1 Kɔrɩntɩ Nɩaa 6 - WƖA TENIŊ

Ŋɩɩ sɩ maga dɩ nɩalɩŋ sɩ laa Yesu wɩaa dii bʋl wɩaa wasɛ

¹ Ma nɩalɩŋ sɩ ŋaa Wɩa nɩaa, dɩ wɩɩ nɛ kʋ hɛ ma balɩa pɛgɛ, dɔŋɔ yie kɛŋ wɩɩ-la kaa mʋ nɩalɩŋ sɩ bɩ Wɩa ka chʋɔlɛ teeŋ nɛ, dɩ ba bʋl wɩɩ-la a wasɛ. Bɛɛ nɛ tɩɩ ma yie bɩ leŋe Wɩa nɩaa bʋl wɩɩ-la wʋwasɛ?

² Ma bɩ jɩŋ arɩ Wɩa nɩaa nɛ jaŋ dii dʋnɩa nɩaa sarɩya? Dɩ ma nɛ jaŋ dii dʋnɩa nɩaa sarɩya, ma bɩ wʋbiisiŋ deemba wuo bʋla wʋwasɛɛ?

³ Ma bɩ jɩŋ arɩ la Wɩa nɩaa nɛ jaŋ dii Wɩa tɩndaaraa ma sarɩya? A saa kʋ bibeŋ dʋnɩa deeŋ lɛ wɩaa?

⁴ Ŋɩɩ-na saa, dɩ wɩɩ kʋ hɛ ma balɩa pɛgɛ, ma jaŋ kɛŋ wɩɩ-la mʋ nɩalɩŋ sɩ bɩ dɩ-chɩnɩɩ kɛnɛ nɩalɩŋ sɩ laa Yesu wɩaa dii aa hilimi sɩpaaŋ dɩ ba bʋla wasɛ pɩmaa?

⁵ Ma hɩɩsɛ nɛ. Nɩbala paala tuo ma tʋɔŋ sɩ kɛŋ wʋjɩmɩŋ, dɩ wɩɩ nɛ kʋ hɛ Wɩa nɩaa balɩa pɛgɛ, dɩ ʋ wuo bʋl a wasɛɛ?

⁶ Ama dɩ Wɩa nɩaa balɩa nɛ kɛŋ wɩɩ, dɔŋɔ yie kɛŋ ʋ dɔŋɔ tɩɩna mʋ nɩalɩŋ sɩ bɩ Wɩa ka chʋɔlɛ teeŋ nɛ ba bʋl wɩɩ-la wasɛ pɩba.

⁷ Ma sɩ vɛnɛ kɛŋ dɔŋɔ mʋmʋ nɩaa deemba teeŋ dɩ ba dii ma wʋbʋlʋŋ pɩma, daga arɩ ma kala tele nɛ Wɩa wombiiŋ lɛ. Dɩ nʋʋ nɛ ŋaa wɩɩ chei ʋ dɔŋɔ, bɛɛ nɛ tɩɩ ʋ bɩ tɔrɛ? Dɩ nʋʋ nɛ gɩrɩma laa ʋ dɔŋɔ kɩaa, bɛɛ nɛ tɩɩ ʋ bɩ leŋe tɩɩna kɩkɛŋ kɩalɩŋ?

⁸ Ama ma tɩtɩa yie ŋaa wɩaa chichei dɔŋɔ aŋ gɩrɩma lɩlaa ma naambiiriŋ ma kɩaa.

⁹ Ma bɩ jɩŋ arɩ nɩbɔŋŋɔɔ bɩ jaŋ wuo jʋʋ Wɩa kuorii-la tʋɔŋ? Má sɩ́ ma tɩtɩa nyɩsʋ. Nɩalɩŋ sɩɩ ŋaa wʋlɩɩlɩŋ arɩ nɩalɩŋ sɩɩ kpaarɛ vʋɩyaa, arɩ bachɔrʋmɔɔ arɩ hachɔrʋmɔɔ, arɩ baalaa koo haalaa balɩa sɩ jaa dɔŋɔ, arɩ baala-la koo haala-la sɩ gɔllɛ lee-kala a ŋɩŋaa ba-lɩɩlɩ koo hachɔrʋŋ wɩaa,

¹⁰ arɩ gaaraa arɩ tʋɔ-luŋ tɩŋŋaa, arɩ sɩ-nyʋaraa, arɩ nɩalɩŋ sɩɩ chei nɩaa yɩrɩŋ, arɩ nɩalɩŋ sɩ gɩrɩma lɩlaa dɔŋɔba kɩaa, nɩaa deemba kʋŋkala bɩ jaŋ wuo jʋʋ Wɩa kuorii-la tʋɔŋ.

