1 SAMƲƐL 12 - WƖA TENIŊ

Wɩalɩŋ Samʋɛl sɩ bʋla ta Iziral tɩŋŋaa

¹ Ŋɩɩ nɛ Samʋɛl bʋla pɩ Iziral tɩŋŋaa kala, “Mɩ jegile nɩɩ wɩalɩŋ kala ma sɩ bʋla pɩmɛ nɛ, a bil kuoro pɩma dɩ ʋ bibemma.

² Lɛɛlɛ ma kɛŋ kuoro nɛ dɩ ʋ laa ma sɩpaaŋ. Mɩ-na hɩɛsa nɛ, mɩ nyuŋ kala pʋllɛ. Mɩ kɛŋ biiriŋ nɛ ma tʋɔŋ. Mɩ hambiiriŋ kala lɛ nɛ mɩ ŋaa ma sɩpaalaarʋ, a kaa kʋ yi jɩnɩŋ.

³ Mɩ chɩŋ daha nɛ dɩ mɩ pɩɛsɛma: dɩ mɩ ŋaa wʋbɔŋ nʋʋ lɛ, tɩɩna kʋ lɩɩ bʋl La TƖƖNA arɩ kuoru-la ʋ sɩ lɩɩsa sɩpaaŋ. Ma kʋbɛɛ nɛŋ nɛ mɩ ha kaa laa? Ma kʋbɛɛ kakumo nɛ mɩ ha kaa laa? Mɩ ha gʋrɛ ma kʋŋ koo a dɔgɩsɛ ma kʋŋ? Ma kʋbɛɛ teeŋ nɛ mɩ ha laa kpalaa ŋɩɩ leŋ mɩ bɩ mɩ sɩaa wuo kaa suri? Dɩ mɩ nɛ ŋaa wɩaa deemba kʋŋ ma dɔŋɔ lɛ, mɩ jaŋ mɩɩra tiŋ tɩɩna.”

⁴ Iziral tɩŋŋaa bʋl, “Ŋ ha bɩ la kʋŋ gʋra koo a dɔgɩsɛ la kʋŋ, ŋ ha bɩ la kʋŋ ma kɩaa kaa laa.”

⁵ Samʋɛl bɩra bʋl, “La TƖƖNA arɩ kuoru-la ʋ sɩ lɩɩsa nɛ pɛ na jɩnɩŋ, arɩ ma kʋŋkala kɩaa tuo mɩ teeŋ.” Ba bʋl, “La TƖƖNA pɛ na nɛ.”

⁶ Ŋɩɩ nɛ Samʋɛl bʋla pɩba, “La TƖƖNA nɛ lɩɩsɛ Mosis arɩ Arɔŋ, a kɛŋ ma naabalɩmaba kʋ lɩɩ Ijipiti tinteeŋ lɛ.

⁷ Má chɩŋ daha, mɩɩ chɛ dɩ mɩ bʋl ma wɩaa nɛ a liisima La TƖƖNA sɩpaaŋ, a mʋ tɩgɛ wʋduoru-la kala La TƖƖNA sɩ ŋaa a laa ma dɩ ma nyɩmmaba ta.

⁸ Jekɔb arɩ ʋ dɩa nɩaa sɩ mʋ hɔŋ Ijipiti tinteeŋ lɛ, ŋɩɩ nɛ Ijipiti tɩŋŋaa dɔgɩsɛba, ma naabalɩmaba-la yele pɩ La TƖƖNA nɛ dɩ ʋ pɛ ba lɛ. Ŋɩɩ nɛ La TƖƖNA tɩŋ Mosis arɩ Arɔŋ, ba mʋ a kɛŋ ma naabalɩmaba lɩɩ nɩmɛ kɔ, a leŋ ba hɔŋ leriŋ deeŋ.

⁹ Ama ma naabalɩmaba yʋ ba TƖƖNA Wɩa wɩaa nɛ. Ŋɩɩ nɛ La TƖƖNA leŋ Fɩlɩsɩtɩa tɩŋŋaa arɩ Mʋab tɩŋŋaa kuoro arɩ Hazɔ tɩŋŋaa laalɩyuori-hɩaŋ ba sɩɩ yɩrɛ Sɩsɛra yuo diiba.

¹⁰ Ba bɩra yele pɩ La TƖƖNA dɩ ʋ pɛ ba lɛ a bʋl, ‘La ŋaa wʋbɔŋ nɛ, la sɩ vɩa La TƖƖNA, aŋ mɩɩra tuto vesi-la ba sɩɩ yɩrɛ Baal arɩ Asɩtarɔf. Ama lɛɛlɛ, laala ta la dʋndɔŋŋɔɔ nɩsɩŋ lɛ. Dɩ ŋ nɛ ŋaa ŋɩɩ, la jaŋ tutoŋ.’

¹¹ Ŋɩɩ nɛ La TƖƖNA hɛ Jerub-Baal, Barak, Jɛfɩta arɩ mɩ-na Samʋɛl, la kʋŋkala nɛ wuo laama ta ma dʋndɔŋŋɔɔ nɩsɩŋ lɛ, ma wuo hɔŋ, wɩɩkala bɩ maa walɩmɛ.

