1 Kɔrɩntɩ Nɩaa 14 - WƖA TENIŊ

Kɩalɩŋ Wɩa Dɩŋ-zɔmʋŋ sɩ joŋo dii zile la lɛ kʋkaanɩŋ

¹ Má kʋŋkala fɩɛsɛ sɩɩ a chɩchɛ ŋɩɩ ma sɩ jaŋ wuo ŋaa a cho nɩaa, a fɩɛsɛ sɩɩŋ ma a chɩchɛ kɩalɩŋ Wɩa Dɩŋ-zɔmʋŋ sɩ joŋo didii zile nɩaa lɛ, a wasanyaŋ kʋ-la ʋ sɩ jaŋ joŋo pɩma dɩ ma wuo bʋbʋl Wɩa wɩaa, ʋ Dɩŋ-zɔmʋŋ doluŋ lɛ.

² Dɩ nʋʋ nɩɩ bʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, ʋ tɩɩna bʋl wɩalɩŋ a pɩpɩ Wɩa nɛ, nuhuobiine dee. Ʋ sɩɩ bʋl yikoro-la nʋʋkala bɩ nɩɩ, ama Wɩa Dɩŋ-zɔŋ-la sɩ hɛ ʋ lɛ nɛ tɩɩ ʋ wuo bʋbʋl wʋkpuŋkperisiŋ deemba.

³ Ama nɩɩ-la sɩɩ bʋl Wɩa wɩaa ʋ Dɩŋ-zɔŋ-la doluŋ lɛ, ʋ bʋl wɩalɩŋ a pɩpɩ nɩaa nɛ. Ʋ yie pɛ ba lɛ a leŋ ŋɩɩ ba sɩ laa Wɩa dii pʋŋa pa, a leŋ ba nyuŋ nyaasɛ Wɩa wɩaa lɛ, a leŋ ba tʋɔŋ ma tɔrɛ.

⁴ Dɩ nʋʋ nɩɩ bʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, ʋ tɩɩna bʋla pɩpɛ ʋ tɩtɩa lɛ nɛ. Ama nɩɩ-la sɩɩ bʋl Wɩa wɩaa ka pɛ nɩalɩŋ sɩ laa Yesu wɩaa dii a hihilimi lɛ nɛ.

⁵ Ŋɩɩ wɩaa mɩ fa cho dɩ ma kala bʋbʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl nɛ, ama wɩɩ-la mɩ sɩ faasa cho nɛ dɩ ma wuo bʋbʋl Wɩa wɩaa. Nɩɩ-la sɩɩ bʋl Wɩa wɩaa, ʋ Dɩŋ-zɔmʋŋ doluŋ lɛ nɛ kɩɩ nɩɩ-la sɩɩ bʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, see dɩ nʋʋ hɛ nɩmɛ sɩ jaŋ wuo dagɛ wɩalɩŋ ʋ sɩɩ bʋl bʋbʋɔŋ a pɩ nɩalɩŋ kala sɩ laa Yesu wɩaa dii aa hilimi, dɩ ŋɩɩ wuo pɛ ba lɛ.

⁶ Mɩ naambiiriŋ, dɩ mɩ nɛ kɔ ma teeŋ a bʋbʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, ɛɛ nɛ mɩ jaŋ ŋaa a pɛ ma lɛ? Mɩ bɩ jaŋ wuo pɛ ma lɛ, see dɩ mɩ bʋl wɩɩ-la Wɩa sɩ joŋo dagɛmɛ a pɩma, koo dɩ mɩ jɩŋ wɩɩ a kaa kʋ dagɛma Wɩa doluŋ lɛ, koo dɩ mɩ nɛ bʋl wɩaa Wɩa Dɩŋ-zɔmʋŋ doluŋ lɛ, koo dɩ mɩ joŋ Wɩa wɩɩ dɔŋ a dagɛma ʋ doluŋ lɛ.

⁷ Dɩ kɩalɩŋ ba sɩ kaa gbigbieli, ŋmʋlʋŋ arɩ cheŋ, dɩ ba nɛ bɩ woruŋ du hɛ dɔŋɔ lɛ, kɩalɩŋ bɩ dɩgɩlɩŋ ka kɛŋ.

⁸ Dɩ ba nɩɩ du pampam tʋa, dɩ ba nɛ bɩ ʋ dunuŋ duo, nʋʋkala bɩ jaŋ wuo jɩŋ arɩ wɩɩ nɛ ŋaa ba yɩyɩrɛ nɩaa.

