1 Kɔrɩntɩ Nɩaa 15 - WƖA TENIŊ

Yesu sɩ sii sʋʋŋ lɛ

¹ Mɩ naambiiri, mɩɩ chɛ dɩ mɩ liisima a mʋ tɩgɛ Wɩa wʋzɔmɔ-la mɩ sɩ bʋla pɩma. Ma laaba dii nɛ a chɩŋ ba lɛ.

² Wɩa wʋzɔmɔ-la nɛ jaŋ laama ta, dɩ ma nɛ kɛŋ wɩalɩŋ mɩ sɩ bʋla pɩma woruŋ. Má sɩ́ leŋe dɩ ʋ nagɛ arɩ wɩalɩŋ ma sɩ laa dii bɩ bʋbʋɔ kɛnɛ.

³ Wɩalɩŋ mɩ sɩ nɩa, ba nɛ mɩ bʋla pɩma. Wɩalɩŋ wʋnyuŋ nɛ ŋ-la, arɩ Yesu sʋʋ la wʋbɔŋŋɔɔ wɩaa nɛ, arɩ ba sɩ ŋmʋnsɛ ŋɩɩ Wɩa teniŋ tʋɔŋ.

⁴ Ʋ sɩ sʋʋ ŋɩɩ, ba joŋu hugi, ka ʋ sii sʋʋŋ lɛ tapʋlaa batori chɛɛŋ, arɩ ba sɩ ŋmʋnsɛ ŋɩɩ Wɩa teniŋ tʋɔŋ.

⁵ Ŋɩɩ nɛ ʋ laa sɩpaaŋ kɛŋ ʋ tɩtɩa kʋ dagɛ Pɩɩta, aŋ-na kɛŋ ʋ tɩtɩa kʋ dagɛ ʋ nanzɔɔba-la fii arɩ balɩa.

⁶ Ʋ ŋɩɩ harɩŋ lɛ ʋ kɛŋ ʋ tɩtɩa kʋ dagɛ ʋ harɩ-tooroo zɔɔ-banɔŋ arɩ daŋɩa bʋa bala lɛ. Nɩaa deemba dɔnsʋŋ ha hɛ ba mɩɩsɩŋ lɛ, ka dɔnsʋŋ ma sʋʋ.

⁷ Ŋɩɩ harɩŋ lɛ ʋ kɛŋ ʋ tɩtɩa kʋ dagɛ Jeems, a kɛŋ ʋ tɩtɩa kʋ dagɛ ʋ nanzɔɔba-la kala ma.

⁸ Ba kala harɩŋ lɛ nɛ ʋ kɛŋ ʋ tɩtɩa kʋ dagɛ mɩ ma. Mɩ-na paala nagɛ nɩɩ-la ba sɩ lʋla, aŋ ka ʋ lʋlʋŋ ha bɩ yie nɛ.

⁹ Yesu nanzɔɔba-la kala, mɩ nɛ paala ŋaa ba tʋɔŋ kʋbie. Ʋ paala bɩ maga dɩ ba kɛmmɛ kaa yɩrɛ Wɩa nanzɔɔ, bɛɛ wɩaa mɩ to naasɩŋ dɔgɩsɛ nɩalɩŋ sɩ laa Yesu wɩaa dii aa hilimi nɛ.

¹⁰ Ama Wɩa dii zile mɩ lɛ woruŋ. Ʋ nɛ leŋe mɩ ŋaa nʋʋ lɛɛlɛ, ʋ zile ma bɩ pɛɩ ŋaa, ama mɩ nɛ faasa tɩŋ kɩŋkɛŋ, a kɩɩ ba kala. Mɩ tɩtɩa doluŋ lɛ dee mɩ wuo tɩtɩŋ, ama Wɩa dol-la ʋ sɩ joŋo pɩmɛ nɛ tɩɩ.

¹¹ Wɩɩ-la sɩ ŋaa sɩɩfɩaŋ nɛ, Wɩa wʋzɔmɔ-la la sɩɩ bʋl. Wʋzɔmɔ-la ba sɩɩ bʋl, ba nɛ mɩ ma bʋbʋl, ba nɛ ma laa dii.

Ŋɩɩ Wɩa sɩ jaŋ chɩsɛ nɩaa sʋʋŋ lɛ

¹² Dɩ la nɛ bʋl Kirisito wɩaa arɩ ʋ sii sʋʋŋ lɛ nɛ, bɛɛ nɛ tɩɩ ma dɔnsʋŋ sɩ dɩ nuhuobiinee bɩ jaŋ sʋʋ aŋ bɩra sii sʋʋŋ lɛ?

