1 SAMƲƐL 17 - WƖA TENIŊ

Devit arɩ Golɩaf

¹ Fɩlɩsɩtɩa tɩŋŋaa laalɩyuoroo sii kʋ hilimi Juda tinteeŋ taŋ-la ba sɩɩ yɩrɛ Soko lɛ, dɩ ba mʋ yuo laalɩŋ a ŋmoo ba buguŋ Ɛfɩs Damɩm sɩ hɛ Soko arɩ lee-la ba sɩɩ yɩrɛ Azɩka pɛgɛ.

² Ka Sɔɔl arɩ Iziral tɩŋŋaa laalɩyuoroo ma ŋmoo ba buguŋ Ɛla fuonaaŋ lɛ, a gbɛrɛ dɩ ba yuo Fɩlɩsɩtɩa tɩmma-la.

³ Fɩlɩsɩtɩa tɩŋŋaa chɩŋ dundolo nyuŋ, Iziral tɩŋŋaa ma chɩŋ dɔŋɔ nyuŋ, ka fuonaaŋ hɛ ba pɛgɛ.

⁴ Baal kʋbala nɛ fa hɛ Fɩlɩsɩtɩa tɩŋŋaa tʋɔŋ a ŋaa laalɩyuori babiibal, baa yɩrɛ Golɩaf, ʋ lɩɩ Gaf nɛ. Ŋɩɩ nɛ ʋ kʋ lɩɩ a mɩmagɩsɛ Iziral tɩŋŋaa. Ʋ duomuŋ ka mʋa ʋ yi naakieliŋ butori.

⁵ Ʋ fa chu kɔlɩɩŋ nyunchu-gbaŋkogo nɛ, aŋ laalɛ laalɩyuori-gɛrɩŋ ba sɩ kɛŋ kɔlɩɩŋ ŋaa. Ʋ yuŋuŋ ŋaa kilo mahɩŋ balɩa arɩ fii arɩ balɩpɛ nɛ.

⁶ Ʋ joŋ kɔlɩɩŋ patuosiba a bɛ tɔ ʋ naasɩŋ, aŋ joŋ tokobiiŋ ba sɩ kɛŋ kɔlɩɩŋ libi a laalɛ.

⁷ Ʋ timiŋ chaasa barɩmɛ nɛ woruŋ ʋ kori. Tiŋ-la niipiniŋ hɔɔŋ dʋndʋŋa yuŋuŋ ŋaa kilo balɩpɛ nɛ. Nɩɩ-la sɩ kori hɔɔtaala-la Golɩaf sɩ kaa kɛrɛɛ laa bayuori-hɛŋŋɛɛ laa ʋ sɩpaaŋ.

⁸ Golɩaf lɩɩ chɩŋ aŋ kpɩa goŋ Iziral laalɩyuoroo teeŋ a bʋl, “Bɛɛ nɛ tɩɩ ma kʋ lɩɩ chɩŋ dɩ ma yuo laalɩŋ? Mɩ ŋaa Fɩlɩsɩtɩa tɩɩna nɛ, ka ma ma ŋaa Sɔɔl tɩntɩnnaa. Má lɩɩsɛ baal ma tʋɔŋ dɩ ʋ kʋ tuu chemmi dɩ la yuo dɔŋɔ.

⁹ Dɩ ʋ nɛ wuo yuo a kpʋmɛ, la jaŋ ŋaa ma yosi a tɩma pɩpɩma, ama dɩ mɩ ma nɛ wuo yuo a kpʋʋ, ma ma jaŋ ŋaa la yosi a tɩma pɩpɩla.”

¹⁰ Ŋɩɩ nɛ Fɩlɩsɩtɩa tɩɩna-la bɩra bʋl, “Jɩnɩŋ mɩɩ tʋʋsɛ Iziral tɩŋŋaa laalɩyuoroo kala joŋŋoo nɛ. Má lɩɩsɛ baal dɩ ʋ kɔ dɩ la yuo dɔŋɔ.”

¹¹ Sɔɔl arɩ Iziral tɩŋŋaa kala sɩ nɩɩ wɩalɩŋ Fɩlɩsɩtɩa tɩɩna-la sɩ bʋla, fawʋllʋŋ faasa kɛmba, ba kala kpaŋ.