⁹ Ŋɩɩ tɩtɩa nɛ ʋ nagɛ, dɩ ŋ nɛ bʋl wɩɩ nɩaa sɩ bɩ nɩɩ, ɛɛ nɛ ba jaŋ wuo jɩŋ wɩɩ-la ŋ sɩɩ bʋl bʋbʋɔŋ? Ŋ jaŋ ta ŋɩŋaa goŋ nɛ.

¹⁰ Yikorusuŋ yʋga nɛ dʋnɩa lɛ, ama ba kʋŋkala tuo dɩ ʋ bɩ bʋbʋɔŋ kɛnɛ.

¹¹ Dɩ nʋʋ nɩɩ bʋl wɩaa yikoro-la lɛ mɩ sɩ bɩ nɩɩ, mɩ jaŋ nagɛ nʋhʋɔrʋ ʋ teeŋ, ka nɩɩ-la ma sɩɩ bʋl wɩaa mɩ teeŋ ma nagɛ nʋhʋɔrʋ mɩ teeŋ.

¹² Ŋɩɩ wɩaa, ma sɩ cho dɩ ma kɛŋ kɩalɩŋ kala Wɩa Dɩŋ-zɔmʋŋ sɩ joŋo dii zile ma lɛ ŋɩɩ, má hɛ doluŋ aŋ chɛ kɩalɩŋ sɩ jaŋ leŋ dɩ ma kɛŋ doluŋ a pɛ nɩalɩŋ sɩ laa Yesu wɩaa dii aa hilimi lɛ, dɩ ba chɩŋ wɩalɩŋ ba sɩ laa dii lɛ kpaŋ kpaŋ.

¹³ Ŋɩɩ wɩaa nɩɩ-la sɩɩ bʋl wɩaa yikoro-la Wɩa Dɩŋ-zɔŋ-la sɩ pɛ nɩaa lɛ ba bʋbʋl, ʋ tɩɩna maga dɩ ʋ sʋl Wɩa dɩ ʋ wuo leŋ dɩ ʋ wuo dɩdagɛ wɩalɩŋ bʋbʋɔŋ ma nɛ.

¹⁴ Dɩ mɩ nɩɩ chʋɔlɛ Wɩa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl lɛ, mɩ dɩma nɛ yie chʋchʋɔlɛ, ama mɩ tʋɔbɩɩnaa lɛ mɩ bɩ wɩɩ-la mɩ sɩɩ bʋl bʋbʋɔŋ jɩŋ.

¹⁵ Wʋbɛɛ nɛ saa maga dɩ mɩ ŋaa? Mɩ jaŋ kɛŋ mɩ dɩma arɩ mɩ tʋɔbɩɩnaa kala kaa chʋchʋɔlɛ Wɩa, aŋ kɛŋ ba kala ma kaa yɩyɩɩ yɩɩlaa.

¹⁶ Dɩ ma nɛ kʋ hilimi, aŋ ka dɩ nʋʋ kɛŋ yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl a dɩdɛnnɛ Wɩa, nɩalɩŋ sɩ hɔŋ nɩmɛ sɩ bɩ wɩɩ-la ŋ sɩɩ bʋl nɩa, dɩ ŋ nɛ chʋɔla dɛrɛ, ɛɛ nɛ ba jaŋ ŋaa jɩŋ wɩɩ-la bʋbʋɔŋ a bʋl Amɩɩ?

¹⁷ Ʋ ŋaa wʋtɩtɩɩ nɛ, nʋʋ jaŋ wuo dɛnnɛ Wɩa woruŋ arɩ yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, ama dɩ nʋʋ nɛ ŋaa ŋɩɩ, ʋ bɩ nɩalɩŋ sɩ hilime lɛ wuo pɩpɛ.

¹⁸ Mɩɩ lɔllɛ Wɩa arɩ mɩ sɩ wuo bʋbʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl a kɩɩ ma kʋŋkala.

¹⁹ Ama dɩ la nɛ kʋ hilimi a chʋchʋɔlɛ Wɩa, mɩ jaŋ cho dɩ mɩ kɛŋ mɩ tʋɔbɩɩnaa bʋl wɩaa baŋmɛnɛ dɩ nɩaa jɩŋ ba bʋbʋɔŋ, a kɩɩ mɩ sɩ jaŋ bʋl wɩaa yʋgɛ yikoro-la nɩaa sɩ bɩ nɩɩ lɛ.

²⁰ Mɩ naambiiriŋ, má sɩ́ wɩaa bɩɩnʋ a nagɛ hambiisiŋ sɩɩ bɩɩnɛ ŋɩɩ. Ma wʋŋaalaa lɛ, má nagɛ bii-mulluŋ sɩ bɩ wʋbɔŋŋɔɔ jɩŋ, ama má bɩbɩɩnɛ wɩaa a nagɛ kʋhɩasɩŋ sɩɩ bɩɩnɛ ŋɩɩ.

