1 SAMƲƐL 13 - WƖA TENIŊ

Samʋɛl bʋl Sɔɔl teeŋ

¹ Sɔɔl fa ŋaa jɩsɩŋ mara arɩ fii nɛ aŋ dii kuoruŋ Iziral tinteeŋ lɛ, a bemba jɩsɩŋ mahɩŋ balɩa arɩ balɩa.

² Sɔɔl fa tʋɔsɛ Iziral laalɩyuoroo bʋɩ batori nɛ. Bʋɩ balɩa hɛ ʋ teeŋ Mɩkɩmas arɩ Bɛtɛl tintee-la peelee sɩ yʋga lɛ, ka bʋɩ ma hɛ ʋ nanʋala Jonataŋ teeŋ Gɩbɩa sɩ hɛ Bɛnjamɩŋ tinteeŋ lɛ, aŋ leŋ baala-la nɩkaanaa mɩɩra mʋ ba dɩɩsɩŋ.

³ Tapʋlɩɩ kʋbala Jonataŋ mʋ yuo Fɩlɩsɩtɩa tɩŋŋaa laalɩyuoro-la buguŋ sɩ hɛ Geba lɛ a chei ʋ kala, ŋɩɩ nɛ Fɩlɩsɩtɩa tɩŋŋaa dɔnsʋŋ nɩɩ wɩɩ-la. Sɔɔl tɩŋ nɩaa ba ŋmʋʋ banyile Iziral tinteeŋ kala lɛ a bʋl wɩɩ-la pɩ Iziral tɩŋŋaa kala, aŋ yɩrɛba dɩ ba mʋ laalɩŋ.

⁴ Iziral tɩŋŋaa kala nɩɩ duoso-la, arɩ Sɔɔl mʋ chei Fɩlɩsɩtɩa laalɩyuoroo buguŋ nɛ. Iziral tɩŋŋaa lɛɛlɛ ŋaa nɩa Fɩlɩsɩtɩa tɩŋŋaa sɩ chaasa bɛrɛ. Ŋɩɩ nɛ tɩndaara-la yɩrɛ Iziral tɩŋŋaa kala ba mʋ Gɩlɩgal a pɛ kuoro Sɔɔl lɛ.

⁵ Fɩlɩsɩtɩa tɩŋŋaa sii hɛ dɔŋɔ dɩ ba yuo Iziral tɩmma-la, a kɛŋ laalɩyuori janɩŋ torukoba bʋɩ batori, ja-jɩllaa bʋɩ balɩdʋ, ka laalɩyuoroo paala yʋgɛ a nagɛ hagɩlɩ-bumbugulo sɩ pɩŋ mʋga niiŋ. Ba sii jɩla ŋmoo buguŋ Mɩkɩmas lɛ, Bɛf Avɛŋ wɩɩpɔsʋŋ dɩɩrɩŋ.

⁶ Ba sɩɩ yuo laalɩŋ, Iziral tɩŋŋaa na dɩ ba tɔ ba laalɩyuoroo hɛ nɛ, leriŋ lɩma pɩba, ba dɔnsʋŋ jʋʋ faa bʋ-bʋɔsʋŋ lɛ, tɩɩ-lugunuŋ tʋɔŋ, bʋ-pɛgɩsɩŋ lɛ, buotuonuŋ tʋɔŋ, arɩ vilee tʋɔŋ.

⁷ Ba dɔnsʋŋ paala fá a chol Jɔdaŋ fuo-la, a mʋ Gad arɩ Gɩlɩad tinteeŋ. Ka Sɔɔl-na ha hɛ Gɩlɩgal lɛ, fawʋllʋŋ kɛŋ laalɩyuoro-la kala sɩ hɛ ʋ teeŋ ba chichel.

⁸ Sɔɔl gbɛrɛ Samʋɛl Gɩlɩgal lɛ tapʋlaa balɩpɛ, arɩ Samʋɛl sɩ bʋl ŋɩɩ pʋ, ama Samʋɛl bɩ Gɩlɩgal kɔ. Ŋɩɩ nɛ laalɩyuoro-la kala sɩ hɛ Sɔɔl teeŋ tapʋlɩa-la balɩpɛ suomo pɩpɩsɛ kʋŋ kʋŋ.

⁹ Sɔɔl fa bʋla pɩba, “Má kɛŋ pʋsʋŋ arɩ nii-magɛ dɔŋɔ Wɩɩsʋlʋŋ kɩaa kʋ pɩmɛ, dɩ mɩ kaa sʋl kʋnyɩgaa Wɩɩsʋlʋŋ pɩ La TƖƖNA a sʋlʋ dɩ ʋ pɛ la lɛ.” Ŋɩɩ nɛ Sɔɔl ŋaa kʋnyɩgaa Wɩɩsʋlɩɩ-la.

¹⁰ Ʋ ŋaa Wɩɩsʋlɩɩ-la a dɩdɛrɛ, dɩ Samʋɛl ma kɔ. Sɔɔl lɩɩ chemu a lɔllʋ.