¹² Devit nyɩmma nɛ fa Jesi. Jesi ŋaa Yufireti tɩɩna nɛ, a lɩɩ Bɛtɩlɛhɛm sɩ hɛ Juda tinteeŋ lɛ. Ʋ kɛŋ hambolibiisiŋ chori nɛ. Bʋa-la lɛ Sɔɔl sɩ dii kuoruŋ, dɩ Jesi hɩɛsa woruŋ.

¹³ Jesi hambolibii-hɩasɩŋ batori nɛ to Sɔɔl harɩŋ a mʋ laal-la. Kʋhɩaŋ yɩrɩŋ nɛ Ɛlɩab, lɩamɩŋ tɩɩna yɩrɩŋ nɛ Abɩnadab, tori tɩɩna ma yɩrɩŋ nɛ Sama.

¹⁴ Devit nɛ ŋaa ba tʋɔŋ kʋbie. Nɩhɩasɩ-la batori nɩɩ to Sɔɔl harɩŋ,

¹⁵ ka Devit yie lɩɩ Sɔɔl teeŋ bʋa dɔŋɔ a mʋ Bɛtɩlɛhɛm dɩ ʋ beŋ ʋ nyɩmma piesee.

¹⁶ Fɩlɩsɩtɩa tɩɩna-la yie kʋ lɩɩ a magɩsɛ Iziral tɩŋŋaa chʋchʋɔŋ arɩ dɩdaanɩŋ kala ŋɩɩ tapʋlaa mahɩŋ balɩa.

¹⁷ Tapʋlɩɩ kʋbala, Jesi bʋla pɩ ʋ nanʋala Devit, “Laa mɩɩ-halaa gbansɩŋ banɔŋ arɩ boroboroba fii, a ŋaa lɩma a kaa mʋ ŋ naambiiriŋ buguŋ a pɩba.

¹⁸ Laa na-yɩl-nʋʋ-gulimoo fii a pɛ a kaa mʋ pɩ laalɩyuoru-hɩaŋ-la sɩɩ bemba, aŋ pɛ na wɩalɩŋ ŋ naambiiriŋ sɩɩ ŋaa, a laa kʋŋ ba teeŋ kaa kɔ sɩ jaŋ dagɛ arɩ ba kɛŋ yarɩfɩɛlaa nɛ.

¹⁹ Ŋ naambiiri-la arɩ Iziral tɩŋŋaa kala nɛ hɛ Sɔɔl teeŋ Ɛla fuonaa-la lɛ a yuyuo Fɩlɩsɩtɩa tɩŋŋaa.”

²⁰ Taŋ sɩ pʋla chʋchʋɔ-fɩɛla, Devit sii a leŋ piesee pɩ pie-daarʋ dɔŋ, aŋ paa kʋdiile-la lɩɩ mʋ, arɩ Jesi sɩ dagʋ ŋɩɩ. Ʋ mʋʋ yi ba buguŋ, dɩ laalɩyuoro-la lɩɩ chɩchɩŋ ba dɩchɩnaa, aŋ ŋɩŋaa laalɩyuori-goŋ.

²¹ Iziral tɩŋŋaa arɩ Fɩlɩsɩtɩa tɩŋŋaa kala kʋ lɩɩ chɩŋ a chaasɛ dɔŋɔ dɩ ba yuo laalɩŋ.

²² Devit leŋ kɩalɩŋ ʋ sɩ kaa mʋ, a pɩ nɩɩ-la sɩɩ beŋ ba laalɩyuoro-la kɩaa, aŋ fá mʋ laal-la leriŋ a chʋɔlɛ ʋ malɩmaba.

²³ Bʋa-la lɛ ʋ sɩɩ bʋl wɩaa ba teeŋ ŋɩɩ, dɩ Fɩlɩsɩtɩa tɩŋŋaa laalɩyuori babiibal-la ba sɩɩ yɩrɛ Golɩaf, a lɩɩ Gaf, dɩ ʋ bɩra tʋɔra lɩɩ chɩŋ sɩpaaŋ aŋ kpɩa goŋ a mɩmagɩsɛ arɩ ʋ sɩ vɛnɛɛ ŋaa ŋɩɩ, Devit nɩɩ.

²⁴ Iziral tɩŋŋaa sɩ na baal-la, fawʋllʋŋ chaasa kɛmba, ba fá.

