1 SAMƲƐL 16 - WƖA TENIŊ

Samʋɛl joŋ Wɩɩsʋllɩ nʋʋŋ a tɩsɛ Devit

¹ Tapʋlɩɩ kʋbala La TƖƖNA pɩɛsɛ Samʋɛl, “Ɛɛ nɛ ŋ jaŋ leŋ dɩ ŋ tʋɔŋ chei Sɔɔl wɩaa a diene magɛ? Mɩ folo kiru nɛ, ʋ bɩra bɩ Iziral tɩŋŋaa kuoru ŋaa. Ŋaa nʋʋŋ a su loŋ, a mʋ Bɛtɩlɛhɛm. Baal kʋbala nɛ hɛ nɩmɛ baa yɩrɛ Jesi. Mʋ ʋ dɩa. Mɩ lɩɩsɛ ʋ hambolibiisiŋ dɔŋɔ nɛ dɩ ʋ dii kuoruŋ.”

² Samʋɛl bʋl, “Ɛɛ nɛ mɩ jaŋ ŋaa a mʋ? Dɩ Sɔɔl nɛ nɩɩ wɩɩ-la, ʋ jaŋ kpʋmɛ.” La TƖƖNA bʋl, “Kɛŋ na-paha aŋ bʋla pɩ nɩɩ-la kala sɩ jaŋ pɩɛsɩŋ, ‘Mɩ kaa kɔ dɩ mɩ kpʋ a sʋl Wɩɩsʋlʋŋ pɩ La TƖƖNA nɛ.’

³ Yɩrɛ Jesi dɩ ʋ ma kɔ Wɩɩsʋlɩɩ-la leriŋ, mɩ jaŋ dagɩŋ wɩɩ-la ŋ sɩ jaŋ ŋaa. Ŋ jaŋ joŋ Wɩɩsʋllɩ nʋʋŋ a tɩsɛ nɩɩ-la mɩ sɩ lɩɩsa a pɩmɛ.”

⁴ Ŋɩɩ nɛ Samʋɛl ŋaa ŋɩɩ tɩtɩa La TƖƖNA sɩ bʋla. Ʋ sɩ mʋ yi Bɛtɩlɛhɛm, nɩhɩasɩ-la sɩ hɛ taŋ-la lɛ kʋ lɩɩ a chemu, fawʋllʋŋ kɛmba. Ba pɩɛsɛ, “Ba fɩɛlaa?”

⁵ Samʋɛl bʋl, “Ba fɩɛla nɛ. Mɩ kɔ dɩ mɩ kpʋ pʋsʋŋ nɛ a sʋl Wɩɩsʋlʋŋ a pɩ La TƖƖNA. Má pɩɩsɛ ma disiniŋ ta, aŋ kɔ dɩ la mʋ Wɩɩsʋlɩɩ-la leriŋ.” Ŋɩɩ nɛ ʋ pɩɩsɛ Jesi arɩ ʋ hambolibiisiŋ ma disiniŋ ta, aŋ yɩrɛ ba ma, dɩ ba kʋ pɛ Wɩɩsʋlɩɩ-la lɛ.

⁶ Ba sɩ mʋa, Samʋɛl na Jesi hambolibii-hɩaŋ ba sɩɩ yɩrɛ Ɛlɩab, a bɩɩnɛ ʋ tʋɔŋ lɛ, “Nɩa deeŋ sɩ chɩŋ La TƖƖNA sɩpaaŋ daha, ʋ nɛ nɩɩ-la ʋ sɩ lɩɩsa.”

⁷ La TƖƖNA bʋla pɩ Samʋɛl, “Sɩ́ ŋɩɩ ʋ sɩ zɔmɔ koo ʋ sɩ waayi lɛ beŋ, ʋ dee mɩ lɩɩsɛ. Mɩ-na ma TƖƖNA bɩ kɩalɩŋ nuhuobiine sɩɩ beŋ nɩɩ beŋ. Nuhuobiine yie beŋ yaraa zɔmʋŋ lɛ nɛ, ka mɩ-na ma TƖƖNA ma bibeŋ tʋɔŋ lɛ.”

⁸ Ŋɩɩ nɛ Jesi yɩrɛ ʋ nanʋala Abɩnadab ʋ kʋ to Samʋɛl sɩpaaŋ a mʋ. Samʋɛl bʋl, “Ʋ ma dee La TƖƖNA lɩɩsɛ.”

⁹ Jesi bɩra yɩrɛ dɔŋɔ ma ba sɩɩ yɩrɛ Sama, ʋ kʋ bal. Samʋɛl bɩra bʋl, “Nɩa deeŋ ma dee La TƖƖNA lɩɩsɛ.”

¹⁰ Jesi ŋaa ŋɩɩ nɛ a leŋ ʋ hambolibiisi-la balɩpɛ kala to Samʋɛl sɩpaaŋ a bal, ama ʋ bʋla pʋ, “La TƖƖNA bɩ ba kʋŋkala lɩɩsa.”

