1 Kɔrɩntɩ Nɩaa 7 - WƖA TENIŊ

Pɔɔl bʋl haalaa jaanɩŋ wɩaa

¹ Teŋ-la ma sɩ ŋmʋnsa pɩmɛ tʋɔŋ ma pɩɛsɛmɛ wɩaa dɔnsʋŋ. Mɩɩ chɛ dɩ mɩ bʋl wɩaa a tɩgɛ wɩalɩŋ lɛ nɛ. Ʋ ŋaa wʋzɔŋ nɛ dɩ baala nɛ bɩ haala jaa.

² Ama a tɩŋ wʋlɩɩlɩŋ wɩaa, baal kala jaa ʋ haala, dɩ haal ma kala jaa ʋ bala.

³ Ʋ maga dɩ baala arɩ ʋ haala joŋ ba tɩtɩa a pɩpɩ dɔŋɔ, a ŋɩŋaa wɩalɩŋ sɩ maga dɩ ba ŋɩŋaa.

⁴ Haala bɩ ʋ tɩtɩa tɩɩ, ʋ bala nɛ tɩɩʋ, baala ma bɩ ʋ tɩtɩa tɩɩ, ʋ haala nɛ tɩɩʋ.

⁵ Dɩ baala nɩɩ chɛ ʋ haala, ʋ bɩ maga dɩ haala vɩa, dɩ haala ma nɩɩ chɛ ʋ bala, ʋ bɩ maga dɩ ʋ bala ma vɩa, see dɩ ba kala sɛyɛ arɩ ba bɩ jaŋ jɩŋ dɔŋɔ a magɛ tapʋlaa baŋmɛnɛ, aŋ joŋ ba tɩtɩa kala hɛ Wɩɩ-chʋɔlʋŋ lɛ. Ama dɩ ma nɛ chʋɔlɛ Wɩa dɛrɛ, má bɩra suomo jɩŋ dɔŋɔ. Dɩ ma nɩɩ ŋaa ŋɩɩ, Sɩtaanɩ bɩ jaŋ wuo na wombiiŋ a jomma hɛ wʋbɔmʋŋ lɛ a tɩŋ ma sɩ bɩ ma tɩtɩa kɛnɩŋ jɩŋ wɩaa.

⁶ Mɩ sɩ bʋl wɩɩŋ deeŋ a pɩpɩma, ʋ bɩ naga arɩ mɩɩ chɛ dɩ mɩ bil nii nɛ a pɩma dɩ ma tuto.

⁷ Wʋtɩtɩɩ nɛ, mɩ fa jaŋ cho dɩ ma kʋŋkala nagɛmɛ a bɩ haala jaa, ama nʋʋ ma kala arɩ ʋ wɩɩ Wɩa sɩ joŋo pʋ nɛ. Wɩa yie joŋ wɩɩŋ deeŋ a pɩ nɩa dɔŋɔ a joŋ wɩɩ dɔŋ a pɩ dɔŋɔ ma.

⁸ Mɩɩ chɛ dɩ mɩ bʋl bonjoŋŋoo arɩ ha-bonjoŋŋoo arɩ ma yo-haalaa wɩaa nɛ. Ʋ jaŋ ŋaa wʋzɔŋ dɩ ma ma nɛ nagɛmɛ a bɩ baala koo haala jaa.

⁹ Ama dɩ ma nɛ bɩ ma tɩtɩa wuo kɩkɛŋ, má mʋ jaa balaba arɩ haalaa. Ʋ nɛ kpɩa ma sɩ jaŋ joŋ baalaa koo haalaa wɩaa a hɛ ma nyuŋ lɛ.

¹⁰ Baala-la sɩ kɛŋ haalaa arɩ haala-la sɩ kɛŋ balaba, mɩɩ chɛ dɩ mɩ bʋl wɩɩŋ deeŋ pɩma nɛ. Mɩ tɩtɩa dee bɩ bʋl, ama La Tɩɩna nɩɩ bʋl wɩɩ-la. Ʋ nɛ ŋ-la: Haala bɩ maga dɩ ʋ vɩa ʋ bala,

¹¹ ama dɩ haal nɛ vɩa ʋ bala, ʋ maga dɩ ʋ bɩra sɩ́ baal dɔŋ jaa nɛ, aŋ hɔŋ a ŋaa ha-bonjoŋ. Dɩ ʋ nɛ na dɩ ʋ bɩ bonjoruŋ wuo hɔŋ, ʋ maga dɩ ʋ mɩɩra mʋ ʋ bala teeŋ. Baala ma bɩ maga dɩ ʋ vɩa ʋ haala.

