1 Kɔrɩntɩ Nɩaa 8 - WƖA TENIŊ

Vʋɩyaa kɩaa diiniŋ wɩaa

¹ Ma sɩ pɩɛsɛmɛ wɩaa dɔnsʋŋ a mʋ tɩgɛ vʋɩŋ kʋdiilee lɛ, mɩɩ chɛ dɩ mɩ bʋl wɩaa a mʋ tɩgɛ ba lɛ nɛ. Ʋ ŋaa wʋtɩtɩɩ nɛ arɩ la kala jɩŋ wɩaa nɛ. Wʋjɩmɩŋ saa yie kɛŋ ʋ tɩɩna bibigisi ʋ tɩtɩa lɛ nɛ. Ama nɩalɩŋ sɩ cho nɩaa yie pɛ ba lɛ nɛ dɩ ba chɩŋ wɩalɩŋ ba sɩ laa dii lɛ woruŋ.

² Nɩɩ-la sɩ bɩɩna dɩ ʋ jɩŋ wɩaa nɛ, ʋ bɩ wɩɩkala jɩŋ arɩ ʋ sɩ maga dɩ ʋ jɩŋ ŋɩɩ.

³ Ama dɩ nʋʋ nɛ cho Wɩa, Wɩa jɩŋ ʋ tɩɩna nɛ.

⁴ Ŋɩɩ wɩaa aŋ ka vʋɩŋ kʋdiile-la wɩaa. La jɩma arɩ vʋɩŋ bɩ ku-wei ŋaa. La bɩra jɩma arɩ Wɩɩ-bala dʋndʋŋ nɛ hɛ nɩmɛ.

⁵ Dɩ vesiŋ nɛ paala hɛ nɩmɛ, dɩ ba nɛ hɛ wɩa-nyuŋ koo tinteeŋ, dɩ la tɩɩnaba nɛ paala yʋgɛ ma,

⁶ la-na jɩŋ Wɩɩ-bala lɛ nɛ. Ʋ nɛ ŋaa la Nyɩmma. Ʋ nɛ ta kʋŋkala sɩ hɛ nɩmɛ. Ʋ lɛ nɛ la to a kɛŋ mɩɩsɩŋ. La Tɩɩna ŋaa kʋbala nɛ. Ʋ nɛ Yesu Kirisito. Ʋ lɛ nɛ Wɩa to a ta kʋŋkala. Ʋ lɛ nɛ la to a kɛŋ mɩɩsɩŋ ma.

⁷ Ama nɩaa kala dee bɩ wɩɩŋ deeŋ jɩŋ. Nɩaa dɔnsʋŋ fa kpaarɛ vʋɩyaa a mal nɛ kɩŋkɛŋ, arɩ jɩnɩŋ kala dɩ ba nɩɩ dii vʋɩyaa kʋdiilee, ba yie bɩɩnɛ arɩ ba pɛ nɩalɩŋ sɩɩ kpaarɛ vʋɩyaa lɛ nɛ, ba tʋɔbɩɩnaa bɩ Wɩa wɩaa lɛ woruŋ chɩna. Ba yie bɩbɩɩnɛ kʋdiile-la ŋaa ba kɛŋ disiniŋ nɛ.

⁸ Kʋdiilee bɩ jaŋ wuo leŋ dɩ Wɩa arɩ nuhuobiinee pɛgɛ zɔŋ. Dɩ ŋ nɛ dii kʋdiilee dɔnsʋŋ aŋ vɩvɩa dɔnsʋŋ, ʋ tuo wɩɩkala Wɩa teeŋ.

⁹ Ma nɩalɩŋ sɩ laa Wɩa wɩaa dii a jɩŋ arɩ ma jaŋ wuo dii kʋŋkala, má fɩɛlɛ ma sɩaa, dɩ ŋɩɩ dee ma jaŋ leŋ dɩ nɩalɩŋ ma sɩ laa Wɩa wɩaa dii aŋ bɩ ba lɛ chɩna woruŋ ŋaa wʋbɔŋ.

¹⁰ Ma nɩalɩŋ sɩ waa Wɩa wɩaa lɛ, dɩ ma dɔnsʋŋ nɛ jʋʋ vʋɩŋ dɩa a hɔnɔ didii kɩaa, dɩ nɩalɩŋ sɩ bɩ waa Wɩa wɩaa lɛ nɛ nama dɩ maa dii kʋdiilee deemba, ma bɩ jɩŋ arɩ ba ma jaŋ to ma lɛ a didii kɩaa deemba?

¹¹ A tɩŋ ma wʋjɩmɩŋ deeŋ, ma naambie sɩ bɩ Wɩa wɩaa lɛ chɩna tele nɛ, nɩɩ-la wɩaa Kirisito sɩ sʋba.

¹² Ŋɩɩ wɩaa, dɩ kʋdiile-la ma sɩɩ dii nɛ leŋe dɩ ma naambiiriŋ to ŋɩɩ lɛ a ŋaa wʋbɔŋ, maa vʋgʋmɛ ʋ tʋɔbɩɩnaa nɛ ŋɩɩ. Dɩ ma nɛ ŋaa ŋɩɩ, ma ŋaa wʋbɔŋ nɛ Kirisito lɛ.

¹³ Ŋɩɩ wɩaa, dɩ mɩ nɛ jɩma arɩ mɩ nɛ dii kʋdiil dɔŋ, mɩ naambie jaŋ ŋaa wʋbɔŋ, ŋɩɩ-na mɩ bɩ jaŋ dii a leŋ dɩ mɩ naambie ŋaa wʋbɔŋ.