¹¹ Ŋɩɩ nɛ Samʋɛl pɩɛsɛ Jesi, “Ŋ hambolibiisiŋ kala nɛ ŋɩɩ?” Jesi bʋl, “Ba tʋɔŋ kʋbie ha hɛ nɩmɛ, ama ʋ mʋ pie-daalɩŋ.” Samʋɛl bʋl, “Tɩŋ dɩ ba mʋ kɛnʋ kɔ, la bɩ jaŋ hɔŋ see dɩ ʋ kɔ.”

¹² Jesi tɩŋ ba mʋ kɛnʋ kɔ. Ʋ fa ŋaa bapʋɔsɩ-fɩaŋ zɔŋ-bie nɛ, ʋ sɩɩ-biee ma kala tʋtʋl. Ŋɩɩ nɛ La TƖƖNA bʋla pɩ Samʋɛl, “Nɩɩ-la nɛ ŋɩɩ, joŋ Wɩɩsʋllɩ nʋʋŋ a tɩsɛ ʋ nyuŋ.”

¹³ Samʋɛl joŋ loŋ arɩ nʋʋŋ a wansa tɩsʋ ʋ naambiiri-la kala sɩpaaŋ. A chɩŋ tapʋlɩɩ-la a kaa mʋ, La TƖƖNA Dɩma kʋ hɛ Devit lɛ a pʋ doluŋ. Ŋɩɩ harɩŋ Samʋɛl mɩɩra mʋ Rama.

Sɔɔl joŋ Devit ʋ ŋaa ʋ tɩntɩnnʋ

¹⁴ La TƖƖNA Dɩma-la lɩɩ Sɔɔl lɛ, ka La TƖƖNA leŋ dɩŋ-bɔmʋŋ mɩɩra kʋ jʋʋ-ʋ, a wʋwalɩmʋ kɩŋkɛŋ.

¹⁵ Sɔɔl tɩntɩnnaa bʋla pʋ, “Wɩa leŋe jɩŋ-bɔŋ nɛ hɛ ŋ lɛ a wʋwalɩmɩŋ kɩŋkɛŋ.

¹⁶ La nɩhɩaŋ, pɩla wombiiŋ dɩ la chɛ nʋʋ sɩ jɩŋ cheŋ dunuŋ, dɩ jɩŋ-bɔŋ-la nɛ sii ŋ lɛ, ʋ jaŋ du cheŋ-la a pɩŋ dɩ ŋ yaraa bɩra kpɩa mʋa.”

¹⁷ Ŋɩɩ nɛ Sɔɔl bʋl ʋ tɩntɩnna-la lɛ, “Má chɛ nʋʋ sɩ chaasa jɩŋ cheŋ dunuŋ woruŋ a kaa kʋ pɩmɛ.”

¹⁸ Tɩntɩnna-la dɔŋɔ bʋl, “Mɩ jɩŋ Jesi sɩ lɩɩ Bɛtɩlɛhɛm nanʋal kʋbala lɛ nɛ, ʋ chaasa jɩŋ cheŋ dunuŋ nɛ woruŋ. Ʋ ŋaa bɔɩ-duo tɩɩna nɛ, a ŋaa bayuoru. Ʋ ŋaa bapʋɔsɛ-zɔŋ nɛ, a jɩŋ wɩaa bʋlʋŋ woruŋ. La TƖƖNA chɩŋ ʋ harɩŋ nɛ.”

¹⁹ Ŋɩɩ nɛ Sɔɔl tɩŋ ba mʋ bʋla pɩ Jesi, “Leŋ dɩ ŋ nanʋala Devit, nɩɩ-la sɩɩ daa ŋ piesee kɔ mɩ teeŋ.”

²⁰ Jesi sii a kɛŋ ʋ nanʋala Devit, a leŋ kakumo chʋŋ boroboro, ʋ hɛ girep nɛnɛɛ sɩnɩŋ a su puruŋ a kɛŋ bʋ-keeŋ pɛ a leŋ Devit kaa mʋ pɩ Sɔɔl.

²¹ Devit mʋ Sɔɔl teeŋ a tɩma pʋpʋ. Ʋ cho ʋ wɩaa woruŋ a leŋ ʋ ŋaa nɩalɩŋ dɔŋɔ sɩɩ kori ʋ laalɩyuori-kɩaa.

²² Ŋɩɩ nɛ Sɔɔl tɩŋ ba bʋla pɩ Jesi, “Mɩɩ sʋlʋŋ, leŋ dɩ Devit hɛ mɩ teeŋ a tɩmaa pɩmɛ, bɛɛ wɩaa mɩ tʋɔŋ tɔrɛ ʋ nyuŋ nɛ.”

²³ Bʋa na-kala lɛ, dɩ jɩŋ-bɔŋ-la sɩ lɩɩ Wɩa teeŋ nɛ sii Sɔɔl lɛ, Devit yie joŋ cheŋ nɛ a du, jɩŋ-bɔŋ-la leŋu, ka ʋ yaraa pɛ dɔŋɔ lɛ.