²⁵ Iziral tɩŋŋaa laalɩyuoro-la lɛɛlɛ bʋbʋl, “Ŋ-na baala deeŋ sɩ kʋ lɩɩ chɩŋ nɛɛ? Ʋʋ tʋʋsɛ Iziral tɩŋŋaa joŋŋoo nɛ. Nɩɩ-la kala sɩ wuo kpʋʋ, kuoro jaŋ pɩ tɩɩna dʋa a yʋgɛ. Ʋ jaŋ joŋ ʋ tolo ma pʋ dɩ ʋ jaa, aŋ leŋ dɩ tɩɩna arɩ ʋ dɩa nɩaa kala bɩra sɩ́ lampoo tiŋ Iziral tinteeŋ lɛ.”

²⁶ Devit pɩɛsɛ laalɩyuoro-la dɔnsʋŋ sɩ chɩna kpagʋ, “Ma sɩ bɛɛ nɛ ba jaŋ ŋaa pɩ nɩɩ-la sɩ jaŋ kpʋ Fɩlɩsɩtɩa tɩŋŋaa baala deeŋ a lɩɩsɛ Iziral tɩŋŋaa hɩɩsɩŋ lɛ? Kʋbɛɛ nɛ ka Fɩlɩsɩtɩa tɩɩna deeŋ sɩ bɩ Wɩa ka to, aa tʋʋsɛ Wɩa-la sɩ weye laalɩyuoroo joŋŋoo?”

²⁷ Ba bɩra bʋl wɩalɩŋ tɩtɩa ba sɩ jaŋ ŋaa pɩ nɩɩ-la sɩ jaŋ wuo kpʋ Golɩaf a pɩ Devit.

²⁸ Devit malɩma Ɛlɩab sɩ nɩa dɩ Devit ka bʋl wɩaa laalɩyuoro-la teeŋ, ʋ baanɩŋ faasa sii ʋ nyuŋ kɩŋkɛŋ ʋ pɩɛsʋ, “Bɛɛ nɛ tɩɩ ŋ kɔ daha? Kʋbɛɛ nɛ ŋ joŋ piese-la baŋmɛnɛ pa pɔkɔŋ nyuŋ? Mɩ jɩŋ ŋ nyuduoŋ arɩ ŋ tʋɔhɛɛŋ wɩaa nɛ, ŋ kɔ dɩ ŋ na ŋɩɩ la sɩɩ yuo laalɩŋ nɛ.”

²⁹ Ŋɩɩ nɛ Devit pɩɛsɛ, “Bɛɛ nɛ mɩ ŋaa? Ʋ bɩ maga dɩ mɩ bʋl wɩaa?”

³⁰ Devit bɩra mʋ laalɩyuoro-la dɔŋɔ ma teeŋ a pɩɛsʋ wɩalɩŋ tɩtɩa ʋ sɩ laa sɩpaaŋ pɩɛsɛ laalɩyuoroo dɔnsʋŋ. Ŋɩɩ nɛ ʋ ma bɩra bʋl wɩalɩŋ tɩtɩa ba sɩ laa sɩpaaŋ bʋla pʋ.

³¹ Ba sɩ nɩɩ wɩalɩŋ kala Devit sɩ bʋla, ba mʋ bʋl wɩalɩŋ kala a pɩ Sɔɔl. Ŋɩɩ nɛ Sɔɔl tɩma yɩrʋ.

³² Devit bʋla pɩ Sɔɔl, “Mɩ nɩhɩaŋ, nʋʋkala sɩ́ leŋe dɩ ŋ bɔyɛ joŋ a tɩŋ Fɩlɩsɩtɩa tɩɩna-la wɩaa, mɩ-na ŋ tɩntɩnna jaŋ mʋ yuou.”

³³ Sɔɔl ma bʋla pɩ Devit, “Ŋ ŋaa bii-bie nɛ, ŋ bɩ jaŋ wuo mʋ yuo Fɩlɩsɩtɩa tɩɩna-la, bɛɛ wɩaa ʋ ŋaa laalɩyuoru nɛ ʋ hambiiriŋ kala lɛ.”

³⁴ Devit bɩra bʋla pɩ Sɔɔl, “Mɩ-na ŋ tɩntɩnna nɩɩ beŋ mɩ nyɩmma piesee. Bʋa na-kala dɩ naachigiŋ koo lʋgʋmʋŋ nɛ kʋ kɛŋ piese-la kʋŋ,

³⁵ mɩ yie kire ŋmobu nɛ a laa piesu-la ʋ niiŋ lɛ. Dɩ ʋ nɛ sii hosi mɩ nyuŋ, mɩ yie kɛŋ ʋ yikori-ŋmʋlʋŋ lɛ nɛ, aŋ ŋmobu kpʋ.