¹¹ Samʋɛl pɩɛsɛ, “Bɛɛ nɛ ŋ ŋaa ŋɩɩ?” Sɔɔl bʋl, “Mɩ na dɩ mɩ laalɩyuoro-la ka pɩsɛ nɛ, ka bʋa-la lɛ ŋ sɩ sɩ ŋ jaŋ kɔ, ŋ bɩ kɔ. Ka Fɩlɩsɩtɩa tɩŋŋaa ma kʋ hilimi Mɩkɩmas lɛ.

¹² Ŋɩɩ nɛ mɩ bɩɩnɛ arɩ Fɩlɩsɩtɩa tɩŋŋaa jaŋ kʋ yuomi Gɩlɩgal lɛ, ka mɩ ha bɩ wɩɩkala ŋaa dɩ La TƖƖNA pɛ mɩ lɛ. Ŋɩɩ nɛ mɩ beŋ dɩ ʋ maga dɩ mɩ ŋaa kʋnyɩgaa Wɩɩsʋlʋŋ.”

¹³ Samʋɛl bʋl, “Nɩyaarɛ wɩɩ nɛ ŋ ŋaa ŋɩɩ. Wɩɩ-la ŋ TƖƖNA Wɩa sɩ joŋo pɩŋ dɩ ŋ to nɛ ŋ vɩa ŋɩɩ. Dɩ ŋ nɛ fa tou, ʋ fa jaŋ leŋ dɩ ŋ doho nɩaa nɛ didii kuoruŋ Iziral tinteeŋ lɛ a kaa mʋ wuu.

¹⁴ Ama lɛɛlɛ ŋ doho nɩaa dee bɩra bɩ jaŋ didii kuoruŋ. La TƖƖNA lɩɩsɛ nʋʋ ʋ tʋɔŋ sɩ tɔrɛ ʋ nyuŋ nɛ, dɩ ʋ nɛ ŋaa ʋ nɩaa sɩpaalaara, bɛɛ wɩaa ŋ bɩ ʋ niiŋ lɛ to.”

¹⁵ Ŋɩɩ nɛ Samʋɛl lɩɩ Gɩlɩgal lɛ a mʋ Gɩbɩa sɩ hɛ Bɛnjamɩŋ tinteeŋ, laalɩyuori kaana-la sii to Sɔɔl harɩŋ. Sɔɔl sɩ dɩɩsɛ laalɩyuoro-la fa sɩ hɛ ʋ teeŋ, ba ŋaa zɔɔ-balɩdʋ nɛ.

Iziral tɩŋŋaa bɩ laalɩyuori kɩaa kɛnɛ

¹⁶ Sɔɔl arɩ ʋ nanʋala Jonataŋ arɩ laalɩyuoro-la kala sɩ hɛ ba teeŋ faa chʋa Gɩbɩa sɩ hɛ Bɛnjamɩŋ tinteeŋ lɛ nɛ, ka Fɩlɩsɩtɩa tɩŋŋaa ma ŋmoo ba buguŋ Mɩkɩmas lɛ.

¹⁷ Fɩlɩsɩtɩa tɩŋŋaa laalɩyuoroo kɛŋ ba tɩtɩa kpaa leree batori ba dɩhɔnʋŋ, dɩ ba yuo laalɩŋ. Dɔŋɔ to Ɔfɩra sɩ hɛ Sʋal tinteeŋ dɩɩrɩŋ a mʋmʋ,

¹⁸ dɔŋɔ ma to Bɛf Horoŋ dɩɩrɩŋ, ka tori tɩɩna ma to tintee-la bʋa, lee-la ŋ sɩ jaŋ chɩŋ aŋ bibeŋ Zeboyim fuonaa-la, a chaasɛ tintee-hɩlɩŋ dɩɩrɩŋ.

¹⁹ Libiru kala fa tuo Iziral tinteeŋ lɛ, bɛɛ wɩaa Fɩlɩsɩtɩa tɩŋŋaa bɩ leŋe ba gʋnnɛ libiŋ. Ba sɩ, “Dɩ Iziral tɩŋŋaa nɛ jɩŋ libiŋ, ba jaŋ libi ba tɩtɩa tokobiee koo tiŋŋee!”

²⁰ Ŋɩɩ wɩaa Iziral tɩŋŋaa kala yie mʋ Fɩlɩsɩtɩa tɩŋŋaa teeŋ nɛ, aa kpallɛ ba nɛsɩŋ pirisiŋ, piri-saasɩŋ, saasɩŋ, arɩ sɩɩ-kɔrʋsʋŋ.

²¹ Dɩ ba nɛ kpallɛ nɛsɩŋ pire koo piri-saa, ba yie laa warɩpʋla balɩa nɛ. Ka dɩ ba nɛ taa saa-balɩŋ koo sɩɩ-kɔrɔ, ba yie laa warɩpʋla kʋbala nɛ.

²² Tapʋlɩɩ-la ba sɩɩ yuo laalɩŋ, Iziral tɩŋŋaa laalɩyuoroo kʋbala ma bɩ tokobiiŋ koo tiŋ kɛnɛ. Sɔɔl arɩ Jonataŋ dʋndʋŋa nɛ kɛnɛ.

²³ Fɩlɩsɩtɩa tɩŋŋaa fa leŋe ba laalɩyuoroo dɔnsʋŋ mʋ pɔ wombii-bie-la sɩ hɛ peelee tʋɔŋ Mɩkɩmas lɛ nɛ.