1 Kɔrɩntɩ Nɩaa 4 - WƖA TENIŊ

Yesu nanzɔɔba sɩ nagɛ ŋɩɩ

¹ Ma sɩɩ benla ŋɩɩ, ʋ maga dɩ nʋʋkala jɩŋ arɩ la ŋaa Kirisito tɩntɩnnaa nɛ. Wɩa joŋ ʋ wɩalɩŋ fa sɩ faa a hɛ la nɩsɩŋ lɛ nɛ.

² Ʋ saa maga dɩ tɩntɩnnʋ kala kɛŋ wʋtɩtɩɩ a tɩtɩŋ ʋ tɩntɩŋŋaa.

³ Mɩ sɩpaa tuo dɩ ma nɩɩ bʋl mɩ teeŋ koo dɩ nɩa nɛ dɔsɛ a mʋ tɩgɛ wɩalɩŋ mɩ sɩɩ dagɛ lɛ. Mɩ paala bɩ cheeriŋ joŋo pɩ mɩ tɩtɩa a mʋ tɩgɛ wɩalɩŋ lɛ.

⁴ Mɩ tʋɔbɩɩnaa kala chese nɛ. Ama mɩ saa bɩ jaŋ wuo bʋl arɩ mɩ bɩ wɩɩ cheye. La Tɩɩna Wɩa nɛ jaŋ dagɛ arɩ mɩ cheye nɛ koo mɩ bɩ cheye.

⁵ Ŋɩɩ wɩaa, má sɩ́ cheeriŋ joŋo pɩ nʋʋkala, dɩ tapʋlɩɩ-la La Tɩɩna sɩ jaŋ kɔ a dii la sarɩya ha bɩ yie. Dɩ ʋ nɛ mɩɩra kɔ, wʋbɔmɔ-la kala nɩaa sɩ ŋaa birimiŋ tʋɔŋ, ba kala jaŋ kʋ lɩɩ pʋlʋmʋŋ. Nɩaa tʋɔbɩɩnaa kala ba sɩ kɛnɛ jaŋ kʋ lɩɩ pʋlʋmʋŋ. Bʋa-la lɛ Wɩa jaŋ bɛsɛ nʋʋkala lɛ a mʋ tɩgɛ wɩalɩŋ ʋ sɩ ŋaa.

⁶ Mɩ naambiiriŋ, ma wɩaa nɛ tɩɩ mɩ joŋ wɩaa deemba mɩ sɩ bʋla a kaa magɩsɛ mɩ dɩ Apɔlɔs sɩ nagɛ ŋɩɩ dɩ ʋ wuo pɛ ma lɛ, dɩ ma wuo gʋnnɛ wɩɩ-la nɩaa sɩɩ bʋl, “Má sɩ́ bee kieli wɩalɩŋ ba sɩ ŋmʋnsa bil.” Ŋɩɩ jaŋ leŋ dɩ ma sɩ́ nʋʋkala beŋ arɩ ʋ nɛ kɩɩ ʋ dɔŋɔ.

⁷ Kʋbɛɛ nɛ ŋaa ma yʋga kɩɩ ma dɔnsʋŋ? Wɩa dee bɩ kɩalɩŋ ma sɩ kɛnɛ joŋo pɩmaa? Dɩ Wɩa nɛ saa joŋo pɩma, bɛɛ nɛ tɩɩ ma bibigisi ma tɩtɩa lɛ arɩ ʋ dee bɩ joŋo pɩma?

⁸ Ma bɩɩna ma kɛŋ kʋŋkala ma sɩɩ chɛ nɛ, a ŋaa kɩa tɩmma, a dii kuoruŋ aŋ ka la-na bɩ kɩaa deemba kʋŋkala kɛnɛ. Wʋtɩtɩɩ, la fa cho dɩ ma dii kuoruŋ nɛ, dɩ la dɩ ma kala ŋaa kuoroo.

⁹ Ʋ naga mɩ-na teeŋ arɩ Wɩa joŋ la nɩalɩŋ sɩ ŋaa ʋ nanzɔɔba la nagɛ dansarɩkaba ba sɩ lɩɩsa nɩaa tʋɔŋ ba pʋɔla tuto harɩŋ dɩ ba kaa mʋ kpʋ nɛ. Ba tʋɔsɛla a kaa kʋ lɩɩ, dɩ dʋnɩa nɩaa arɩ Wɩa tɩndaaraa nala a huurila nɛ.

