1 Kɔrɩntɩ Nɩaa 2 - WƖA TENIŊ

Pɔɔl bʋl wɩaa a mʋ tɩgɛ Kirisito sɩ sʋʋ daagɛsɛ nyuŋ

¹ Mɩ naambiiriŋ, mɩ sɩ kɔ ma teeŋ dɩ mɩ bʋl Wɩa wʋzɔmɔ-la a pɩma, mɩ bɩ wʋduduosi bʋla a nagɛ mɩ kɛŋ wʋjɩmɩŋ.

² Mɩ sɩ kɔ ma teeŋ, mɩ joŋ mɩ tɩtɩa a nagɛ mɩ bɩ wɩɩkala jɩŋ nɛ, see Yesu Kirisito sɩ sʋʋ daagɛsɛ nyuŋ dʋndʋŋa wɩaa nɛ mɩ jɩŋ.

³ Ŋɩɩ wɩaa, mɩ sɩ hɛ ma teeŋ, mɩ fa nagɛ nɩpʋgʋ nɛ. Fawʋllʋŋ fa kɛmmɛ, mɩ chichel.

⁴ Nuhuobiine wʋjɩmɩŋ dee mɩ kaa bʋbʋl Wɩa wʋzɔmɔ-la, aŋ pɛ dɩdagɛ ma ma. Ama ŋɩɩ mɩ sɩɩ bʋl wɩaa daga arɩ Wɩa Dɩŋ-zɔmʋŋ doluŋ hɛ mɩ lɛ nɛ.

⁵ Wɩa ŋaa ŋɩɩ mɩ lɛ dɩ ma na ʋ doluŋ a laa ʋ wɩaa dii, aŋ sɩ́ nuhuobiine wʋjɩmɩŋ lɛ to.

Wɩa wʋjɩmɩŋ kɩɩ nuhuobiine wʋjɩmɩŋ

⁶ Ama nɩalɩŋ sɩ waa Wɩa wɩaa lɛ, la yie dɩdagɛba wʋjɩmɩŋ nɛ. Wʋjɩmɩŋ deeŋ la sɩɩ dagʋ tuo dʋnɩa deeŋ nɩaa wʋjɩmɩŋ, dʋnɩa deeŋ nɩduoruŋ wʋjɩmɩŋ ma dee. Nɩduoruŋ deemba wʋjɩmɩŋ jaŋ dɛrɛ.

⁷ Wʋjɩmɩɩ-la wɩaa mɩ sɩɩ bʋl, ʋ lɩɩ Wɩa teeŋ nɛ a ŋaa wʋfaalɩɩ nɩaa teeŋ. Wʋjɩmɩɩ-la faa nɛ Wɩa teeŋ, ka dʋnɩa-na suomi. Wɩa lɩɩsɛla dɩ la kɛŋ wʋjɩmɩŋ deeŋ nɛ a wuo kɛŋ tʋla ʋ teeŋ.

⁸ Nɩalɩŋ kala sɩɩ beŋ dʋnɩa deeŋ bɩ wɩaa deemba bʋbʋɔŋ jɩŋ. Dɩ ba nɛ fa jɩmba, ba fa bɩ jaŋ kpaasɛ La Tɩɩna sɩ kɛŋ tʋla a mɛrɛ daagɛsɛ nyuŋ.

⁹ Ba ŋmʋnsɛ Wɩa teniŋ tʋɔŋ a bʋl, “Kʋ-la nuhuobiine ha sɩ bɩ na, kʋ-la wɩaa ʋ ha sɩ bɩ nɩa, arɩ kʋ-la wɩaa ha sɩ bɩ nuhuobiine tʋɔbɩɩnaa jʋa, kɩalɩŋ tɩtɩa nɛ Wɩa wasa bil nɩalɩŋ sɩ chou lɛ.”

¹⁰ Ama Wɩa to ʋ Dɩŋ-zɔmʋŋ lɛ nɛ a kɛŋ wɩaa deemba fa sɩ faa kaa dagɛla. Wɩa Dɩŋ-zɔmʋŋ yie gbilli wɩɩkala nɛ, a paala jɩŋ Wɩa wɩɩ-wɩɩkala sɩ faa.

¹¹ Nuhuobiiŋ bɛɛ nɛ jaŋ wuo jɩŋ wɩɩ-la ʋ dɔŋɔ sɩɩ bɩɩnʋ? Nʋʋkala bɩ wuo jɩŋ, see ʋ tɩɩna tɩtɩa sɩɩ bɩɩnʋ wɩɩ-la. Ŋɩɩ tɩtɩa nɛ nʋʋkala bɩ jaŋ wuo jɩŋ wɩalɩŋ Wɩa sɩɩ bɩɩnʋ, see Wɩa Dɩŋ-zɔŋ-la dʋndʋŋa.

¹² La laa Wɩa Dɩŋ-zɔŋ-la nɛ. Ʋ tuo dʋnɩa deeŋ kʋŋ. Wɩa joŋ ʋ Dɩŋ-zɔŋ-la a pɩla nɛ dɩ la wuo jɩŋ kɩalɩŋ kala ʋ sɩ joŋo dii zile la lɛ.

¹³ La yie bʋl kɩaa deemba wɩaa a pɩ nɩaa nɛ. Dʋnɩa deeŋ wʋjɩmɩŋ dee la kaa bʋbʋl wɩaa. Ama Wɩa Dɩŋ-zɔŋ-la nɛ dagɛla ŋɩɩ la sɩ jaŋ bʋl wɩalɩŋ. Ʋ yie dagɛ ʋ tɩtɩa wɩaa bʋbʋɔŋ a pɩ nɩalɩŋ lɛ ʋ sɩ hɛ, dɩ ba ma jɩŋ ba bʋbʋɔŋ.

¹⁴ Nɩɩ-la kala sɩ bɩ Wɩa Dɩŋ-zɔmʋŋ kɛnɛ bɩ jaŋ laa kɩalɩŋ Wɩa sɩ joŋo pɩ nɩalɩŋ sɩ kɛŋ ʋ Dɩŋ-zɔŋ-la. Ʋ tɩɩna bɩ jaŋ wuo jɩmba. Ba yie ŋaa kʋpɛɩba nɛ ʋ teeŋ, bɛɛ wɩaa nʋʋ bɩ jaŋ wuo jɩmba, see dɩ ʋ kɛŋ Wɩa Dɩŋ-zɔŋ-la.

¹⁵ Nɩɩ-la sɩ kɛŋ Wɩa Dɩŋ-zɔŋ-la nɛ jaŋ wuo chagɩlɛ nʋʋkala a mʋ tɩgɛ wɩɩkala lɛ. Ama nɩɩ-la sɩ bɩ Wɩa Dɩŋ-zɔŋ-la kɛnɛ bɩ jaŋ wuo chagɩlɛ nɩɩ-la sɩ kɛŋ Wɩa Dɩŋ-zɔŋ-la.

¹⁶ Wɩa teniŋ tʋɔŋ ŋ-la nɛ ba ŋmʋnsɛ a pɩɛsɛ, “Kʋbɛɛ nɛ jɩŋ La Tɩɩna Wɩa tʋɔbɩɩnaa? Kʋbɛɛ nɛ jaŋ wuo bʋl wɩaa a chagɩlʋ?” Ama la-na jɩŋ Kirisito tʋɔbɩɩnaa nɛ.