¹³ Dɩ nɩaa nɛ bɩ jaŋ sʋʋ aŋ sii sʋʋŋ lɛ, ŋɩɩ-na Kirisito bɩ sʋʋŋ lɛ sie.

¹⁴ Dɩ Kirisito nɛ bɩ sʋʋŋ lɛ sie, wɩɩ-la la sɩ bʋla pɩma ŋaa wʋpɛɩba nɛ, ma sɩ laa wɩalɩŋ dii ma ŋaa pɛɩ nɛ.

¹⁵ Ʋ ŋɩɩ saa jaŋ nagɛ arɩ la nyɩɛ wɩaa pɩpɩ Wɩa nɛ, bɛɛ wɩaa la bʋla arɩ ʋ chɩsɛ Kirisito sʋʋŋ lɛ nɛ. Dɩ nɩaa nɛ bɩ jaŋ sʋʋ aŋ wuo sii sʋʋŋ lɛ, ŋɩɩ-na Wɩa bɩ Kirisito chɩsa.

¹⁶ Dɩ Wɩa nɛ bɩ jaŋ chɩsɛ nɩaa sʋʋŋ lɛ, ŋɩɩ-na ʋ bɩ Kirisito ma chɩsa sʋʋŋ lɛ.

¹⁷ Dɩ Wɩa nɛ bɩ Kirisito chɩsa sʋʋŋ lɛ, ŋɩɩ-na wɩɩ-la ma sɩ laa dii ŋaa pɛɩ nɛ, ma ha hɛ ma wʋbɔŋŋɔɔ lɛ nɛ.

¹⁸ Ʋ ŋɩɩ saa jaŋ dagɛ arɩ nɩalɩŋ sɩ laa Yesu wɩaa dii aŋ sʋʋ ma lɛlɛ nɛ.

¹⁹ Dɩ la yɩɛlaa sɩ hɛ Kirisito lɛ jaŋ dɛrɛ dʋnɩa deeŋ lɛ, ŋɩɩ-na la wɩɩŋ kɛŋ nenige kɩŋkɛŋ nɛ a kɩɩ dʋnɩa nɩaa kala.

²⁰ Ama wʋtɩtɩɩ nɛ, Wɩa chɩsɛ Kirisito sʋʋŋ lɛ nɛ. Ʋ ŋɩɩ daga arɩ nɩalɩŋ Wɩa sɩ jaŋ chɩsɛ sʋʋŋ lɛ, Kirisito nɛ nɩɩ-la Wɩa laa sɩpaaŋ chɩsɛ sʋʋŋ lɛ.

²¹ Nɩbala lɛ nɛ sʋʋŋ to jʋʋ dʋnɩa. Ŋɩɩ tɩtɩa nɛ nɩbala ma lɛ nɛ nɩaa jaŋ to a sii sʋʋŋ lɛ.

²² Adam wɩaa nɛ tɩɩ nɩaa sʋsʋʋ. Ŋɩɩ tɩtɩa nɛ a tɩŋ Kirisito ma wɩaa, nɩaa jaŋ kɛŋ mɩɩsɩŋ.

²³ Ama la kala kɛŋ bʋa-la lɛ Wɩa sɩ jaŋ chɩsɛla sʋʋŋ lɛ nɛ. Kirisito nɛ Wɩa laa sɩpaaŋ chɩsɛ sʋʋŋ lɛ. Dɩ ʋ nɛ mɩɩra kɔ, nɩalɩŋ sɩ ŋaa ʋ nɩaa, Wɩa jaŋ chɩsɛ ba ma sʋʋŋ lɛ.

²⁴ Ŋɩɩ harɩŋ nɛ dʋnɩa dɩdɛrɩŋ jaŋ yi. Kirisito jaŋ yuo dii kɩalɩŋ kala sɩɩ dii doluŋ dʋnɩa lɛ arɩ dol-bɔmɔ-la kala sɩ hɛ nɩmɛ, aŋ joŋ kuorii-la a hɛ ʋ Nyɩmma Wɩa nɩsɩŋ lɛ.

²⁵ Ama ʋ maga dɩ Kirisito dii kuoruŋ, aŋ-na yuo dii ʋ dʋndɔŋŋɔɔ kala, a kɛmba nyaga bil ʋ naasɩŋ bʋbʋɔŋ.

²⁶ Ʋ dʋndɔŋ-la ʋ sɩ jaŋ to harɩŋ yuo dii nɛ ŋaa sʋʋŋ.

