1 SAMƲƐL 14 - WƖA TENIŊ

Jonataŋ yuo Fɩlɩsɩtɩa tɩŋŋaa

¹ Tapʋlɩɩ kʋbala Sɔɔl nanʋala Jonataŋ bʋla pɩ bapʋɔsɩ-bie-la sɩɩ kori ʋ laalɩyuori kɩaa, “Kɔ dɩ la mʋ Fɩlɩsɩtɩa tɩŋŋaa buguŋ sɛmɛ-la dɔŋɔ.” Ama Jonataŋ bɩ bʋla pɩ ʋ nyɩmma.

² Sɔɔl fa hɔŋ Gɩbɩa pɔkɔŋ nyuŋ nɛ, tɩa kʋbala nɛnɛɛ sɩ nagɛ kampoiŋ bʋbʋɔŋ, a hɛ lee-la ba sɩɩ yɩrɛ Mɩgɩrɔŋ. Laalɩyuoroo zɔɔ-balɩdʋ nɛ fa hɛ ʋ teeŋ.

³ Laalɩyuoro-la tʋɔŋ, Wɩɩsʋllɩ sɩpaalaara nɛ hɛ nɩmɛ baa yɩrɛ Ahija, a laalɛ ʋ gɛrɩ-laala-daŋɩŋ. Ahija nyɩmma nɛ Ahitub. Ahitub naambie nɛ Ɩkabɔd. Ahitub ma nyɩmma nɛ Finihas. Finihas ma nyɩmma nɛ Eli. Eli nɛ fa ŋaa La TƖƖNA Wɩɩsʋllɩ sɩpaalaara Sɩlɔ lɛ. Nʋʋkala fa bɩ jɩŋ arɩ Jonataŋ mʋ lee.

⁴ Wombii-bie-la sɩ hɛ peelee tʋɔŋ sɛmɛ na-kala Jonataŋ sɩɩ bɩɩnɛ dɩ ʋ to a cholo mʋ Fɩlɩsɩtɩa tɩmma-la buguŋ kɛŋ bʋ-balaa balɩa sɩ leŋie nɛ, baa yɩrɛ dɔŋɔ Bɔzɛs, aa yɩrɛ dɔŋɔ ma Sɛnɛ.

⁵ Bʋsʋ-la dɔŋɔ chɩŋ wɩɩpɔsʋŋ nagʋa dɩɩrɩŋ nɛ, a chaasa Mɩkɩmas. Ka dɔŋɔ ma chɩŋ wɩɩpɔsʋŋ nadiiŋ dɩɩrɩŋ, a ma chaasa Geba.

⁶ Jonataŋ bɩra bʋla pɩ ʋ bapʋɔsɩ-bie-la sɩɩ kori ʋ laalɩyuori kɩaa, “Kɔ dɩ la chol a mʋ Fɩlɩsɩtɩa tɩmma-la sɩ bɩ la Wɩa ka to leriŋ. Kapo La TƖƖNA jaŋ pɛ la lɛ. Wɩɩkala bɩ jaŋ wuo pɔ dɩ La TƖƖNA sɩ́ la laa ta, dɩ la yʋga koo dɩ la bɩ yʋgɛ.”

⁷ Nɩɩ-la sɩ kori ʋ laalɩyuori kɩaa bʋl, “Wɩɩ-la kala ŋ sɩ bɩɩna dɩ ŋ ŋaa, ŋaa. Mɩ chɩŋ ŋ harɩŋ nɛ arɩ mɩ tʋɔŋ kala.”

⁸ Jonataŋ bɩra bʋl, “Kɔ dɩ la chol a tʋʋlɛ Fɩlɩsɩtɩa tɩmma-la a leŋ dɩ ba nala.

⁹ Dɩ ba nɛ sɩ, ‘Má chɩŋ nɩmɛ dɩ la kɔ,’ la jaŋ chɩŋ, la bɩ jaŋ mʋ ba teeŋ.

¹⁰ Ama dɩ ba nɛ bɩra sɩ, ‘Ma kʋ jɩl la teeŋ,’ la jaŋ jɩl, bɛɛ wɩaa ŋɩɩ daga arɩ La TƖƖNA jomba hɛ la nɩsɩŋ lɛ nɛ.”

¹¹ Ŋɩɩ nɛ ba kala balɩa leŋ Fɩlɩsɩtɩa tɩmma-la sɩ hɔŋ sɛmɛ-la dɔŋɔ naba. Ba sɩ naba, ba bʋl, “Bee na, Iziral tɩmma-la nɛ gbiene lɩɩ bʋɔsʋ-la lɛ ba sɩ faa a kʋʋ lɩɩ ŋɩɩ.”

