1 Kɔrɩntɩ Nɩaa 16 - WƖA TENIŊ

Kɩalɩŋ la sɩ jaŋ joŋo pɩ la dɔnsʋŋ tɩŋŋaa sɩ laa Yesu wɩaa dii

¹ Lɛɛlɛ mɩɩ chɛ dɩ mɩ bʋl wɩaa a mʋ tɩgɛ moribie-la ma sɩɩ chɛ dɩ ma kɩɛsɛ, dɩ ba kaa mʋ pɩ Wɩa nɩalɩŋ sɩ hɛ Judiya tinteeŋ lɛ nɛ. Mɩ laa sɩpaaŋ dagɛ nɩalɩŋ sɩ laa Yesu wɩaa dii aa hilimi a hɛ Galiisia tinteeŋ lɛ, ŋɩɩ ba sɩ jaŋ ŋaa a kɩɛsɛ moribie-la. Ma ma ŋaa ŋɩɩ tɩtɩa.

² Lahadi chɛɛ na-kala, moribie-la ma kʋŋkala sɩ tɩma a na yɔbɔ-la tʋɔŋ, nʋʋkala lɩɩsɛ magɛ ŋɩɩ ʋ sɩɩ chɛ dɩ ʋ joŋo bil, a bil. Dɩ mɩ nɛ kɔ, ma bɩra bɩ jaŋ kɩkɩɛsɛ moribiee.

³ Dɩ mɩ nɛ kɔ, mɩ jaŋ ŋmʋnsɛ tenniŋ pɩ nɩalɩŋ ma sɩ lɩɩsa, dɩ ba pɛ kɛŋ ba dɩ ma moribie-la ma sɩ kɩɛsa mʋ pɩ nɩalɩŋ sɩ laa Yesu wɩaa dii a hɛ Jerusalɛm lɛ.

⁴ Dɩ ʋ nɛ maga dɩ mɩ ma mʋ, la kala jaŋ to dɔŋɔ mʋ.

Wɩalɩŋ Pɔɔl sɩɩ chɛ dɩ ʋ ŋaa

⁵ Mɩɩ chɛ dɩ mɩ kʋ to Masidoonia tinteeŋ nɛ a mʋ lee. Dɩ mɩ nɛ kʋ to lee-la, mɩ jaŋ kʋ nama.

⁶ Mɩ jaŋ kʋ hɛ ma teeŋ a dieni mʋa, kapo, mɩ jaŋ hɛ ma teeŋ dɩ waarɩŋ chɛnsɩŋ dɛrɛ, dɩ ma pɛ mɩ lɛ dɩ mɩ vɛŋ mɩ wombiiŋ, lee-la kala mɩ sɩɩ mʋ.

⁷ Mɩ bɩ chɛ dɩ mɩ kʋ nama aŋ parɩma kieli. Dɩ Wɩa nɛ sɛyɛ, mɩ cho dɩ mɩ dieni nɛ ma teeŋ.

⁸ Ama mɩ jaŋ hɔŋ Ɛfɛsɩs lɛ a mʋ yi gbieli-bal-la ba sɩɩ yɩrɛ Pɛntɩkɔs chɛɛŋ.

⁹ Wɩa pɩmɛ wombii-bal nɛ dɩ mɩ tɩŋ tɩntɩŋ zɔŋ daha, ka nɩalɩŋ sɩ bɩ chɛ dɩ mɩ tɩŋ tɩntɩŋŋaa daha yʋgɛ.

¹⁰ Dɩ Timoti nɛ kɔ ma teeŋ, má kɛnʋ woruŋ, dɩ ʋ sɩ́ wɩɩkala fá. Mɩ dɩ ʋ kala nɩɩ tɩŋ Wɩa tɩntɩmɩa-la.

¹¹ Má sɩ́ leŋe dɩ nʋʋkala bee gʋʋnʋ. Má pɛ ʋ lɛ dɩ ʋ vɛŋ wombiiŋ arɩ yarɩfɩɛlaa, aŋ mɩɩra kɔ mɩ teeŋ. Mɩɩ gbɛrɛ ʋ dɩ la naambiiri-la nɛ dɩ ba mɩɩra kɔ.