³⁶ Mɩ kpʋ naachigee arɩ lʋgʋmaa nɛ woruŋ, Fɩlɩsɩtɩa tɩŋŋaa baala deeŋ sɩ bɩ Wɩa ka to ma jaŋ nagɛ ba dɔŋɔ mɩ teeŋ, bɛɛ wɩaa ʋ tʋʋsɛ Wɩa-la sɩ weye laalɩyuoroo joŋoo nɛ.

³⁷ La TƖƖNA sɩ lɩɩsɛmɛ naachigee arɩ lʋgʋmaa niiŋ lɛ, ʋ jaŋ lɩɩsɛmɛ Fɩlɩsɩtɩa tɩɩna deeŋ ma nɩsɩŋ lɛ.” Ŋɩɩ nɛ Sɔɔl bʋla pɩ Devit, “Mʋ, La TƖƖNA jaŋ chɩŋ ŋ harɩŋ.”

³⁸ Ŋɩɩ nɛ Sɔɔl paa ʋ laalɩyuori gɛnnɩŋ ba sɩ kɛŋ kɔlɩɩŋ ŋaa, a nyɩgɩlɛ Devit. Ʋ joŋ nyunchu-gbaŋkogo ma ba sɩ kɛŋ kɔlɩɩŋ ŋaa, a pʋ ʋ chu.

³⁹ Devit joŋ ʋ tokobiiŋ a vɔɔ mɛrɛ laalɩyuori-gɛrɩ-la lɛ a kaa gʋgɔllɛ dɩ ʋ na, bɛɛ wɩaa ʋ bɩ ba laala mal. Devit bʋla pɩ Sɔɔl, “Mɩ bɩ jaŋ wuo kɛŋ kɩaa deemba mʋ.” Ŋɩɩ nɛ ʋ wuri gɛnnɩ-la bil.

⁴⁰ Ŋɩɩ nɛ aŋ joŋ ʋ dantɩga, a tʋɔsɛ tabɩaa sɩ ŋaa mʋla mʋla kɩaa banɔŋ fuoŋ sɩɩ pɛllʋ lɛ, a joŋo hɛ ʋ pie-daarɩ-lʋaga lɛ, aŋ kori kpalɩŋ ma ʋ nɩsɩŋ lɛ, a mʋ kpagɛ Golɩaf Fɩlɩsɩtɩa tɩɩna-la.

⁴¹ Dɩ Golɩaf arɩ ʋ laalɩyuoru-la sɩɩ kori hɔɔtaala-la ʋ sɩ kaa kɛrɛɛ laa bayuori-hɛŋŋɛɛ ma kʋ kpagɛ Devit.

⁴² Fɩlɩsɩtɩa tɩɩna-la sɩ na Devit dɩ ʋ ŋaa bapʋɔsɩ-fɩaŋ zɔŋ-bie, ʋ bee gʋʋnʋ.

⁴³ Ŋɩɩ nɛ ʋ pɩɛsɛ Devit, “Vaha nɛ mɩ ŋaa, ŋ kori daaŋ kʋkɔ mɩ lɛɛ?” Ŋɩɩ nɛ ʋ kalɩbɛ ʋ vesiŋ a hɛ Devit lɛ,

⁴⁴ aŋ bʋl, “Kɔ daha dɩ mɩ kɛnɩŋ pʋɔsa pɩ zaaraa arɩ baga kɩaa dɩ ba dii.”

⁴⁵ Ŋɩɩ nɛ Devit ma bʋla pʋ, “Ŋŋ kɔ mɩ lɛ arɩ tokobiiŋ arɩ timiŋ nɛ, ama mɩ-naa kɔ ŋ lɛ La TƖƖNA doluŋ kala Tɩɩna sɩ ŋaa Iziral laalɩyuoroo Wɩa yɩrɩŋ lɛ nɛ. Ʋ joŋŋoo nɛ ŋ tʋʋsɛ ŋɩɩ.

⁴⁶ Jɩnɩŋ La TƖƖNA jaŋ joŋuŋ hɛ mɩ nɩsɩŋ lɛ, mɩ jaŋ kpʋŋ a keri ŋ nyuŋ. Jɩnɩŋ mɩ jaŋ joŋ Fɩlɩsɩtɩa tɩŋŋaa laalɩyuoroo deemba kʋsʋʋnʋŋ a pɩ zaaraa arɩ baga kɩaa dɩ ba dii. Ŋɩɩ nɛ dʋnɩa nɩaa kala jaŋ jɩŋ dɩ Iziral Wɩa nɛ kɛŋ doluŋ.

