1 SAMƲƐL 11 - WƖA TENIŊ

Sɔɔl laa taŋ-la ba sɩɩ yɩrɛ Jabɛs nɩaa ta

¹ Bʋa kʋbala lɛ, Amɔŋ kuoru-balɩŋ ba sɩɩ yɩrɛ Nahas kɛŋ ʋ laalɩyuoroo mʋ golli taŋ-la ba sɩɩ yɩrɛ Jabɛs sɩ hɛ Gɩlɩad tinteeŋ lɛ a chu, dɩ ba yuou. Ŋɩɩ nɛ Jabɛs tɩŋŋaa baalaa kala bʋla pʋ, “Leŋ dɩ la hɛ niiŋ pɩ dɔŋɔ, ka dɩ la sɛɩ dɩ ŋ bibenla.”

² Nahas bʋl, “Dɩ ma nɛ jaŋ sɛɩ dɩ mɩ chaarɛ ma nadiiŋ sɩaa, a hɛ ma Iziral tɩŋŋaa kala hɩɩsɩŋ, mɩ jaŋ leŋ dɩ la hɛ niiŋ pɩ dɔŋɔ.”

³ Jabɛs nɩhɩasɩŋ ma bʋla pʋ, “Pɩla tapʋlaa balɩpɛ, dɩ la wuo tɩŋ tɩndaarɩŋ a pɩ Iziral tinteeŋ nɩaa kala. Dɩ la nɛ bɩ nʋʋ na sɩ jaŋ kʋ laala ta, la jaŋ sɛyɛ pɩŋ.”

⁴ Ba sɩ tɩŋ tɩndaaraa ba mʋ a bʋl wɩalɩŋ kala a pɩ Sɔɔl jaŋ Gɩbɩa nɩaa, ba faasa ŋmoo niiŋ.

⁵ Bʋa-la lɛ dɩ Sɔɔl kiri ʋ nɛ-belliŋ a lɩɩ baga kʋkɔ. Ʋ pɩɛsɛ, “Bɛɛ nɛ kɛŋ nɩalɩŋ? Bɛɛ nɛ tɩɩ ba yiyel?” Ŋɩɩ nɛ ba joŋ wɩɩ-la Jabɛs nɩaa sɩ bʋla a to pʋ.

⁶ Sɔɔl sɩ nɩɩ wɩalɩŋ, Wɩa Dɩma kʋ jʋʋ-ʋ arɩ doluŋ, ʋ baanɩŋ faasa sii.

⁷ Ʋ kɛsɛ nɛ-belliŋ balɩa, a kaa keri muno muno, a paa tɩŋ nɩaa ba kaa gɔllɛ Iziral tinteeŋ kala, a heele bʋl, “Nɩɩ-la kala sɩ jaŋ vɩa dɩ ʋ to Sɔɔl arɩ Samʋɛl harɩŋ a mʋ laalɩŋ, ŋɩɩ Sɔɔl sɩ ŋaa ʋ nɛ-belliŋ, ŋɩɩ tɩtɩa nɛ ba jaŋ joŋo ŋaa nɩɩ-la ma nɛ-belliŋ lɛ.” Ŋɩɩ nɛ La TƖƖNA leŋ fawʋllʋŋ faasa kɛŋ Iziral tɩŋŋaa, ba kala sii kʋ hɛ dɔŋɔ a ŋaa nii-bala.

⁸ Sɔɔl sɩ kɛmba a hɛ dɔŋɔ Bɛzɛk lɛ a dɩɩsɛ, nɩalɩŋ sɩ lɩɩ Iziral ŋaa bʋɩ zɔɔ-batori nɛ, ka nɩalɩŋ ma sɩ lɩɩ Juda ŋaa bʋɩ mara arɩ fii.

⁹ Ŋɩɩ nɛ ba bʋla pɩ tɩndaara-la sɩ kɛŋ duoso lɩɩ Jabɛs sɩ hɛ Gɩlɩad tinteeŋ lɛ a kɔ, “Má mʋ a bʋla pɩ ma nɩaa, chiemiŋ wɩɩ-hɛɛ-siesee ma jaŋ na laatanɩŋ.” Tɩndaara-la sɩ mɩɩra mʋ bʋl wɩɩ-la pɩ Jabɛs nɩaa, ba tʋɔŋ pɩŋ dɩ-bala.

¹⁰ Ba bʋla pɩ Amɔŋ tɩmma-la, “Chie la jaŋ sɛyɛ pɩma, wɩɩ-la kala ma sɩ cho, ma jaŋ wuo ŋaa la lɛ.”

¹¹ Tɩtaŋ-la Sɔɔl kɛŋ ʋ nɩaa a kpaa leree batori. Sɩɩ-pʋʋraa ba guu jʋʋ Amɔŋ tɩmma-la dɩhɔnʋŋ, a kpʋba ŋɩɩ halɩɩ a mʋ yi wɩɩ-hɛɛ-siesee. Ba nɩalɩŋ sɩ ka fá pɩsɛ tintee-la lɛ, ŋ bɩ jaŋ na nɩaa balɩa ma dɩ baa to dɔŋɔ.

Ba wasa leŋ Sɔɔl kuoruŋ chɩŋ

¹² Iziral tɩŋŋaa lɛɛlɛ pɩɛsɛ Samʋɛl, “Nɩɩ nɛ nɩalɩŋ fa sɩ pɩɛsa arɩ Sɔɔl jaŋ wuo dii kuoruŋ a beŋ la nyuŋ hɛ? Má kɛsɛba kaa kɔ dɩ la kpʋ.”

¹³ Ama Sɔɔl bʋl, “Aɩ, má sɩ́ nʋʋkala kpʋ jɩnɩŋ, bɛɛ wɩaa jɩnɩŋ nɛ La TƖƖNA laa Iziral tɩŋŋaa ta.”

¹⁴ Ŋɩɩ nɛ Samʋɛl bʋla pɩ nɩalɩŋ, “Má kɔ dɩ la kala mʋ Gɩlɩgal, a chaasa wasa leŋ dɩ Sɔɔl kuoruŋ chɩŋ.”

¹⁵ Ba kala sii mʋ Gɩlɩgal, a mʋ La TƖƖNA sɩpaaŋ a chaasa bil Sɔɔl kuoruŋ. Nɩmɛ nɛ ba kpʋ pʋsʋŋ a ŋaa nii-magɛ dɔŋɔ Wɩɩsʋlʋŋ La TƖƖNA sɩpaaŋ. Ŋɩɩ nɛ Sɔɔl arɩ Iziral tɩŋŋaa kala gbieli gbieli-bal kuorii-la bʋbʋɔŋ lɛ.