Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Jɔɔŋ 4 - WƖA TENIŊ


Wɩa Dɩŋ-zɔmʋŋ doluŋ sɩ nagɛ ŋɩɩ

1 Mɩ bii-chooloo, dɩ nɩaa nɛ sɩ dɩ ba kɛŋ doluŋ a wuo bʋl wɩaa, Wɩa Dɩŋ-zɔŋ-la doluŋ lɛ, má sɩ́ guu laa dii arɩ baa bʋl wʋtɩtɩɩ nɛ. Má laa sɩpaaŋ magɩsɛba na arɩ ba sɛnɛ ŋaa Wɩa wʋlaabʋllaa nɛɛ. Bɛɛ wɩaa wʋnyɩɛrɩ Wɩa wʋlaabʋllaa yʋga nɛ a hɛ dʋnɩa lɛ.

2 Ŋ-la lɛ nɛ ma jaŋ to a wuo jɩŋ dɩ nʋʋ nɛ kɛŋ Wɩa Dɩŋ-zɔmʋŋ doluŋ: Nɩɩ-la kala sɩ laa Yesu wɩaa dii a sɛɩ dɩ ʋ nɛ ŋaa Kirisito, nɩɩ-la Wɩa sɩ lɩɩsa, a bɩra sɛɩ dɩ ʋ kʋ ŋaa nuhuobiiŋ nɛ a kʋ tuu dʋnɩa, ʋ tɩɩna nɛ sɛnɛ kɛŋ Wɩa Dɩŋ-zɔmʋŋ doluŋ.

3 Nɩɩ-la kala sɩ bɩ ŋɩɩ bʋla a tɩgɛ Yesu lɛ, ʋ bɩ Wɩa Dɩŋ-zɔmʋŋ doluŋ kɛnɛ. Dol-la ʋ tɩɩna sɩ kɛnɛ ŋaa Kirisito dʋndɔŋ-balɩŋ doluŋ nɛ. Ma nɩa arɩ Kirisito dʋndɔŋ-balɩŋ deeŋ jaŋ kɔ dʋnɩa. Ʋ doluŋ nɛ saa paala hɛ dʋnɩa lɛ lɛɛlɛ.

4 Mɩ biiri, ma nɛ ŋaa nɩalɩŋ Wɩa sɩ tɩɩ. Ma nɛ lɛɛlɛ kɛŋ doluŋ a kɩɩ nɩalɩŋ sɩ nyɩɛ wɩaa arɩ ba ŋaa Wɩa wʋlaabʋlla nɛ, bɛɛ wɩaa Wɩa Dɩŋ-zɔmʋŋ sɩ hɛ ma lɛ nɛ kɛŋ doluŋ a kɩɩ dol-la dʋnɩa nɩaa sɩ kɛnɛ.

5 Nɩalɩŋ sɩ nyɩɛ wɩaa arɩ ba ŋaa Wɩa wʋlaabʋllaa nɛ, ba hɛ dʋnɩa nɩsɩŋ lɛ nɛ a bʋbʋl dʋnɩa wɩaa. Ŋɩɩ nɛ tɩɩ dʋnɩa nɩaa jegilee nɩɩ ba teeŋ.

6 Ama la-na ŋaa nɩalɩŋ Wɩa sɩ tɩɩ nɛ. Nɩɩ-la kala sɩ jɩŋ Wɩa, ʋ tɩɩna ma jegilee nɩɩ la teeŋ nɛ. Nɩalɩŋ ma sɩ bɩ Wɩa jɩŋ, ba bɩ la teeŋ jegili. Ŋ-la lɛ nɛ la jaŋ wuo to jɩŋ wʋtɩtɩɩ tɩŋŋaa arɩ wʋnyɩɛraa.


Wɩa sɩ cho nɩaa ŋɩɩ

7 Mɩ bii-chooloo, má leŋ dɩ la cho dɔŋɔ. Dɩ la nɛ cho dɔŋɔ, ʋ lɩɩ Wɩa teeŋ nɛ. Nɩɩ-la kala sɩ cho nɩaa ŋaa Wɩa bii-lʋlɩɩ nɛ a jɩŋ Wɩa.

8 Nɩɩ-la ma kala sɩ bɩ nɩaa cho, ʋ bɩ Wɩa jɩŋ, bɛɛ wɩaa chonuŋ ŋaa Wɩa kʋŋ nɛ.

9 Ŋ-la nɛ Wɩa dagɛla arɩ ʋ chola nɛ: Ʋ joŋ ʋ Bii-bala dɩ ʋ kʋ tuu dʋnɩa, dɩ la to ʋ lɛ a kɛŋ mɩɩsɩ-la sɩ bɩ dɛrɛ.