¹¹ Ma dɔnsʋŋ faa ŋaa wɩaa deemba nɛ. Ama Wɩa fo ma wʋbɔŋŋɔɔ ta nɛ. Wɩa nɛ tɩɩma. A tɩŋ La Tɩɩna Kirisito Yesu wɩaa arɩ Wɩa Dɩŋ-zɔŋ-la doluŋ lɛ, ma ŋaa tʋɔpʋl tɩmma nɛ Wɩa teeŋ.

Ʋ maga dɩ la leŋ disiŋ wʋŋaalaa

¹² Mɩ jaŋ wuo bʋl arɩ dɩ mɩ nɛ cho, mɩ jaŋ ŋaa wɩɩ-na kala mɩ sɩɩ chɛ. Wʋtɩtɩɩ nɛ, ama wɩɩ-na kala bɩ jaŋ ŋaa wʋzɔŋ a pɩmɛ. Mɩ jaŋ wuo bɩra bʋl arɩ mɩ nɛ cho, mɩ jaŋ wuo ŋaa wɩɩkala, ama mɩ bɩ jaŋ sɛɩ dɩ kʋŋkala kɛŋ doluŋ mɩ lɛ.

¹³ Nʋʋ hɛ nɩmɛ a ma jaŋ bʋl, Wɩa nɛ ŋaa kʋdiilee ba dii hɩhɛ luoruŋ lɛ, ka luoruŋ ma laa kʋdiile-la bibil. Wʋtɩtɩɩ nɛ, ama Wɩa jaŋ leŋ dɩ kʋdiilee arɩ luoru-la kala pʋa. Wɩa bɩ nuhuobiine ŋaa dɩ ʋ kɛŋ ʋ yaraa ŋɩŋaa wʋlɩɩlɩŋ, ama dɩ ʋ kɛŋ ʋ yaraa tɩma pʋpʋ. Wɩa nɛ tɩɩ yara-la ma.

¹⁴ Wɩa doluŋ lɛ nɛ ʋ chɩsɛ La Tɩɩna Kirisito sʋʋŋ lɛ. Ʋ jaŋ chɩsɛ la ma sʋʋŋ lɛ.

¹⁵ Ma bɩ jɩŋ arɩ ma yaraa ŋaa Kirisito yaraa sɛmɛ dɔŋɔ nɛɛ? Ma bɩɩna mɩ jaŋ wuo joŋ Kirisito yaraa sɛmɛ dɔŋɔ a mɛrɛ hachɔrʋmʋŋ yaraa lɛ? Aɩ, mɩ bɩ jaŋ ŋaa ŋɩɩ.

¹⁶ Koo ma bɩ jɩŋ dɩ baala nɛ kɛŋ hachɔrʋŋ-la pɩŋ, ba kala ŋaa kʋbala nɛɛ? Wɩa teniŋ tʋɔŋ ba chaasa bʋl, “Baala arɩ ʋ haala jaŋ mɛrɛ dɔŋɔ lɛ a ŋaa kʋbala.”

¹⁷ Ŋɩɩ tɩtɩa nɛ nɩɩ-la sɩ kɛŋ ʋ tɩtɩa mʋ mɛrɛ La Tɩɩna Kirisito lɛ, ʋ dɩ ʋ ŋaa kʋbala nɛ Wɩa Dɩŋ-zɔŋ-la doluŋ lɛ.

¹⁸ Má lɩɩsɛ ma tɩtɩa wʋlɩɩlɩŋ lɛ. Wʋbɔŋ-na kala nuhuobiine sɩ ŋaa bɩ ʋ yaraa ka chei, ama baal-la sɩɩ ŋaa wʋlɩɩlɩŋ yie chei ʋ yaraa kala nɛ.

¹⁹ Ma bɩ jɩŋ arɩ ma yaraa ŋaa Wɩa Dɩŋ-zɔŋ-la ʋ sɩ joŋo pɩma dɩa nɛɛ? Ma dee bɩ ma tɩtɩa tɩɩ. Wɩa nɛ tɩɩma.

²⁰ Wɩa joŋ ʋ chalɩŋ nɛ yɔɔma. Ŋɩɩ wɩaa, má kɛŋ ma yaraa tɩŋ tɩntɩmɩɩ-la sɩɩ tɔrɛ Wɩa tʋɔŋ.