²⁷ Wɩa teniŋ tʋɔŋ ba bʋla arɩ Wɩa joŋ kʋŋkala a hɛ Kirisito nɩsɩŋ lɛ nɛ. Dɩ ba nɛ bʋla Wɩa teniŋ tʋɔŋ arɩ Wɩa joŋ kʋŋkala a hɛ Kirisito nɩsɩŋ lɛ nɛ, ʋ bɩ naga arɩ la Nyɩmma Wɩa ma hɛ ʋ nɩsɩŋ lɛ nɛ.

²⁸ Dɩ Wɩa nɛ joŋ kʋŋkala a hɛ Kirisito nɩsɩŋ lɛ, ʋ ŋɩɩ harɩŋ lɛ, Kirisito ma jaŋ joŋ ʋ tɩtɩa a hɛ Wɩa nɩsɩŋ lɛ, nɩɩ-la sɩ joŋ kʋŋkala hɛ ʋ nɩsɩŋ lɛ, dɩ Wɩa kɛŋ kʋŋkala doluŋ.

²⁹ Dɩ nɩaa nɛ sʋba aŋ bɩ jaŋ sii sʋʋŋ lɛ, bɛɛ nɛ tɩɩ nɩaa yie chɩŋ nɩalɩŋ sɩ sʋba nyuŋ lɛ a ŋaa ba foba Wɩɩchʋɔlɛ lɩɩŋ? Dɩ sʋʋŋ lɛ siiniŋ nɛ paala tuo, bɛɛ nɛ tɩɩ nɩaa yie chɩŋ nɩalɩŋ sɩ sʋba nyuŋ lɛ ba foba Wɩɩchʋɔlɛ lɩɩŋ?

³⁰ Bɛɛ nɛ tɩɩ la nɩna hɛɛŋ bʋa na-kala lɛ?

³¹ Mɩ naambiiri, bʋa na-kala lɛ mɩ dɩ sʋʋŋ ka loo nɛ. La kala sɩ kɛŋ mɩɩsɩŋ La Tɩɩna Yesu Kirisito lɛ ŋɩɩ, mɩ jaŋ wuo bigisi mɩ tɩtɩa lɛ a tɩŋ ma wɩaa.

³² La sɩ mʋ Ɛfɛsɩs, nɩaa hoso arɩ baga kɩaa sɩ hoso ŋɩɩ nɛ, a faa chɛ dɩ ba kpʋmɛ. Dɩ mɩ nɛ fa yuo yuosuŋ deeŋ dɩ mɩ laa yɩrɩŋ koo kɩaa nɩaa teeŋ, ʋ bʋbʋɔŋ nɛ bɛɛ? Dɩ Wɩa nɛ bɩ jaŋ chɩsɛ nɩaa sʋʋŋ lɛ, ŋɩɩ-na má leŋ dɩ la dii kɩaa aŋ nyʋa kʋnyʋalaa, bɛɛ wɩaa chie la jaŋ sʋʋ.

³³ Ama ma sɩ́ ma tɩtɩa nyɩsʋ. Dɩ ŋ nɛ ŋaa nɩzɔŋ aŋ tuto nɩbɔŋŋɔɔ harɩŋ, ŋ ma jaŋ kʋ ŋaa nɩbɔŋ.

³⁴ Má sii doŋ lɛ aŋ leŋ wʋbɔŋŋɔɔ ŋaanɩŋ. Ma dɔnsʋŋ wʋŋaalaa naga arɩ ma bɩ Wɩa jɩŋ, mɩ bʋl ŋɩɩ dɩ hɩɩsɩŋ kɛmma nɛ.

Yarɩ-zɔmɔ-la la sɩ kaa sii sʋʋŋ lɛ

³⁵ Nɩa dɔŋɔ jaŋ pɩɛsɛ, dɩ ɛɛ nɛ nɩalɩŋ sɩ sʋba jaŋ wuo ŋaa a sii sʋʋŋ lɛ? Dɩ yarɩ bɛɛba nɛ ba jaŋ kɛŋ?

³⁶ Nɩɩ-la sɩ pɩɛsɛ wɩɩŋ deeŋ ŋaa nɩyaarɩ nɛ. Dɩ ŋ nɛ joŋ kʋdoho a duu, ʋ bɩ jaŋ nyʋ kʋfalɩŋ, see kʋ-la ŋ sɩ joŋo duu laa sɩpaaŋ pʋa.

³⁷ Dɩ ŋ nɛ joŋ kuorimiiŋ koo mɩɩ-biiŋ a duu, nyʋʋlɩɩ-la bɩ bii-la ŋ sɩ joŋo duu wuo nagɛ.

