1 Kɔrɩntɩ Nɩaa 3 - WƖA TENIŊƲ maga dɩ Wɩa tɩntɩnnaa pɛ dɔŋɔ lɛ a tɩŋ ʋ tɩntɩŋŋaa 1 Mɩ naambiiriŋ, mɩ bɩ wuo bʋl wɩaa ma teeŋ a nagɛ ma ŋaa nɩa sɩ kɛŋ Wɩa Dɩŋ-zɔŋ-la nɛ. Ama mɩ bʋl wɩaa ma teeŋ a nagɛ ma haa ŋaa dʋnɩa wɩaa nɛ. Ma ha ŋaa hambiisiŋ nɛ Kirisito wɩaa lɛ. 2 Wɩalɩŋ mɩ sɩ bʋla ma teeŋ, ba nagɛ yɩlɩŋ nɛ mɩ leŋ ma wasɛ. Mɩ bɩ wʋyuŋi kala bʋla pɩma. Bʋa-la lɛ, ma ha bɩ ma tɩtɩa kaa hɛ dɔŋɔ dɩ ma nɩɩ wʋyuŋi. Arɩ lɛɛlɛ kala ma ha bɩ wʋyuŋi kala wuo nɩɩ. 3 Ma haa ŋaa dʋnɩa wʋŋaalaa nɛ, bɛɛ wɩaa, ma kɛŋ yarɩ-bieriŋ dɔŋɔ lɛ, a yuyuo dɔŋɔ, ma sɩɩ ŋaa wɩaa deemba, dʋnɩa wʋŋaalaa dee ŋɩɩ? 4 Ma yie pɔrɛ dɔŋɔ lɛ nɛ. Dɔŋɔ sɩ dɩ ʋ to Pɔɔl harɩŋ nɛ, ka dɔŋɔ ma sɩ dɩ ʋ to Apɔlɔs harɩŋ nɛ. Ma sɩɩ bʋl ŋɩɩ, dʋnɩa nɩaa wʋbʋlaa dee ma bʋbʋl ŋɩɩ? 5 Kʋbɛɛ nɛ Apɔlɔs? Kʋbɛɛ nɛ Pɔɔl? La ŋaa Wɩa tɩntɩnnaa nɛ. La nɛ bʋl Wɩa wɩaa pɩma ma laa dii. La kʋŋkala tɩŋ tɩntɩmɩɩ-la La Tɩɩna Wɩa sɩ joŋo pɩla dɩ la tɩŋ nɛ. 6 Wɩa wɩalɩŋ la sɩ bʋla pɩma nagɛ kʋdoho nɛ la duu. Mɩ nɛ duu kʋdoho-la, Apɔlɔs ma nɛ ŋaa lɩɩŋ a mɩsɛ, ama Wɩa nɛ leŋe ʋ waa. 7 Nɩɩ-la sɩ duu kʋ-la arɩ nɩɩ-la sɩ ŋaa lɩɩŋ mɩsɛ kala bɩ sɩɩfɩaŋ wɩɩ ŋaa. Wɩa nɛ kɩɩ ba kala, bɛɛ wɩaa ʋ nɛ leŋe ʋ waa. 8 Nɩɩ-la sɩ duu kʋdoho-la arɩ nɩɩ-la sɩ ŋaa lɩɩŋ mɩsɛ, ba kala tɩma magɛ dɔŋɔ nɛ. Wɩa jaŋ tiŋ nʋʋkala a magɛ ŋɩɩ ʋ sɩ tɩŋ ʋ tɩntɩmɩɩ-la magɛ. 9 La kala ŋaa tɩntɩnnɩ-dɔsɛ nɛ a pɛ Wɩa lɛ laa tɩŋ. Ma saa nagɛ Wɩa baga nɛ, a bɩra nagɛ Wɩa dɩa. 10 Tɩntɩmɩɩ-la mɩ sɩɩ tɩŋ, Wɩa nɛ joŋ doluŋ pɩmɛ. Mɩ nagɛ dɩɩ-saara sɩ jɩŋ dɩa saanɩŋ woruŋ nɛ a bil Wɩa dɩa-la gentine. Nʋʋ ma dɔŋ nɛ saa dɩa-la ʋ jɩl. Nʋʋkala saa fɩɛlɛ ʋ sɩaa ŋɩɩ ʋ sɩɩ saa dɩa-la. 11 Wɩa laa sɩpaaŋ nɛ a joŋ Yesu Kirisito dɩ ʋ ŋaa ʋ dɩa-la gentine. Nʋʋkala bɩra bɩ jaŋ wuo bil dɩa-la gentine doho. 12 Dɩ nʋʋ nɛ joŋ sɛlɩmɛ kaa saa dɩa-la, koo hɔpʋla, koo tabɩɩ-zɔŋŋɔɔ nɛ, koo daa-borusuŋ, koo mɔsʋŋ, koo kaha, 13 dɩ Kirisito nɛ mɩɩra kɔ tapʋlɩɩ-la, kɩalɩŋ nʋʋkala sɩ kaa saa dɩa-la, ba jaŋ naʋ. Nyiniŋ nɛ jaŋ dagɛ kʋ-la ba sɩ kaa saa nagɩsɩŋ. Ba jaŋ to ŋɩɩ lɛ a jɩŋ tɩntɩmɩɩ-la nʋʋkala sɩ tɩma. 14 Dɩ nyiŋ-la nɛ kɔ aŋ bɩ wuo dii kɩalɩŋ nʋʋkala sɩ kaa saa dɩa-la, ʋ tɩɩna jaŋ laa ʋ time. 15 Ama dɩ nyiŋ-la nɛ wuo dii kɩalɩŋ nʋʋkala sɩ kaa saa dɩa-la, ʋ tɩɩna lɔlɔ ta nɛ. Ama Wɩa jaŋ laa ʋ-na tɩtɩa ta. Ʋ jaŋ naga arɩ nyiŋ-la faa chɛ dɩ ʋ dii ʋ tɩɩna nɛ, aŋ ka Wɩa lɩɩsʋ nyiŋ-la lɛ. 16 Ma bɩ jɩŋ arɩ ma ŋaa Wɩa dɩa nɛ Wɩa Dɩŋ-zɔŋ-la jʋjʋʋ? 17 Ŋɩɩ wɩaa, dɩ nʋʋkala nɛ chei Wɩa dɩa-la, Wɩa ma jaŋ chei ʋ tɩɩna. Wɩa dɩa bɩ disiniŋ kɛnɛ. Ma nɛ saa ŋaa dɩa-la. 18 Nʋʋkala sɩ́ ʋ tɩtɩa nyɩsʋ. Dɩ nʋʋ nɛ hɛ ma tʋɔŋ a bɩɩnɛ arɩ ʋ kɛŋ wʋjɩmɩŋ dʋnɩa deeŋ lɛ, ʋ maga dɩ ʋ bɩrɩmɛ nɩyaarɩ nɛ a wuo kɛŋ wʋjɩmɩɩ-la sɩ lɩɩ Wɩa teeŋ. 19 Dʋnɩa nɩaa wʋjɩmɩŋ ŋaa pɛɩ nɛ Wɩa teeŋ. Wɩa teniŋ tʋɔŋ ba bʋla, “Wɩa to dʋnɩa nɩaa wʋjɩmɩŋ lɛ nɛ a bɛrɛ kɛsɛba.” 20 Wɩa teniŋ sɛmɛ dɔŋɔ ma ba ŋmʋnsa arɩ wʋjɩnnaa tʋɔbɩɩnaa kala ŋaa pɛɩ nɛ. 21 Ŋɩɩ wɩaa nʋʋkala saa sɩ́ ʋ bɔyɛ lɛ ŋmoo a dagɛ wɩɩ-la nuhuobiine sɩ jaŋ wuo ŋaa. Wʋtɩtɩɩ, ma nɛ tɩɩ kʋŋkala. 22 Ma nɛ tɩɩ Pɔɔl, a tɩɩ Apɔlɔs, a tɩɩ Pɩɩta, a tɩɩ dʋnɩa, a tɩɩ mɩɩsɩŋ, a tɩɩ sʋʋŋ ma, a tɩɩ lɛɛlɛ arɩ maachie. Ma nɛ tɩɩ ba kala. 23 Kirisito nɛ tɩɩma, Wɩa ma nɛ tɩɩ Kirisito. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.