1 SAMƲƐL 15 - WƖA TENIŊ

La TƖƖNA kiri Sɔɔl kuoruŋ lɛ

¹ Tapʋlɩɩ kʋbala Samʋɛl bʋla pɩ Sɔɔl, “La TƖƖNA tɩmmɛ nɛ, mɩ joŋ Wɩɩsʋllɩ nʋʋŋ a tɩsɩŋ, ŋ ŋaa Iziral tɩŋŋaa kuoro. Ŋɩɩ wɩaa, jegile nɩɩ wɩalɩŋ La TƖƖNA sɩ bʋla.

² Wɩalɩŋ La TƖƖNA doluŋ kala Tɩɩna sɩ bʋla nɛ ŋ-la: ‘Mɩ jaŋ dɔgɩsɛ Amalɛk tɩŋŋaa a tɩŋ ba fa sɩ kɛrɛ Iziral tɩŋŋaa wombiiŋ lɛ, bʋa-la lɛ ba sɩ lɩɩ Ijipiti tinteeŋ kʋkɔ.

³ Mʋ a yuo Amalɛk tɩmma-la a chei kʋŋ na-kala ba sɩ kɛnɛ. Sɩ́ leŋe dɩ kʋŋ ka. Kpʋ baalaa, haalaa, hambiisiŋ arɩ bii-mulluŋ, nɛsɩŋ arɩ piesee, bʋntaŋŋaba arɩ kakusuŋ kala.’ ”

⁴ Ŋɩɩ nɛ Sɔɔl yɩrɛ laalɩyuoro-la kala kʋ hɛ dɔŋɔ taŋ-la ba sɩɩ yɩrɛ Tɛlɛm lɛ. Laalɩyuoro-la sɩɩ vɛŋ naasɩŋ lɛ a lɩɩ Iziral tinteeŋ ŋaa bʋɩ zɔɔ-balɩa nɛ, ka bʋɩ fii ma lɩɩ Juda tinteeŋ.

⁵ Sɔɔl arɩ ʋ laalɩyuoro-la sii mʋ Amalɛk tɩŋŋaa taŋ, a tuu faa fuonaaŋ sɩ luŋie lɛ, a pɔ.

⁶ Ŋɩɩ nɛ Sɔɔl bʋla pɩ Keni tɩŋŋaa, “Má pɔrɛ ma tɩtɩa a lɩɩ Amalɛk tɩŋŋaa tʋɔŋ, dɩ mɩ sɩ́ ma pɛ kpʋ, bɛɛ wɩaa ma fa kɛŋ zile nɛ Iziral tɩŋŋaa teeŋ, bʋa-la lɛ ba sɩ lɩɩ Ijipiti tinteeŋ lɛ a kʋkɔ.” Ŋɩɩ nɛ Keni tɩmma-la pɔrɛ ba tɩtɩa a lɩɩ Amalɛk tɩŋŋaa tʋɔŋ.

⁷ Ŋɩɩ nɛ Sɔɔl yuo dii Amalɛk tɩŋŋaa kala. Ʋ chɩŋ taŋ-la ba sɩɩ yɩrɛ Havɩla lɛ nɛ a yuoba ŋɩɩ a mʋ yi taŋ kʋbala ba sɩɩ yɩrɛ Suu, a hɛ Ijipiti wɩɩpɔsʋŋ dɩɩrɩŋ.

⁸ Ʋ kpʋ Amalɛk tɩŋŋaa kala nɛ, aŋ kɛŋ ba kuoro ba sɩɩ yɩrɛ Agag.

⁹ Sɔɔl arɩ ʋ laalɩyuoroo bɩ kuoro Agag-na kpʋa, a pɛ ba pʋŋ-zɔŋŋɔɔ lɛ, piesee, nɛsɩŋ, nɛ-bii-nɛrɛɛ arɩ pie-pɔrɔɔ arɩ kʋŋ na-kala sɩ zɔmɔ pɩba. Ama kɩalɩŋ sɩ bɩ zɔmɔ pɩba, ba kala nɛ ba chei a pɛ pʋsʋ-la sɩ pugumo lɛ.

¹⁰ Ŋɩɩ nɛ La TƖƖNA bʋla pɩ Samʋɛl,

¹¹ “Mɩ tʋɔŋ kala nɛ cheye mɩ sɩ leŋe Sɔɔl dii kuoruŋ, bɛɛ wɩaa ʋ joŋ harɩŋ a yɩamɛ nɛ, a bɩ wɩalɩŋ mɩ sɩ daga ka to.” Wɩɩ-la walɩmɛ Samʋɛl woruŋ, ʋ bɛrɛ doŋ tɩtaŋɩŋ kala a sʋl La TƖƖNA.

