1 Jɔɔŋ 5 - WƖA TENIŊ

Wɩa biiriŋ jaŋ kɛŋ doluŋ a wuo dʋnɩa

¹ Nɩɩ-la kala sɩ laa dii arɩ Yesu nɛ ŋaa Kirisito, Nɩɩ-la Wɩa sɩ lɩɩsa, ʋ ŋaa Wɩa bii nɛ. Nɩɩ-la kala sɩ cho nʋʋ, ʋ cho nɩɩ-la bie ma nɛ.

² Dɩ la nɛ cho Wɩa a tuto wɩalɩŋ ʋ sɩ dagɛla, ŋɩɩ daga arɩ la cho Wɩa biiriŋ nɛ.

³ Dɩ la nɩɩ to wɩalɩŋ ʋ sɩ dagɛla, ŋɩɩ dagɛ arɩ la cho Wɩa nɛ. Ʋ bɩ hɛɩ a pɩla dɩ la to wɩaa deemba,

⁴ bɛɛ wɩaa Wɩa bii kala kɛŋ doluŋ nɛ dʋnɩa wɩaa lɛ. La sɩ laa Wɩa dii nɛ pɩla doluŋ deeŋ la yuo dii dʋnɩa wɩaa.

⁵ Kʋbɛɛ nɛ saa kɛŋ doluŋ dɩ ʋ wuo yuo dii dʋnɩa? See nɩɩ-la kala sɩ laa dii arɩ Yesu nɛ ŋaa Wɩa Bie.

Kɩalɩŋ batori sɩ daga arɩ Yesu nɛ ŋaa Wɩa Bie

⁶ Ʋ-na Yesu Kirisito nɛ kɔ dʋnɩa ba fou Wɩɩchʋɔlɛ lɩɩŋ, a kpaasʋ mɛrɛ daagɛsɛ nyuŋ ʋ chalɩŋ jaasɛ. Ŋ-la daga arɩ lɩɩŋ dʋndʋŋa dee ba fou, ba kpaasʋ mɛrɛ daagɛsɛ nyuŋ ma nɛ ʋ chalɩŋ jaasʋ. Wɩa Dɩŋ-zɔmʋŋ bʋl wɩaa a tɩgɛ ŋɩɩ lɛ, bɛɛ wɩaa ʋ nɛ kɛŋ wʋtɩtɩɩ.

⁷ Kɩaa batori nɛ hɛ nɩmɛ a dɩdagɛ wɩɩŋ deeŋ.

⁸ Ba nɛ ŋaa: Wɩa Dɩŋ-zɔmʋŋ arɩ lɩɩ-la arɩ ʋ chal-la. Ba kala ka bʋl wʋbala nɛ.

⁹ Dɩ wɩɩ nɛ ŋaa nʋʋ lɛ dɩ ʋ bʋl wɩɩ-la, la yie sɛɩ nɛ. Ama dɩ Wɩa nɛ bʋl wɩɩ, ʋ nɛ ŋaa sɩɩfɩaŋ a kɩɩ nuhuobiine wʋbʋlʋŋ. Wɩa tɩtɩa nɛ saa bʋl wɩaa a tɩgɛ ʋ Bie lɛ. Wɩalɩŋ kala ʋ sɩ bʋla a tɩgɛ ʋ lɛ ŋaa wʋtɩtɩɩ nɛ.

¹⁰ Nɩɩ-la kala sɩ laa Wɩa Bie wɩaa dii, ʋ tɩɩna jɩma ʋ tʋɔŋ lɛ arɩ wɩalɩŋ Wɩa sɩ bʋla a tɩgɛ ʋ lɛ ŋaa wʋtɩtɩɩ nɛ. Ama nɩɩ-la kala sɩ bɩ Wɩa laa dii, ʋ kɛŋ Wɩa yɩyɩrɛ wʋnyɩɛrʋ nɛ, bɛɛ wɩaa ʋ bɩ wɩɩ-la ʋ sɩ bʋla a tɩgɛ ʋ Bie lɛ laa dii.

¹¹ Wɩɩ-la Wɩa sɩ bʋla nɛ ŋ-la: dɩ ʋ pɩla mɩɩsɩ-la sɩ bɩ dɛrɛ nɛ. Mɩɩsɩ-la hɛ ʋ Bie teeŋ nɛ.