¹² Ma nɩkaanaa ma, mɩ-na Pɔɔl nɛ bʋl wɩɩŋ deeŋ pɩpɩma, La Tɩɩna Wɩa dee. Dɩ baal-la sɩ laa Wɩa wɩaa dii nɛ kɛŋ haal-la sɩ bɩ Wɩa wɩaa laa dii, dɩ haal-la nɛ sɛyɛ dɩ ba hɔŋ, baal-la bɩ maga dɩ ʋ vɩaʋ.

¹³ Dɩ haal-la sɩ laa Wɩa wɩaa dii nɛ kɛŋ bala sɩ bɩ Wɩa wɩaa laa dii, dɩ ʋ nɛ sɛyɛ dɩ ba hɔŋ, ʋ bɩ maga dɩ haal-la vɩaʋ.

¹⁴ Wɩɩ-la sɩ tɩɩ nɛ ŋ-la: Dɩ haala nɛ laa Wɩa wɩaa dii aŋ ka ʋ bala bɩ laa dii, a tɩŋ haal-la wɩaa, Wɩa yie joŋ arɩ baal-la ma bɩ disiniŋ kɛnɛ. Ŋɩɩ tɩtɩa nɛ, dɩ baal nɛ laa Wɩa wɩaa dii aŋ ka ʋ haala bɩ laa dii, a tɩŋ baal-la wɩaa, Wɩa yie joŋ arɩ haal-la ma bɩ disiniŋ kɛnɛ. Dɩ ŋɩɩ fa dee, ba biiriŋ fa jaŋ nagɛ nɩalɩŋ sɩ bɩ Wɩa ka chʋɔlɛ biiriŋ a kɛŋ disiniŋ. Ama ba biiriŋ bɩ disiniŋ kɛnɛ Wɩa teeŋ.

¹⁵ Baal koo haal, dɩ ba tʋɔŋ nɩɩ-la sɩ bɩ Wɩa ka chʋɔlɛ nɩɩ chɛ dɩ nɩɩ-la ʋ sɩ jaa viiri, ʋ maga dɩ ʋ viiri. Dɩ ʋ nɛ viire, nɩɩ-la sɩɩ chʋɔlɛ Wɩa bɩ wɩɩ ŋaa chei. Wɩa yie chɩchɛ dɩ ma hɔŋ sɔm nɛ.

¹⁶ Haal-la sɩ laa Wɩa wɩaa dii, aŋ ka ʋ bala bɩ Wɩa wɩaa laa dii, ɛɛ nɛ ŋ jaŋ wuo ŋaa jɩŋ arɩ ŋ bala ma jaŋ kʋ laa Wɩa wɩaa dii? Baal-la ma sɩ laa Wɩa wɩaa dii, ka ʋ haala bɩ Wɩa ka chʋɔlɛ, ɛɛ nɛ ŋ ma jaŋ wuo ŋaa jɩŋ arɩ ŋ haala jaŋ kʋ laa Wɩa wɩaa dii?

¹⁷ Kʋ-la kala Wɩa sɩ joŋo pɩŋ, arɩ ŋɩɩ ŋ fa sɩ naga ka Wɩa yɩrɩŋ, ʋ maga dɩ ŋ kɛnʋ nɛ. Wɩɩŋ deeŋ nɛ mɩ dɩdagɛ nɩalɩŋ sɩ laa Yesu wɩaa dii aa hilimi lee-na kala.

¹⁸ Dɩ nʋʋ nɛ fa keri ʋ peniŋ ka Wɩa yɩrʋ, ʋ bɩ maga dɩ ʋ bɩɩnɛ arɩ ʋ ŋaa wʋbɔŋ nɛ. Dɩ nʋʋ ma nɛ bɩ ʋ peniŋ kere aŋ ka Wɩa yɩrʋ, ʋ tɩɩna bɩ maga dɩ ʋ keri ʋ peniŋ.

¹⁹ Dɩ ŋ keri ŋ peniŋ koo dɩ ŋ bɩ kere, ʋ bɩ wɩɩ kɛnɛ Wɩa teeŋ. Wɩɩ-la sɩ ŋaa sɩɩfɩaŋ wɩɩ nɛ, dɩ ma tuto Wɩa niiŋ wɩalɩŋ ʋ sɩ bʋla.

²⁰ Nʋʋkala sɩ nagɛ ŋɩɩ aŋ ka Wɩa yɩrʋ, ʋ nagɛ ŋɩɩ.