¹² Taŋ sɩ pʋla chʋchʋɔŋ, ʋ sii mʋ Sɔɔl leriŋ dɩ ʋ naʋ, ama nʋʋ bʋla pʋ, “Sɔɔl mʋ lee-la ba sɩɩ yɩrɛ Kamɛl. Nɩmɛ nɛ ʋ kɛŋ tabɩaa saa kʋŋ ʋ ŋaa magɩl a pɩ ʋ tɩtɩa, dɩ nɩaa liliisi ʋ wɩaa, aŋ lɩɩ nɩmɛ mʋ Gɩlɩgal.”

¹³ Bʋa-la lɛ Samʋɛl sɩ kʋ na Sɔɔl, Sɔɔl chʋɔlʋ aŋ bʋl, “La TƖƖNA jaŋ pɛ ŋ lɛ! Mɩ to wɩalɩŋ kala La TƖƖNA sɩ daga nɛ.”

¹⁴ Samʋɛl pɩɛsɛ, “Ka bɛɛ nɛ tɩɩ mɩ nɩɩ piesee arɩ nɛsɩŋ yele?”

¹⁵ Sɔɔl bʋl, “Amalɛk tɩŋŋaa teeŋ nɛ laalɩyuoro-la kɛsɛba lɩɩ. Ba leŋ piese-la arɩ nɛsɩ-la sɩ zɔmɔ dɩ ba kaa kpʋ sʋl Wɩɩsʋlʋŋ nɛ a pɩ ŋ TƖƖNA Wɩa, kʋkaana na-kala nɛ la kpʋ.”

¹⁶ Samʋɛl bʋla pɩ Sɔɔl, “Chɩna magɛ ŋɩɩ! Leŋ mɩ bʋl wɩɩ-la La TƖƖNA dɩa sɩ bʋla pɩmɛ tɩtaŋɩŋ a pɩŋ.” Sɔɔl bʋl, “Bʋla pɩmɛ.”

¹⁷ Ŋɩɩ nɛ Samʋɛl bʋl, “Bumbuŋ kala, ŋ tɩtɩa fa bene arɩ ŋ bɩ nʋʋ ŋaa nɛ. Ŋ dee saa bɩ kʋ ŋaa Iziral tɩŋŋaa doho doho-la kala sɩpaalaara ŋɩɩ? La TƖƖNA nɛ lɩɩsɩŋ ŋ ŋaa ba kuoro.

¹⁸ Ʋ tɩmɩŋ nɛ a bʋl, ‘Mʋ a kpʋ Amalɛk tɩŋŋaa a chei kʋŋ na-kala ba sɩ kɛnɛ, ba ŋaa nɩbɔmɔ nɛ. Ʋ sɩ dɩ ŋ yuoba ŋɩɩ nɛ deeŋ deeŋ a kpʋ ba kala dɛrɛ.’

¹⁹ Bɛɛ nɛ tɩɩ ŋ bɩ La TƖƖNA niiŋ lɛ to? Bɛɛ nɛ tɩɩ ŋ sɩɩŋ fɩɛsɛ kɩalɩŋ ma sɩ yuo laa lɛ, a ŋaa wʋbɔmʋŋ deeŋ La TƖƖNA teeŋ?”

²⁰ Sɔɔl bʋl, “Mɩ to La TƖƖNA niiŋ nɛ, mɩ tɩŋ tɩntɩmɩɩ-la ʋ sɩ sɩ mɩ tɩŋ nɛ. Mɩ chaasa kpʋ Amalɛk tɩŋŋaa kala nɛ, aŋ kɛŋ ba kuoro Agag kʋweeŋ mɩɩra kɔ.

²¹ Kɩalɩŋ la sɩ yuo laa tʋɔŋ nɛ laalɩyuoro-la kɛsɛ piesee arɩ nɛsɩ-la sɩ zɔmɔ ba ŋaa Wɩa kɩaa, dɩ ba kpʋ a sʋl Wɩɩsʋlʋŋ Gɩlɩgal lɛ a pɩ ŋ TƖƖNA Wɩa.”

²² Samʋɛl pɩɛsɛ, “Wʋbɛɛ nɛ La TƖƖNA chɩchɛ, kʋnyɩgaa Wɩɩsʋlʋŋ koo ba sɩ kpʋ pʋsʋŋ a sʋl Wɩɩsʋlʋŋ koo nʋʋ sɩ to ʋ niiŋ lɛ nɛ? Dɩ ŋ nɛ to ʋ niiŋ ʋ nɛ kpɩa ŋ sɩ kpʋ pie-belliŋ sɩ zɔmɔ a nyɩga ŋaa Wɩɩsʋlʋŋ pʋ.