³⁸ Wɩa nɛ yie leŋ kʋdoho-la nyʋ a nagɛ ŋɩɩ ʋ sɩɩ chɛ. Kʋdoho na-kala yie nyʋ a nagɛ ʋ nagɩsɩŋ nɛ.

³⁹ Kɩalɩŋ kala sɩ hɛ dʋnɩa lɛ a kɛŋ mɩɩsɩŋ, ba nammɩa bɩ kʋbala ŋaa. Nuhuobiinee arɩ pʋsʋŋ arɩ diibiisiŋ arɩ chenfilee nammɩa bɩ kʋbala ŋaa.

⁴⁰ Kɩalɩŋ sɩ hɛ wɩa-nyuŋ nagɩsɩŋ arɩ kɩalɩŋ sɩ hɛ tinteeŋ nagɩsɩŋ, ba zɔmʋŋ bɩ dɔŋɔ naga. Wɩa-nyuŋ kɩaa kɛŋ ba tʋla nɛ, tinteeŋ kɩaa ma kɛŋ ba tʋla.

⁴¹ Wɩɩpɔsʋŋ kɛŋ ʋ pʋlʋmʋŋ nɛ, chɛnɛ ma kɛŋ ʋ pʋlʋmʋŋ, ka chɛnwʋlaa ma kɛŋ ba pʋlʋmʋŋ. Chɛnwʋlaa ma tʋɔŋ, dɔnsʋŋ ma pʋlla nɛ a kɩɩ dɔnsʋŋ.

⁴² Ŋɩɩ tɩtɩa nɛ ʋ nagɛ dɩ nɩaa nɛ sii sʋʋŋ lɛ. Yara-la ba sɩ joŋo hugi jaŋ pʋa, yara-la ʋ sɩ jaŋ kaa sii sʋʋŋ lɛ bɩ jaŋ kɔ dɩ ʋ pʋa.

⁴³ Yara-la ba sɩ jaŋ joŋo hugi lɔrɔ nɛ. Dɩ ʋ nɛ sii sʋʋŋ lɛ, ʋ jaŋ kɛŋ tʋla. Yara-la ba sɩ joŋo hugi pʋgʋma nɛ, dɩ ʋ nɛ sii sʋʋŋ lɛ, ʋ jaŋ kɛŋ doluŋ.

⁴⁴ Yara-la ba sɩ jaŋ joŋo hugi nɛ la kɛŋ dʋnɩa deeŋ lɛ ŋɩɩ. Ama yara-la sɩ jaŋ sii sʋʋŋ lɛ ŋaa yara-la Wɩa wiese-la ʋ sɩ jaŋ joŋo pɩla nɛ. Dɩ la nɛ kɛŋ dʋnɩa deeŋ yaraa, ʋ maga dɩ la kɛŋ Wɩa jaŋ yaraa ma nɛ.

⁴⁵ Wɩa teniŋ tʋɔŋ ba ŋmʋnsa, “Nuhuobiiŋ-la Wɩa sɩ bumo ŋaa yɩrɩŋ nɛ Adam. Ŋɩɩ nɛ Wɩa wiese hɛ ʋ lɛ ʋ kɛŋ mɩɩsɩŋ.” Adam-la sɩ to harɩŋ kɔ nɛ ŋaa Wɩa wiese-la sɩɩ pɩ nɩaa mɩɩsɩŋ.

⁴⁶ Ʋ bɩ naga Wɩa wiese-la ʋ sɩ joŋo hɛ la lɛ nɛ laa sɩpaaŋ kɔ, ama yara-la la sɩ kɛnɛ dʋnɩa deeŋ lɛ nɛ laa sɩpaaŋ kɔ, ka Wɩa wiese-la ʋ sɩ joŋo hɛ la lɛ ma to harɩŋ kɔ.

⁴⁷ Nuhuobiiŋ bumbuŋ-la, dʋnɩa tɩarɩŋ nɛ Wɩa lɔgɛ mɛʋ. Nɩɩ-la sɩ to harɩŋ kɔ-na lɩɩ Wɩa-jaŋ nɛ.

⁴⁸ Ba sɩ lɔgɛ tɩarɩŋ a mɛ Adam ŋɩɩ, ŋɩɩ tɩtɩa nɛ nɩalɩŋ kala ma sɩ lɩɩ Adam lɛ ŋaa tɩarɩŋ. Kirisito sɩ lɩɩ Wɩa-jaŋ kʋ tuu ŋɩɩ, ŋɩɩ tɩtɩa nɛ nɩalɩŋ ma sɩ lɩɩ ʋ lɛ ma nagɛ ʋ-na nɩɩ-la sɩ lɩɩ Wɩa-jaŋ.