¹² Ŋɩɩ nɛ nɩalɩŋ sɩ hɛ lee-la kpɩa Jonataŋ arɩ nɩɩ-la sɩ kori ʋ laalɩyuori kɩaa lɛ a bʋl, “Má kʋ jɩl la teeŋ dɩ la dagɛma wʋjɩmɩŋ.” Jonataŋ bʋla pɩ nɩɩ-la sɩ kori ʋ laalɩyuori kɩaa, “Kɔ dɩ la jɩl, La TƖƖNA jomba hɛ Iziral tɩŋŋaa nɩsɩŋ lɛ nɛ ŋɩɩ.”

¹³ Jonataŋ kɛŋ ʋ nɩsaa arɩ ʋ naasɩŋ nɛ pɛrɩsɛ jɩl, ka nɩɩ-la ma sɩ kori ʋ laalɩyuori kɩaa tuto. Ʋ sɩ jɩla, ʋ ŋmoo Fɩlɩsɩtɩa tɩmma-la lulo, ka bapʋɔsɩ-bie-la ma kpʋba a tuto.

¹⁴ Jonataŋ arɩ bapʋɔsɩ-bie-la sɩ bumo yuo Fɩlɩsɩtɩa tɩmma-la, ba kpʋ nɩaa mara nɛ eeka kpaa magɛ dɔŋɔ tʋɔŋ.

Iziral tɩŋŋaa kiri Fɩlɩsɩtɩa tɩŋŋaa

¹⁵ Ŋɩɩ nɛ fawʋllʋŋ chaasa kɛŋ Fɩlɩsɩtɩa tɩŋŋaa laalɩyuoroo kala, nɩalɩŋ sɩ hɛ ba buguŋ lɛ arɩ nɩalɩŋ sɩɩ yuo laalɩŋ. Ŋɩɩ nɛ tinteeŋ zigili. Wɩa nɛ joŋ fawʋllɩɩ-la a hɛ ba kala lɛ.

¹⁶ Sɔɔl laalɩyuoro-la sɩɩ pɔba Gɩbɩa sɩ hɛ Bɛnjamɩŋ tinteeŋ lɛ, beŋ a na dɩ Fɩlɩsɩtɩa nɩaa laalɩyuoroo wɩɩkala vʋgʋma, ba fá pɩsɛ leriŋ kala.

¹⁷ Ŋɩɩ nɛ ʋ bʋla pɩ laalɩyuoro-la sɩ hɛ ʋ teeŋ nɩhɩasɩŋ, “Má dɩɩsɛ laalɩyuoro-la kala a na kʋbɛɛ nɛ tuo.” Ba sɩ dɩɩsa, ba na dɩ Jonataŋ arɩ nɩɩ-la sɩ kori ʋ laalɩyuori kɩaa nɛ tuo.

¹⁸ Sɔɔl bʋla pɩ Ahija, “Kɛŋ Wɩa niiriŋ daga-la kɔ yei.” (Bʋa-la lɛ dɩ ʋ hɛ Iziral tɩŋŋaa teeŋ.)

¹⁹ Sɔɔl sɩɩ bʋl wɩaa Wɩɩsʋllɩ sɩpaalaara teeŋ ŋɩɩ, dɩ wɩaa wasa vʋgʋmɛ kɩŋkɛŋ Fɩlɩsɩtɩa tɩmma-la buguŋ lɛ ba ŋɩŋaa goŋ. Sɔɔl bɩra bʋla pɩ Wɩɩsʋllɩ sɩpaalaara, “Leŋee wiesi.”

²⁰ Ŋɩɩ nɛ ka Sɔɔl arɩ ʋ laalɩyuoroo kala hɛ dɔŋɔ lɛ a mʋ laal-la. Ba sɩ mʋa, ba na dɩ Fɩlɩsɩtɩa nɩaa wɩɩkala chaasa vʋgʋmɛ, ba tɩtɩa gʋraa ta dɔŋɔ arɩ tokobiee.

²¹ Iziral tɩmma-la dɔnsʋŋ fa sɩ hɛ Fɩlɩsɩtɩa tɩŋŋaa teeŋ, a to mʋ lee-la Fɩlɩsɩtɩa tɩŋŋaa sɩ ŋmoo ba buguŋ dɩ ba yuo Iziral tɩŋŋaa, ba leŋ Fɩlɩsɩtɩa tɩŋŋaa aŋ mɩɩra mʋ pɛ Iziral tɩŋŋaa lɛ a yuo pɩpɩ Sɔɔl arɩ Jonataŋ.

