba sɩpaaŋ ba wɩaa vɩvɛŋ woruŋ nɛ.

¹⁷ Tapʋlɩɩ kʋbala Sɔɔl bʋla pɩ Devit, “Na mɩ tol-hɩaŋ Mɛrab nɛ ŋ-la, mɩ jaŋ joŋo pɩŋ dɩ ŋ jaa. Ŋ-na kɛŋ bɔɩ-duoŋ a to mɩ niiŋ a yuo La TƖƖNA laalɩŋ.” Sɔɔl bʋla ʋ tʋɔŋ lɛ, “Mɩ-na bɩ jaŋ ŋaaʋ wɩɩkala, Fɩlɩsɩtɩa tɩŋŋaa nɛ jaŋ kpʋʋ pɩmɛ.”

¹⁸ Ama Devit bʋla pɩ Sɔɔl, “Mɩ ma nɛ kʋbɛɛ, mɩ dɩa nɩaa koo mɩ nyɩmma dɩa nɩaa magɛ ɛɛ nɛ Iziral doho nɩaa tʋɔŋ, a magɛ dɩ mɩ ŋaa kuoro hɩɩlɛ-baala?”

¹⁹ Ama bʋa-la sɩ yie dɩ ba joŋ Sɔɔl tolo Mɛrab a pɩ Devit, ba mɩɩra joŋo pɩ Mehola doho nɩaa baal kʋbala ba sɩɩ yɩrɛ Adɩrɩɛl ʋ jaa.

²⁰ Sɔɔl fa kɛŋ tolo dɔŋ ma nɛ baa yɩrɛ Mɩkal. Tolo-la dɩma kɛŋ Devit woruŋ. Ŋɩɩ nɛ ba bʋl wɩɩ-la pɩ Sɔɔl, ʋ tʋɔŋ tɔrɛ.

²¹ Sɔɔl bʋl ʋ tʋɔŋ lɛ, “Mɩ jaŋ joŋ tolo-la pʋ dɩ ʋ jaa, dɩ mɩ to ʋ lɛ a bɛrɛ kɛŋ Devit dɩ Fɩlɩsɩtɩa tɩŋŋaa kpʋʋ.” Ŋɩɩ nɛ Sɔɔl bɩra bʋla pɩ Devit, “Lɛɛlɛ wombiiŋ bɩra pɩna nɛ a pɩŋ dɩ ŋ ŋaa mɩ hɩɩlɛ-baala.”

²² Ŋɩɩ nɛ Sɔɔl hɛ ʋ tɩntɩnnaa dɩ ba mʋ a yɩrɛ Devit dʋndʋŋa a bʋl wɩaa pʋ, “Kuoro tʋɔŋ tɔrɛ ŋ nyuŋ nɛ woruŋ, ʋ tɩntɩnnaa ma kala choŋ. Lɛɛlɛ ʋ maga dɩ ŋ jaa kuoro tolo nɛ.”

²³ Ba bʋl wɩɩŋ deeŋ bʋlɩa bʋlɩa a pɩ Devit. Ŋɩɩ nɛ ʋ pɩɛsɛ, “Ma bɩɩna ʋ ŋaa wʋbie nɛ dɩ nʋʋ ŋaa kuoro hɩɩlɛ-baalaa? Mɩ ŋaa summu nɛ, nɩaa ma bɩ mɩ jɩŋ woruŋ.”

²⁴ Sɔɔl tɩntɩnna-la sɩ bʋl wɩalɩŋ Devit sɩ bʋla pɩba a pɩ Sɔɔl,

²⁵ ŋɩɩ nɛ Sɔɔl sɩ, “Má bʋla pɩ Devit, ‘Hajaarɛ kɩalɩŋ kala kuoro sɩɩ chɛ nɛ, dɩ ŋ joŋ ʋ baanɩŋ fɩɩsɛ Fɩlɩsɩtɩa tɩŋŋaa sɩ ŋaa ʋ dʋndɔŋŋɔɔ lɛ, a kpʋ ba nɩaa zɔlɔ a keri ba penee puroo kaa kʋ bil ʋ sɩpaaŋ.’ ” Sɔɔl tʋɔbɩɩnaa kala nɛ, dɩ ʋ joŋ Devit a hɛ Fɩlɩsɩtɩa tɩŋŋaa nɩsɩŋ lɛ dɩ ba kpʋʋ.

²⁶ Sɔɔl tɩntɩnna-la sɩ bʋl wɩalɩŋ a pɩ Devit, ʋ tʋɔŋ tɔrɛ arɩ ʋ sɩ jaŋ ŋaa kuoro hɩɩlɛ-baala. Ka dɩ bʋa-la ba sɩ jaŋ jaa dɔŋɔ na yi,

²⁷ Devit arɩ ʋ nɩaa lɩɩ a kpʋ Fɩlɩsɩtɩa tɩŋŋaa zɔɔ-balɩa, a keri ba penee puroo kaa kʋ dɩɩsɛ kuoro sɩpaaŋ ba chesi, ka dɩ ʋ wuo ŋaa kuoro hɩɩlɛ-baala. Ŋɩɩ nɛ Sɔɔl joŋ ʋ tolo Mɩkal pɩ Devit ʋ jaa.

²⁸ Sɔɔl sɩ kʋ jɩŋ arɩ La TƖƖNA chɩŋ Devit harɩŋ nɛ, ʋ tolo Mɩkal ma chou,

²⁹ fawʋllʋŋ wasa kɛŋ Sɔɔl woruŋ a tɩŋ Devit wɩaa. Ʋ mɩɩsɩŋ kala lɛ, ʋ kɛŋ Devit ŋaa ʋ dʋndɔŋ.

³⁰ Fɩlɩsɩtɩa tɩŋŋaa laalɩyuoroo yie vɛnɛ kɔ a yuyuo Iziral tɩŋŋaa. Dɩ ba nɛ kɔ na-kala, Devit yie yuo diiba nɛ. Ʋ nɛ yuo dii nɩaa kɩɩ Sɔɔl laalɩyuori-hɩasɩ-la dɔnsʋŋ kala. Ŋɩɩ nɛ Devit yɩrɩŋ teeli leriŋ kala.