²³ Dɩ ŋ nɛ vɩa ʋ niiŋ, ŋɩɩ ŋaa wʋbɔŋ nɛ a nagɛ nʋʋ sɩɩ vʋgʋ. Dɩ ŋ nɛ kɛŋ sɩɩ-duoŋ, ŋɩɩ ma ŋaa wʋbɔŋ nɛ ʋ teeŋ a nagɛ nʋʋ sɩɩ kpaarɛ vʋɩyaa. Ŋ sɩ bɩ La TƖƖNA niiŋ lɛ to ŋɩɩ, ʋ ma kiriŋ kuoruŋ lɛ nɛ.”

²⁴ Ŋɩɩ nɛ Sɔɔl bʋla pɩ Samʋɛl, “Mɩ ŋaa wʋbɔŋ nɛ. Mɩ vɩa La TƖƖNA niiŋ nɛ, a bɩ wɩalɩŋ ŋ sɩ daga ma to. Mɩ nɩaa sɩɩŋ nɛ mɩ fá, a ŋaa wɩɩ-la ba sɩɩ chɛ.

²⁵ Mɩɩ sʋlʋŋ, joŋ mɩ wʋbɔŋ-la chɛmɛ, aŋ to mɩ harɩŋ dɩ la mɩɩra mʋ, dɩ mɩ wuo zil La TƖƖNA.”

²⁶ Ama Samʋɛl bʋla pʋ, “Mɩ bɩ jaŋ to ŋ harɩŋ mʋ. Ŋ vɩa La TƖƖNA niiŋ nɛ, ʋ ma kiriŋ nɛ, ŋ bɩra bɩ Iziral tɩŋŋaa kuoru ŋaa.”

²⁷ Samʋɛl sɩ mɩɩra dɩ ʋ viiri, Sɔɔl guu kɛŋ ʋ gɛrɩŋ niipiniŋ lɛ ʋ kɩɛsɛ.

²⁸ Ŋɩɩ nɛ ʋ bʋla pɩ Sɔɔl, “Jɩnɩŋ, La TƖƖNA kɛŋ Iziral tinteeŋ kuoruŋ laa ŋ nɩsɩŋ lɛ nɛ arɩ doluŋ, a joŋo pɩ nʋʋ dɔŋ sɩ kpɩaŋ.

²⁹ Wɩa nɛ ŋaa Iziral tɩŋŋaa tʋla, ʋ bɩ wɩaa ka nyɩɛ koo aa bɩrɩmɛ ʋ tʋɔbɩɩnaa. Ʋ bɩ nuhuobiiŋ ŋaa, a kɛŋ ʋ tʋɔbɩɩnaa bɩbɩrɩmɛ.”

³⁰ Ŋɩɩ nɛ Sɔɔl bʋl, “Mɩ jɩma mɩ ŋaa wʋbɔŋ nɛ, ama mɩɩ sʋlʋŋ zilmi mɩ nɩhɩasɩŋ arɩ Iziral tɩŋŋaa sɩpaaŋ, aŋ to mɩ harɩŋ dɩ la mʋ, dɩ mɩ wuo zil ŋ TƖƖNA Wɩa.”

³¹ Samʋɛl mɩɩra to ʋ harɩŋ ba mʋ, Sɔɔl zil La TƖƖNA.

³² Ŋɩɩ nɛ Samʋɛl bʋl, “Má kɛŋ Agag, Amalɛk tɩŋŋaa kuoru-la kɔ mɩ teeŋ.” Agag nyɩrɛ bɔyɛ aŋ mʋ, a bɩɩnɛ ʋ tʋɔŋ lɛ, “Bʋa-la lɛ ba sɩ maga dɩ ba kpʋmɛ kiele nɛ.”

³³ Ama Samʋɛl bʋl, “Ŋ sɩ kpʋ nɩaa biiriŋ, ka ba naamba hɔŋ arɩ na-hɩllɩŋ ŋɩɩ, ŋ naaŋ ma jaŋ hɔŋ arɩ na-hɩllɩŋ.” Ŋɩɩ nɛ aŋ kpʋ Agag La TƖƖNA sɩpaaŋ Gɩlɩgal lɛ.

³⁴ Ŋɩɩ nɛ Samʋɛl sii lɩɩ nɩmɛ a mʋ ʋ jaŋ Rama, ka Sɔɔl ma mʋ ʋ jaŋ Gɩbɩa.

³⁵ Samʋɛl yele pɩ Sɔɔl nɛ, ama ʋ kaa mʋʋ sʋʋ dɩ ʋ sɩɩŋ bɩra bɩ Sɔɔl na. La TƖƖNA tʋɔŋ fa cheye nɛ woruŋ ʋ sɩ leŋe Sɔɔl dii kuoruŋ Iziral tinteeŋ lɛ.