¹⁰ A tɩŋ Kirisito wɩaa, la ŋaa nɩyaara nɛ, ka ma-na kɛŋ wʋjɩmɩŋ Kirisito teeŋ. La-na ŋaa puwuolo nɛ, aŋ ka ma-na ŋaa nɩduori. Nɩaa mʋmɔŋ la lɛ aŋ zizilma.

¹¹ Naabʋɔsʋŋ deemba lɛ losuŋ arɩ lɩɩnyʋasʋŋ kɛnla nɛ, la laalɛ gɛrɩ-kɔsʋmɔɔ, ba ŋmuŋmoola, la gɔllɔ bɩbaarɛ.

¹² La faasa tɩtɩŋ nɛ dɩ la pɛ la tɩtɩa lɛ. Dɩ nɩaa nɛ ŋmɩɛsa hɛ la lɛ, la-na yie sʋl Wɩa pɩba nɛ, dɩ ba nɛ to naasɩŋ dʋdɔgɩsɛla, la yie nyalɩmɛ nɛ.

¹³ Dɩ ba nɛ chei la yɩrɩŋ, la-na yie bʋl wʋzɔŋŋɔɔ nɛ a tɩgɛ ba lɛ. Naabʋɔsʋŋ deemba lɛ, la ŋaa kʋtɔɔnɩ nɛ, dʋnɩa nɩsʋrʋŋ nɛ paala kpɩala.

¹⁴ Ma nagɛ mɩ bii-chooloo nɛ. Ŋɩɩ wɩaa, mɩ bɩ wɩaa deemba ŋmʋnsa pɩma dɩ hɩɩsɩŋ kɛmma, ama mɩɩ chɛ dɩ mɩ chagɩlɛma nɛ.

¹⁵ Dɩ ma nɛ kɛŋ sɩpaalaaraa sɩɩ dagɛma Kirisito wɩaa, dɩ ba nɛ ŋaa bʋɩ fii ma, ma nyɩmmaba dee ŋɩɩ. Mɩ nɛ ŋaa ma nyɩmma Yesu Kirisito lɛ, bɛɛ wɩaa mɩ nɛ bʋl Wɩa wʋzɔmɔ-la a pɩma.

¹⁶ Ŋɩɩ wɩaa mɩɩ sʋlma dɩ ma to mɩ naabʋɔsʋŋ, a ŋɩŋaa wɩalɩŋ mɩ sɩɩ ŋaa.

¹⁷ Ŋɩɩ nɛ tɩɩ mɩ tɩŋ Timoti dɩ ʋ kɔ ma teeŋ ŋɩɩ. Ʋ nagɛ mɩ bii-choolii nɛ, a kɛŋ wʋtɩtɩɩ ma La Tɩɩna Kirisito wɩaa lɛ. Ʋ jaŋ liliisima ŋɩɩ mɩ sɩɩ to Kirisito wɩaa, arɩ ŋɩɩ mɩ sɩ yie dagɛba lee-na kala nɩaa sɩ laa Yesu wɩaa dii aa hilimi tʋɔŋ.

¹⁸ Ma dɔnsʋŋ bɩrɩmɛ deŋgiŋ tɩmma nɛ a bɩɩnɛ arɩ mɩ bɩ jaŋ kʋ nama.

¹⁹ Dɩ Wɩa nɛ sɛyɛ, mɩ bɩ jaŋ dieni aŋ kʋ nama. Dɩ mɩ nɛ kɔ, mɩ bɩ chɛ dɩ mɩ nɩɩ deŋgiŋ tɩŋŋaa deemba wʋbʋlaa dʋndʋŋa, ama mɩ jaŋ chɩchɛ dɩ mɩ jɩŋ dol-la ba sɩ kɛnɛ,

²⁰ bɛɛ wɩaa, Wɩa kuorii-la bɩ nuhuobiine wʋbʋlaa lɛ nɛ chɩna, ama Wɩa doluŋ lɛ nɛ ʋ chɩŋ.

²¹ Wʋbɛɛ nɛ ma cho? Mɩ kori chɩba kʋ vɩɩrɛma, koo mɩ kɛŋ chonuŋ arɩ sɩɩfɩɛlaa kɔ?