1 Jɔɔŋ 2 - WƖA TENIŊ

Kirisito chɩŋ la harɩŋ a pɩpɛ la lɛ

¹ Mɩ biiri, mɩ ŋmʋnsɛ wɩɩŋ deeŋ pɩpɩma dɩ ma bɩra sɩ́ wʋbɔŋŋɔɔ ŋaa, ama dɩ la kʋŋkala nɛ ŋaa wʋbɔŋ, la kɛŋ nʋʋ nɛ sɩ chɩŋ la nyuŋ Wɩa sɩpaaŋ. Ʋ jaŋ sʋla laala ʋ Nyɩmma teeŋ. Tʋɔpʋl Tɩɩna Yesu Kirisito nɛ ŋɩɩ.

² Ʋ nɛ joŋ ʋ mɩɩsɩŋ a yɔɔ sʋʋŋ la wʋbɔŋŋɔɔ wɩaa, dɩ Wɩa joŋ la wʋbɔŋŋɔɔ a chɛla. La dʋndʋŋa wʋbɔŋŋɔɔ wɩaa dee, ama dʋnɩa nɩaa kala wʋbɔŋŋɔɔ wɩaa nɛ.

³ Dɩ la nɩɩ to wɩalɩŋ Wɩa sɩ daga, ŋɩɩ daga arɩ la jɩŋ Wɩa nɛ.

⁴ Dɩ nʋʋ nɛ sɩ ʋ jɩmʋ, aŋ bɩ wɩalɩŋ ʋ sɩ daga ka to, tɩɩna ŋaa wʋnyɩɛrʋ nɛ, ʋ bɩ wʋtɩtɩɩ kɛnɛ.

⁵ Ama nɩɩ-la kala sɩɩ to ʋ niiŋ wɩaa, ʋ nɛ nɩɩ-la sɩ sɛnɛ cho Wɩa kɩŋkɛŋ. Ŋɩɩ lɛ nɛ la jaŋ to jɩŋ arɩ la hɛ Wɩa teeŋ nɛ.

⁶ Nɩɩ-la kala sɩ sɩ ʋ dɩ Wɩa ŋaa kʋbala, ʋ maga dɩ ʋ tɩɩna wʋŋaalaa nagɛ Yesu Kirisito wʋŋaalaa nɛ.

Nɩalɩŋ sɩɩ vɛŋ pʋlʋmʋŋ tʋɔŋ sɩ nagɛ ŋɩɩ

⁷ Mɩ bii-chooloo, wɩɩ-la mɩ sɩ ŋmʋnsaa pɩma lɛɛlɛ, ʋ bɩ wʋfalɩɩ kala ŋaa, ʋ ŋaa wʋbɩnɩɩ nɛ ma sɩ nɩa bumbuŋ kala. Wʋbɩnɩɩ-la nɛ wɩalɩŋ ma sɩ nɩa faafaa kala.

⁸ Ama ʋ saa naga arɩ wʋfalɩɩ nɛ mɩ sɩ ŋmʋnsa pɩpɩma, bɛɛ wɩaa wɩɩŋ deeŋ kʋ ŋaa wʋtɩtɩɩ Kirisito mɩɩsɩŋ lɛ arɩ ma ma mɩɩsɩŋ lɛ. Bʋa deeŋ lɛ birimiŋ ka lɛl nɛ, aŋ ka pʋlʋmʋŋ suomo chɩchaanɛ.

⁹ Nɩɩ-la kala sɩ sɩ ʋʋ vɛŋ pʋlʋmʋŋ tʋɔŋ aŋ bɛrɛ ʋ dɔŋɔ tɩɩna, ʋ ha hɛ birimiŋ tʋɔŋ nɛ.

¹⁰ Ama nɩɩ-la kala sɩ cho ʋ dɔŋɔ tɩɩna, ʋʋ vɛŋ pʋlʋmʋŋ tʋɔŋ nɛ. Wɩɩkala bɩra tuo sɩ jaŋ ŋaa dɩ ʋ tel.