²² Iziral tɩmma-la dɔnsʋŋ fa sɩ faa Efirem tintee-la peelee sɩ yʋga lɛ sɩ nɩa dɩ Fɩlɩsɩtɩa tɩŋŋaa ka fá nɛ, ba kala kʋ lɩɩ pɛ Iziral tɩŋŋaa lɛ. Ba chaasa kire to Fɩlɩsɩtɩa tɩŋŋaa harɩŋ.

²³ Tapʋlɩɩ-la La TƖƖNA chaasa laa Iziral tɩŋŋaa ta nɛ. Ba yuo laal-la ŋɩɩ nɛ deeŋ deeŋ a mʋ kieli taŋ-la ba sɩɩ yɩrɛ Bɛf Avɛŋ.

Jonataŋ dii tʋʋŋ

²⁴ Tapʋlɩɩ-la losuŋ kɛŋ Iziral tɩŋŋaa laalɩyuoroo ba na hɛɛŋ woruŋ, bɛɛ wɩaa Sɔɔl fa ŋmɩɛsa nɛ a bʋl, “Dɩ mɩ nɛ bɩ mɩ baanɩŋ joŋo fɩɩsɛ mɩ dʋndɔŋŋɔɔ lɛ jɩnɩŋ, ka dɩ ma kʋŋ dii kɩaa, ŋmɩaŋ jaŋ dii tɩɩna.” Ŋɩɩ wɩaa nʋʋkala bɩ kʋŋ die.

²⁵ Iziral laalɩyuoro-la kala jʋʋ duuŋ tʋɔŋ, a na tʋʋŋ tinteeŋ.

²⁶ Ba sɩ jʋʋ duuŋ tʋɔŋ, ba na dɩ tʋʋŋ gbu lɩlɩɩ tinteeŋ, ka ba kʋŋkala bɩ taga hɛ ʋ niiŋ lɛ, bɛɛ wɩaa fawʋllʋŋ fa kɛmba nɛ a tɩŋ Sɔɔl ŋmɩaŋ-la wɩaa.

²⁷ Ama Jonataŋ-na fa bɩ nɩa dɩ ʋ nyɩmma ŋmɩɛsa pɩ nɩalɩŋ. Ŋɩɩ nɛ ʋ kɛŋ dantɩga ʋ sɩ koro niiŋ a tɔɔ tʋʋ-jaga dɔŋɔ, a kaa jɩla lenni. Ʋ yaraa guu polli.

²⁸ Ŋɩɩ nɛ laalɩyuoro-la dɔŋɔ bʋla pʋ, “Ŋ nyɩmma ŋmɩɛsa pɩ laalɩyuoroo kala nɛ a bʋl, ‘Dɩ nʋʋkala nɛ dii kʋŋ jɩnɩŋ, ŋmɩaŋ jaŋ dii tɩɩna.’ Ŋɩɩ nɛ tɩɩ nɩalɩŋ kala yaraa yʋɔrɛ ŋɩɩ.”

²⁹ Jonataŋ bʋl, “Mɩ nyɩmma hɛ wɩɩŋ ʋ tinteeŋ nɩaa lɛ. Mɩ sɩ lenni tʋʋ-la mʋa, mɩ yaraa kala nɛ pollo.

³⁰ Bee na, dɩ nɩalɩŋ nɛ fa dii kɩalɩŋ ba sɩ yuo laa ba dʋndɔŋŋɔɔ teeŋ mʋa jɩnɩŋ, ba fa jaŋ kpʋ Fɩlɩsɩtɩa tɩmma-la a kɩɩ ŋ-la.”

³¹ Tapʋlɩɩ-la Iziral tɩŋŋaa sɩ chɩŋ lee-la ba sɩɩ yɩrɛ Mɩkɩmas, aŋ kpʋ Fɩlɩsɩtɩa tɩŋŋaa ŋɩɩ deeŋ deeŋ a mʋ yi Aɩjalɔŋ, ŋɩɩ harɩŋ, ba chaasa lɔl nɛ woruŋ.

³² Ba tuoŋi kɩalɩŋ ba sɩ yuo laa ba dʋndɔŋŋɔɔ teeŋ, a kɛsɛ piesee, nɛsɩŋ arɩ nɛ-biisiŋ a kpʋ jaasɛ leriŋ kala, a chɩchaŋ arɩ chalɩŋ.