²¹ Ba ŋmʋnsɛ Wɩa teniŋ tʋɔŋ arɩ Wɩa sɩ ʋ jaŋ to nɩalɩŋ sɩɩ bʋl yikori-tanɩa arɩ nʋhʋɔraa lɛ a bʋl wɩaa pɩ ʋ nɩaa, arɩ ŋɩɩ ma kala ba bɩ jaŋ jegile nɩɩ ʋ teeŋ.

²² Ŋɩɩ wɩaa, Wɩa leŋe ʋ Dɩŋ-zɔmʋŋ pɛ nɩaa lɛ ba wuo bʋbʋl wɩaa yikorusuŋ dɔnsʋŋ lɛ, dɩ ʋ ŋaa Wɩa doluŋ wʋmagɩl a pɩ nɩalɩŋ sɩ bɩ Wɩa wɩaa laa dii. Nɩalɩŋ sɩ laa Wɩa wɩaa dii, wɩɩŋ deeŋ bɩ magɩl ŋaa ba teeŋ. Dɩ nʋʋ ma nɛ bʋl Wɩa wɩaa, ʋ Dɩŋ-zɔmʋŋ doluŋ lɛ, ʋ ŋaa magɩl nɛ a pɩ nɩalɩŋ sɩ laa Wɩa wɩaa dii. Ʋ bɩ magɩl ŋaa a pɩ nɩalɩŋ sɩ bɩ Wɩa wɩaa laa dii.

²³ Ŋɩɩ wɩaa, dɩ nɩalɩŋ sɩ laa Yesu wɩaa dii nɛ kʋ hilimi, dɩ ba kʋŋkala bʋbʋl wɩaa yikoro-la Wɩa Dɩŋ-zɔmʋŋ sɩ pɛ ba lɛ ba bʋbʋl, dɩ nɩwogusuŋ koo nɩalɩŋ sɩ bɩ Wɩa wɩaa laa dii nɛ hɛ ba tʋɔŋ, ba jaŋ bɩɩnɛ arɩ ma nyuŋ tuo.

²⁴ Ama dɩ ma kala nɛ bʋl Wɩa wɩaa ʋ Dɩŋ-zɔmʋŋ doluŋ lɛ, dɩ nɩɩ-la sɩ bɩ Wɩa wɩaa laa dii koo dɩ nɩwogo nɛ hɛ ma tʋɔŋ, ʋ jaŋ sɛnɛ jɩŋ arɩ ʋ ŋaa wʋbɔŋ ŋaarʋ nɛ. Wɩalɩŋ ma sɩ bʋla jaŋ jʋʋ-ʋ lɛ dɩ ʋ na arɩ ʋ cheye nɛ.

²⁵ Wɩalɩŋ kala sɩ hɛ ʋ tʋɔŋ lɛ jaŋ kʋ lɩɩ pʋlʋmʋŋ Wɩa sɩpaaŋ. Ŋɩɩ nɛ ʋ jaŋ tuu kpirimi Wɩa sɩpaaŋ a chʋɔlʋ, a bʋl arɩ wʋtɩtɩɩ, Wɩa hɛ ma teeŋ nɛ.

Wombii-la sɩ maga dɩ nɩalɩŋ sɩ laa Yesu wɩaa dii to chʋɔlɛ Wɩa

²⁶ Wɩalɩŋ kala mɩ sɩ bʋla, ba bʋbʋɔŋ nɛ ŋ-la: Dɩ ma nɛ kʋ hilimi-na kala, dɩ dɔŋɔ nɛ kɛŋ yɩɩlɩŋ dɩ ʋ yɩɩ, dɩ dɔŋɔ ma kɛŋ wɩɩ dɩ ʋ dagɛ nɩaa, koo nʋʋ nɩɩ chɛ dɩ ʋ bʋl wɩɩ-la Wɩa sɩ joŋo dagʋ ʋ doluŋ lɛ, dɔŋɔ maa chɛ dɩ ʋ bʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl, dɔŋɔ maa chɛ dɩ ʋ dagɛ wɩɩ-la ba sɩ bʋla bʋbʋɔŋ, má maga ma ŋaa wɩaa deemba kala a pɩpɛ dɔŋɔ lɛ.

²⁷ Dɩ nɩaa dɔnsʋŋ nɩɩ chɛ dɩ ba bʋl wɩaa yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl lɛ, ʋ maga dɩ ba ŋaa balɩa koo batori a bʋl kʋŋ kʋŋ, ka dɩ nʋʋ ma hɛ nɩmɛ aa dagɛ wɩalɩŋ ba sɩ bʋla bʋbʋɔŋ.