¹¹ Ka nɩɩ-la kala sɩ bɛrɛ ʋ dɔŋɔ tɩɩna, ʋ tɩɩna ka vɛŋ birimiŋ tʋɔŋ nɛ. Ʋ bɩ jɩŋ lee-la kala ʋ sɩɩ mʋ. Birimiŋ ŋaa ʋ sɩaa bɩ na.

¹² Mɩ biiriŋ, a tɩŋ Yesu wɩaa nɛ Wɩa joŋ ma wʋbɔŋŋɔɔ a chɛma. Ŋɩɩ nɛ tɩɩ mɩ ŋmʋnsɛ wɩaa deemba pɩpɩma.

¹³ Mɩ nyɩmmaba ma, ma jɩŋ Nɩɩ-la fa sɩ hɛ nɩmɛ bumbuŋ kala nɛ. Ŋɩɩ nɛ tɩɩ mɩ ŋmʋnsa pɩpɩ ma ma. Ma bapʋɔsaa ma, ma lɛɛlɛ yuo dii Sɩtaanɩ nɛ, ŋɩɩ nɛ tɩɩ mɩ ŋmʋnsa pɩpɩ ma ma. Mɩ biiriŋ, ma ma jɩŋ la Nyɩmma Wɩa nɛ, ŋɩɩ nɛ tɩɩ mɩ ŋmʋnsa pɩpɩ ma ma.

¹⁴ Mɩ kʋhɩasɩŋ ma, ma jɩŋ Nɩɩ-la fa sɩ hɛ nɩmɛ bumbuŋ kala nɛ, ŋɩɩ nɛ tɩɩ mɩ ŋmʋnsa pɩpɩma. Ma bapʋɔsaa ma, ma ma kɛŋ doluŋ, Wɩa niiŋ wɩaa ma hɛ ma tʋɔŋ lɛ. Ma lɛɛlɛ yuo dii Sɩtaanɩ nɛ, ŋɩɩ nɛ tɩɩ mɩ ŋmʋnsa pɩpɩma.

¹⁵ Má sɩ́ dʋnɩa kɩaa cho. Nɩɩ-la kala sɩ cho dʋnɩa kɩaa, ʋ bɩ la Nyɩmma Wɩa cho.

¹⁶ Kɩalɩŋ kala sɩ hɛ dʋnɩa lɛ, la yaraa wʋchɛɛlɛɛ arɩ la sɩɩŋ wʋchooloo arɩ kɩalɩŋ sɩ ŋaa nɩaa bibigisi ba tɩtɩa lɛ, ba kala bɩ la Nyɩmma Wɩa teeŋ lɩa, ba ŋaa dʋnɩa kɩaa nɛ.

¹⁷ Dʋnɩa arɩ kɩalɩŋ kala sɩ hɛ nɩmɛ nuhuobiinee cho, ba kala jaŋ lɛl. Ama nɩɩ-la sɩ ŋaa wɩalɩŋ Wɩa sɩ cho, ʋ jaŋ kɛŋ mɩɩsɩ-la sɩ bɩ dɛrɛ.

Kirisito dʋndɔŋ-balɩŋ

¹⁸ Mɩ biiriŋ, dʋnɩa dɩdɛrɩŋ kpaga nɛ. Ma nɩa arɩ Kirisito dʋndɔŋ-balɩŋ jaŋ kɔ. Bʋa deeŋ lɛ Kirisito dʋndɔŋŋɔɔ paala yʋgɛ nɛ a kɔ. Ŋɩɩ wɩaa, la jɩma arɩ dʋnɩa dɩdɛrɩŋ kpaga nɛ.

¹⁹ Ba lɩɩ la tʋɔŋ nɛ, ama la dɩ ba fa bɩ kʋbala ŋaa. Dɩ la dɩ ba nɛ fa ŋaa kʋbala, ba ma fa ha jaŋ hɛ la tʋɔŋ. Ama ba sɩ lɩɩ la tʋɔŋ nɛ daga arɩ la dɩ ba bɩ kʋbala ŋaa.