⁴⁹ La sɩ kɛŋ nɩɩ-la ba sɩ kɛŋ tɩarɩŋ mɛ nagɩsɩŋ ŋɩɩ, ŋɩɩ tɩtɩa nɛ la jaŋ kɛŋ nɩɩ-la sɩ lɩɩ Wɩa-jaŋ ma nagɩsɩŋ.

⁵⁰ Mɩ naambiiriŋ, wɩɩ-la mɩ sɩɩ chɛ dɩ mɩ bʋl nɛ ŋ-la: Yara-la ba sɩ kɛŋ tɩarɩŋ mɛ bɩ jaŋ wuo hɛ Wɩa kuorii-la tʋɔŋ. Yara-la ma sɩɩ pʋa bɩ jaŋ wuo hɛ nɩmɛ deeŋ deeŋ a nagɛ yara-la sɩ bɩ pʋa.

⁵¹ Má jegile nɩɩ, mɩ jaŋ bʋl wʋkpuŋkpere pɩma. La kala bɩ jaŋ sʋʋ. Ama bʋa kʋbala jaŋ kɔ dɩ Wɩa kɛŋ la yaraa kala bɩrɩmɛ.

⁵² Wɩɩŋ deeŋ jaŋ guu ŋaa a nagɛ duonuŋ sɩ lɩgɩsa. Dɩ bʋa-la nɛ yie, Wɩa tɩndaara jaŋ ŋmʋʋ ʋ nyile. Dɩ ʋ nɛ ŋmʋʋ nyile-la, nɩalɩŋ kala sɩ laa Yesu wɩaa dii aŋ sʋʋ jaŋ sii a wei. Ba bɩra bɩ jaŋ sʋʋ. La nɩalɩŋ sɩ hɛ la mɩɩsɩŋ deeŋ lɛ aŋ bɩ sʋba ma, Wɩa jaŋ kɛŋ la yaraa bɩrɩmɛ dɩ ba sɩ pʋa.

⁵³ Wɩa jaŋ kɛŋ yara-la sɩɩ pʋa kaa bɩrɩmɛ dɩ ba bɩra sɩ́ pʋa. Ŋɩɩ tɩtɩa nɛ la yara-la ma sɩɩ sʋʋ, ʋ jaŋ kɛmba kaa bɩrɩmɛ, dɩ ba sɩ́ sʋʋ.

⁵⁴ Dɩ la yara-la sɩɩ pʋa nɛ dɩ ʋ ŋaa dɩ ba bɩra bɩ pʋa, dɩ la yara-la ma sɩɩ sʋʋ bɩra bɩ sʋʋ, ŋɩɩ daga arɩ wɩalɩŋ ba sɩ ŋmʋnsa Wɩa teniŋ tʋɔŋ sɛnɛ kʋ ŋaa wʋtɩtɩɩ nɛ. Ba bʋla, “La yuo dii sʋʋŋ nɛ.

⁵⁵ Sʋʋŋ, ŋ doluŋ hɛ nɩɩ? Sʋʋŋ, nɩɩ nɛ ŋ huoŋ hɛ dɩ ŋ wuo jʋʋ nɩaa lɛ dɩ ba na hɛɛŋ?”

⁵⁶ Sʋʋŋ huoŋ nɛ wʋbɔŋŋɔɔ ŋaanɩŋ. Wʋbɔŋŋɔɔ ma doluŋ lɩɩ wɩalɩŋ Wɩa sɩ joŋo bil la lɛ dɩ la tuto lɛ nɛ.

⁵⁷ Ama má leŋ la lɔllɛ la Nyɩmma Wɩa, ʋ sɩ to La Tɩɩna Yesu Kirisito lɛ a pɩla doluŋ la wuo yuo dii sʋʋŋ.

⁵⁸ Ŋɩɩ wɩaa mɩ naambiiriŋ, má chɩŋ wɩalɩŋ ma sɩ laa dii lɛ kpaŋ kpaŋ. Má sɩ́ leŋe dɩ kʋŋkala kɛmma begili. Má fɩɛsɛ sɩɩŋ a tɩŋ La Tɩɩna tɩntɩŋŋaa woruŋ. Ma jɩma arɩ Wɩa tɩntɩmɩɩ-la ma sɩɩ tɩŋ bɩ jaŋ kɔ dɩ ʋ ŋaa pɛɩ.