²⁸ Ama dɩ nʋʋ nɛ tuo dɩ ʋ laa wɩalɩŋ bʋl aŋ dagɛ ba bʋbʋɔŋ, ʋ maga dɩ nɩɩ-la sɩ bʋl wɩalɩŋ yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl lɛ, dɩ ʋ tɔrɛ ʋ niiŋ nɛ, aŋ munso bʋl wɩalɩŋ a pɩpɩ Wɩa arɩ ʋ tɩtɩa.

²⁹ Dɩ nɩaa nɛ hɛ ma tʋɔŋ aa bʋl Wɩa wɩaa Wɩa Dɩŋ-zɔŋ-la doluŋ lɛ, má leŋ dɩ ba ŋaa balɩa koo batori a bʋbʋl wɩalɩŋ, aŋ ka dɩ ma kʋkaanaa ma kɛŋ wɩalɩŋ ba sɩ bʋla kaa chɔ naa.

³⁰ Dɩ Wɩa nɛ joŋ wɩɩ dagɛ ma nɩalɩŋ sɩ hilime tʋɔŋ dɔŋɔ dɩ ʋ bʋla pɩma, nɩɩ-la sɩɩ bʋl wɩaa maga ʋ tɔrɛ ʋ niiŋ ka dɩ ʋ bʋl wɩɩ-la.

³¹ Ma kala jaŋ wuo bʋl Wɩa wɩaa, Wɩa Dɩŋ-zɔŋ-la doluŋ lɛ, kʋŋ kʋŋ a dagɛ dɔŋɔ dɩ ma nyuŋ nyaasɛ.

³² Nɩɩ-la sɩɩ bʋl Wɩa wɩaa, ʋ Dɩŋ-zɔmʋŋ doluŋ lɛ maga dɩ ʋ wuo kɛŋ ʋ tɩtɩa a mʋ tɩgɛ wɩalɩŋ ʋ sɩɩ bʋl lɛ,

³³ bɛɛ wɩaa Wɩa bɩ chɛ dɩ maa ŋaa wɩaa vʋgʋma vʋgʋma, ama ʋʋ chɛ dɩ la wɩaa vɩvɛŋ woruŋ nɛ. Nɩalɩŋ sɩ laa Yesu wɩaa dii aa hilimi tʋɔŋ lee-na kala,

³⁴ ʋ bɩ maga dɩ haalaa bʋbʋl wɩaa. Ʋ maga dɩ ba tɔrɛ ba niiŋ aŋ tuto baalaa niiŋ nɛ, arɩ wɩalɩŋ Mosis sɩ ŋmʋnsa bil dɩ ba tuto sɩ dagɛ ŋɩɩ.

³⁵ Dɩ wɩɩ ma nɛ hɛ nɩmɛ a maga dɩ ba jɩŋ, ʋ maga dɩ ba pɩɛsɛ ba balaba nɛ dɩa lɛ. Ʋ ŋaa hɩɩsɩŋ nɛ dɩ Wɩa nɩaa nɛ hilime, dɩ haalaa bʋl wɩaa hɩhɛ.

³⁶ Ma lɛ nɛ Wɩa wɩaa suomi? Koo ma dʋndʋŋa nɛ ba bʋl Wɩa wɩaa pa?

³⁷ Dɩ nʋʋ nɛ bɩɩna arɩ ʋ ŋaa Wɩa wʋlaabʋllʋ nɛ koo dɩ ʋ kɛŋ kɩalɩŋ Wɩa Dɩŋ-zɔŋ-la sɩ joŋo dii zile la lɛ, ʋ maga dɩ ʋ tɩɩna jɩŋ arɩ wɩɩŋ deeŋ mɩ sɩɩ bʋl lɩɩ Wɩa teeŋ nɛ.

³⁸ Dɩ nʋʋ nɛ bɩ chɛ dɩ ʋ sɛɩ wɩɩŋ deeŋ, má yʋ ʋ wɩaa.

³⁹ Ŋɩɩ wɩaa mɩ naambiiriŋ, má fɩɛsɛ sɩɩŋ a chɩchɛ dɩ ma wuo bʋbʋl Wɩa wɩaa ʋ Dɩŋ-zɔmʋŋ doluŋ lɛ, aŋ sɩ́ ma dɔnsʋŋ tɩŋŋaa kiru dɩ ba sɩ́ wɩaa bʋl yikoro-la Wɩa Dɩŋ-zɔmʋŋ sɩ pɛ nɩaa lɛ ba bʋbʋl.

⁴⁰ Ʋ maga dɩ ma ŋaa wɩɩkala ʋ bʋa lɛ, dɩ ʋ ŋaa dee dee.