²⁰ Ama ma-na jɩŋ wʋtɩtɩɩ nɛ, bɛɛ wɩaa Kirisito joŋ ʋ Dɩŋ-zɔmʋŋ hɛ ma lɛ nɛ.

²¹ Ʋ bɩ naga dɩ mɩ ŋmʋnsa pɩpɩma a tɩŋ ma sɩ bɩ wʋtɩtɩɩ-la jɩŋ nɛ. Ama mɩ ŋmʋnsa pɩpɩma a tɩŋ ma sɩ jɩŋ wʋtɩtɩɩ-la nɛ. Ma jɩma arɩ wʋnyɩɛrɩ tɩɩna bɩ wʋtɩtɩɩ kɛnɛ.

²² Kʋbɛɛ nɛ saa ŋaa wʋnyɩɛrɩ tɩɩna? Nɩɩ-la sɩ sɩ Yesu dee bɩ Kirisito ŋaa, Nɩɩ-la Wɩa sɩ lɩɩsa, ʋ nɛ ŋaa wʋnyɩɛrɩ tɩɩna. Nɩɩ-la nɛ ŋaa Kirisito dʋndɔŋ-balɩŋ, bɛɛ wɩaa ʋ nɛ vɩa la Nyɩmma Wɩa arɩ ʋ Bie Yesu.

²³ Nɩɩ-la kala sɩ vɩa Wɩa Bie, ʋ bɩ ʋ Nyɩmma ma jɩŋ. Nɩɩ-la ma kala sɩ sɛɩ Wɩa Bie, ʋ sɛɩ ʋ Nyɩmma ma nɛ.

²⁴ Má leŋ dɩ wɩalɩŋ kala ma sɩ nɩa bumbuŋ hɛ ma tʋɔŋ a kaa mʋ. Dɩ wɩaa deemba nɛ hɛ ma tʋɔŋ a kaa mʋ, ma jaŋ hɛ Wɩa Bie arɩ ʋ Nyɩmma lɛ.

²⁵ Wɩɩ-la Kirisito tɩtɩa sɩ bʋla dɩ ʋ jaŋ ŋaa pɩla nɛ ŋ-la: Ʋ sɩ ʋ jaŋ joŋ mɩɩsɩ-la sɩ bɩ dɛrɛ a pɩla.

²⁶ Mɩ ŋmʋnsɛ wɩaa deemba pɩpɩma a mʋ tɩgɛ nɩalɩŋ sɩɩ chɛ dɩ ba nyɩsɛma lɛ nɛ.

²⁷ Ama Kirisito joŋ ʋ Dɩŋ-zɔŋ-la hɛ ma lɛ nɛ. Ʋ Dɩŋ-zɔŋ-la sɩ hɛ ma lɛ ŋɩɩ, ma bɩra bɩ nʋʋ ka chɛ dɩ ʋ dagɛma. Ʋ Dɩŋ-zɔŋ-la sɩ hɛ ma lɛ ka dagɛma wɩɩkala nɛ. Wɩalɩŋ kala ʋ sɩɩ dagɛma ŋaa wʋtɩtɩɩba nɛ, wʋnyɩɛrɩ dee. Má to wɩalɩŋ ʋ Dɩŋ-zɔmʋŋ sɩ dagɛma, a leŋ ma dɩ Kirisito ŋaa kʋbala.

²⁸ Mɩ biiri, dɩ ma nɩɩ to Kirisito ŋɩɩ a kaa mʋ, la jaŋ kɛŋ bɔɩ-duoŋ chɛɛ-la ʋ sɩ jaŋ mɩɩra kɔ. Hɩɩsɩŋ bɩ jaŋ kɛnla dɩ la faa.

²⁹ Ma jɩma arɩ Kirisito ŋaa tʋɔpʋl Tɩɩna nɛ, ma saa jaŋ jɩŋ arɩ nʋʋkala sɩ ŋaa tʋɔpʋl tɩɩna, ʋ tɩɩna ŋaa Kirisito bii nɛ.