¹² Ma jɩŋ la naambie ba sɩɩ yɩrɛ Apɔlɔs nɛ. Mɩ bʋla pʋ woruŋ arɩ ʋ dɩ la naambiiri-la kʋ nama. Ama ʋ bɩ ʋ tɩtɩa kaa hɛ dɔŋɔ dɩ ʋ kɔ lɛɛlɛ. Ama dɩ ʋ na wombiiŋ, ʋ jaŋ kɔ.

Wʋkaanaa

¹³ Má pɔ, a chɩŋ wɩalɩŋ ma sɩ laa dii lɛ kpaŋ kpaŋ. Má kɛŋ bɔɩ-duoŋ a kɛŋ doluŋ Wɩa teeŋ.

¹⁴ Wɩɩkala ma sɩɩ ŋaa, má ŋaa arɩ chonuŋ.

¹⁵ Mɩ naambiiri, ma jɩŋ baal kʋbala ba sɩɩ yɩrɛ Sɩtɛfanas nɛ. Ʋ dɩ ʋ dɩa nɩaa nɛ laa sɩpaaŋ laa Wɩa wɩaa dii Akaaya tinteeŋ lɛ. Ba pɛ Wɩa nɩaa lɛ nɛ woruŋ, a joŋ ba tɩtɩa kala a hɛ ŋɩɩ lɛ. Mɩɩ sʋlma, mɩ naambiiri,

¹⁶ dɩ ma tuto nɩdosunuŋ deemba niiŋ. Má tuto Wɩa tɩntɩnnʋ-na kala niiŋ, arɩ nɩalɩŋ sɩɩ pɛ la lɛ la tɩtɩŋ.

¹⁷ Mɩ tʋɔŋ tɔrɔ woruŋ arɩ Sɩtɛfanas arɩ Fɔtʋnaatʋs arɩ Akaakɩs sɩ kɔ mɩ teeŋ. Ba nɛ laa ma nyuŋ daha.

¹⁸ Ba leŋe mɩ tʋɔŋ pɩŋ dɩ-bala nɛ. Ba jaŋ leŋ dɩ ma ma tʋɔŋ pɩŋ dɩ-bala. Ʋ maga dɩ ma zizil nɩdosunuŋ deemba nɛ.

¹⁹ Nɩalɩŋ sɩ laa Yesu wɩaa dii aa hilimi a hɛ Esia tinteeŋ lɛ, ba kala ka chʋɔlɛma. Baal-la ba sɩɩ yɩrɛ Akuila arɩ ʋ haala Pɩrɩsɩla, arɩ nɩalɩŋ sɩ laa Yesu wɩaa dii aa hilimi ba dɩa lɛ, baa chʋɔlɛma woruŋ La Tɩɩna Yesu yɩrɩŋ lɛ.

²⁰ Nɩalɩŋ kala sɩ laa Wɩa wɩaa dii a hɛ daha maa chʋɔlɛma. Má guori dɔŋɔ aŋ chʋɔlɛ dɔŋɔ kɩŋkɛŋ kɩŋkɛŋ.

²¹ Lɛɛlɛ, mɩ-na Pɔɔl, mɩ tɩtɩa nɛ ŋmʋnsa aa chʋɔlɛma.

²² Dɩ nʋʋkala nɛ bɩ La Tɩɩna Kirisito cho, Wɩa jaŋ kalɩba hɛ ʋ lɛ. Maranaata! Ʋ bʋbʋɔŋ nɛ, La Tɩɩna Kirisito kɔ!

²³ La Tɩɩna Yesu Kirisito lahɔrɩmɔ lɛ Wɩa jaŋ pɛ ma lɛ.

²⁴ Yesu Kirisito yɩrɩŋ lɛ, mɩ cho ma kala nɛ. Amɩɩ.