⁴⁷ Nɩalɩŋ kala sɩ hɛ daha jaŋ jɩŋ arɩ tokobiiŋ koo timiŋ dee La TƖƖNA kaa laa nɩaa tɩta. La TƖƖNA nɛ yie yuo didii ʋ dʋndɔŋŋɔɔ, ʋ jaŋ joŋ ma kala a hɛ la nɩsɩŋ lɛ.”

⁴⁸ Golɩaf sɩ kʋ kpagɛ dɩ ʋ yuo Devit, Devit guu fá mʋ dɩ ʋ chemu.

⁴⁹ Devit tʋʋ ʋ lʋaga tʋɔŋ a lɩɩsɛ tabɩɩŋ hɛ kpalɩŋ lɛ a kaa viisi viisi, aŋ yagɛ Golɩaf tile lɛ. Tabɩɩ-la mʋʋra jʋʋ ʋ tile, ʋ tuu tele chu.

⁵⁰ Ŋɩɩ nɛ Devit yuo dii Fɩlɩsɩtɩa tɩɩna-la arɩ kpalɩŋ. Ʋ bɩ tokobiiŋ ma koro, aŋ yuo dii Golɩaf a kpʋʋ.

⁵¹ Ŋɩɩ nɛ Devit fá mʋ chugili Golɩaf lɛ, a kɛŋ Golɩaf tokobiiŋ lɛrɛ tʋʋrɛ ʋ pɛɛŋ lɛ, a keri Golɩaf nyuŋ arɩ tokobii-la. Fɩlɩsɩtɩa tɩŋŋaa sɩ na dɩ ba ba-nyantʋɔrɛ sʋba, ba mɩɩra fá.

⁵² Ŋɩɩ nɛ Iziral tɩŋŋaa arɩ Juda tɩŋŋaa laalɩyuoroo ŋaa goŋ aŋ kire to ba harɩŋ a mʋ yi tasɩ-la ba sɩɩ yɩrɛ Gaf arɩ Ɛkʋrɔŋ boi-baalaa. Fɩlɩsɩtɩa tɩŋŋaa kʋsʋʋnʋŋ fa pɩŋ taŋ-la ba sɩɩ yɩrɛ Saarem wombiiŋ lɛ ŋɩɩ nɛ a mʋ yi Gaf arɩ Ɛkʋrɔŋ.

⁵³ Iziral tɩŋŋaa sɩ kiri Fɩlɩsɩtɩa tɩmma-la a mʋ, ba mɩɩra jʋʋ Fɩlɩsɩtɩa tɩŋŋaa buguŋ a paa ba kɩaa kala.

⁵⁴ Ŋɩɩ nɛ Devit joŋ Golɩaf nyuŋ a kaa mʋ Jerusalɛm, aŋ paa Golɩaf laalɩyuori kɩaa a bil ʋ-na tɩtɩa Devit lɛbɩŋ lɛ.

⁵⁵ Sɔɔl fa sɩ na dɩ Devit mʋa dɩ ʋ yuo Golɩaf, ʋ pɩɛsɛ ʋ laalɩyuoroo nɩhɩaŋ ba sɩɩ yɩrɛ Abɩna, “Abɩna, kʋbɛɛ bie nɛ bapʋɔsɛ bie deeŋ?” Ŋɩɩ nɛ ʋ bʋl, “Tɛŋɛ, kuoro, mɩ bɩ jɩŋ.”

⁵⁶ Kuoro bɩra bʋl, “Pɩɛsɛ a na nɩɩ-la sɩ lʋl bapʋɔsɛ bie deeŋ.”

⁵⁷ Devit sɩ kpʋ Golɩaf Fɩlɩsɩtɩa tɩɩna-la bʋa-la lɛ aŋ mɩɩra kɔ, Abɩna pʋʋra kɛnʋ mʋ Sɔɔl sɩpaaŋ, dɩ Golɩaf nyuŋ ha paala hɛ Devit nɩsɩŋ lɛ.

⁵⁸ Sɔɔl pɩɛsɛ Devit, “Bapʋɔsɩ-bie, kʋbɛɛ bii nɛ ŋ ŋaa?” Devit sɩ, “Ŋ tɩntɩnna Jesi, Bɛtɩlɛhɛm tɩɩna-la nɛ lʋlmɛ.”