²¹ Dɩ ŋ nɛ fa ŋaa yoŋ aŋ ka Wɩa yɩrɩŋ, sɩ́ leŋe dɩ ʋ ŋaa wɩɩkala. Ama dɩ ŋ nɛ na wombiiŋ ŋ sɩ jaŋ wuo tɩɩ ŋ tɩtɩa, ʋ maga dɩ ŋ tɩɩ ŋ tɩtɩa nɛ.

²² Yoŋ-na kala La Tɩɩna Kirisito sɩ yɩra, ʋ tɩɩna tɩɩ ʋ tɩtɩa nɛ Kirisito teeŋ. Ŋɩɩ tɩtɩa nɛ nɩɩ-la sɩ tɩɩ ʋ tɩtɩa aŋ ka Kirisito yɩrʋ, ŋaa Kirisito yoŋ nɛ.

²³ Kirisito nɛ joŋ ʋ chalɩŋ yɔɔma. Ŋɩɩ wɩaa, má sɩ́ nuhuobiinee yosuŋ ŋaa.

²⁴ Mɩ naambiiriŋ, nʋʋkala sɩ nagɛ ŋɩɩ aŋ ka Wɩa yɩrʋ, ʋ maga dɩ ʋ nagɛ ŋɩɩ tɩtɩa nɛ.

Bonjoŋŋoo, ha-bonjoŋŋoo arɩ yo-haalaa wɩaa

²⁵ Ma sɩ pɩɛsɛmɛ wɩɩ-la a mʋ tɩgɛ nɩalɩŋ ha sɩ bɩ bala koo haala jaa lɛ, Wɩa bɩ wɩɩkala bʋla pɩla a mʋ tɩgɛ ba lɛ, ama Wɩa sɩ fá mɩ nenige ŋɩɩ, ʋ leŋe mɩ ŋaa nɩtɩtɩɩ nɛ, ŋɩɩ wɩaa mɩɩ chɛ dɩ mɩ bʋl wɩɩ-la mɩ sɩ kɛnɛ nɛ a tɩgɛ hatoloo lɛ.

²⁶ A tɩŋ lɛɛlɛ tinteeŋ sɩ dolie wɩaa, ʋ jaŋ zɔŋ dɩ nʋʋ nɛ bɩ bala koo haala kɛnɛ.

²⁷ Ŋ jaa haala nɛɛ? Pʋpɔ ŋ sɩ́ ʋ vɩa. Ŋ bɩ haala jaa? Ŋɩɩ-na bɩra sɩ́ haal chɛ.

²⁸ Ama dɩ ŋ nɛ jaa haala, ŋ bɩ wʋbɔŋ ŋaa. Dɩ hatolo ma ha sɩ bɩ bala jaa, dɩ ʋ nɛ jaa bala, ʋ bɩ wʋbɔŋ ŋaa. Ama nɩalɩŋ sɩ jaa haala koo bala, ba yie jʋʋ wʋwalɩmaa tʋɔŋ nɛ. Mɩ bɩ chɛ dɩ ma jʋʋ wʋwalɩmaa deemba. Ŋɩɩ nɛ tɩɩ mɩ sɩ má sɩ́ bala koo haala kɛŋ.

²⁹ Mɩ naambiiriŋ, wɩɩ-la mɩ sɩɩ bʋl nɛ ŋ-la: La bɩ jaŋ dieni dʋnɩa deeŋ lɛ. Ŋɩɩ wɩaa, nɩalɩŋ sɩ kɛŋ haalaa, maga dɩ ba nagɛ arɩ ba bɩ haalaa kɛnɛ nɛ.

³⁰ Nɩalɩŋ sɩɩ yel maga dɩ ba nagɛ arɩ ba tʋɔŋ bɩ cheye, ka nɩalɩŋ sɩɩ mɔŋ maga dɩ ba naga arɩ ba tʋɔŋ bɩ tɔrɔ. Nɩalɩŋ sɩɩ yɔɔ kɩaa maga dɩ ba nagɛ arɩ ba bɩ kɩalɩŋ ba sɩɩ yɔɔ tɩɩ.

³¹ Bayalaa ma maga dɩ ba nagɛ arɩ ba bɩ kɩaa yallɛ, bɛɛ wɩaa dʋnɩa deeŋ nagɩŋ ʋ sɩ nagɛ, ʋ bɩ jaŋ dieni kɩŋkɛŋ.

