1 Kɔrɩntɩ Nɩaa 13 - WƖA TENIŊ

Chonuŋ nɛ kɩɩ kʋŋkala

¹ Dɩ mɩ nɛ wuo bʋbʋl yikoro-na kala a wuo bʋbʋl Wɩa tɩndaaraa ma yikoro, aŋ bɩ nɩaa cho, ʋ nagɛ bimbelimiŋ nɛ mɩ ŋmuŋmoo ŋɩɩ a ŋɩŋaa goŋ pɛɩ.

² Dɩ Wɩa Dɩŋ-zɔmʋŋ nɛ pɩmɛ doluŋ dɩ mɩ wuo bʋbʋl Wɩa wɩaa, a wuo jɩŋ wʋfaalɩɩ kala bʋbʋɔŋ, a kɛŋ wʋjɩmɩŋ kala, aŋ pɛ laa Wɩa dii a jaŋ wuo ŋaa dɩ peelee churo mʋmʋ leree dɔnsʋŋ, aŋ bɩ nɩaa cho, ʋ ŋaa wʋpɛɩ nɛ.

³ Dɩ mɩ nɛ joŋ mɩ kɩaa kala a pɩ summoo, a joŋ mɩ tɩtɩa a pɩ nɩaa dɩ ba nyɩgɛ nyiniŋ dɩ ʋ diimi kpʋ, aŋ bɩ nɩaa cho, ʋ bɩ nyʋʋrɩ kala kɛnɛ.

⁴ Dɩ ŋ nɛ cho nɩaa, ŋ jaŋ kɛŋ kenyiri ba teeŋ a kɛŋ zile ma, ŋ bɩ jaŋ kɛŋ yarɩ-bieriŋ nɩaa teeŋ, ŋ bɩ jaŋ bibigisi ŋ tɩtɩa lɛ ba teeŋ, ŋ bɩ jaŋ ŋɩŋaa sɩɩ-duoŋ ma ba lɛ.

⁵ Dɩ ŋ nɛ cho nɩaa, ŋ bɩ jaŋ ŋaa wɩaa jʋjʋʋ ba lɛ, ŋ bɩra bɩ jaŋ to ŋ tɩtɩa tʋɔtɔrʋŋ lɛ, ŋ bɩ jaŋ leŋ dɩ ŋ baanɩŋ sisii lɩma lɩma, ŋ bɩra bɩ jaŋ laa wɩaa hɩhɛ ŋ tʋɔŋ.

⁶ Dɩ ŋ nɛ cho nɩaa, ŋ tʋɔŋ bɩ jaŋ tɔrɛ dɩ ba nɛ ŋaa wʋbɔŋ, ama ŋ tʋɔŋ jaŋ tɔrɛ dɩ ba to wʋtɩtɩɩ.

⁷ Dɩ ŋ nɛ cho nɩaa, ŋ jaŋ kɛŋ nyalɩma wɩɩkala lɛ, a laaba dii, a kɛŋ yɩɛlaa, a kɛŋ nyʋa-mɛrɛ.

⁸ Chonuŋ-na bɩ dɛrɛ. Dol-la Wɩa Dɩŋ-zɔmʋŋ sɩ joŋo pɩla la wuo bʋbʋl Wɩa wɩaa, a wuo bʋbʋl yikori dosunuŋ kala a pɛ wʋjɩmɩŋ ma lɛ, ba kala jaŋ lɛl.

⁹ Wʋjɩmɩɩ-la la sɩ kɛnɛ, arɩ dol-la Wɩa Dɩŋ-zɔŋ-la sɩ joŋo pɩla la bʋbʋl Wɩa wɩaa bɩ suo.

¹⁰ Ama dɩ kʋ-la sɩ ŋaa kʋ-piliŋ nɛ kɔ, kʋ-la sɩ gbɔbɔ jaŋ lɛl.

¹¹ Mɩ fa sɩ ŋaa hambie, mɩ bʋl hambii wɩaa nɛ, a bɩɩnɛ wɩaa ma a nagɛ hambie, a fa ŋɩŋaa wɩaa a nagɛ hambie. Ama mɩ sɩ kʋ waa dɛrɛ, mɩ joŋ hambii wɩalɩŋ ta nɛ.

¹² Lɛɛlɛ la sɩ hɛ dʋnɩa deeŋ lɛ, ʋ naga laa beŋ Kirisito liigu liigu nɛ, a nagɛ nɩaa sɩ beŋ beenantɩrɛ lɛ a na kʋa liigu. La bɩ Kirisito chaasa nɩna woruŋ, ama maachie la sɩaa jaŋ na dɔŋɔ. Lɛɛlɛ mɩ jɩmʋ mʋa nɛ, ama maachie mɩ jaŋ chaasa jɩmʋ woruŋ, arɩ Wɩa sɩ jɩmmɛ ŋɩɩ.

¹³ Ŋɩɩ-na wɩɩ-la dɩdɛrɩŋ, wɩaa batori nɛ hɛ nɩmɛ. Ba nɛ ŋ-la: Wɩa laa diiniŋ, yɩɛlaa arɩ chonuŋ. Ama wɩaa deemba batorumuŋ tʋɔŋ ba sɩɩfɩaŋ wɩɩŋ nɛ, chonuŋ.