³³ Ŋɩɩ nɛ nʋʋ dɔŋ hɛ duoso pɩ Sɔɔl, “Nɩalɩŋ ka ŋaa wʋbɔŋ nɛ La Tɩɩna teeŋ, ba sɩɩ chaŋ nammɩa arɩ chalɩŋ.” Sɔɔl bʋl, “Ma joŋ ma Wɩa laa diiniŋ ta nɛ ŋɩɩ La TƖƖNA teeŋ. Má bilimi tabɩɩ-balɩŋ kaa kɔ daha lɩma.”

³⁴ Ʋ bɩra bʋl, “Má lɩɩ nɩalɩŋ teeŋ a bʋla pɩba, ‘Má kʋŋkala kɛŋ nɛsɩŋ arɩ piesee kaa kɔ mɩ teeŋ daha a kpʋ a chaŋ. Má sɩ́ ba dɩ chalɩŋ chaŋ, a ŋaa wʋbɔŋ La TƖƖNA teeŋ.’ ” Ŋɩɩ nɛ nʋʋkala kɛŋ ʋ pʋna kʋ kpʋ nɩmɛ tɩtaŋ-la.

³⁵ Ŋɩɩ nɛ Sɔɔl saa Wɩɩsʋllɩ koruŋ pɩ La TƖƖNA. Ʋ Wɩɩsʋllɩ koru-bumbuŋ nɛ ŋɩɩ ʋ sɩ saa.

³⁶ Sɔɔl bɩra bʋl, “Má leŋ la tuu yuo Fɩlɩsɩtɩa tɩŋŋaa tɩtaŋɩŋ a paa ba kɩaa ŋɩɩ a mʋ yi sɩɩpʋʋraa. Má leŋ la kpʋ ba kala.” Nɩalɩŋ bʋl, “Wɩɩ-la kala sɩ zɔmɔ a pɩŋ, ŋaa.” Ama Wɩɩsʋllɩ sɩpaalaara sɩ, “Má leŋ dɩ la laa sɩpaaŋ pɩɛsɛ Wɩa daha a na.”

³⁷ Ŋɩɩ nɛ Sɔɔl pɩɛsɛ Wɩa, “Mɩ mʋ yuo Fɩlɩsɩtɩa tɩŋŋaa? Ŋ jaŋ leŋ dɩ Iziral tɩŋŋaa yuo diibaa?” Tapʋlɩɩ-la Wɩa bɩ wɩɩkala bʋla pʋ.

³⁸ Ŋɩɩ wɩaa Sɔɔl bʋl, “Má nɩalɩŋ kala sɩ ŋaa laalɩyuoroo sɩpaalaaraa, má kɔ la chɛ na wʋbɔŋ-la la sɩ ŋaa jɩnɩŋ.

³⁹ La TƖƖNA sɩ weye a laa Iziral tɩŋŋaa tɩta wɩaa, mɩ ŋmɩɛsa, dɩ mɩ bie Jonataŋ ma nɛ paala ŋaa wʋbɔŋ-la, ʋ maga ba kpʋʋ nɛ.” Ka nɩalɩŋ kala tɔrɛ ba niiŋ.

⁴⁰ Sɔɔl bɩra bʋl Iziral tɩŋŋaa lɛ, “Má kala mʋ chɩŋ daha, ka mɩ dɩ mɩ nanʋala Jonataŋ ma chɩŋ daha.” Ŋɩɩ nɛ nɩalɩŋ bʋl, “Wɩɩ-la kala sɩ zɔmɔ a pɩŋ, ŋaa.”

⁴¹ Ŋɩɩ nɛ Sɔɔl sʋl La TƖƖNA, Iziral tɩŋŋaa Wɩa a bʋl, “Mɩɩ sʋlʋŋ, dagɛmɛ nɩɩ-la sɩ cheye. Bɛɛ nɛ tɩɩ ŋ bɩ mɩ-na ŋ tɩntɩnna teeŋ jegile jɩnɩŋ? Dɩ cheeriŋ lɩɩ mɩ nɛ koo mɩ bie Jonataŋ nɛ, to Urim lɛ a leŋ la jɩŋ. Ama dɩ Iziral tɩŋŋaa teeŋ nɛ cheeriŋ lɩɩ, to Tumim lɛ a leŋ la jɩŋ.” Ŋɩɩ nɛ ʋ kɛŋ Jonataŋ arɩ Sɔɔl Iziral tɩŋŋaa kala sɩɩŋ lɛ.