¹² Nɩɩ-la kala sɩ hɛ Wɩa Bie teeŋ kɛŋ mɩɩsɩ-la nɛ. Nɩɩ-la kala ma sɩ bɩ Wɩa bile teeŋ hɛ, ʋ ma bɩ mɩɩsɩ-la kɛnɛ.

La kɛŋ mɩɩsɩ-la sɩ bɩ dɛrɛ

¹³ Mɩ ŋmʋnsɛ wɩɩŋ deeŋ pɩpɩma dɩ ma nɩalɩŋ sɩ laa Wɩa Bie wɩaa dii ma wuo jɩŋ arɩ ma kɛŋ mɩɩsɩ-la sɩ bɩ dɛrɛ nɛ.

¹⁴ La kɛŋ bɔɩ-duoŋ nɛ Wɩa sɩpaaŋ, bɛɛ wɩaa la laa dii arɩ la nɛ sʋlʋ a chɩchɛ kʋŋkala sɩɩ tɔrɛ ʋ tʋɔŋ, ʋ jaŋ jegile nɩɩ la teeŋ.

¹⁵ Dɩ la nɛ saa jɩma arɩ la nɛ sʋl kʋŋkala ʋ teeŋ, ʋ yie jegile nɩɩ la teeŋ nɛ, ŋɩɩ-na la jɩma arɩ ʋ jaŋ joŋ kʋ-la la sɩɩ chɛ pɩla.

¹⁶ Dɩ nʋʋkala nɛ na ʋ dɔŋɔ tɩɩna dɩ ʋ ŋaa wʋbɔŋ sɩ bɩ jaŋ leŋ dɩ ʋ sʋʋ, ʋ maga dɩ tɩɩna sʋl Wɩa pʋ nɛ dɩ Wɩa joŋ ʋ mɩɩsɩŋ chɛʋ. Mɩ bʋl ŋ-la a tɩgɛ nɩalɩŋ sɩ ŋaa wʋbɔmɔ-la lɛ sɩ bɩ maga dɩ ba sʋʋ lɛ nɛ a tɩŋ ba wʋbɔmɔ-la wɩaa. Wʋbɔŋŋɔɔ dɔnsʋŋ hɛ nɩmɛ, dɩ nʋʋ nɛ ŋaaba, ʋ tɩɩna jaŋ sʋʋ. Dɩ nʋʋ nɛ saa ŋaa wʋbɔŋŋɔɔ deemba, mɩ bɩ sɩ dɩ ma sʋl Wɩa dɩ ʋ joŋ ʋ mɩɩsɩŋ chɛʋ.

¹⁷ Wɩɩ na-kala ŋ sɩ ŋaa chei ŋaa wʋbɔŋ nɛ, ama wʋbɔŋŋɔɔ dɔnsʋŋ hɛ nɩmɛ, dɩ ŋ nɛ ŋaaba, ŋ bɩ jaŋ sʋʋ a tɩŋ ba wɩaa.

¹⁸ La jɩma arɩ Wɩa bii kala bɩ wʋbɔŋŋɔɔ ka ŋaa deeŋ deeŋ. Wɩa Bie Yesu nɛ yie pʋpɔʋ. Sɩtaanɩ bɩ ʋ wɩɩkala wuo ŋaa.

¹⁹ La jɩma la ŋaa Wɩa biiriŋ nɛ. Nɩkaana-la-na kala sɩ hɛ dʋnɩa lɛ hɛ Sɩtaanɩ nɩsɩŋ lɛ nɛ.

²⁰ La bɩra jɩma arɩ Wɩa Bie nɛ kɔ a suri la sɩaa la wuo jɩŋ Wɩɩ-tɩtɩɩ-la. La dɩ Wɩɩ-tɩtɩɩ-la ŋaa kʋbala nɛ. La hɛ ʋ Bie lɛ. Ʋ nɛ ŋaa Wɩa tɩtɩa. Ʋ nɛ joŋ mɩɩsɩ-la sɩ bɩ dɛrɛ pɩla.

²¹ Mɩ biiri, má lɩɩsɛ ma tɩtɩa vʋɩyaa lɛ.