10 Ŋ-la nɛ chonuŋ nagɛ: Ʋ bɩ naga la nɛ laa sɩpaaŋ cho Wɩa, ama Wɩa nɛ laa sɩpaaŋ chola. Ʋ tɩŋ ʋ Bie ʋ kʋ tuu sʋʋ la wɩaa, dɩ Wɩa joŋ ʋ baanɩŋ ta ʋ fa sɩ kɛnɛ a tɩŋ la wʋbɔŋŋɔɔ wɩaa, a joŋ la wʋbɔŋŋɔɔ chɛla.

11 Mɩ bii-chooloo, Wɩa sɩ chola ŋɩɩ, ʋ maga dɩ la ma cho dɔŋɔ.

12 Nʋʋkala ha bɩ Wɩa na. Dɩ la nɛ cho dɔŋɔ, Wɩa hɛ la teeŋ nɛ a kaa mʋ. Dɩ ʋ nɛ hɛ la teeŋ ŋɩɩ, la jaŋ cho Wɩa arɩ la dɔnsʋŋ tɩŋŋaa kɩŋkɛŋ.

13 Ʋ joŋ ʋ Dɩŋ-zɔŋ-la hɛ la lɛ dɩ ʋ dɩdagɛla. Ŋɩɩ lɛ nɛ la to jɩŋ arɩ la hɛ Wɩa teeŋ nɛ, Wɩa ma hɛ la teeŋ nɛ a kaa mʋ.

14 La tɩtɩa na nɛ a laa dii arɩ Wɩa ta ʋ Bie dɩ ʋ kʋ tuu ŋaa dʋnɩa nɩaa Laataara nɛ.

15 Nʋʋkala sɩ wuo bʋl arɩ Yesu nɛ ŋaa Wɩa Bie, Wɩa hɛ tɩɩna teeŋ nɛ a kaa mʋ. Ʋ tɩɩna ma hɛ Wɩa teeŋ nɛ a kaa mʋ.

16 Ŋɩɩ nɛ la tɩtɩa jɩŋ a laa dii arɩ Wɩa chola nɛ. Chonuŋ ŋaa Wɩa kʋŋ nɛ. Nɩɩ-la kala sɩ cho Wɩa arɩ nɩaa a kaa mʋ, ʋ tɩɩna hɛ Wɩa teeŋ nɛ a kaa mʋ. Wɩa ma hɛ ʋ tɩɩna teeŋ a kaa mʋ.

17 Dɩ la nɛ cho Wɩa arɩ nɩaa kɩŋkɛŋ, la jaŋ nagɛ ŋɩɩ ʋ fa sɩ naga dʋnɩa lɛ. Dɩ la nɛ ŋaa ŋɩɩ, la jaŋ kɛŋ nyuduoŋ tapʋlɩɩ-la Kirisito sɩ jaŋ dii dʋnɩa nɩaa sarɩya.

18 Nɩɩ-la sɩ cho Wɩa arɩ nɩaa, ʋ tɩɩna bɩ fawʋllʋŋ ka fá. Dɩ la nɛ cho Wɩa arɩ nɩaa kɩŋkɛŋ, chono-la kiri fawʋllʋŋ ta nɛ. Dɩ la nɛ haa fá fawʋllʋŋ arɩ Wɩa jaŋ dɔgɩsɛla, la ha bɩ Wɩa arɩ nɩaa cho kɩŋkɛŋ.

19 Wɩa nɛ laa sɩpaaŋ chola. Ŋɩɩ nɛ tɩɩ la ma wuo cho Wɩa arɩ nɩaa.

20 Dɩ nʋʋ nɛ sɩ ʋ cho Wɩa nɛ aŋ bɛrɛ ʋ dɔŋɔ tɩɩna, ʋ ŋaa wʋnyɩɛrʋ nɛ. Ʋ sɩ wuo na ʋ dɔŋɔ tɩɩna aŋ bɩ ʋ cho, ŋɩɩ-na ʋ bɩ Wɩa ʋ sɩ bɩ wuo na ma cho.

21 Wɩa bʋla pɩla arɩ nɩɩ-la kala sɩ chou, ʋ maga dɩ ʋ cho ʋ dɔŋɔ tɩɩna ma nɛ.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