¹² Ama ma sɩ na dɩ Amɔŋ tɩŋŋaa kuoro Nahas ka chɛ ʋ yuoma, ma vɩa ma TƖƖNA Wɩa sɩ paala ŋaa ma kuoro nɛ, aŋ bʋla pɩmɛ, ‘Laa chɛ kuoro nɛ dɩ ʋ bibeŋ la.’

¹³ Lɛɛlɛ, na kuoru-la ma sɩ lɩɩsa nɛ ŋ-la, ma nɛ pɩɛsa chɩchɛ kuoro. La TƖƖNA joŋu pɩma nɛ dɩ ʋ bibemma.

¹⁴ Wɩɩkala jaŋ vɛŋ woruŋ pɩ ma dɩ kuoru-la La TƖƖNA sɩ joŋo pɩma dɩ ʋ bibemma, dɩ ma dɩ ʋ kala nɩɩ fá La TƖƖNA Wɩa, a tɩma pʋpʋ, a sɛyɛ tuto wɩalɩŋ kala ʋ sɩ daga.

¹⁵ Ama dɩ ma nɛ bɩ La TƖƖNA niiŋ to, aŋ chichei wɩalɩŋ ʋ sɩ daga, ʋ jaŋ dɔgɩsɛ ma dɩ ma kuoru-la kala arɩ ʋ fa sɩ dɔgɩsɛ ma nyɩmmaba ŋɩɩ.

¹⁶ Ŋɩɩ wɩaa, má chɩŋ daha a na wʋbal-la La TƖƖNA sɩ jaŋ ŋaa ma sɩɩŋ lɛ.

¹⁷ Bʋa deeŋ lɛ ŋaa tafaaŋ nɛ. Ama mɩ jaŋ sʋl La TƖƖNA dɩ ʋ leŋ dɩ taŋ dɔŋ, dɩ duonuŋ nɩɩ lɛɛlɛ. Ŋɩɩ nɛ ma jaŋ jɩŋ arɩ ma chaasa ŋaa wʋbɔŋ nɛ La TƖƖNA sɩpaaŋ, ma sɩ bʋla pʋ arɩ maa chɛ kuoro nɛ.”

¹⁸ Samʋɛl sɩ sʋl La TƖƖNA, tapʋlɩɩ-la tɩtɩa nɛ La TƖƖNA leŋ taŋ dɔŋ, duonuŋ nɩɩ. Ŋɩɩ nɛ nɩalɩŋ kala chaasa fɩfá La TƖƖNA arɩ Samʋɛl.

¹⁹ Ba kala bʋla pɩ Samʋɛl, “Laa sʋlʋŋ, sʋl ŋ TƖƖNA Wɩa a pɩ la-na ŋ tɩntɩnnaa dɩ la sɩ́ sʋʋ, bɛɛ wɩaa la na dɩ la ŋaa wʋbɔŋ nɛ a pɛ la wʋbɔŋŋɔɔ lɛ, la sɩ bʋla arɩ laa chɛ kuoro nɛ.”

²⁰ Ŋɩɩ nɛ Samʋɛl bʋl, “Má sɩ́ leŋe dɩ fawʋllʋŋ kɛmma, ma ŋaa wʋbɔŋŋɔɔ deemba kala nɛ, ama má sɩ́ harɩŋ joŋo yɩa La TƖƖNA, má tou arɩ ma tʋɔŋ kala.

²¹ Má pɔ ma sɩ́ mʋ tuto tɔŋŋɔɔ sɩ bɩ bʋbʋa kala kɛnɛ. Ba bɩ wʋzɔŋ kala wuo ŋaa pɩpɩma, ba bɩra bɩ ma wuo laa tɩta ma, bɛɛ wɩaa ba ŋaa kʋpɛɩba nɛ.

²² A tɩŋ La TƖƖNA yɩrɩ-balɩŋ wɩaa, ʋ bɩ jaŋ kɔ dɩ ʋ vɩa ʋ nɩaa ta, ʋ tʋɔtɔrʋŋ lɛ nɛ ʋ lɩɩsɛma ma ŋaa ʋ nɩaa.

²³ Mɩ-na bɩ jaŋ kɔ dɩ mɩ vɩa dɩ mɩ sʋl Wɩa pɩma. Dɩ mɩ nɛ ŋaa ŋɩɩ, mɩ jaŋ ŋaa wʋbɔŋ La TƖƖNA lɛ. Mɩ jaŋ dagɛma wɩalɩŋ sɩ zɔmɔ a magɛ dɩ ma ŋɩŋaa.

²⁴ Má hɛ doluŋ aŋ fá La TƖƖNA, a kɛŋ wʋtɩtɩɩ a tutou arɩ ma tʋɔŋ kala. Má liisi wʋbala-la kala ʋ sɩ ŋaa pɩma wɩaa.

²⁵ Ama dɩ ma nɛ vɩa aŋ ha pɛsɛ a ŋɩŋaa wʋbɔŋŋɔɔ, La TƖƖNA jaŋ chei ma dɩ ma kuoru-la kala ta.”