⁴² Sɔɔl bʋl, “Má tɔnsɔ pɩ mɩ dɩ Jonataŋ.” Ŋɩɩ nɛ ba tɔnsɛ, ʋ kɛŋ Jonataŋ.

⁴³ Sɔɔl bʋla pɩ Jonataŋ, “Wɩɩ-la ŋ sɩ ŋaa, bʋla pɩmɛ.” Jonataŋ bʋl, “Mɩ dantɩga niiŋ nɛ mɩ kaa tagɛ tʋʋŋ mʋa a kaa jɩla lenni. Wɩɩŋ deeŋ ŋaa wɩɩ nɛ a magɛ dɩ mɩ sʋʋ?”

⁴⁴ Sɔɔl bʋl, “A leŋ dɩ Wɩa dɔgɩsɛmɛ kɩŋkɛŋ, dɩ mɩ nɛ bɩ leŋe ba kpʋ ŋ-na Jonataŋ.”

⁴⁵ Laalɩyuoro-la kala bɩ sɛyɛ, aŋ ŋaa goŋ a bʋla pɩ Sɔɔl, “Jonataŋ ŋaa nʋʋ sɩ chaasa laa Iziral tɩŋŋaa ta nɛ, ʋ bɩ maga dɩ ʋ sʋʋ wɩɩŋ deeŋ wɩaa. La TƖƖNA sɩ weye wɩaa, ʋ nyu-pʋŋ ma bɩ maga dɩ ʋ churo tel. Wɩɩ-la ʋ sɩ ŋaa jɩnɩŋ, Wɩa nɛ pɛ ʋ lɛ.” Ba ŋaa ŋɩɩ nɛ a laa Jonataŋ ta, ba bɩ ʋ kpʋa.

⁴⁶ Ŋɩɩ harɩŋ lɛ nɛ Sɔɔl bɩra bɩ Fɩlɩsɩtɩa tɩŋŋaa harɩŋ kire, ka ʋ dɩ ʋ laalɩyuoroo mɩɩra mʋ ba tinteeŋ.

⁴⁷ Sɔɔl sɩ kʋ dii kuoruŋ Iziral tinteeŋ lɛ harɩŋ, ʋ chaasa yuo ba dʋndɔŋŋɔɔ sɩ hɛ lee na-kala nɛ: Mʋab tɩŋŋaa, Amɔŋ tɩŋŋaa, Ɛdɔm tɩŋŋaa, Zoba tɩŋŋaa kuoroo arɩ Fɩlɩsɩtɩa tɩŋŋaa. Dɩ ʋ nɛ joŋ ʋ sɩaa chaasɛ lee-kala, ʋ yie yuo dii ba nɛ.

⁴⁸ Ʋ chaasa yuo laalɩŋ nɛ woruŋ arɩ baalɩŋ, a yuo dii Amalɛk tɩmma-la, aŋ laa Iziral tɩŋŋaa ta nɩalɩŋ fa sɩ yie yuo diiba aŋ paa ba kɩaa nɩsɩŋ lɛ.

Sɔɔl dɩa nɩaa

⁴⁹ Sɔɔl hambolibiisiŋ nɛ Jonataŋ, Isivi arɩ Malɩkɩ-Sʋa. Ʋ tol-hɩaŋ yɩrɩŋ nɛ Mɛrab, ʋ tol-bie ma yɩrɩŋ nɛ Mɩkal.

⁵⁰ Ʋ haala yɩrɩŋ nɛ Ahɩnʋam, a ŋaa Ahɩmaas tolo. Sɔɔl laalɩyuoroo nɩhɩaŋ nɛ Abɩna, Nɛɛ nanʋala. Nɛɛ ŋaa Sɔɔl nyɩmma kʋbie nɛ.

⁵¹ Sɔɔl nyɩmma Kɩs arɩ Abɩna nyɩmma Nɛɛ kala nyɩmma nɛ Abɩɛl.

⁵² Sɔɔl mɩɩsɩŋ kala lɛ, ʋ dɩ Fɩlɩsɩtɩa tɩŋŋaa chaasa yuo laalɩŋ nɛ woruŋ. Dɩ Sɔɔl nɛ na nɩduo koo bɔɩ-duo tɩɩna na-kala, ʋ yie kɛnʋ pɛ ʋ laalɩyuoroo lɛ nɛ.