³² Mɩ bɩ chɛ dɩ wɩaa walɩmɛma. Baal-la sɩ bɩ haala kɛnɛ yie joŋ ʋ nyuŋ kala hɛ La Tɩɩna tɩntɩŋŋaa lɛ nɛ. Ʋ yie chɩchɛ dɩ ʋ tɩma pɩ ʋ Tɩɩna dɩ ʋ tʋɔŋ tɔrɛ nɛ.

³³ Ama baal-la sɩ kɛŋ haala yie bɩbɩɩnɛ dʋnɩa wʋŋaalaa wɩaa nɛ, bɛɛ wɩaa ʋ yie chɩchɛ dɩ ʋ ŋaa wɩaa dɩ ʋ haala tʋɔŋ tɔrɛ nɛ.

³⁴ Ŋɩɩ wɩaa, ʋ yie kɛŋ tʋɔbɩɩnaa balɩa nɛ a tɩtɩŋ ʋ tɩntɩŋŋaa. Haal-la koo hatolo-la sɩ bɩ bala kɛnɛ yie joŋ ʋ tɩtɩa kala a hɛ La Tɩɩna tɩntɩŋŋaa lɛ nɛ. Ʋ yie chɩchɛ dɩ ʋ joŋ ʋ yaraa arɩ ʋ tʋɔŋ kala a pɩ Wɩa nɛ. Ama haal-la sɩ kɛŋ bala yie joŋ ʋ tɩtɩa kala hɛ dʋnɩa wʋŋaalaa lɛ nɛ, bɛɛ wɩaa ʋ yie chɩchɛ dɩ ʋ ŋaa wɩaa dɩ ʋ bala tʋɔŋ tɔrɛ nɛ.

³⁵ Mɩɩ chɛ dɩ ma pɛ ma tɩtɩa lɛ nɛ, ŋɩɩ nɛ tɩɩ mɩ bʋbʋl wɩɩŋ deeŋ. Mɩ bɩ chɛ dɩ mɩ kirima ma tʋɔtɔrɛ wʋŋaalaa lɛ. Ama mɩɩ chɛ dɩ ma ŋaa wɩalɩŋ sɩɩ to wombiiŋ lɛ nɛ, a joŋ ma tɩtɩa arɩ ma wɩɩ-wɩɩkala a hɛ La Tɩɩna tɩntɩŋŋaa lɛ.

³⁶ Dɩ baala nɛ sʋgɛ hatolo dɩ ʋ jaa, dɩ haal-la ma sɛɩ, aŋ ka ba ha bɩ dɔŋɔ jaa, dɩ baal-la nɛ bene arɩ ʋ bɩ ʋ tɩtɩa wuo kɛŋ, a chɩchɛ sɩɩfɩɛsɩŋ dɩ ʋ jɩŋ haal-la, a na dɩ haal-la ma ka hɩasʋ, ʋ maga dɩ ʋ jaaʋ. Ʋ ŋɩɩ bɩ wʋbɔŋ ŋaa.

³⁷ Ama dɩ baal nɛ hɛ nɩmɛ a jɩŋ ʋ tʋɔŋ lɛ arɩ ʋ jaŋ hɔŋ aŋ bɩ haal jɩŋ, a bɩɩnɛ wɩɩ-la lɛ a mʋ dɛrɛ, a wuo kɛŋ ʋ tɩtɩa woruŋ haalaa wɩaa lɛ, a wuo jɩŋ arɩ ʋ bɩ jaŋ jaa hatolo-la ʋ sɩ sʋga, ʋ tɩɩna ŋaa wʋzɔŋ nɛ.

³⁸ Ŋɩɩ wɩaa, dɩ baal-la nɛ jaa haala, ʋ ŋaa woruŋ nɛ, ama nɩɩ-la sɩ bɩ haala jaa nɛ paala kpɩaʋ.

³⁹ Haala sɩ kɛŋ bala, dɩ ʋ bala nɛ hɛ ʋ mɩɩsɩŋ lɛ, ʋ bala-la nɛ tɩɩʋ. Ama dɩ ʋ bala nɛ sʋba, ʋ kɛŋ wombiiŋ dɩ ʋ bɩra jaa baal dɔŋ ʋ sɩ cho. Ama ʋ maga dɩ ʋ jaa nɩɩ-la sɩ cho La Tɩɩna nɛ.

⁴⁰ Dɩ ʋ nɛ bɩ bala jaa, ʋ jaŋ na tʋɔtɔrʋŋ. Mɩ tʋɔbɩɩnaa nɛ ŋɩɩ. Mɩ bʋl wɩɩŋ deeŋ, bɛɛ wɩaa ma jɩma arɩ Wɩa Dɩŋ-zɔmʋŋ hɛ mɩ lɛ nɛ.