1 Kɔrɩntɩ Nɩaa 5 - WƖA TENIŊ

Nɩalɩŋ sɩ laa Yesu wɩaa dii dɔnsʋŋ ŋaa wʋlɩɩlɩŋ

¹ Mɩ nɩa arɩ nʋʋ nɛ hɛ ma tʋɔŋ a ŋaa disiniŋ. Ʋ ŋɩɩ lɔrɔ. Nɩalɩŋ sɩ bɩ Wɩa jɩŋ ma paala bɩ ŋɩɩ ka ŋaa. Ba bʋla pɩmɛ arɩ nʋʋ nɛ hɛ ma tʋɔŋ a laa ʋ nyɩmma haala jaa.

² Ɛɛ nɛ saa ma jaŋ wuo ŋaa a bigisi ma tɩtɩa lɛ? Ʋ maga dɩ ma tʋɔŋ chei nɛ, ka dɩ ma lɩɩsɛ nɩɩ-la sɩ ŋaa ŋɩɩ a ta ma tʋɔŋ.

³ Mɩ-na, mɩ hɛ dɩ-bolii nɛ, ama mɩ dɩma guoli ma tʋɔŋ nɛ. Mɩ paala joŋ cheeriŋ pɩ nɩɩ-la sɩ ŋaa wʋlɔrʋŋ deeŋ nɛ a nagɛ mɩ hɛ ma teeŋ nɛ.

⁴ Dɩ ma nɛ kʋ hilimi La Tɩɩna Yesu Kirisito yɩrɩŋ lɛ, mɩ dɩma jaŋ hɛ ma teeŋ, Yesu Kirisito ma doluŋ jaŋ hɛ ma teeŋ.

⁵ Má joŋ baala deeŋ hɛ Sɩtaanɩ nɩsɩŋ lɛ, dɩ ʋ to ʋ tʋɔtɔrɛ wʋŋaalaa lɛ a dɔgɩsɛ ʋ yaraa, ka dɩ Wɩa laa ʋ dɩma ta tapʋlɩɩ-la La Tɩɩna sɩ jaŋ mɩɩra kɔ.

⁶ Ma sɩɩ bigisi ma tɩtɩa lɛ ŋɩɩ, ʋ ŋɩɩ bɩ zɔŋ. Ma bɩ jɩŋ arɩ sɩbʋrʋŋ mʋa nɛ ba yie joŋo hɛ boroboro munuŋ lɛ, ka ʋ sii pʋɔrɛ a yʋgɛɛ?

⁷ Má joŋ sɩ-bʋrʋ-bɩnɩɩ-la sɩ ŋaa wʋbɔŋ a ta. Dɩ ma nɛ ŋaa ŋɩɩ, ma jaŋ wuo ŋaa tʋɔpʋl tɩmma, a wuo nagɛ boroboro muŋ-falɩɩ-la ba ha sɩ bɩ sɩbʋrʋŋ hɛ. Ma saa jɩma arɩ ma bɩ wʋbɔŋ kɛnɛ. La kɛŋ la tɩtɩa hɛ dɔŋɔ dɩ la gbieli dɩɩsɩŋ kiele bal gbiele-la nɛ. Kirisito nɛ ŋaa Pie-bie-la ba sɩ kpʋa dɩ la kaa dii la dɩɩsɩŋ kiele bal gbiele-la.

⁸ Ŋɩɩ wɩaa, má leŋ dɩ la gbieli la dɩɩsɩŋ kiele bal gbiele-la. Má leŋ dɩ la joŋ boroboro bɩnɩɩ-la sɩ kɛŋ sɩbʋrʋŋ ta. Sɩ-bʋrʋ-la nagɛ wʋbɔmʋŋ arɩ tʋɔbɔmʋŋ nɛ. Má leŋ dɩ la gbieli arɩ boroboro-la sɩ bɩ sɩbʋrʋŋ kɛnɛ. Boroboro deeŋ nagɛ wʋtɩtɩɩ arɩ tʋɔ-bala nɛ.

⁹ Teŋ-la mɩ sɩ ŋmʋnsa pɩma tʋɔŋ, mɩ bʋla pɩma dɩ ma lɩɩsɛ ma tɩtɩa nɩalɩŋ sɩɩ ŋaa wʋlɩɩlɩŋ tʋɔŋ.

¹⁰ Mɩ saa bɩ bʋla arɩ ma sɩ́ dʋnɩa nɩaa sɩɩ ŋaa wʋlɩɩlɩŋ, koo nɩalɩŋ sɩ kɛŋ tʋɔ-luŋuŋ, koo gaaraa, koo vʋɩ-kpaaraa tʋɔŋ guolu. Dɩ ma nɩɩ chɛ dɩ ma sɩ́ ba tʋɔŋ guolu, ŋɩɩ-na ma bɩ jaŋ hɛ dʋnɩa lɛ.

¹¹ Ama wɩɩ-la mɩ sɩɩ bʋl nɛ ŋ-la: Má sɩ́ ma tɩtɩa kaa mʋ mɛrɛ nɩɩ-la sɩ sɩ ʋ ŋaa nɩalɩŋ sɩ laa Wɩa wɩaa dii dɔŋɔ nɛ aŋ ŋɩŋaa wʋlɩɩlɩŋ, koo ʋ kɛŋ tʋɔ-luŋuŋ, koo ʋ kpaarɛ vʋɩyaa, koo ʋ gɔllɔ chichei nɩaa yɩrɩŋ, koo ʋ ŋaa sɩ-nyʋarʋ, koo ʋ ŋaa gaarʋ. Ma paala sɩ́ leŋe dɩ ma dɩ tɩɩna hɔŋ a dii kʋdiilee ma.

¹² Mɩ tɩntɩmɩŋ dee dɩ mɩ laa nɩalɩŋ sɩ bɩ Yesu laa dii wɩaa jɩŋ. Ama ma-na saa maga dɩ ma laa dɔŋɔba wɩaa jɩjɩŋ nɛ.

¹³ Nɩalɩŋ sɩ bɩ Yesu jɩŋ-na, Wɩa nɛ jaŋ dii ba sarɩya. Wɩa teniŋ tʋɔŋ ba bʋla, “Má lɩɩsɛ nɩbɔmʋŋ ta ma tʋɔŋ.”